કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલ, ઈન્ડિયા-સિંગાપોર મિનિસ્ટ્રીયલ રાઉન્ડટેબલ (ISMR) માળખા હેઠળ સતત ઉચ્ચ સ્તરીય જોડાણના ભાગરૂપે 19-21 ઓગસ્ટ 2026 દરમિયાન સિંગાપોરની મુલાકાતે છે.

ભારત-સિંગાપોર આર્થિક અને વ્યાપારી સંબંધોને મજબૂત કરવા માટે વિવિધ ક્ષેત્રોના આશરે 70 વરિષ્ઠ વ્યાપારી નેતાઓનો સમાવેશ કરતું એક ભારતીય વ્યાપારી પ્રતિનિધિમંડળ શ્રી પીયૂષ ગોયલની સાથે સિંગાપોરની મુલાકાતે છે. આ પ્રતિનિધિમંડળમાં ટેકનોલોજી, સોફ્ટવેર અને AI, ઉત્પાદન અને એન્જિનિયરિંગ, ઈન્ફ્રાસ્ટ્રક્ચર અને સુસ્થિરતા, નાણાકીય સેવાઓ અને ફિનટેક, હેલ્થકેર અને લાઈફ સાયન્સ, ખાદ્ય અને કૃષિ, લોજિસ્ટિક્સ, મેરિટાઇમ અને વેપાર તેમજ વ્યવસાયિક સેવાઓના પ્રતિનિધિઓ સામેલ છે.

આ પ્રતિનિધિમંડળ B2B, G2B અને સંસ્થાકીય જોડાણો હાથ ધરશે, જેમાં અગ્રણી સેન્ટર્સ ઓફ એક્સેલન્સ (COEs) સાથે સંવાદ અને સિંગાપોરમાં કૌશલ્ય સંસ્થાઓની મુલાકાતનો પણ સમાવેશ થાય છે. આ જોડાણો ભાગીદારી, રોકાણ, બજાર પહોંચ, ટેકનોલોજી સહયોગ અને પ્રતિભા વિકાસ પર ધ્યાન કેન્દ્રિત કરશે. આ મુલાકાત ઈન્ડિયા-સિંગાપોર મિનિસ્ટ્રીયલ રાઉન્ડટેબલ અને ઈન્ડિયા-સિંગાપોર બિઝનેસ રાઉન્ડટેબલ બેઠકોના ભાગરૂપે આયોજિત કરવામાં આવી રહી છે.

આ મુલાકાત દરમિયાન શ્રી પીયૂષ ગોયલ 20 ઓગસ્ટ 2026 ના રોજ ચોથી ઈન્ડિયા-સિંગાપોર મિનિસ્ટ્રીયલ રાઉન્ડટેબલ (ISMR) માં ભાગ લેશે. ISMR એ ભારત-સિંગાપોર વ્યાપક વ્યૂહાત્મક ભાગીદારી (CSP) ને આગળ ધપાવવા માટેની સર્વોચ્ચ મંત્રી સ્તરીય પ્રણાલી છે. આ રાઉન્ડટેબલ ચોથી ઈન્ડિયા-સિંગાપોર બિઝનેસ રાઉન્ડટેબલ (ISBR) સાથે યોજાશે, ત્યારબાદ એમઓયુ હસ્તાક્ષર સમારોહ અને સિંગાપોરના નાયબ પ્રધાનમંત્રી દ્વારા તમામ ISMR અને ISBR પ્રતિનિધિઓ માટે આયોજિત બપોરના ભોજન સમારંભ યોજાશે.

કેન્દ્રીય મંત્રી શ્રીમતી નિર્મળા સીતારમન (નાણા અને કોર્પોરેટ બાબતો); ડૉ. સુબ્રહ્મણ્યમ જયશંકર (વિદેશ બાબતો); અને શ્રી અશ્વિની વૈષ્ણવ (રેલવે, માહિતી અને પ્રસારણ, અને ઇલેક્ટ્રોનિક્સ અને ઇન્ફોર્મેશન ટેકનોલોજી) ની સાથે શ્રી પીયૂષ ગોયલ આ રાઉન્ડટેબલમાં ભાગ લેશે. મંત્રીઓ મુલાકાત દરમિયાન તેમના સિંગાપોરના સમકક્ષો અને અન્ય વરિષ્ઠ સિંગાપોરના નેતૃત્વ સાથે મુલાકાત કરશે.

શ્રી પીયૂષ ગોયલ ઇસ્તાના ખાતે સિંગાપોરના પ્રધાનમંત્રી શ્રી લોરેન્સ વોંગ સાથે પણ શિષ્ટાચાર મુલાકાત કરશે.

