പ്രധാനമന്ത്രി ശ്രീ നരേന്ദ്ര മോദിയുടെ 'സഹകാർ സേ സമൃദ്ധി' എന്ന കാഴ്ചപ്പാട് മുൻപോട്ടു കൊണ്ടുപോകുന്നതിൻ്റെ ഭാഗമായി, രാജ്യത്തെ അർബൻ സഹകരണ ബാങ്കിംഗ് മേഖലയെ ആധുനികവും സുതാര്യവും സുരക്ഷിതവും മത്സരക്ഷമവുമാക്കുന്നതിനുള്ള നിർണായക ചുവടുവെയ്പ്പിൽ കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷായുടെ നേതൃത്വത്തിൽ, 'സഹകാർ നവ്-ക്രാന്തി' പരിപാടി ഇന്ന് മുംബൈയിലെ ബി.എസ്.ഇ അന്താരാഷ്ട്ര കൺവെൻഷൻ സെൻ്ററിൽ നടന്നു.

മുഖ്യാതിഥിയായ കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ, അർബൻ സഹകരണ ബാങ്കുകൾക്കായുള്ള സെക്യൂരിറ്റി ഓപ്പറേഷൻസ് സെൻ്റർ, രാജ്യവ്യാപകമായ സേവന ശേഖരത്തിന് കീഴിലുള്ള കോർ ബാങ്കിംഗ്, അനുബന്ധ സേവനങ്ങൾ എന്നിവ ഉദ്ഘാടനം ചെയ്തു. ചടങ്ങിൽ NUCFDC-യും നാഷണൽ ഫോറൻസിക് സയൻസസ് യൂണിവേഴ്സിറ്റിയും (NFSU) തമ്മിലുള്ള ധാരണാപത്രം കൈമാറി.

നേരത്തെ, മുംബൈയിലെ ഫോർട്ടിലുള്ള ശാരദാ സദനിൽ NUCFDC-യുടെ പുതിയ ഓഫീസ് മന്ദിരത്തിൻ്റെ ഉദ്ഘാടനവും കേന്ദ്ര ആഭ്യന്തര, സഹകരണ മന്ത്രി നിർവ്വഹിച്ചു. മഹാരാഷ്ട്ര മുഖ്യമന്ത്രി ശ്രീ ദേവേന്ദ്ര ഫഡ്‌നവിസ്, മഹാരാഷ്ട്ര ഉപമുഖ്യമന്ത്രി ശ്രീ ഏക്‌നാഥ് ഷിൻഡെ, കേന്ദ്ര സഹകരണ സഹമന്ത്രി ശ്രീ കൃഷൻ പാൽ ഗുർജാർ, കേന്ദ്ര സഹകരണ, വ്യോമയാന സഹമന്ത്രി ശ്രീ മുരളീധർ മൊഹോൽ, മഹാരാഷ്ട്ര സഹകരണ മന്ത്രി ശ്രീ ബാബാസാഹെബ് പാട്ടീൽ, മഹാരാഷ്ട്ര സംസ്ഥാന മന്ത്രിമാരായ ശ്രീ ജയ്കുമാർ റാവൽ, ശ്രീ ആശിഷ് ഷെലാർ, സഹകരണ മന്ത്രാലയം സെക്രട്ടറി ശ്രീ ആശിഷ് കുമാർ ഭൂട്ടാനി, NUCFDC ചെയർമാൻ ശ്രീ ജ്യോതീന്ദ്ര മേത്ത, വിവിധ സംസ്ഥാനങ്ങളിലെ അർബൻ സഹകരണ ബാങ്ക് ഫെഡറേഷൻ പ്രതിനിധികൾ, രാജ്യത്തുടനീളമുള്ള അർബൻ സഹകരണ ബാങ്കുകളുമായി ബന്ധപ്പെട്ട പ്രമുഖർ എന്നിവർ 'സഹകാർ നവ്-ക്രാന്തി' പരിപാടിയിൽ പങ്കെടുത്തു.

