ভাৰত চৰকাৰৰ যুৱ পৰিক্ৰমা আৰু ক্ৰীড়া মন্ত্ৰালয়ৰ যুৱ পৰিক্ৰমা বিভাগৰ দ্বাৰা আয়োজিত ব্ৰিকছ যুৱ মন্ত্ৰীসকলৰ বৈঠকখনি ২০২৬ চনৰ ২২ আগষ্ট, শনিবাৰে বিশাখাপট্টনমত সফলতাৰে সামৰণি পৰে।

এই বৈঠকত মাননীয় কেন্দ্ৰীয় যুৱ পৰিক্ৰমা আৰু ক্ৰীড়া মন্ত্ৰী ড° মনসুখ মাণ্ডবিয়াই সভাপতিত্ব কৰে, আৰু তেখেতৰ লগতে মাননীয় যুৱ পৰিক্ৰমা আৰু ক্ৰীড়া ৰাজ্যিক মন্ত্ৰী শ্ৰীমতী ৰক্ষা নিখিল খাড়ছে তথা যুৱ পৰিক্ৰমা বিভাগৰ সচিব শ্ৰী সুনীল পালিৱালো উপস্থিত থাকে।

মন্ত্ৰীসকলৰ এই বৈঠকৰ আলোচনাসমূহ ব্ৰিকছ যুৱ সন্মিলন আৰু ব্ৰিকছ যুৱ পৰিষদৰ বৈঠকৰ ফলাফলৰ ওপৰত ভিত্তি কৰি আগবাঢ়িছিল। এই কাৰ্যসূচীসমূহৰ পৰা উত্থাপিত পৰামৰ্শ আৰু দৃষ্টিভংগীসমূহে মন্ত্ৰী পৰ্যায়ৰ আলোচনাসমূহৰ বাবে এক গুৰুত্বপূৰ্ণ ভেটি প্ৰদান কৰিছিল।

প্ৰতিনিধিসকলক সম্বোধন কৰি মাননীয় কেন্দ্ৰীয় যুৱ পৰিক্ৰমা আৰু ক্ৰীড়া মন্ত্ৰী ড. মনসুখ মাণ্ডবিয়াই কয়, "মাননীয় প্ৰধানমন্ত্ৰী শ্ৰী নৰেন্দ্ৰ মোদী জীৰ নেতৃত্বত আমি ২০৪৭ চনৰ বাবে এখন ভিজন ডকুমেণ্ট প্ৰস্তুত কৰিছো, যি সময়ত ভাৰতে স্বাধীনতাৰ ১০০ বছৰ সম্পূৰ্ণ কৰিব। এই দৃষ্টিভংগীক বাস্তৱায়িত কৰাৰ দিশত দেশক নেতৃত্ব দিবলৈ প্ৰধানমন্ত্ৰীয়ে কোনো ৰাজনৈতিক পটভূমি নথকা ১ লাখ যুৱ নেতাক গঢ়ি তোলাৰ বাবে এক উদাত্ত আহ্বান জনাইছে।"

"সেয়েহে, আমি এই মনোভাৱেৰে কেইবাটাও পদক্ষেপ গ্ৰহণ কৰিছো। স্বেচ্ছাসেৱা, শিক্ষণ, নেতৃত্ব আৰু নাগৰিক অংশগ্ৰহণৰ বাবে এক সৰ্বাঙ্গীন মঞ্চ হিচাপে আমি MY Bharat প্ৰতিষ্ঠা কৰিছো। আজি ২.৫ কোটিতকৈয়ো অধিক যুৱক-যুৱতীয়ে এই মঞ্চত পঞ্জীয়ন কৰিছে আৰু সক্ৰিয়ভাৱে অংশগ্ৰহণ কৰিছে," ড. মাণ্ডবিয়াই কয়।

ব্ৰিকছ ৰাষ্ট্ৰ আৰু অংশীদাৰ দেশসমূহৰ যুৱ প্ৰতিনিধি, যুৱ নেতা, নীতিনিৰ্ধাৰক আৰু জ্যেষ্ঠ বিষয়াসকলক একত্ৰিত কৰি যুৱপ্ৰজন্মৰ বাবে গুৰুত্বপূৰ্ণ বিষয়সমূহৰ ওপৰত আলোচনা, অভিজ্ঞতা বিনিময় আৰু সহযোগিতামূলক পদক্ষেপৰ বাবে এই কাৰ্যসূচীসমূহে এক মঞ্চ প্ৰদান কৰিছিল।

