زراعت و کسانوں کی بہبود اور دیہی ترقی کے مرکزی وزیر جناب شیوراج سنگھ چوہان نے آج نئی دہلی کے کرشی بھون میں پردھان منتری دھن دھانیہ کرشی یوجنا (پی ایم-ڈی ڈی کے وائی) کی پیش رفت کا جائزہ لیا۔ جائزے کے دوران 100 منتخب اضلاع میں اسکیم کے نفاذ میں تیزی لانے، مختلف اسکیموں کے درمیان بہتر تال میل پیدا کرنے، ضلعی سطح پر کارکردگی کو بہتر بنانے اور اس بات کو یقینی بنانے پر توجہ مرکوز کی گئی کہ اسکیم کے تحت کیے جانے والے اقدامات سودمند نتائج اور کسانوں کے لیے ٹھوس فوائد میں تبدیل ہوں۔

جائزے کے دوران وزیر موصوف کو اسکیم کے ڈیش بورڈ کے ذریعے پردھان منتری دھن دھانیا کرشی یوجنا کی پیش رفت سے آگاہ کیا گیا۔ اس میں اضلاع کے لحاظ سے کارکردگی، ضلعی ایکشن پلان، مرکزی نوڈل افسران (سی این اوز) کی جانب سے فیلڈ مانیٹرنگ، مالی پیش رفت، صلاحیت سازی، مختلف اسکیموں کے درمیان تال میل اور مستفیدین کی سطح پر نتائج کا جائزہ لینے کے لیے تیار کیے جانے والے طریقۂ کار سے متعلق معلومات شامل تھیں۔

100 اضلاع کی اعداد و شمار پر مبنی نگرانی

پردھان منتری دھن دھانیہ کرشی یوجنا (پی ایم-ڈی ڈی کے وائی) کا مقصد کم زرعی پیداوار، فصل کی کم پیداوار اور زرعی قرضوں کی کم تقسیم کی بنیاد پر منتخب کیے گئے 100 اضلاع میں زرعی ترقی کو تیز کرنا ہے۔

اس اسکیم کے تحت چھ اہم مقاصد پر توجہ مرکوز کی گئی ہے: زرعی پیداوار میں اضافہ؛ فصلوں میں تنوع اور پائیدار زرعی طریقوں کو فروغ دینا؛ کٹائی کے بعد ذخیرہ کرنے کی صلاحیت میں اضافہ؛ آبپاشی کے بنیادی ڈھانچے کو بہتر بنانا؛ قلیل مدتی اور طویل مدتی زرعی قرضوں تک زیادہ رسائی کو یقینی بنانا؛ اور حکمرانی اور خدمات کی فراہمی کو بہتر بنانا۔

اس اسکیم کو 11 وزارتوں اور محکموں کی 36 مرکزی اسکیموں کے درمیان تال میل کے ذریعے نافذ کیا جا رہا ہے۔ اس میں ریاستی حکومتوں کی اسکیموں اور نجی شعبے کی شراکت کو بھی شامل کیا گیا ہے۔

36 اسکیموں کے تحت سالانہ اہداف کے مقابلے میں پیش رفت کی نگرانی کے لیے مجموعی طور پر 121 اشاریوں کی نشاندہی کی گئی ہے، جن میں 74 آؤٹ پٹ اشاریے اور 47 نتائج کے اشاریے شامل ہیں۔ آؤٹ پٹ اشاریوں کی بنیاد پر اضلاع کی کارکردگی کی ہر ماہ پی ایم-ڈی ڈی کے وائی ڈیش بورڈ کے ذریعے درجہ بندی کی جاتی ہے، جبکہ نتائج کے اشاریے بنیادی سطح کے اعداد و شمار کے مقابلے میں پیش رفت کا جائزہ لینے میں مدد دیں گے۔