ഏറെനാളത്തെ കാത്തിരിപ്പിനൊടുവിൽ, റിസർവ് ബാങ്ക് ഓഫ് ഇന്ത്യയുടെ അംഗീകാരത്തോടെയും ആവശ്യത്തിന് മൂലധനത്തോടെയും അർബൻ സഹകരണ ബാങ്കുകൾക്കായുള്ള മാതൃസ്ഥാപനം പുതിയ ഓഫീസോടെ ഇപ്പോൾ യാഥാർത്ഥ്യമായെന്ന് ചടങ്ങിൽ സംസാരിച്ച കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ പറഞ്ഞു.

ഈ പരിപാടി നടക്കുന്ന വേദിക്ക് അതിൻ്റെതായ ചരിത്രപരമായ പ്രാധാന്യമുണ്ടെന്നും ശ്രീ അമിത് ഷാ വ്യക്തമാക്കി. നിലവിൽ ഇതൊരു ഓഡിറ്റോറിയമായി ഉപയോഗിക്കുന്നുണ്ടെങ്കിലും, ഏകദേശം 100 വർഷത്തോളമായി ഈ സ്ഥലം ഇന്ത്യയിലെ ഓഹരി വിപണിയുടെ കേന്ദ്രബിന്ദുവായിരുന്നുവെന്നും രാജ്യത്തിൻ്റെ സാമ്പത്തിക, വ്യവസായ വികസനത്തിന് അടിത്തറയിടുന്നതിൽ പ്രധാന പങ്ക് വഹിച്ചിട്ടുണ്ടെന്നും അദ്ദേഹം പറഞ്ഞു. സ്വാതന്ത്ര്യത്തിന് മുമ്പും ശേഷവും ഇന്ത്യയുടെ പുനർനിർമ്മാണത്തിലും വികസനത്തിലും സുപ്രധാന പങ്ക് വഹിച്ച പ്രമുഖ കമ്പനികളുടെ വളർച്ചയ്ക്ക് ബി.എസ്.ഇ-യുടെ ഈ ചരിത്രപ്രസിദ്ധമായ ട്രേഡിംഗ് ഹാൾ സാക്ഷ്യം വഹിച്ചിട്ടുണ്ട്. ഇന്ന്, അതേ ചരിത്രപരമായ വേദി അർബൻ സഹകരണ ബാങ്കിംഗ് മേഖലയിലെ പുതിയൊരു നവീകരണത്തിന് കൂടി സാക്ഷ്യം വഹിക്കുകയാണെന്ന് അദ്ദേഹം കൂട്ടിച്ചേർത്തു.

റിസർവ് ബാങ്ക് ഓഫ് ഇന്ത്യ നിർദ്ദേശിച്ചിട്ടുള്ള പാലന മാനദണ്ഡങ്ങൾ പാലിക്കുന്നതിന് ആവശ്യമായ മാർഗ്ഗനിർദ്ദേശങ്ങൾ ഈ മാതൃസ്ഥാപനം അർബൻ സഹകരണ ബാങ്കുകൾക്ക് നൽകുമെന്നും, അവയുടെ സുഗമമായ പ്രവർത്തനത്തിന് സാങ്കേതികവും സ്ഥാപനപരവുമായ പിന്തുണ ഉറപ്പാക്കുമെന്നും ശ്രീ അമിത് ഷാ പറഞ്ഞു. ഇതിലൂടെ ബാങ്കിംഗ് മേഖലയിലെ പുതിയ പരിഷ്കാരങ്ങളെയും നിയന്ത്രണ മാറ്റങ്ങളെയും കുറിച്ചുള്ള വിവരങ്ങൾ കൃത്യസമയത്ത് തന്നെ അർബൻ സഹകരണ ബാങ്കുകളിലേക്ക് എത്തും. 'മ്യൂൾഹണ്ടർ' പോലുള്ള സുപ്രധാന സോഫ്റ്റ്‌വെയറുകൾ, ആധുനിക സാങ്കേതിക പരിഹാരങ്ങൾ, ജീവനക്കാരുടെ പരിശീലന സൗകര്യങ്ങൾ തുടങ്ങി ഈ മേഖലയ്ക്ക് ആവശ്യമായ കാര്യങ്ങൾ ഈ മാതൃസ്ഥാപനം വഴി ലഭ്യമാക്കുമെന്നും അദ്ദേഹം വ്യക്തമാക്കി. സുതാര്യത വർദ്ധിപ്പിച്ചുകൊണ്ട് പൊതുജനങ്ങളുടെയും റിസർവ് ബാങ്ക് ഓഫ് ഇന്ത്യയുടെയും വിശ്വാസ്യത ഉറപ്പുവരുത്താനുള്ള വഴി ഈ സ്ഥാപനം കാണിച്ചുതരുമെന്നും ശ്രീ അമിത് ഷാ പറഞ്ഞു. ഇത് ആധുനിക കാലത്തെ ബാങ്കിംഗ് മത്സരത്തിൽ മറ്റ് ബാങ്കുകൾക്കൊപ്പം തുല്യമായി നിലനിൽക്കാൻ അർബൻ സഹകരണ ബാങ്കുകളെ പ്രാപ്തമാക്കും. ഈ സേവനങ്ങൾ നൽകുന്നതിനുമപ്പുറം, ഈ ആസ്ഥാന സ്ഥാപനം അർബൻ സഹകരണ ബാങ്കിംഗ് പ്രസ്ഥാനത്തിന് പുതിയ ജീവൻ നൽകുകയും അതിൻ്റെ വ്യാപ്തി വർദ്ധിപ്പിക്കുകയും ബാങ്കിംഗ് സേവനങ്ങളെ ആധുനികവും സുതാര്യവും വിശ്വസനീയവുമാക്കുകയും ചെയ്യുമെന്ന് അദ്ദേഹം അഭിപ്രായപ്പെട്ടു.

