مرکزی حکومت نے درج فہرست ذاتوں کے لیے میٹرک کے بعد وظائف اور درج فہرست ذاتوں و دیگر طبقات کے لیے میٹرک سے قبل وظائف کی مرکزی امداد یافتہ اسکیموں کی فراہمی، نگرانی اور جواب دہی کے نظام کو مزید مضبوط کیا ہے۔ ان اسکیموں سے ملک بھر کے تسلیم شدہ اداروں میں زیر تعلیم اہل طلبہ کی مدد ہوتی ہے اوراسے ریاستی حکومتوں اور مرکز کے زیر انتظام علاقوں کی انتظامیہ کے ذریعے نافذ کیاجاتا ہے۔

وظائف کی یہ اسکیمیں کھلی نوعیت کی اور طلب پر مبنی ہیں۔  پوسٹ میٹرک اسکالرشپ اسکیم کو 2022-2021 سے براہ راست بینیفٹ ٹرانسفر (ڈی بی ٹی) کے ذریعے نافذ کیا گیا ہے ، جبکہ میٹرک سے قبل وظائف کی اسکیم میں 2023-2022 سے ڈی بی ٹی کا طریقہ اختیار کیا گیا ہے۔ اس نظام کے تحت مرکزی حصہ براہ راست اہل درخواست دہندگان کے آدھار سے منسلک بینک کھاتوں میں جاری کیا جاتا ہے ۔

مرکزی حصے کی رقم جاری کرنا ریاستوں اور مرکز کے زیر انتظام علاقوں کے ذریعے نیشنل اسکالرشپ پورٹل پر ان کے متعلقہ حصے کی ادائیگی سے متعلق ڈیٹا کی ترسیل سے منسلک ہے ۔ یہ ڈیجیٹل عمل اسکالرشپ کی درخواستوں اور تقسیم کی مرکز اور ریاستی سطح کی نگرانی کو ممکن بناتا ہے ، بروقت فراہمی کو فروغ دیتا ہے اور رقوم  میں خرد برد  یا غلط استعمال کی گنجائش کو کم کرتا ہے ۔

نفاذ سے متعلق شکایات یا نمائندگیوں کو متعلقہ ریاستی حکومت یا مرکز کے زیر انتظام علاقے کی انتظامیہ ، جو عمل درآمد کرنے والی ایجنسی ہے ، کو قابل اطلاق طریقہ کار کے تحت جانچ اور اصلاحی کارروائی کے لیے فوری طور پر بھیج دیا جاتا ہے ۔ جہاں بھی ضرورت ہو متعلقہ حکام مناسب انتظامی کارروائی کرتے ہیں ۔

اصلاح شدہ نظام میں جامع جوابدہی، مسلسل نگرانی اور شفافیت پر زور دیا گیا ہے ۔ قومی ، علاقائی اور ریاستی سطحوں پر میٹنگوں کے ساتھ ساتھ فیلڈ وزٹ کے ذریعے وقتا فوقتا نفاذ کا جائزہ لیا جاتا ہے ۔ اسکیم کی کارکردگی کا جائزہ لینے کے لیے مرکزی اور ریاستی وزراء ، سینئر افسران اور مرکز اور ریاستوں کے دیگر عہدیداروں کی شرکت کے ساتھ قومی کانفرنسوں اور چنتن شوروں کا بھی انعقاد کیا جاتا ہے ۔

ڈی بی ٹی ، آدھار سے بینک کھاتوں کو منسلک کرنا ، پورٹل پر مبنی ڈیٹا کا تبادلہ اور باقاعدہ جائزے مل کر منظوری سے لے کر رسید تک ایک ٹریس ایبل ڈیلیوری چین بناتے ہیں ۔ ان اقدامات کا مقصد اس بات کو یقینی بنانا ہے کہ اسکالرشپ کی امداد اہل طلباء تک براہ راست پہنچے اور بغیر کسی تاخیر کے ان کی مسلسل تعلیم میں مدد کرے ۔

سماجی انصاف اور تفویض اختیارات کی وزارت شفاف ، ٹیکنالوجی سے چلنے والے اور جوابدہ اسکالرشپ کی فراہمی کے نظام کے ذریعے پسماندہ طبقات کے طلبا کے لئے تعلیمی رسائی کو مضبوط کرنے کے لئے پرعزم ہے ۔

مزید معلومات کے لیے ملاحظہ کریں:https://socialjustice.gov.in/schemes/23

***

ش ح۔ ک ا۔ ع د

U.NO.3104