মাননীয় কেন্দ্ৰীয় যুৱ পৰিক্ৰমা আৰু ক্ৰীড়া মন্ত্ৰীগৰাকীয়ে এক উন্নত ভৱিষ্যত গঢ়াৰ বাবে যুৱপ্ৰজন্মৰ সৈতে অংশীদাৰিত্বৰ প্ৰয়োজনীয়তাৰ ওপৰত অধিক গুৰুত্ব আৰোপ কৰে। তেওঁ কয়, "ভাৰতৰ ব্ৰিকছ অধ্যক্ষতাৰ সময়ছোৱাত আমাৰ দৃষ্টিভংগী স্পষ্ট আছিল যে আমাৰ অংশীদাৰী ভৱিষ্যত গঢ় দিয়াত যুৱপ্ৰজন্মক কেৱল হিতাধিকাৰী হিচাপেই নহয়, বৰঞ্চ সক্ৰিয় অংশীদাৰ হিচাপে স্বীকৃতি দিব লাগিব। আহক, আমি যুৱ অংশগ্ৰহণৰ পৰা যুৱ অংশীদাৰিত্বলৈ; পৰামৰ্শৰ পৰা সহ-সৃষ্টিলৈ; যুৱপ্ৰজন্মৰ বাবে কাৰ্যসূচীৰ পৰা যুৱপ্ৰজন্মৰ সৈতে নিৰ্মিত মঞ্চলৈ আগবাঢ়ি যাওঁ। একেলগে, আহক আমি এনে এক ব্ৰিকছ গঢ়ি তুলিবলৈ আগবাঢ়ি যাওঁ য'ত যুৱপ্ৰজন্মই কেৱল ভৱিষ্যতৰ বাবে প্ৰস্তুতি চলোৱাই নহয়— তেওঁলোকে সক্ৰিয়ভাৱে ইয়াক গঢ় দিছে।"

ব্ৰিকছ যুৱ মন্ত্ৰীসকলৰ বৈঠকৰ কাৰ্যসূচীৰ অংশ হিচাপে, ব্ৰিকছৰ সদস্য ৰাষ্ট্ৰসমূহৰ প্ৰতিনিধিসকলে 'এক পেড় মা কে নাম' শীৰ্ষক এক বিশেষ বৃক্ষৰোপণ অভিযানত অংশগ্ৰহণ কৰে, য'ত প্ৰতিগৰাকী প্ৰতিনিধিয়ে নিজৰ নিজৰ মাতৃৰ প্ৰতি সন্মান জনাই একোটাকৈ পুলি ৰোপণ কৰে। কৃতজ্ঞতাৰ এক প্ৰতীকী আৰু আন্তৰিক প্ৰকাশ হিচাপে আলহী প্ৰতিনিধিদলসমূহে এই পদক্ষেপক ব্যাপকভাৱে প্ৰশংসা কৰে।

প্ৰতিনিধিসকলে বিশাখাপট্টনমৰ সমীপত অৱস্থিত অন্যতম গুৰুত্বপূৰ্ণ ঐতিহ্যক্ষেত্ৰ ঐতিহাসিক তোতলাকোণ্ডা বৌদ্ধ বিহাৰো পৰিদৰ্শন কৰে। এই পৰিদৰ্শনে প্ৰতিনিধিসকলক ভাৰতৰ চহকী সভ্যতাৰ ঐতিহ্য আৰু ইয়াৰ দীৰ্ঘদিনীয়া শান্তি, সম্প্ৰীতি আৰু সাংস্কৃতিক বিনিময়ৰ পৰম্পৰাৰ বিষয়ে এক বহুমূলীয়া ধাৰণা প্ৰদান কৰে। আলহী বিশিষ্ট ব্যক্তিসকলে এই ভ্ৰমণক আদৰণি জনায় আৰু ই সমগ্ৰ কাৰ্যসূচীটোলৈ এক সমৃদ্ধিশালী সাংস্কৃতিক মাত্ৰা প্ৰদান কৰাৰ লগতে ব্ৰিকছ ৰাষ্ট্ৰসমূহৰ যুৱপ্ৰজন্মৰ মাজত বন্ধুত্ব আৰু পাৰস্পৰিক বুজাবুজিৰ বান্ধোন অধিক সুদৃঢ় কৰে।

