ভাৰতীয় গণসংযোগ প্ৰতিষ্ঠান (আইআইএমচিয়ে) আজি ভাৰতীয় তথ্য সেৱা (আইআইএছ)-ৰ ‘এ’ শ্ৰেণীৰ বিষয়া প্ৰশিক্ষাৰ্থীসকলৰ ২০০৯, ২০২৩ আৰু ২০২৪ বেটচক সামৰি বিদায়ী অনুষ্ঠান আৰু স্নাতক সমাৱৰ্তন অনুষ্ঠান আয়োজন কৰে।

ডিমড বিশ্ববিদ্যালয় হিচাপে স্বীকৃতি লাভ কৰাৰ পাছত প্ৰথমবাৰৰ বাবে আইআইএমচিয়ে আইআইএছৰ বিষয়া প্ৰশিক্ষাৰ্থীসকলক স্নাতকোত্তৰ ডিগ্ৰী প্ৰদান কৰাৰ ফলত এই অনুষ্ঠানটো আইআইএমচি আৰু ভাৰতীয় তথ্য সেৱাৰ বাবে এক ঐতিহাসিক মাইলৰ খুঁটি হিচাপে চিহ্নিত হয়।

নিৰ্ধাৰিত শৈক্ষিক আৰু পেছাগত প্ৰয়োজনীয়তা সফলতাৰে সম্পূৰ্ণ কৰাৰ পাছত বিষয়া প্ৰশিক্ষাৰ্থীসকলক জনসংযোগ আৰু শাসন ব্যৱস্থা বিষয়ত এমএ ডিগ্ৰী প্ৰদান কৰা হয়। এমএ কাৰ্যসূচীৰ প্ৰৱৰ্তনে আইআইএছৰ পেছাগত প্ৰশিক্ষণত শৈক্ষিক দিশটো অধিক শক্তিশালী কৰাৰ লগতে জনসংযোগ, সংবাদ মাধ্যম আৰু শাসন ব্যৱস্থাৰ অধ্যয়নক একত্ৰিত কৰাৰ ক্ষেত্ৰত এক গুৰুত্বপূৰ্ণ পদক্ষেপ হিচাপে পৰিগণিত হৈছে।

বিদায়ী অনুষ্ঠানত তথ্য আৰু সম্প্ৰচাৰ মন্ত্ৰালয়ৰ সচিব শ্ৰী চঞ্চল কুমাৰে কয় যে জনসাধাৰণৰ সৈতে যোগাযোগ শাসন ব্যৱস্থাৰ এক অবিচ্ছেদ্য অংগ আৰু পৰিৱৰ্তনশীল প্ৰযুক্তি তথা বিভিন্ন মঞ্চৰ সৈতে সংগতি ৰাখি ইয়াৰো বিকাশ ঘটিব লাগিব। তেওঁ কয় যে বিষয়াসকলে নতুন নতুন প্ৰযুক্তিৰ বিষয়ে সদা সজাগ হৈ থাকিব লাগিব। কৃত্ৰিম বুদ্ধিমত্তাই এক নতুন পৰিৱৰ্তনকাৰী শক্তি হিচাপে আত্মপ্ৰকাশ কৰাৰ সময়তে ভুল তথ্য, ডিপফেক আৰু কৃত্ৰিমভাৱে সৃষ্টি কৰা সমলৰ দৰে নতুন প্ৰত্যাহ্বানেও দেখা দিছে।

তেওঁ গুৰুত্ব আৰোপ কৰি কয় যে যোগাযোগ এক দুমুখীয়া প্ৰক্ৰিয়া হ’ব লাগিব আৰু নাগৰিকৰ মতামতে নীতি আৰু ইয়াৰ ৰূপায়ণ উন্নত কৰাত সহায় কৰিব পাৰে। তেওঁ কয় যে দ্ৰুততা গুৰুত্বপূৰ্ণ যদিও সঠিকতা আৰু বিশ্বাসযোগ্যতাৰ ক্ষেত্ৰত কোনো আপোচ কৰিব নোৱাৰি, কিয়নো প্ৰতিটো যোগাযোগতে প্ৰতিষ্ঠানটোৰ কৰ্তৃত্ব প্ৰতিফলিত হয়।