આ ઉપરાંત, શ્રી ગોયલ ગ્લોબલ ફાઇનાન્સ એન્ડ ટેકનોલોજી નેટવર્ક, YPO ગ્લોબલ, મિલકેન ઇન્સ્ટિટ્યૂટ, કેપ્પલ ઇન્ફ્રાસ્ટ્રક્ચર, ટેમાસેક હોલ્ડિંગ્સ અને IHH હેલ્થકેરના વરિષ્ઠ પ્રતિનિધિઓ તેમજ સિંગાપોર બિઝનેસ ફેડરેશન (SBF) ના અધ્યક્ષની આગેવાની હેઠળના પ્રતિનિધિમંડળ, ટર્નર એન્ડ ટાઉન્સેન્ડ અને STT GDC સાથે ગવર્નમેન્ટ-ટુ-બિઝનેસ (G2B) બેઠકોની શ્રેણી યોજશે. આ જોડાણો પછી ફેમિલી ઓફિસ રાઉન્ડટેબલ યોજાશે.

મંત્રીશ્રી સિંગાપોરના વિદેશ બાબતો અને વેપાર તથા ઉદ્યોગ રાજ્ય મંત્રી સુશ્રી ગાન સિયાઓ હુઆંગની સાથે સિટી સ્ક્વેર મોલ ખાતે APEDA–FairPrice પહેલની સંયુક્ત મુલાકાત લેશે. આ પહેલનો ઉદ્દેશ્ય ભારતીય કૃષિ-ખાદ્ય નિકાસને પ્રોત્સાહન આપવાનો અને સિંગાપોરના છૂટક બજારમાં તેમની હાજરીને મજબૂત કરવાનો છે, જે બંને દેશો વચ્ચે ગાઢ થઈ રહેલા કૃષિ-વેપાર સંબંધોને દર્શાવે છે.

શ્રી પીયૂષ ગોયલ ઇનસીડ એશિયા કેમ્પસ ખાતે ફિક્કી દ્વારા આયોજિત ઈન્ડિયા-સિંગાપોર બિઝનેસ ફોરમમાં પણ ભાગ લેશે, જ્યાં તેઓ “નવી વૈશ્વિક વિકાસ ગણતરીમાં ભારત: એશિયા અને વિશ્વના વ્યવસાયો માટે વિકાસ અને તકો” પર અનૌપચારિક ચર્ચામાં ભાગ લેશે, ત્યારબાદ ભારતીય અને સિંગાપોરના વ્યાપારી સમુદાય સાથે નેટવર્કિંગ ડિનર યોજાશે.

મંત્રીશ્રી દ્વારા મરીના બે સેન્ડ્સ એક્સ્પો એન્ડ કન્વેન્શન સેન્ટર ખાતે ICAI ASEAN કોન્ફરન્સ 2026 માં મુખ્ય પ્રવચન સાથે આ મુલાકાત સંપન્ન થશે.

સિંગાપોર ભારત માટે એક મુખ્ય આર્થિક ભાગીદાર અને રોકાણનો મોટો સ્ત્રોત બની રહ્યો છે. નાણાંકીય વર્ષ 2025-26 માં સિંગાપોર 19.8 અબજ યુએસ ડોલરના એફડીઆઈ પ્રવાહ સાથે ભારતમાં એફડીઆઈનો સૌથી મોટો સ્ત્રોત હતો. એપ્રિલ 2000 થી માર્ચ 2026 દરમિયાન સિંગાપોરમાંથી કુલ એફડીઆઈ પ્રવાહ 194.68 અબજ યુએસ ડોલર રહ્યો હતો, જે ભારતના કુલ એફડીઆઈ પ્રવાહના 24.72% હિસ્સો ધરાવે છે.

સિંગાપોર એશિયાનમાં ભારતનો સૌથી મોટો વેપારી ભાગીદાર પણ છે અને એક્સટર્નલ કમર્શિયલ બોરોઇંગ્સ અને ફોરેન પોર્ટફોલિયો ઇન્વેસ્ટમેન્ટનો એક મહત્વપૂર્ણ સ્ત્રોત બની રહ્યો છે. ભારત-સિંગાપોર વ્યાપક આર્થિક સહયોગ કરાર (CECA) ના નિષ્કર્ષ પછી દ્વિપક્ષીય વેપારમાં નોંધપાત્ર વધારો થયો છે, જે નાણાકીય વર્ષ 2004-05 માં 6.7 અબજ યુએસ ડોલરથી વધીને નાણાકીય વર્ષ 2025-26 માં 36.1 અબજ યુએસ ડોલર થયો છે.

આ મુલાકાત સિંગાપોર સાથે વેપાર, રોકાણ અને લોકો-સાથે-લોકોના સંબંધોને મજબૂત કરવા માટે ભારતની કટિબદ્ધતાને પુનઃપુષ્ટ કરે છે, જે એફડીઆઈના ભારતના સૌથી મોટા સ્ત્રોતોમાંથી એક છે અને અદ્યતન ઉત્પાદન, ડિજિટલાઇઝેશન, કૌશલ્ય વિકાસ અને ગ્રીન ઇકોનોમીમાં એક મુખ્ય ભાગીદાર છે.

SM/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad