নতুন দিল্লীত খাদ্য আৰু ৰাজহুৱা বিতৰণ বিভাগ (DFPD) আৰু ভাৰতীয় খাদ্য নিগমৰ (FCI) মাজত ২০২৬-২৭ বিত্তীয় বৰ্ষৰ বাবে এখন বুজাবুজিৰ চুক্তি স্বাক্ষৰিত হয়। খাদ্যশস্য ব্যৱস্থাপনাত পৰিচালনাগত দক্ষতা বৃদ্ধি কৰা, উত্তৰদায়িত্ব সুদৃঢ় কৰা আৰু আধুনিকীকৰণ তৰান্বিত কৰাৰ উদ্দেশ্যে নিৰ্ধাৰিত লক্ষ্যৰে সৈতে এই বুজাবুজিৰ চুক্তিয়ে এফচিআইৰ বাবে এক বিস্তৃত কাৰ্যসম্পাদনৰ গাঁথনি নিৰ্ধাৰণ কৰিছে।

এই বুজাবুজিৰ চুক্তিয়ে ভঁৰালৰ লোকচান হ্ৰাস কৰা, সংৰক্ষণ ক্ষমতাৰ সৰ্বোত্তম ব্যৱহাৰ কৰা, লজিষ্টিকছ আৰু যোগান শৃংখল ব্যৱস্থাপনাৰ উন্নতি সাধন কৰা, আৰু মান নিয়ন্ত্ৰণ ব্যৱস্থাসমূহ সুদৃঢ় কৰাৰ দৰে গুৰুত্বপূৰ্ণ দিশসমূহৰ ওপৰত গুৰুত্ব আৰোপ কৰিছে। এফচিআইৰ কাম-কাজৰ দক্ষতা, স্বচ্ছতা আৰু নিৰীক্ষণ ব্যৱস্থা উন্নত কৰিবলৈ ব্যৱসায়িক প্ৰক্ৰিয়াসমূহৰ অধিক ডিজিটেলাইজেচন আৰু আধুনিক তথ্য প্ৰযুক্তিৰ ব্যৱস্থা গ্ৰহণৰ ওপৰতো ই গুৰুত্ব প্ৰদান কৰিছে।

আধুনিকীকৰণ কাৰ্যসূচীৰ অংশ হিচাপে, এই বুজাবুজিৰ চুক্তিখনে এফচিআইৰ কৰ্মচাৰীসকলৰ বাবে সামৰ্থ্য বৃদ্ধি আৰু দক্ষতা বিকাশৰ পদক্ষেপসমূহৰ ব্যৱস্থা কৰিছে, যাতে সংস্থাটোৱে খাদ্যশস্য ব্যৱস্থাপনাৰ নতুন প্ৰযুক্তি আৰু সমসাময়িক ব্যৱস্থাসমূহ ফলপ্ৰসূভাৱে গ্ৰহণ কৰিব পাৰে।

১৯৬৪ চনৰ খাদ্য নিগম আইনৰ অধীনত ১৯৬৫ চনত প্ৰতিষ্ঠা হোৱা এফচিআয়ে ভাৰত চৰকাৰৰ হৈ খাদ্যশস্য ক্ৰয়, সংৰক্ষণ, পৰিবহণ আৰু বিতৰণৰ দায়িত্ব গ্ৰহণ কৰি দেশৰ খাদ্য নিৰাপত্তা বজাই ৰখাৰ ক্ষেত্ৰত এক গুৰুত্বপূৰ্ণ ভূমিকা পালন কৰে। ইয়াৰ কাম-কাজত জড়িত হৈ থকা বৃহৎ পৰিমাণৰ ৰাজহুৱা সম্পদলৈ লক্ষ্য ৰাখি, খাদ্য ৰাজসাহায্যৰ ফলপ্ৰসূ ব্যৱহাৰ আৰু পৰিচালনা প্ৰক্ৰিয়াসমূহৰ নিৰন্তৰ উন্নতি সাধন কৰাটোৱেই হৈছে ইয়াৰ মূল অগ্ৰাধিকাৰ।

এই বুজাবুজিৰ চুক্তিখনে এফচিআইৰ কাৰ্যসম্পাদনক স্পষ্টভাৱে নিৰ্ধাৰিত বাৰ্ষিক মাপকাঠীৰ সৈতে সংযোগ কৰি ইয়াৰ কাম-কাজত এক জোখ-মাখ কৰিব পৰা আৰু ফলাফলমুখী দৃষ্টিভংগীৰ সূচনা কৰিছে। এই গাঁথনিটোৰ উদ্দেশ্য হৈছে সম্পদৰ ব্যৱহাৰত অধিক দক্ষতা বৃদ্ধি কৰা, কাম-কাজত স্বচ্ছতা সুদৃঢ় কৰা আৰু সমগ্ৰ সংস্থাটোত প্ৰযুক্তি-নিৰ্ভৰ সমাধানসমূহ গ্ৰহণ কৰাত উৎসাহিত কৰা।

বুজাবুজিৰ চুক্তিৰ লক্ষ্যসমূহৰ এটা অংশক, ডিপোৰ আন্তঃগাঁথনি আৰু পৰিচালনাগত দক্ষতা মূল্যায়ন কৰাৰ বাবে থকা এক ৱেব-ভিত্তিক প্লেটফৰ্ম 'ডিপো দৰ্পণ পৰ্টেল'ৰ জৰিয়তে এফচিআইৰ ডিপোসমূহৰ কাৰ্যসম্পাদনৰ সৈতে সংযোগ কৰা হৈছে। এফচিআইৰ সমগ্ৰ ডিপোসমূহৰ ভৌতিক আন্তঃগাঁথনি সুদৃঢ় কৰিবলৈ, পৰিচালনাগত কাৰ্যসম্পাদন উন্নত কৰিবলৈ আৰু নিৰন্তৰ উন্নতি সাধনক উৎসাহিত কৰিবলৈ ফলাফল আৰু লক্ষ্য-ভিত্তিক মাপকাঠীসমূহ অন্তৰ্ভুক্ত কৰা হৈছে।

এই বুজাবুজিৰ চুক্তি স্বাক্ষৰিত হোৱাই খাদ্যশস্য ব্যৱস্থাপনা প্ৰণালীৰ আধুনিকীকৰণ কৰা আৰু দেশৰ খাদ্য নিৰাপত্তা গাঁথনিৰ দক্ষতা আৰু দৃঢ়তা বৃদ্ধি কৰাৰ প্ৰতি চৰকাৰৰ নিৰন্তৰ দায়বদ্ধতাক প্ৰতিফলিত কৰে। এই কাৰ্যসম্পাদন-ভিত্তিক গাঁথনিৰ জৰিয়তে, ডিএফপিডি আৰু এফচিআয়ে খাদ্য ৰাজসাহায্যৰ সম্পদসমূহ ব্যয়-সাশ্ৰয়ী আৰু স্বচ্ছভাৱে ব্যৱহাৰ কৰাটো নিশ্চিত কৰাৰ লগতে দেশলৈ অধিক মূল্য প্ৰদান কৰাৰ ক্ষেত্ৰত তেওঁলোকৰ দায়বদ্ধতা পুনৰবাৰ দৃঢ় কৰিছে।

****

IA/RP/RD