তেওঁ লগতে কয় যে বিষয়াসকলে নিৰন্তৰভাৱে নিজৰ দক্ষতা উন্নত কৰি থাকিব লাগিব, ক্ষেত্ৰ পৰ্যায়ৰ সৈতে সংযোগ বজাই ৰাখিব লাগিব আৰু যোগাযোগৰ বাহিৰেও যেতিয়া শাসন ব্যৱস্থাৰ আন দায়িত্ব অৰ্পণ কৰা হয়, তেতিয়া সেই দায়িত্ব গ্ৰহণ আৰু ইয়াৰ বিভিন্ন দিশ বুজি পোৱাৰ বাবে সাজু থাকিব লাগিব। তেওঁ কয় যে সৰ্বোপৰি নাগৰিকসকলেই সকলো কামৰ কেন্দ্ৰবিন্দু হৈ থাকিব লাগিব আৰু বিষয়াসকলে সদায় এই প্ৰশ্ন উত্থাপন কৰিব লাগিব যে তেওঁলোকৰ কামে জনসাধাৰণক, বিশেষকৈ সমাজৰ আটাইতকৈ দৰিদ্ৰ লোকসকলক সহায় কৰিছে নে নাই। যদি সহায় কৰা নাই, তেন্তে তেওঁলোকে নিজৰ পন্থা পুনৰ বিবেচনা কৰি নতুন পৰিকল্পনা গ্ৰহণ কৰিব লাগিব আৰু সদায় জনসাধাৰণৰ সমস্যাসমূহ সহমৰ্মিতাৰে উপলব্ধি কৰি তেওঁলোকক সহায় কৰাৰ দিশত কাম কৰিব লাগিব।

অনুষ্ঠানত আইআইএমচিৰ উপাচাৰ্য ড০ প্ৰজ্ঞা পালিৱাল গৌৰে কয় যে বিষয়া প্ৰশিক্ষাৰ্থীসকল এই স্নাতকোত্তৰ ডিগ্ৰীৰ প্ৰথম গৰাকী প্ৰাপক, যিয়ে আইআইএমচিৰ শৈক্ষিক ভূমিকা শক্তিশালী হোৱাৰ লগতে যোগাযোগৰ ক্ষেত্ৰত পেছাগত প্ৰশিক্ষণৰ সৈতে ইয়াৰ ঘনিষ্ঠ সম্পৰ্ক প্ৰতিফলিত কৰে। তেওঁ কয় যে যোগাযোগৰ উদ্দেশ্য কেৱল তথ্য প্ৰেৰণ কৰা নহয়, বৰং বুজাবুজি সৃষ্টি কৰা আৰু বিষয়া প্ৰশিক্ষাৰ্থীসকলে স্পষ্টতা, বস্তুনিষ্ঠতা আৰু সংবেদনশীলতাৰে নিজৰ দায়িত্ব পালন কৰিব লাগিব। তেওঁ লগতে কয় যে এই এমএ ডিগ্ৰীয়ে সদায় পৰিৱৰ্তিত হৈ থকা এই ক্ষেত্ৰখনত নিৰন্তৰ শিক্ষাগ্ৰহণৰ গুৰুত্বৰ কথাও সোঁৱৰাই দিয়ে।

অনুষ্ঠানত তথ্য আৰু সম্প্ৰচাৰ মন্ত্ৰালয়ৰ অতিৰিক্ত সচিব শ্ৰী প্ৰভাত, তথ্য আৰু সম্প্ৰচাৰ মন্ত্ৰালয়ৰ যুটীয়া সচিব শ্ৰী কেকে নিৰালা, প্ৰশিক্ষণৰ সঞ্চালক প্ৰধান শ্ৰী এল মধু নাগ, জ্যেষ্ঠ বিষয়াসকল, শিক্ষক-শিক্ষয়িত্ৰী আৰু বিষয়া প্ৰশিক্ষাৰ্থীসকল উপস্থিত থাকে।

*****

Mahesh Kumar/ Aparajita Priyadarshini/AA