چھ اہم مقاصد کے حوالے سے 100 اضلاع کا اوسط اسکور اپریل 2026 میں 22.54 سے بڑھ کر جولائی 2026 میں 38.85 ہو گیا، جو 16.31 پوائنٹس کی بہتری کو ظاہر کرتا ہے۔

اس مدت کے دوران تمام مقاصد کے لحاظ سے بھی کارکردگی میں بہتری ریکارڈ کی گئی۔ زرعی پیداوار کا اوسط اسکور اپریل میں 2.53 سے بڑھ کر جولائی میں 6.70 ہو گیا؛ فصلوں میں تنوع اور پائیدار زرعی طریقوں کا اسکور 5.60 سے بڑھ کر 8.65؛ کاشت کے بعد ذخیرہ کرنے کی صلاحیت کا اسکور 2.61 سے بڑھ کر 3.82؛ آبپاشی کے بنیادی ڈھانچے کا اسکور 1.65 سے بڑھ کر 4.20؛ زرعی قرضوں تک رسائی کا اسکور 2.81 سے بڑھ کر 5.59؛ جبکہ حکمرانی اور خدمات کی فراہمی کا اسکور 7.94 سے بڑھ کر 10.33 ہو گیا۔

تمام 100 اضلاع نے ضلعی ایکشن پلان اپ لوڈ کر دیے

جائزے کے دوران بتایا گیا کہ تمام 100 اضلاع نے اپنے ضلعی ایکشن پلان (ڈی اے پی) اپ لوڈ کر دیے ہیں اور تمام 100 اضلاع کے ایکشن پلان پر رائے اور تجاویز بھی فراہم کی جا چکی ہیں۔

تمام 100 اضلاع نے جولائی 2026 تک آؤٹ پٹ اشاریوں کے حوالے سے اعداد و شمار پیش کر دیے ہیں، جبکہ تمام 100 اضلاع نے مالی سال 2025-26 کے لیے نتائج کے اشاریوں سے متعلق اعداد و شمار بھی جمع کرا دیے ہیں۔

جائزے اور نگرانی کے لیے ریاستی، ضلعی اور قومی سطح پر کمیٹیاں تشکیل دی گئی ہیں۔ مرکزی نوڈل افسران بھی اسکیم کے نفاذ کی باقاعدگی سے زمینی سطح پر نگرانی کر رہے ہیں۔

نتائج اور کسانوں تک فوائد کی رسائی پر توجہ

جائزے کے دوران اس بات پر زور دیا گیا کہ نگرانی کے نظام کو مزید مضبوط بنایا جائے تاکہ صرف سرگرمیوں اور اخراجات کی نگرانی تک محدود رہنے کے بجائے حاصل ہونے والے نتائج اور کسانوں تک پہنچنے والے حقیقی فوائد کی پیمائش پر توجہ مرکوز کی جا سکے۔

پی ایم-ڈی ڈی کے وائی ڈیش بورڈ کا مالی پیش رفت ماڈیول 31 اگست 2026 کو نافذ کر دیا گیا ہے۔ مستفیدین کی پیش رفت کا ماڈیول ستمبر 2026 کے وسط تک نافذ کرنے کا ہدف مقرر کیا گیا ہے، جس سے مستفیدین کی سطح پر پیش رفت کو منظم انداز میں ریکارڈ کرنا ممکن ہو سکے گا۔

مزید مضبوط بنایا گیا ڈیش بورڈ دھن دھانیا اضلاع میں مرکزی اسکیموں، ریاستی اسکیموں اور دیگر ذرائع کے ذریعے کیے جانے والے سرمایہ کاری اور اقدامات کو یکجا کرنے میں بھی معاون ثابت ہوگا۔

اس سے نشانزد اضلاع میں دستیاب وسائل کے استعمال، کیے گئے اقدامات، مستفید ہونے والے کسانوں اور حاصل ہونے والے نتائج کا جامع جائزہ لینے میں مدد ملے گی۔

