પ્રધાનમંત્રી નરેન્દ્ર મોદીએ ગઈકાલે લોક કલ્યાણ માર્ગ પર તેમના નિવાસસ્થાને રાષ્ટ્રીય શિક્ષક પુરસ્કાર મેળવનારાઓ સાથે વાતચીત કરી હતી.

આ વર્ષે ત્રણ વિભાગોના 82 શિક્ષકો અને શિક્ષણવિદોને રાષ્ટ્રીય શિક્ષક પુરસ્કાર માટે પસંદ કરવામાં આવ્યા છે. આમાં શાળા શિક્ષણ અને સાક્ષરતા વિભાગના 48 શિક્ષકો, ઉચ્ચ શિક્ષણ સંસ્થાઓ અને પોલિટેકનિકના 21 શિક્ષકો/ફેકલ્ટી સભ્યો અને કૌશલ્ય વિકાસ અને ઉદ્યોગસાહસિકતા મંત્રાલયના 13 કૌશલ્ય પ્રશિક્ષકોનો સમાવેશ થાય છે. પુરસ્કાર વિજેતાઓએ તેમના શિક્ષણ પ્રવાસને આકાર આપનારા અનુભવો અને નવીન વિચારસરણી શેર કરી હતી. તેમણે વર્ગખંડમાં શિક્ષણ પ્રક્રિયાને વધુ આકર્ષક અને અસરકારક બનાવવા માટે અપનાવવામાં આવેલી વિવિધ સર્જનાત્મક પદ્ધતિઓનું પણ વર્ણન કર્યું હતું.

પ્રધાનમંત્રીએ ભાર મૂક્યો કે શિક્ષકોએ બાળકોના શૈક્ષણિક પ્રદર્શનથી આગળ વધીને તેમના વર્તન અને રોજિંદા જીવન પર ધ્યાન કેન્દ્રિત કરવું જોઈએ. પરંપરાગત સંયુક્ત પરિવાર પ્રણાલીના પતનનો ઉલ્લેખ કરતા, તેમણે કહ્યું કે બાળકોના જીવનમાં શિક્ષકોની ભૂમિકા વધુ મહત્વપૂર્ણ બની ગઈ છે. ડ્રગ્સની સમસ્યાનો ઉલ્લેખ કરતા, પ્રધાનમંત્રીએ શિક્ષકોને બાળકોમાં થઈ રહેલા ફેરફારો પ્રત્યે સતર્ક રહેવા, તેની પાછળના કારણો શોધવા અને આવા બાળકોને આ વ્યસનમાંથી બહાર નીકળવામાં મદદ કરવા કહ્યું હતું.

પ્રધાનમંત્રીએ કહ્યું કે બાળપણની નિર્દોષતા જાળવી રાખવી એ શિક્ષકોની મહત્વપૂર્ણ ભૂમિકા છે. તેમણે કહ્યું કે બાળકોમાં મૂળભૂત સ્વભાવ અને જિજ્ઞાસા હોય છે, અને જો શિક્ષકો આ જિજ્ઞાસાને દિશામાન કરે અને તેનું પોષણ કરે, તો તેઓ બાળકોના વિકાસમાં મહત્વપૂર્ણ યોગદાન આપી શકે છે.

સ્ક્રીન સમયના મુદ્દા વિશે વાત કરતા, તેમણે કહ્યું કે તે એક મોટી ચિંતા બની ગઈ છે. તેમણે શિક્ષકોને આગ્રહ કર્યો કે તેઓ માતાપિતા સાથે ચર્ચા કરે કે તેમના બાળકો સ્ક્રીન પર કેટલો સમય વિતાવે છે અને શું તેઓ મોડી રાત સુધી મોબાઇલ ફોનનો ઉપયોગ કરે છે. તેમણે સૂચન કર્યું કે બાળકો રમતગમત, શારીરિક પ્રવૃત્તિઓ અને સર્જનાત્મક પ્રવૃત્તિઓમાં રસ કેળવીને સ્ક્રીનના વધુ પડતા ઉપયોગની આદતને ધીમે ધીમે દૂર કરી શકે છે.

રાષ્ટ્રીય શિક્ષણ નીતિનો ઉલ્લેખ કરતા, પ્રધાનમંત્રીએ વર્ગખંડની બહાર બાળકોને જોડવા અને તેમને વાસ્તવિક દુનિયાની કુશળતા અને કાર્ય પદ્ધતિઓ સાથે જોડવાના મહત્વ પર ભાર મૂક્યો હતો. તેમણે શિક્ષકોને પણ આગ્રહ કર્યો કે તેઓ ફક્ત અભ્યાસક્રમની માહિતી આપવા સુધી મર્યાદિત ન રહે, પરંતુ બાળકોને સખત મહેનત માટે આદર જેવા મૂલ્યો વિકસાવવામાં પણ મદદ કરે.

SM/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad