രാഷ്ട്രപതി ശ്രീമതി ദ്രൗപദി മുർമു ഇന്ന് (2026 ഓഗസ്റ്റ് 31) ന്യൂഡൽഹിയിൽ നടന്ന 18 നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജി ക്യാമ്പസുകളുടെ സംയുക്ത ബിരുദദാന ചടങ്ങിൽ പങ്കെടുത്തു.
ചടങ്ങിൽ സംസാരിച്ച രാഷ്ട്രപതി, വസ്ത്ര-വ്യാപാര മേഖല നമ്മുടെ സാംസ്കാരിക പൈതൃകത്തിൻ്റെ ഭാഗം മാത്രമല്ല, മറിച്ച് ലക്ഷക്കണക്കിന് ആളുകളുടെ ജീവനോപാധിയുടെ നട്ടെല്ല് കൂടിയാണെന്ന് അഭിപ്രായപ്പെട്ടു. പരമ്പരാഗത കരകൗശല വിദഗ്ധർക്ക് ആവശ്യമായ പിന്തുണയും മാർഗ്ഗനിർദ്ദേശവും ലഭിക്കുകയാണെങ്കിൽ, അത് അവരുടെ അടുത്ത തലമുറയെ അഭിമാനത്തോടും ആത്മവിശ്വാസത്തോടും കൂടി ഈ തൊഴിലിൽ തുടർന്നുപോകാൻ പ്രേരിപ്പിക്കും. അതത് പ്രദേശങ്ങളിലെ നെയ്ത്തുകാരെയും കരകൗശല വിദഗ്ധരെയും വസ്ത്ര മേഖലയിലെ ആധുനിക സാങ്കേതിക വിദ്യകൾ പരിചയപ്പെടുത്തുന്നതിനും അവരെ വിപണികളുമായി ബന്ധിപ്പിക്കുന്നതിനുമായി വിവിധ നിഫ്റ്റ് കേന്ദ്രങ്ങൾ 'ക്രാഫ്റ്റ് ക്ലസ്റ്റർ ഇനിഷ്യേറ്റീവ്' പോലുള്ള പദ്ധതികൾ നടപ്പിലാക്കിയിട്ടുണ്ടെന്ന കാര്യവും രാഷ്ട്രപതി പറഞ്ഞു.
മുൻപെങ്ങുമില്ലാത്തവിധം വളരെ വലിയ ആത്മവിശ്വാസത്തോടെയാണ് ഇന്ന് നമ്മുടെ രാജ്യം ആഗോളതലത്തിൽ തങ്ങളുടെ പങ്കാളിത്തം വിപുലീകരിക്കുന്നതെന്ന് രാഷ്ട്രപതി പറഞ്ഞു. ഇന്ത്യയുടെ ആഗോള സാന്നിധ്യം വർദ്ധിപ്പിക്കുന്നതിന് അപാരമായ സാധ്യതകളുള്ള ഒരു മേഖല കൂടിയാണ് ഫാഷൻ ടെക്നോളജി. പഠനം പൂർത്തിയാക്കി ഇറങ്ങുന്ന വിദ്യാർത്ഥികൾ ഈ അവസരം പരമാവധി പ്രയോജനപ്പെടുത്തണമെന്ന് അവർ ആഹ്വാനം ചെയ്തു. ഈ ശ്രമത്തിൽ, വിദ്യാർത്ഥികൾ തങ്ങളുടെ അടിവേരുകളുമായും നമ്മുടെ സംസ്കാരത്തിൻ്റെ അടിസ്ഥാന മൂല്യങ്ങളുമായും ശക്തമായി ബന്ധപ്പെട്ടിരിക്കുന്നതോടൊപ്പം തന്നെ ഒരു ആഗോള വീക്ഷണം പുലർത്തണമെന്നും അവർ കൂട്ടിച്ചേർത്തു. ഇതിലൂടെ അവർക്ക് വിജയകരമായ പ്രൊഫഷണലുകളാകാൻ സാധിക്കുമെന്ന് മാത്രമല്ല, ഇന്ത്യയുടെ സാംസ്കാരിക പൈതൃകം സംരക്ഷിക്കുന്നതിനും സമ്പന്നമാക്കുന്നതിനും സംഭാവന നൽകാനും കഴിയുമെന്നും രാഷ്ട്രപതി അഭിപ്രായപ്പെട്ടു.
