بھارت کی صدرِ جمہوریہ محترمہ دروپدی مرمو نے آج (31 اگست 2026) نئی دہلی میں نیشنل انسٹی ٹیوٹ آف فیشن ٹیکنالوجی (نِفٹ) کے 18 کیمپس کے مشترکہ جلسۂ تقسیمِ اسناد میں شرکت کی۔

اس موقع پر اپنے خطاب میں صدرِ جمہوریہ نے کہا کہ ٹیکسٹائل اور ملبوسات کا شعبہ صرف ہماری ثقافتی وراثت کا حصہ نہیں ہے بلکہ کروڑوں ہم وطنوں کی روزی روٹی کا ذریعہ بھی رہا ہے۔ اگر روایتی دست کاروں کو تعاون اور رہنمائی فراہم کی جائے تو اس سے ان کی آنے والی نسلوں کو بھی فخر اور اعتماد کے ساتھ اس پیشے سے وابستہ رہنے کی ترغیب ملے گی۔ انہوں نے یہ جان کر خوشی کا اظہار کیا کہ نِفٹ کے مختلف مراکز نے ‘کرافٹ کلسٹر پہل’ جیسے پروگرام نافذ کیے ہیں، جن کے ذریعے اپنے اپنے علاقوں کے بُنکروں اور دست کاروں کو ٹیکسٹائل اور ملبوسات کے شعبے میں جدید تکنیکوں سے روشناس کرایا جا رہا ہے اور انہیں منڈیوں سے جوڑا جا رہا ہے۔

صدرِ جمہوریہ نے کہا کہ آج ہمارا ملک ماضی کے مقابلے میں کہیں زیادہ اعتماد کے ساتھ عالمی سطح پر اپنے کردار کو وسعت دے رہا ہے۔ فیشن ٹیکنالوجی ایک ایسا شعبہ ہے جس میں عالمی سطح پر بھارت کے کردار کو بڑھانے کے بے پناہ امکانات موجود ہیں۔ انہوں نے طلبہ سے کہا کہ وہ اس موقع سے بھرپور فائدہ اٹھائیں۔ انہوں نے کہا کہ اس کوشش میں تمام طلبہ یہ بات ہمیشہ یاد رکھیں کہ ان کی سوچ عالمی ہو، لیکن ان کی جڑیں اپنی مٹی اور ملک کی ثقافتی اقدار سے جڑی ہوں۔ اس طرح وہ نہ صرف کامیاب پیشہ ور بنیں گے بلکہ بھارت کی ثقافتی وراثت کے تحفظ اور فروغ میں بھی اپنا کردار ادا کر سکیں گے۔

صدرِ جمہوریہ نے کہا کہ طلبہ کو عالمی معیار کی مصنوعات اور برانڈ تیار کرنے چاہئیں، لیکن اس کے ساتھ یہ بھی یقینی بنانا چاہیے کہ وہ ماحول دوست ہوں۔ انہوں نے کہا کہ اپنی مصنوعات کے لیے مقامی طور پر دستیاب خام مال کا استعمال ماحول کے تحفظ کی سمت میں ایک اہم قدم ہوگا۔ بچے ہوئے اجزا کو بے کار سمجھ کر پھینکنا نہیں چاہیے، بلکہ انہیں نئی شکل، نئی افادیت اور نئی قدر دی جا سکتی ہے۔ انہوں نے یہ جان کر خوشی کا اظہار کیا کہ نِفٹ کے پالیسی سازوں نے پائیداری اور سماجی ذمہ داری کو ادارے کے عملی منصوبے میں اہم مقام دیا ہے۔ انہوں نے اعتماد ظاہر کیا کہ نِفٹ ٹیکسٹائل اور ملبوسات کے شعبے میں پائیدار مستقبل کے لئے اپنی کوششوں کے تحت سرکلر معیشت کے طریقۂ کار کو وسیع اور منافع بخش بنانے کے لیے مؤثر اقدامات کرے گا۔

صدرِ جمہوریہ نے کہا کہ 2047 تک ترقی یافتہ بھارت کے ہدف کو حاصل کرنے میں نوجوان اہم کردار ادا کریں گے۔ انہوں نے کہا کہ نِفٹ جیسے باوقار اداروں کے باصلاحیت نوجوان طلبہ سے ملک کو بہت سی توقعات وابستہ ہیں۔ انہوں نے طلبہ پر زور دیا کہ وہ ایسے معاشرے کی تعمیر میں اپنا تعاون دیں جہاں ہر شہری کو ملک کی ترقی میں اپنا کردار ادا کرنے کا مناسب موقع مل سکے۔ انہوں نے کہا کہ ان کی کامیابی اس بات میں مضمر ہے کہ ان کی کوششوں سے کسی دست کار کو اپنی دست کاری کی بنیادی شناخت برقرار رکھتے ہوئے اپنی پیداوار اور آمدنی بڑھانے میں کس حد تک مدد ملتی ہے۔

صدرِ جمہوریہ کی تقریر دیکھنے کے لیے یہاں کلک کریں۔

***

ش ح۔ ک ا۔ اش ق

U.NO. 2813