کسانوں اور زرعی کارکنوں کی تربیت و استعداد میں اضافہ

پی ایم-ڈی ڈی کے وائی کے نفاذ میں صلاحیت سازی ایک اہم جزو ہے۔ جنوری سے جولائی 2026 کے دوران مجموعی طور پر 6,90,530 کسانوں اور 88,961  زرعی کارکنوں کو مختلف مہارتوں کی تربیت دی گئی۔

اس کے علاوہ، اس عرصے کے دوران 2,20,683 کسانوں اور کارکنوں کو قدرتی کھیتی باڑی کی تربیت بھی فراہم کی گئی۔

زرعی توسیعی نظام کو مضبوط بنانے اور کسانوں میں جدید اور بہتر زرعی طریقوں کو فروغ دینے کے لیے کرشی وگیان کیندروں (کے وی کے) کو صلاحیت سازی اور زمینی سطح پر اقدامات کے لیے تکنیکی شراکت دار کے طور پر استعمال کیا جا رہا ہے۔

تال میل اور شراکت داری کو مضبوط بنانا

جائزے کے دوران 11 وزارتوں اور محکموں کی 36 مرکزی اسکیموں، ریاستی اسکیموں اور نجی شعبے کے اقدامات کے درمیان باہمی تال میل کو مزید مضبوط بنانے پر بھی توجہ مرکوز کی گئی۔

سرکاری کاروباری اداروں  کے محکمہ نے مرکزی سرکاری شعبے کے اداروں (سی پی ایس ایز) کی جانب سے مالی سال 2026-27 اور 2027-28 کے لیے کارپوریٹ سماجی ذمہ داری (سی ایس آر) کی سرگرمیوں کے تحت پی ایم-ڈی ڈی کے وائی کے اضلاع کو اپنانے کا کام شروع کیا ہے۔ اس سے نشانزد اضلاع میں ترقیاتی اقدامات کی معاونت کے لیے ایک اضافی راستہ فراہم ہوگا۔

اس طرح کے باہمی تال میل اور سرمایہ کاری کو ریکارڈ کرنے کے لیے نگرانی کے نظام کو مزید مضبوط بنایا جا رہا ہے، جس سے دھن دھنیا اضلاع میں نافذ کیے جانے والے مختلف اقدامات کے مجموعی اثرات کا جائزہ لینا ممکن ہو سکے گا۔

پی ایم-ڈی ڈی کے وائی کو اکتوبر میں ایک سال مکمل ہوگا

پی ایم-ڈی ڈی کے وائی کو مرکزی کابینہ نے 16 جولائی 2025 کو منظوری دی تھی اور معزز وزیر اعظم نے 11 اکتوبر 2025 کو اس کا باضابطہ آغاز کیا تھا۔ پی ایم-ڈی ڈی کے وائی ڈیش بورڈ کو اکتوبر 2025 کے آخری ہفتے میں فعال کیا گیا، جبکہ آؤٹ پٹ اشاریوں کی بنیاد پر ماہانہ درجہ بندی کا آغاز نومبر 2025 سے ہوا۔

اکتوبر 2026 میں اسکیم کے پہلے سال کی تکمیل کے موقع پر 100 دھن دھانیہ اضلاع کی پیش رفت اور کارکردگی کو اجاگر کرنے کے لیے ایک پروگرام منعقد کرنے کی منصوبہ بندی کی جا رہی ہے۔ ربیع اور علاقائی کانفرنسوں کے دوران بھی ان اضلاع کی پیش رفت کو نمایاں کیا جائے گا۔

جائزے کے دوران زراعت کے مرکزی وزیر کی صدارت میں قومی ایگزیکٹو کمیٹی کا اجلاس بلانے اور ہر ضلع کی دھن دھانیا کمیٹی میں دو ترقی پسند کسانوں کو نامزد کرکے کسانوں کی شمولیت کو مزید مضبوط بنانے کی تجویز پر بھی غور کیا گیا۔

********

ش ح۔ ع ح  ۔رض

U-2915