വിദ്യാർത്ഥികൾ ലോകോത്തര ഉൽപ്പന്നങ്ങളും ബ്രാൻഡുകളും സൃഷ്ടിക്കണമെന്നും എന്നാൽ അവ പരിസ്ഥിതി സൗഹൃദമാണെന്ന് ഉറപ്പുവരുത്തണമെന്നും രാഷ്ട്രപതി പറഞ്ഞു. ഉൽപ്പന്നങ്ങൾക്കായി പ്രാദേശികമായി ലഭിക്കുന്ന അസംസ്കൃത വസ്തുക്കൾ ഉപയോഗിക്കുന്നത് പരിസ്ഥിതി സംരക്ഷണത്തിലേക്കുള്ള സുപ്രധാന ചുവടുവെയ്പ്പായിരിക്കും. അവശിഷ്ടങ്ങൾ മാലിന്യമായി തള്ളിക്കളയരുത്; അവയ്ക്ക് പുതിയ രൂപവും പുതിയ ഉപയോഗവും പുതിയ മൂല്യവും നൽകാൻ സാധിക്കും. ഇൻസ്റ്റിറ്റ്യൂട്ടിൻ്റെ തന്ത്രപ്രധാനമായ പദ്ധതിക്കുള്ളിൽ സുസ്ഥിരതയ്ക്കും സാമൂഹിക പ്രതിബദ്ധതയ്ക്കും നിഫ്റ്റിൻ്റെ നയരൂപകർത്താക്കൾ വലിയ പ്രാധാന്യം നൽകിയിട്ടുണ്ടെന്ന കാര്യത്തിൽ സന്തോഷമുണ്ടെന്നും അവർ പറഞ്ഞു. വസ്ത്ര-വ്യാപാര മേഖലയിൽ സുസ്ഥിരമായ ഒരു ഭാവിക്കായുള്ള ശ്രമങ്ങൾക്ക് അനുസൃതമായി, ചാക്രിക സമ്പദ് വ്യവസ്ഥാ രീതികൾ വ്യാപകവും പ്രയോജനപ്രദവുമാക്കാൻ നിഫ്റ്റ് ഫലപ്രദമായ നടപടികൾ സ്വീകരിക്കുമെന്ന് അവർ ആത്മവിശ്വാസം പ്രകടിപ്പിച്ചു.
2047-ഓടെ 'വികസിത ഇന്ത്യ' എന്ന ലക്ഷ്യം കൈവരിക്കുന്നതിൽ യുവാക്കൾ നിർണായക പങ്ക് വഹിക്കുമെന്ന് രാഷ്ട്രപതി പറഞ്ഞു. നിഫ്റ്റ് പോലുള്ള പ്രശസ്തമായ സ്ഥാപനങ്ങളിലെ കഴിവുള്ള യുവ വിദ്യാർത്ഥികളിൽ രാജ്യത്തിന് വലിയ പ്രതീക്ഷകളുണ്ടെന്ന് അവർ അടിവരയിട്ടു പറഞ്ഞു. രാജ്യത്തിൻ്റെ പുരോഗതിയിൽ പങ്കാളിയാകാൻ ഓരോ പൗരനും തുല്യമായ അവസരമുള്ള ഒരു സമൂഹം കെട്ടിപ്പടുക്കുന്നതിൽ സംഭാവന നൽകാൻ അവർ അവരോട് ആഹ്വാനം ചെയ്തു. കരകൗശല വിദഗ്ധരുടെ തനതായ വ്യക്തിത്വം കാത്തുസൂക്ഷിച്ചുകൊണ്ട് തന്നെ, അവരുടെ ഉൽപ്പാദനക്ഷമതയും വരുമാനവും വർദ്ധിപ്പിക്കാൻ സഹായിക്കുന്നതിലാണ് വിദ്യാർത്ഥികളുടെ വിജയം അടങ്ങിയിരിക്കുന്നതെന്നും രാഷ്ട്രപതി വ്യക്തമാക്കി.
****