কেন্দ্ৰীয় বাণিজ্য আৰু উদ্যোগ মন্ত্ৰী শ্ৰী পীয়ুষ গোৱেলে ভাৰত-ছিংগাপুৰ মন্ত্ৰী পৰ্যায়ৰ ঘূৰণীয়া মেজমেল (আইএছএমআৰ) পৰিকাঠামোৰ অধীনত অব্যাহত থকা উচ্চ পৰ্যায়ৰ বুজাবুজিৰ অংশ হিচাপে ১৯ আগষ্টৰ পৰা ২১ আগষ্ট, ২০২৬ লৈ ছিংগাপুৰ ভ্ৰমণলৈ গৈছে।

ভাৰত-ছিংগাপুৰৰ অৰ্থনৈতিক আৰু বাণিজ্যিক সম্পৰ্ক শক্তিশালী কৰিবলৈ বিভিন্ন খণ্ডৰ প্ৰায় ৭০গৰাকী জ্যেষ্ঠ বাণিজ্যিক নেতাৰে গঠিত ভাৰতীয় বাণিজ্যিক প্ৰতিনিধি দলে শ্ৰী পীয়ুষ গোৱেলৰ সৈতে ছিংগাপুৰ ভ্ৰমণলৈ গৈছে। প্ৰতিনিধি দলটোত আছে প্ৰযুক্তি, ছফ্টৱেৰ আৰু এআই, উৎপাদন আৰু অভিযান্ত্ৰিক, আন্তঃগাঁথনি আৰু বহনক্ষমতা, বিত্তীয় সেৱা আৰু ফিনটেক, স্বাস্থ্যসেৱা আৰু জীৱ বিজ্ঞান, খাদ্য আৰু কৃষি, লজিষ্টিকছ, সামুদ্ৰিক আৰু বাণিজ্য, আৰু পেছাদাৰী সেৱাৰ প্ৰতিনিধিসকল।

প্ৰতিনিধি দলটোৱে বি২বি, জি২বি আৰু প্ৰাতিষ্ঠানিক আলোচনাত অংশগ্ৰহণ কৰিব, যাৰ ভিতৰত আছে আগশাৰীৰ উৎকৰ্ষতাৰ কেন্দ্ৰসমূহৰ (চিঅ’ই) সৈতে মত বিনিময় আৰু ছিংগাপুৰৰ দক্ষতা প্ৰতিষ্ঠানসমূহ ভ্ৰমণ। এই সম্পৰ্কবোৰে অংশীদাৰিত্ব, বিনিয়োগ, বজাৰ প্ৰৱেশাধিকাৰ, প্ৰযুক্তি সহযোগিতা আৰু প্ৰতিভা বিকাশৰ ওপৰত গুৰুত্ব আৰোপ কৰিব। ভাৰত-ছিংগাপুৰ মন্ত্ৰী পৰ্যায়ৰ ঘূৰণীয়া মেজমেল আৰু ভাৰত-ছিংগাপুৰ বাণিজ্যিক ঘূৰণীয়া মেজমেলত সমান্তৰালভাৱে এই ভ্ৰমণৰ আয়োজন কৰা হৈছে।

এই ভ্ৰমণকালত শ্ৰী পীয়ুষ গোয়েলে ২০২৬ চনৰ ২০ আগষ্টত চতুৰ্থ ভাৰত-ছিংগাপুৰ মন্ত্ৰী পৰ্যায়ৰ ঘূৰণীয়া মেজমেলত (আইএছএমআৰ) অংশগ্ৰহণ কৰিব। আই এছ এম আৰ-এ ভাৰত-ছিংগাপুৰ ব্যাপক কৌশলগত অংশীদাৰিত্ব (চি এছ পি)-ৰ অগ্ৰগতিৰ বাবে শীৰ্ষ মন্ত্ৰী পৰ্যায়ৰ ব্যৱস্থা হিচাপে কাম কৰে। চতুৰ্থ ভাৰত-ছিংগাপুৰ বাণিজ্যিক ঘূৰণীয়া মেজমেল (আইএছবিআৰ)ৰ সমান্তৰালভাৱে এই ঘূৰণীয়া মেজমেল অনুষ্ঠিত হ’ব, তাৰ পিছত এখন বুজাবুজিৰ চুক্তিত স্বাক্ষৰ অনুষ্ঠানৰ পাছত সকলো আইএছএমআৰ আৰু আইএছবিআৰৰ প্ৰতিনিধিসকলৰ বাবে ছিংগাপুৰৰ উপ-প্ৰধানমন্ত্ৰীয়ে দুপৰীয়াৰ ভোজেমেলৰ আয়োজন কৰিব।

