ਕੇਂਦਰੀ ਵਾਤਾਵਰਣ, ਜੰਗਲਾਤ ਅਤੇ ਜਲਵਾਯੂ ਪਰਿਵਰਤਨ ਮੰਤਰੀ ਸ਼੍ਰੀ ਭੂਪੇਂਦਰ ਯਾਦਵ, ਜਰਮਨੀ ਦੇ ਵਾਤਾਵਰਣ, ਜਲਵਾਯੂ ਸੁਰੱਖਿਆ, ਕੁਦਰਤ ਸੰਭਾਲ ਅਤੇ ਪ੍ਰਮਾਣੂ ਸੁਰੱਖਿਆ ਮੰਤਰੀ ਕਾਰਸਟੇਨ ਸ਼ਨਾਈਡਰ ਦੇ ਨਾਲ, 1 ਸਤੰਬਰ 2026 ਨੂੰ ਨਵੀਂ ਦਿੱਲੀ ਵਿੱਚ 'ਟੂਗੇਦਰ ਫਾਰ ਏ ਗ੍ਰੇਟਰ ਕਲਾਈਮੇਟ ਰੈਜ਼ੀਲੈਂਟ' ਵਿਸ਼ੇ 'ਤੇ ਚੌਥੇ ਇੰਡੋ-ਜਰਮਨ ਵਾਤਾਵਰਣ ਫੋਰਮ ਦੀ ਸਹਿ-ਪ੍ਰਧਾਨਗੀ ਕਰਨਗੇ।

ਇਹ ਫੋਰਮ ਭਾਰਤ ਅਤੇ ਜਰਮਨੀ ਵਿਚਕਾਰ ਵਾਤਾਵਰਣ ਨੀਤੀ 'ਤੇ ਸਭ ਤੋਂ ਉੱਚਾ ਦੁਵੱਲਾ ਪਲੈਟਫਾਰਮ ਹੈ ਅਤੇ 2008 ਤੋਂ ਇਸਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਹ ਕੇਂਦਰੀ ਵਾਤਾਵਰਣ, ਜੰਗਲਾਤ ਅਤੇ ਜਲਵਾਯੂ ਪਰਿਵਰਤਨ ਮੰਤਰਾਲੇ ਅਤੇ ਜਰਮਨੀ ਦੇ ਵਾਤਾਵਰਣ, ਜਲਵਾਯੂ ਸੁਰੱਖਿਆ, ਕੁਦਰਤ ਸੰਭਾਲ ਅਤੇ ਪ੍ਰਮਾਣੂ ਸੁਰੱਖਿਆ ਮੰਤਰਾਲੇ ਦੁਆਰਾ ਜਰਮਨ ਏਸ਼ੀਆ-ਪ੍ਰਸ਼ਾਂਤ ਵਪਾਰ ਕਮੇਟੀ ਅਤੇ ਭਾਰਤੀ ਉਦਯੋਗ ਸੰਗਠਨਾਂ ਦੇ ਸਹਿਯੋਗ ਨਾਲ ਸਾਂਝੇ ਤੌਰ 'ਤੇ ਆਯੋਜਿਤ ਕੀਤਾ ਜਾਂਦਾ ਹੈ।

ਇਸ ਮੌਕੇ 'ਤੇ, ਸ਼੍ਰੀ ਯਾਦਵ ਅਤੇ ਸ਼੍ਰੀ ਸ਼ਨਾਈਡਰ ਵਾਤਾਵਰਣ ਸੁਰੱਖਿਆ ਅਤੇ ਜਲਵਾਯੂ ਨੀਤੀ ਨਾਲ ਸਬੰਧਿਤ ਮੁੱਖ ਮੁੱਦਿਆਂ 'ਤੇ ਚਰਚਾ ਕਰਨਗੇ, ਜਿਸ ਦਾ ਉਦੇਸ਼ ਦੁਵੱਲੇ ਸਹਿਯੋਗ ਨੂੰ ਵਧਾਉਣਾ, ਅਨੁਭਵ ਸਾਂਝੇ ਕਰਨਾ ਅਤੇ ਵਿਵਹਾਰਕ ਸਹਿਯੋਗ ਨੂੰ ਉਤਸ਼ਾਹਿਤ ਕਰਨਾ ਹੈ। ਫੋਰਮ ਵਿਖੇ ਥੀਮੈਟਿਕ ਸੈਸ਼ਨ ਘੱਟ-ਕਾਰਬਨ ਉਦਯੋਗਾਂ; ਵੈੱਟਲੈਂਡਜ਼, ਪਹਾੜਾਂ ਅਤੇ ਜੰਗਲਾਂ ਵਿੱਚ ਜੈਵ ਵਿਭਿੰਨਤਾ; ਸਰੋਤ ਕੁਸ਼ਲਤਾ ਅਤੇ ਇੱਕ ਕਾਰੋਬਾਰੀ ਮਾਡਲ ਵਜੋਂ ਸਰਕੂਲਰ ਅਰਥਵਿਵਸਥਾ ਅਤੇ ਟਿਕਾਊ ਵਿੱਤ, ਹਰਿਤ ਹੁਨਰ ਅਤੇ ਨਿਵੇਸ਼ ਗਤੀਸ਼ੀਲਤਾ ਦੇ ਖੇਤਰਾਂ ਵਿੱਚ ਚੁਣੌਤੀਆਂ, ਹੱਲ ਅਤੇ ਮੌਕਿਆਂ 'ਤੇ ਕੇਂਦ੍ਰਿਤ ਹੋਣਗੇ।