സഹകരണ മന്ത്രാലയത്തിൻ്റെ ചുമതലയേറ്റ ശേഷം നബാർഡിലെയും ബന്ധപ്പെട്ട അധികാര മേഖലകളിലെയും ഉദ്യോഗസ്ഥരുമായി ആദ്യമായി കൂടിക്കാഴ്ച നടത്തിയപ്പോൾ, അർബൻ സഹകരണ ബാങ്കുകൾക്കായി ഒരു ആസ്ഥാന കേന്ദ്രം രൂപീകരിക്കുന്നത് ഏറ്റവും വലിയ വെല്ലുവിളിയായും ഏതാണ്ട് അസാധ്യമായ ഒരു ദൗത്യവുമായാണ് തോന്നിയതെന്ന് കേന്ദ്ര ആഭ്യന്തര, സഹകരണ മന്ത്രി പറഞ്ഞു. എന്നാൽ, അർബൻ സഹകരണ ബാങ്കുകളുടെയും സഹകരണ മേഖലയുമായി ബന്ധപ്പെട്ട എല്ലാ പങ്കാളികളുടെയും സഹകരണത്തോടെ വളരെ കുറഞ്ഞ സമയത്തിനുള്ളിൽ 306 കോടി രൂപ മൂലധനമായി സമാഹരിക്കാൻ സാധിച്ചുവെന്നും, സ്ഥാപനത്തിൻ്റെ പല സേവനങ്ങളും പ്രവർത്തനങ്ങളും വിജയകരമായി ആരംഭിക്കാൻ കഴിഞ്ഞുവെന്നും അദ്ദേഹം പറഞ്ഞു. ഒരിക്കൽ അങ്ങേയറ്റം പ്രയാസകരമെന്ന് തോന്നിയ സങ്കൽപ്പം ഇന്ന് യാഥാർത്ഥ്യമാവുകയും അർബൻ സഹകരണ ബാങ്കിംഗ് മേഖലയെ ശാക്തീകരിക്കുന്നതിനായി സ്ഥിരതയോടെ മുന്നോട്ട് പോവുകയുമാണെന്നും ശ്രീ അമിത് ഷാ വ്യക്തമാക്കി.