২০২৬ চনৰ ১৯-২০ আগষ্টত গুজৰাটৰ গান্ধীনগৰত অনুষ্ঠিত ব্ৰিকছ যুৱ সন্মিলন আৰু ব্ৰিকছ যুৱ পৰিষদৰ বৈঠকৰ পাছত, ব্ৰিকছ যুৱ মন্ত্ৰীসকলৰ বৈঠকৰ জৰিয়তে যুৱ কাৰ্যসূচীসমূহৰ সামৰণি মৰা হয়। যুৱ সহযোগিতাৰ ক্ষেত্ৰত হোৱা অগ্ৰগতি পৰ্যালোচনা কৰিবলৈ, নীতিগত দৃষ্টিভংগী বিনিময় কৰিবলৈ আৰু বহনক্ষম তথা সৰ্বাংগীণ উন্নয়নত যুৱপ্ৰজন্মৰ ভূমিকা আগুৱাই নিয়াৰ অগ্ৰাধিকাৰসমূহৰ ওপৰত আলোচনা কৰিবলৈ এই বৈঠকত ব্ৰিকছৰ সদস্য ৰাষ্ট্ৰসমূহৰ যুৱ পৰিক্ৰমাৰ দায়িত্বত থকা মন্ত্ৰী আৰু জ্যেষ্ঠ বিষয়াসকল একত্ৰিত হয়।

ব্ৰিকছ যুৱ মন্ত্ৰীসকলৰ বৈঠকৰ এক মূল ফলাফল আছিল যুটীয়া বিবৃতি গ্ৰহণ, যিয়ে যুৱ সহযোগিতা সুদৃঢ় কৰা আৰু উন্নয়ন প্ৰক্ৰিয়াত যুৱপ্ৰজন্মৰ অৰ্থপূৰ্ণ অংশগ্ৰহণক প্ৰসাৰিত কৰাৰ ক্ষেত্ৰত ব্ৰিকছ ৰাষ্ট্ৰসমূহৰ উমৈহতীয়া প্ৰতিশ্ৰুতিক প্ৰতিফলিত কৰে। এই যুটীয়া বিবৃতিয়ে শিক্ষা, প্ৰশিক্ষণ আৰু দক্ষতা; যুৱ উদ্যোগশীলতা; বিজ্ঞান, প্ৰযুক্তি আৰু উদ্ভাৱন; সামাজিক আৰু সাংস্কৃতিক অংশগ্ৰহণ, সমাজ সেৱা আৰু স্বেচ্ছাসেৱা; উন্নয়ন, দৰিদ্ৰতা, ক্ষুধা আৰু অসমতা দূৰীকৰণ; স্বাস্থ্য, যুৱ আৰু ক্ৰীড়া; যুৱ, পৰিৱেশ আৰু বহনক্ষমতা; সৰ্বধৰ্মীয় যুৱ সংলাপ; যুৱ বিনিময়; আৰু যুৱ অন্তৰ্ভুক্তিকৰণৰ গুৰুত্বৰ ওপৰত আলোকপাত কৰিছে।

মন্ত্ৰীসকলৰ বৈঠকৰ আলোচনাৰ অন্যতম মূল কেন্দ্ৰবিন্দু আছিল যুৱক-যুৱতীসকলৰ দক্ষতা বিকাশ, সিদ্ধান্ত গ্ৰহণ প্ৰক্ৰিয়াত অৰ্থপূৰ্ণ অংশগ্ৰহণ আৰু সমসাময়িক যুৱ-সম্পৰ্কীয় সমস্যাসমূহ সমাধানৰ ক্ষেত্ৰত অৱদান আগবঢ়াব পৰাকৈ এক অনুকূল পৰিৱেশ সৃষ্টি কৰাৰ গুৰুত্ব। তেওঁলোকে লগতে যুৱ-নেতৃত্বাধীন পদক্ষেপসমূহ শক্তিশালী কৰা, নৱপ্ৰৱৰ্তন আৰু উদ্যোগীকৰণক উৎসাহিত কৰা আৰু উমৈহতীয়া স্বাৰ্থৰ বিষয়সমূহত অভিজ্ঞতা তথা ধাৰণাৰ আদান-প্ৰদানৰ জৰিয়তে যুৱপ্ৰজন্মৰ মাজত আন্তঃসীমান্ত সহযোগিতাৰ সুযোগ বৃদ্ধি কৰাৰ গুৰুত্বৰ ওপৰতো বিশেষ জোৰ দিয়ে।

ব্ৰিকছ দেশসমূহৰ মাজত যুৱ সহযোগিতা আগবঢ়াই নিয়াৰ ক্ষেত্ৰত ব্ৰিকছ যুৱ মন্ত্ৰীসকলৰ বৈঠকৰ সফল সামৰণি আৰু ব্ৰিকছ যুৱ মন্ত্ৰীসকলৰ যুটীয়া বিবৃতি গ্ৰহণ এক গুৰুত্বপূৰ্ণ মাইলৰ খুঁটি হিচাপে চিহ্নিত হৈছে। ব্ৰিকছৰ যুৱ কাৰ্যসূচীসমূহে সমগ্ৰ ব্ৰিকছৰ যুৱপ্ৰজন্ম আৰু প্ৰতিষ্ঠানসমূহৰ মাজত অংশীদাৰিত্ব শক্তিশালী কৰিছে, অধিক পাৰস্পৰিক বুজাবুজি গঢ়ি তুলিছে আৰু নিৰন্তৰ সহযোগিতাৰ পথ প্ৰশস্ত কৰিছে।