ਇਹ ਫੋਰਮ ਨੀਤੀ ਨਿਰਮਾਤਾਵਾਂ, ਨਿੱਜੀ ਖੇਤਰ ਦੇ ਪ੍ਰਤੀਨਿਧੀਆਂ, ਥਿੰਕ ਟੈਂਕਾਂ ਅਤੇ ਦੋਵਾਂ ਦੇਸ਼ਾਂ ਵਿਚਕਾਰ ਵਾਤਾਵਰਣ ਅਤੇ ਜਲਵਾਯੂ ਸਹਿਯੋਗ 'ਤੇ ਮੁੱਖ ਹਿੱਸੇਦਾਰਾਂ ਵਿਚਕਾਰ ਦੁਵੱਲੇ ਅਦਾਨ-ਪ੍ਰਦਾਨ ਲਈ ਇੱਕ ਮੁੱਖ ਪਲੈਟਫਾਰਮ ਵਜੋਂ ਕੰਮ ਕਰੇਗਾ। ਮੰਤਰਾਲਿਆਂ, ਕਾਰੋਬਾਰਾਂ, ਮਾਹਿਰ ਸਮੂਹਾਂ ਅਤੇ ਗੈਰ-ਸਰਕਾਰੀ ਸੰਗਠਨਾਂ ਦੇ ਪ੍ਰਤੀਨਿਧੀ ਫੋਰਮ ਵਿੱਚ ਹਿੱਸਾ ਲੈਣਗੇ।

ਚੌਥੇ ਇੰਡੋ-ਜਰਮਨ ਵਾਤਾਵਰਣ ਫੋਰਮ ਤੋਂ ਪਹਿਲਾਂ, ਇਸ ਸਾਲ ਜਲਵਾਯੂ ਪਰਿਵਰਤਨ, ਜੈਵ ਵਿਭਿੰਨਤਾ ਅਤੇ ਸਰਕੂਲਰ ਅਰਥਵਿਵਸਥਾ 'ਤੇ ਤਿੰਨ ਸਾਂਝੇ ਕਾਰਜ ਸਮੂਹਾਂ ਦੀ ਮੁਲਾਕਾਤ ਹੋਈ। ਸਬੰਧਿਤ ਕਾਰਜ ਸਮੂਹਾਂ ਨੇ ਅੱਜ ਤੱਕ ਦੀ ਪ੍ਰਗਤੀ ਅਤੇ ਆਪਸੀ ਹਿੱਤ ਦੇ ਖੇਤਰਾਂ 'ਤੇ ਚਰਚਾ ਕੀਤੀ।

ਭਾਰਤ ਅਤੇ ਜਰਮਨੀ ਵਿਚਕਾਰ ਮਜ਼ਬੂਤ ​​ਅਤੇ ਵਧ ਰਹੇ ਆਰਥਿਕ ਅਤੇ ਉਦਯੋਗਿਕ ਸਬੰਧਾਂ ਅਤੇ ਟਿਕਾਊ ਤਕਨਾਲੋਜੀਆਂ ਅਤੇ ਹਰਿਤ ਅਰਥਵਿਵਸਥਾ ਵਿੱਚ ਦੋਵਾਂ ਦੇਸ਼ਾਂ ਵਿਚਕਾਰ ਡੂੰਘੇ ਸਹਿਯੋਗ ਦੀ ਸੰਭਾਵਨਾ ਨੂੰ ਦੇਖਦੇ ਹੋਏ ਇਸ ਫੋਰਮ ਨੂੰ ਬਹੁਤ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ।

************

ਵੀਐੱਮ/ਜੀਐੱਸ/ਏਕੇ