'ബാങ്ക് ഇൻ എ ബോക്സ്' സേവനം ആരംഭിച്ച ഇന്ന് അർബൻ സഹകരണ ബാങ്കിംഗ് മേഖലയെ സംബന്ധിച്ചിടത്തോളം അങ്ങേയറ്റം സുപ്രധാനമായ ദിവസമാണെന്ന് ശ്രീ അമിത് ഷാ പറഞ്ഞു. ഇതിലൂടെ കോർ ബാങ്കിംഗ്, ഡിജിറ്റൽ പേയ്‌മെൻ്റുകൾ, ക്ലൗഡ് സേവനങ്ങൾ, നിയമ നിർവഹണങ്ങൾ, കൂടാതെ നിരവധി ആധുനിക ബാങ്കിംഗ് സൗകര്യങ്ങൾ എന്നിവ അർബൻ സഹകരണ ബാങ്കുകൾക്ക് ഒരൊറ്റ സംയോജിത പ്ലാറ്റ്‌ഫോമിൽ ലഭ്യമാകും. ഉപഭോക്താക്കൾക്ക് ആധുനികവും ലോകോത്തരവുമായ ബാങ്കിംഗ് സൗകര്യങ്ങൾ നൽകാൻ ഒരൊറ്റ ശാഖ മാത്രമുള്ള ഒരു ചെറിയ അർബൻ സഹകരണ ബാങ്കിന് പോലും വലിയ തുക ചെലവഴിക്കാതെ തന്നെ ഇത് വഴി സാധിക്കുമെന്ന് അദ്ദേഹം പറഞ്ഞു. ചെറിയ ബാങ്കുകളെ സാങ്കേതികമായി ശാക്തീകരിക്കുന്നതിനും മത്സരസജ്ജമായ ബാങ്കിംഗ് അന്തരീക്ഷവുമായി അവയെ സംയോജിപ്പിക്കുന്നതിനും ഈ സംരംഭം വഴിയൊരുക്കും.

ഓൺലൈൻ ബാങ്കിംഗിൻ്റെ ഈ കാലഘട്ടത്തിൽ ഫോറൻസിക് സയൻസിൻ്റെ പിന്തുണയില്ലാതെ ബാങ്കുകൾക്കോ അവയുടെ ഉപഭോക്താക്കൾക്കോ പൂർണ്ണമായ സുരക്ഷിതത്വം ഉറപ്പാക്കാൻ കഴിയില്ലെന്ന് അദ്ദേഹം പറഞ്ഞു. ഈ ആവശ്യം മുൻനിർത്തിയാണ് നാഷണൽ ഫോറൻസിക് സയൻസസ് യൂണിവേഴ്‌സിറ്റിയുമായി (NFSU) ധാരണാപത്രത്തിൽ ഒപ്പുവെക്കാൻ NUCFDC-ക്ക് നിർദ്ദേശം നൽകിയത്. സൈബർ സുരക്ഷയിലും ഡിജിറ്റൽ ഫോറൻസിക്കിലും NFSU ലോകോത്തര നൈപുണ്യം കൈവരിച്ചിട്ടുണ്ടെന്നും രാജ്യത്തുടനീളമുള്ള നിരവധി ബാങ്കുകൾക്ക് പ്രൊഫഷണൽ സേവനങ്ങൾ നൽകിവരുന്നുണ്ടെന്നും അദ്ദേഹം പറഞ്ഞു. NUCFDC-യും NFSU-വും തമ്മിലുള്ള സഹകരണം അർബൻ സഹകരണ ബാങ്കുകളുടെയും അവയുടെ ഉപഭോക്താക്കളുടെയും ഡിജിറ്റൽ സുരക്ഷയെ കൂടുതൽ ശക്തിപ്പെടുത്തും.