মন্ত্ৰীগৰাকীয়ে কেন্দ্ৰীয় বিত্ত আৰু কৰ্পোৰেট পৰিক্ৰমা মন্ত্ৰী শ্ৰীমতী নিৰ্মলা সীতাৰমণ, কেন্দ্ৰীয় বহিঃ পৰিক্ৰমা মন্ত্ৰী ড০ সুব্ৰমণিয়ম জয়শংকৰ আৰু কেন্দ্ৰীয় ৰে’ল, তথ্য আৰু সম্প্ৰচাৰ, ইলেক্ট্ৰনিকছ আৰু তথ্য প্ৰযুক্তি মন্ত্ৰী শ্ৰী অশ্বিনী বৈষ্ণৱৰ সৈতে এই ঘূৰণীয়া মেজমেলত অংশগ্ৰহণ কৰিব। এই ভ্ৰমণকালত মন্ত্ৰীসকলে তেওঁলোকৰ ছিংগাপুৰৰ সংশ্লিষ্ট দপ্তৰৰ মন্ত্ৰীসকল আৰু ছিংগাপুৰৰ অন্যান্য জ্যেষ্ঠ নেতৃত্বৰ সৈতে মত বিনিময় কৰিব।

শ্ৰী পীয়ুষ গোৱেলে ইষ্টানাত ছিংগাপুৰৰ প্ৰধানমন্ত্ৰী লৰেন্স ৱঙকো সাক্ষাৎ কৰিব।

ইয়াৰ সমান্তৰালভাৱে, শ্ৰী গোৱেলে গ্লোৱেল ফাইনেঞ্চ এণ্ড টেকন’লজি নেটৱৰ্ক, ৱাই পি অ’ গ্ল’বেল, মিল্কেন ইনষ্টিটিউট, কেপেল ইনফ্ৰাষ্ট্ৰাকচাৰ, টেমাছেক হোল্ডিঙছ আৰু আই এইচ এইচ হেলথকেয়াৰৰ জ্যেষ্ঠ প্ৰতিনিধিৰ লগতে ছিংগাপুৰ বিজনেছ ফেডাৰেচন (এছ বি এফ)-ৰ অধ্যক্ষ নেতৃত্বাধীন প্ৰতিনিধি দল, টাৰ্নাৰ এণ্ড টাউনছেণ্ড আৰু এছ টি টি জি ডি চি-ৰ জ্যেষ্ঠ প্ৰতিনিধিসকলৰ সৈতে কেইবালানিও চৰকাৰৰ পৰা বাণিজ্যলৈ (জি২বি) বৈঠকত অংশগ্ৰহণ কৰিব। এই আলোচনাসমূহৰ পিছতে ফেমিলী অফিচ ৰাউণ্ডটেবুল অনুষ্ঠিত হ’ব।

মন্ত্ৰীগৰাকীয়ে ছিংগাপুৰৰ বৈদেশিক পৰিক্ৰমা আৰু বাণিজ্য আৰু উদ্যোগৰ ৰাজ্যিক মন্ত্ৰী গান ছিয়াও হুৱাঙৰ সৈতে যুটীয়াভাৱে চিটি স্কোৱেৰ মলত এ পি ই ডি এ-ফেয়াৰপ্ৰাইচ পদক্ষেপ পৰিদৰ্শন কৰিব। এই পদক্ষেপৰ লক্ষ্য হৈছে ভাৰতীয় কৃষি-খাদ্য ৰপ্তানিৰ প্ৰচাৰ কৰা আৰু ছিংগাপুৰৰ খুচুৰা বজাৰত সেইবোৰৰ উপস্থিতি শক্তিশালী কৰা, যিয়ে দুয়োখন দেশৰ মাজৰ গভীৰ কৃষি-বাণিজ্য সম্পৰ্ক প্ৰতিফলিত কৰে।

