زراعت و کسان بہبود اور دیہی ترقی کے مرکزی وزیر جناب شیوراج سنگھ چوہان نے آج پسا میں واقع بھارتی زرعی تحقیقاتی کونسل کے بھارتی زرعی تحقیقاتی ادارے میں نیشنل اسکالرشپ پورٹل کے ذریعے ملک بھر کے زراعت سے متعلق طلبا کے لیے وظائف اور فیلوشپ کی رقم جاری کی۔ اس اقدام کے تحت 6,000 سے زائد طلبا کو براہِ راست فائدہ منتقلی کے نظام کے ذریعے مجموعی طور پر 21.35 کروڑ روپے کی رقم فراہم کی گئی۔

اس نئے اقدام کے تحت اب  زرعی شعبےکے طلبہ کو ہر ماہ براہِ راست فائدہ منتقلی کے ذریعے وظائف کی رقم ملے گی، جس سے انہیں بروقت اور بلا رکاوٹ مالی معاونت یقینی بنائی جا سکے گی۔

تقریب سے خطاب کرتے ہوئے مرکزی وزیرِ زراعت جناب چوہان نے کہا کہ وظائف محض مالی امداد کا ذریعہ نہیں ہیں بلکہ زرعی تعلیم کو مضبوط بنانے، اسے عملی تعلیم سے جوڑنے اور طلبہ کے لیے مزید مواقع پیدا کرنے کا ایک اہم وسیلہ ہیں۔ انہوں نے کہا کہ براہِ راست فائدہ منتقلی کا نظام طلبہ کو بروقت مالی معاونت فراہم کرنے کو یقینی بنائے گا اور روایتی نظام میں ہونے والی تاخیر کو ختم کرنے میں مدد دے گا۔

طلبہ سے خطاب کرتے ہوئے جناب چوہان نے زرعی تعلیم میں عملی تربیت کی اہمیت پر زور دیا۔ انہوں نے کہا کہ صرف جماعتوں میں دی جانے والی تعلیم سے اچھے کسان، سائنس دان یا زرعی کاروباری افراد تیار نہیں کیے جا سکتے، بلکہ زراعت کے شعبے میں حقیقی صلاحیت پیدا کرنے کے لیے عملی تربیت ناگزیر ہے۔ انہوں نے طلبہ پر زور دیا کہ وہ نظام میں بہتری کے لیے اپنی تجاویز اور خیالات بھی پیش کریں۔

جناب چوہان نے کہا کہ وزیر اعظم جناب نریندر مودی کی قیادت اور رہنمائی میں حکومت زراعت کے شعبے میں غذائی سلامتی، غذائیت اور کسانوں کی آمدنی کے تحفظ کو ترجیح دے رہی ہے۔ بھارتی زرعی تحقیقاتی کونسل کے سائنس دانوں کی خدمات کو سراہتے ہوئے انہوں نے کہا کہ ان کی تحقیق اور کسانوں کی محنت نے مل کر ملک کے غذائی اجناس کے ذخائر کو مضبوط بنانے میں اہم کردار ادا کیا ہے۔

مرکزی وزیر نے نوجوانوں کی حوصلہ افزائی کرتے ہوئے کہا کہ وہ اپنے کیریئر سے آگے بڑھ کر بڑے مقاصد طے کریں اور ملک کی ترقی میں بامعنی کردار ادا کریں۔ انہوں نے زرعی شعبےکے طلبہ پر زور دیا کہ وہ خود کو صرف روزگار حاصل کرنے تک محدود نہ رکھیں بلکہ زراعت کے شعبے میں جدت طرازی، نئے کاروباری منصوبوں اور تحقیق میں قائدانہ کردار ادا کریں۔

جناب چوہان نے کہا کہ نیشنل اسکالرشپ پورٹل-براہِ راست فائدہ منتقلی کا نظام وظائف کی تقسیم کو زیادہ شفاف، تیز رفتار اور بلا رکاوٹ بنائے گا۔ بروقت مالی معاونت سے طلبہ اپنی تعلیم پر زیادہ مؤثر انداز میں توجہ مرکوز کر سکیں گے۔ انہوں نے اس بات پر بھی زور دیا کہ مستقبل کے چیلنجوں سے بہتر طور پر نمٹنے کے لیے زرعی تعلیم کو ٹیکنالوجی، تربیت اور صنعت سے متعلق عملی تعلیم کے ساتھ مربوط کرنا ضروری ہے۔

ہریالی اماوسیا کے موقع پر جناب چوہان نے ملک بھر کے بھارتی زرعی تحقیقاتی کونسل کے اداروں میں زیرِ تعلیم زرعی طلبہ سے شجرکاری مہم میں حصہ لینے کی بھی اپیل کی۔ انہوں نے کہا کہ ماحول کو سرسبز بنانے کے اقدامات زراعت اور ماحول دونوں کے تئیں ہماری اجتماعی ذمہ داری کا حصہ ہیں۔

زراعت و کسانوں کی بہبودکےمرکزی وزیر مملکت جناب بھاگیرتھ چودھری، بھارتی زرعی تحقیقاتی کونسل کے ڈائریکٹر جنرل ڈاکٹر ایم۔ ایل۔ جٹ، کونسل کے سکریٹری جناب گیانیندر ترپاٹھی، ڈپٹی ڈائریکٹر جنرل ڈاکٹر یشپال سنگھ ملک اور بھارتی زرعی تحقیقاتی ادارے کے ڈائریکٹر ڈاکٹر سی۔ سرینواس راؤ بھی اس موقع پر موجود تھے۔

بھارتی زرعی تحقیقاتی کونسل اور بھارتی زرعی تحقیقاتی ادارے کے اعلیٰ افسران اور سائنس دانوں کے علاوہ بڑی تعداد میں طلبہ نے تقریب میں بالمشافہ شرکت کی، جبکہ ہزاروں طلبہ نے آن لائن بھی اس میں شرکت کی۔

********

ش ح۔ ع ح  ۔رض

U-1783