২০২৬ চনৰ ভাৰতৰ ব্ৰিকছৰ সভাপতিত্বৰ সামগ্ৰিক বিষয়বস্তু "স্থিতিস্থাপকতা, নৱপ্ৰৱৰ্তন, সহযোগিতা আৰু বহনক্ষমতা গঢ়ি তোলা"ৰ সৈতে সংগতি ৰাখি, ভাৰতৰ ২০২৬ চনৰ ব্ৰিকছৰ সভাপতিত্বৰ অধীনত যুৱ কাৰ্যসূচীসমূহে উত্তম অনুশীলনৰ আদান-প্ৰদান, ৰাষ্ট্ৰীয় অগ্ৰাধিকাৰ আৰু সহযোগিতামূলক কাৰ্যকলাপৰ ওপৰত গুৰুত্ব আৰোপ কৰি যুৱ সহযোগিতা শক্তিশালী কৰাৰ প্ৰয়াস কৰিছে।

ব্ৰিকছ যুৱ কাৰ্যকলাপৰ কেলেণ্ডাৰৰ অংশ হিচাপে ভাৰতৰ ২০২৬ চনৰ ব্ৰিকছৰ সভাপতিত্বৰ অধীনত ব্ৰিকছ যুৱ সন্মিলন, ব্ৰিকছ যুৱ পৰিষদৰ বৈঠক আৰু ব্ৰিকছ যুৱ মন্ত্ৰীসকলৰ বৈঠক অনুষ্ঠিত কৰা হয়, য'ত ২০২৬ চনৰ ২২ আগষ্টত অন্ধ্ৰপ্ৰদেশৰ বিশাখাপট্টনমত ব্ৰিকছ যুৱ মন্ত্ৰীসকলৰ বৈঠক সফলতাৰে আয়োজন কৰা হয়।

ভাৰতৰ ব্ৰিকছৰ সভাপতিত্ব সামৰণিৰ দিশে অগ্ৰসৰ হোৱাৰ লগে লগে, এই কাৰ্যসূচীসমূহৰ ফলাফলসমূহে নিৰন্তৰ সহযোগিতাৰ বাবে এক সুদৃঢ় ভিত্তি প্ৰদান কৰিছে আৰু এক অধিক স্থিতিস্থাপক, উদ্ভাৱনীমূলক, অন্তৰ্ভুক্তিমূলক আৰু বহনক্ষম ভৱিষ্যত গঢ়ি তোলাৰ ক্ষেত্ৰত যুৱপ্ৰজন্মৰ সম্ভাৱনাক কামত লগোৱাৰ বাবে ব্ৰিকছ দেশসমূহৰ উমৈহতীয়া প্ৰতিশ্ৰুতিক পুনৰ দৃঢ় কৰিছে।

ব্ৰিকছ যুৱ মন্ত্ৰীসকলৰ বৈঠকৰ সমান্তৰালভাৱে, ড° মনসুখ মাণ্ডভিয়াই দক্ষিণ আফ্ৰিকা আৰু সংযুক্ত আৰৱ আমিৰশ্বাহীৰ তেওঁৰ সমকক্ষসকলৰ সৈতেও দ্বিপাক্ষিক বৈঠকত মিলিত হয়। এই আলোচনাত দক্ষতা বিকাশ, যুৱ উদ্যোগীকৰণ আৰু যুৱ অংশগ্ৰহণৰ বাবে ডিজিটেল প্লেটফৰ্মৰ ওপৰত বিশেষ জোৰ দি যুৱ পৰিক্ৰমা আৰু ক্ৰীড়া ক্ষেত্ৰত দ্বিপাক্ষিক সহযোগিতা শক্তিশালী কৰাৰ ওপৰত গুৰুত্ব আৰোপ কৰা হয়।

যুৱ আৰু ক্ৰীড়া ক্ষেত্ৰত ভাৰত আৰু সংশ্লিষ্ট দেশসমূহৰ মাজৰ সম্পৰ্ক অধিক সুদৃঢ় কৰিবলৈ সকলো পক্ষই বিনিময় কাৰ্যসূচী, সামৰ্থ্য বিকাশৰ পদক্ষেপ আৰু প্ৰাতিষ্ঠানিক আন্তঃগাঁথনিৰ জৰিয়তে গভীৰ সহযোগিতাৰ পথ অন্বেষণ কৰে।

*****

Pawan Singh Faujdar / Ayushman Kumar/RD