শ্ৰী পীয়ুষ গোৱেলে আইএনএছইএডি এছিয়া কেম্পাছত এফ আই চি চি আই-ৰ দ্বাৰা আয়োজিত ভাৰত-ছিংগাপুৰ বিজিনেছ ফ’ৰামতো অংশগ্ৰহণ কৰিব, য’ত তেওঁ "নতুন গোলকীয় বিকাশৰ সমীকৰণত ভাৰতঃ এছিয়া আৰু বিশ্বত বাণিজ্যৰ বাবে বিকাশ আৰু সুযোগ" শীৰ্ষক এক গুৰুত্বপূৰ্ণ আলোচনাত অংশগ্ৰহণ কৰিব, তাৰ পিছত ভাৰতীয় আৰু ছিংগাপুৰৰ বাণিজ্যিক সম্প্ৰদায়ৰ সৈতে এক নৈশভোজ অনুষ্ঠিত হ’ব।

মেৰিনা বে চেণ্ডছ এক্সপো এণ্ড কনভেনছন চেণ্টাৰত অনুষ্ঠিত আইচিএআই আছিয়ান সন্মিলন ২০২৬ ত মন্ত্ৰীগৰাকীৰ মূল ভাষণৰ জৰিয়তে এই ভ্ৰমণৰ সামৰণি পৰিব।

ছিংগাপুৰ ভাৰতৰ বাবে এক গুৰুত্বপূৰ্ণ অৰ্থনৈতিক অংশীদাৰ আৰু বিনিয়োগৰ এক প্ৰধান উৎস হিচাপে পৰিগণিত হৈ আহিছে। বিত্তীয় বৰ্ষ ২০২৫-২৬ ত ১৯.৮ বিলিয়ন ডলাৰৰ সৈতে ছিংগাপুৰ আছিল ভাৰতত প্ৰত্যক্ষ বৈদেশিক বিনিয়োগৰ সৰ্ববৃহৎ উৎস। ২০০০ চনৰ এপ্ৰিল মাহৰ পৰা ২০২৬ চনৰ মাৰ্চ মাহৰ ভিতৰত ছিংগাপুৰৰ পৰা মুঠ এফ ডি আই প্ৰবাহ আছিল ১৯৪.৬৮ বিলিয়ন আমেৰিকান ডলাৰ, যিটো ভাৰতত মুঠ প্ৰত্যক্ষ বিদেশী বিনিয়োগৰ ২৪.৭২%।

আছিয়ানৰ ভিতৰত ছিংগাপুৰ ভাৰতৰ সৰ্ববৃহৎ বাণিজ্যিক অংশীদাৰ আৰু বহিঃ বাণিজ্যিক ঋণ আৰু বৈদেশিক পৰিক্ৰমা বিনিয়োগৰ এক গুৰুত্বপূৰ্ণ উৎস হৈ আহিছে। ভাৰত-ছিংগাপুৰ ব্যাপক অৰ্থনৈতিক সহযোগিতা চুক্তি (চিইচিএ) সম্পন্ন হোৱাৰ পিছত দ্বিপাক্ষিক বাণিজ্য যথেষ্ট পৰিমাণে সম্প্ৰসাৰিত হৈছে, বিত্তীয় বৰ্ষ ২০০৪-০৫ ত ৬.৭  বিলিয়ন আমেৰিকান ডলাৰৰ পৰা ২০২৫-২৬ ত ৩৬.১ বিলিয়ন আমেৰিকান ডলাৰলৈ বৃদ্ধি পাইছে।

এই ভ্ৰমণে ছিংগাপুৰৰ সৈতে বাণিজ্য, বিনিয়োগ আৰু জনসাধাৰণৰ মাজৰ সম্পৰ্ক শক্তিশালী কৰাৰ বাবে ভাৰতৰ দায়বদ্ধতাক পুনৰ নিশ্চিত কৰিছে, যিখন দেশ হৈছে ভাৰতৰ এফডিআইৰ অন্যতম বৃহৎ উৎস তথা উন্নত উৎপাদন, ডিজিটেলাইজেচন, দক্ষতা বিকাশ আৰু সেউজ অৰ্থনীতিৰ এক মুখ্য অংশীদাৰ।

***

Abhishek Dayal/Abhijith Narayanan/Garima Singh/HS