NUCFDC-യും നാഷണൽ ഫോറൻസിക് സയൻസസ് യൂണിവേഴ്‌സിറ്റിയും തമ്മിലുള്ള കരാറിലൂടെ സൈബർ സുരക്ഷ, ഡിജിറ്റൽ ഫോറൻസിക്‌സ് എന്നിവയുമായി ബന്ധപ്പെട്ട സൗകര്യങ്ങൾ ഏറ്റവും ചെറിയ അർബൻ സഹകരണ ബാങ്കിൻ്റെ പോലും ഓരോ ശാഖയിലും വളരെ കുറഞ്ഞ ചെലവിൽ എത്തിക്കുമെന്ന് കേന്ദ്ര ആഭ്യന്തര, സഹകരണ മന്ത്രി പറഞ്ഞു. സൈബർ സുരക്ഷ, ഡിജിറ്റൽ ഫോറൻസിക്‌സ്, ഈ മേഖലകളിലെ ജീവനക്കാരുടെ പരിശീലനം, ഗവേഷണ സൗകര്യങ്ങൾ എന്നിവ 'ബാങ്ക് ഇൻ എ ബോക്‌സ്' വഴി സംയോജിത രീതിയിൽ ലഭ്യമാക്കുമെന്നും അദ്ദേഹം വ്യക്തമാക്കി. പരിപാടിക്കിടെ ഉദ്ഘാടനം ചെയ്ത 'സെക്യൂരിറ്റി ഓപ്പറേഷൻസ് സെൻ്റർ' അർബൻ സഹകരണ ബാങ്കുകൾക്ക് 24 മണിക്കൂറും സൈബർ നിരീക്ഷണവും തത്സമയ മാർഗ്ഗനിർദ്ദേശവും സുരക്ഷയും നൽകും. ബാങ്കുകളെയും ഉപഭോക്താക്കളെയും നിക്ഷേപകരെയും ഡിജിറ്റൽ ഭീഷണികളിൽ നിന്ന് സംരക്ഷിക്കുന്നതിന് അംഗത്വം അത്യന്താപേക്ഷിതമാണെന്ന് അദ്ദേഹം ചൂണ്ടിക്കാട്ടി.

ഈ മാതൃസ്ഥാപനത്തിൻ്റെയും സെക്യൂരിറ്റി ഓപ്പറേഷൻ സെൻ്ററിൻ്റെയും അംഗങ്ങളാകാൻ എല്ലാ അർബൻ സഹകരണ ബാങ്കുകളോടും ശ്രീ അമിത് ഷാ അഭ്യർത്ഥിച്ചു. ഒരു ബാങ്കിൻ്റെ ശാഖകളുടെ എണ്ണവുമായി ബന്ധപ്പെടുത്തി വേണം അംഗത്വ ഫീസ് നിശ്ചയിക്കാനെന്നും, അങ്ങനെ ഒരൊറ്റ ശാഖ മാത്രമുള്ള ഒരു ചെറിയ ബാങ്കിന് പോലും അംഗമാകാൻ സാധിക്കുമെന്നും അദ്ദേഹം പറഞ്ഞു. ലാഭമുണ്ടാക്കുകയല്ല മാതൃസ്ഥാപനത്തിൻ്റെ ലക്ഷ്യമെന്നും, മറിച്ച് അർബൻ സഹകരണ ബാങ്കുകളെ വ്യവസ്ഥാപിതമാക്കുകയും ദേശീയ, അന്തർദേശീയ തലങ്ങളിൽ മത്സരിക്കാൻ അവരെ സജ്ജരാക്കുകയും പ്രതിസന്ധി ഘട്ടങ്ങളിൽ സഹായിക്കുകയുമാണെന്ന് അദ്ദേഹം വ്യക്തമാക്കി.

രാജ്യത്തുടനീളമുള്ള 1,400 അർബൻ സഹകരണ ബാങ്കുകളിലായി ഏകദേശം 6 ലക്ഷം കോടി രൂപയുടെ നിക്ഷേപമുണ്ടെന്നും ദേശീയ വികസനത്തിൽ ഈ ബാങ്കുകൾ വളരെ പ്രധാനപ്പെട്ട പങ്കാണ് വഹിക്കുന്നതെന്നും കേന്ദ്ര ആഭ്യന്തര, സഹകരണ മന്ത്രി പറഞ്ഞു. ചെറുകിട കച്ചവടക്കാർ, വ്യാപാരികൾ, കുടിൽ വ്യവസായങ്ങൾ, എം.എസ്.എം.ഇ-കൾ, പ്രാദേശിക സംരംഭകർ, വനിതാ സ്വയംസഹായ സംഘങ്ങൾ, മധ്യവർഗ്ഗം എന്നിവരുടെ ആവശ്യങ്ങൾ നിറവേറ്റുന്നതിനായി അർബൻ സഹകരണ ബാങ്കുകൾ ഫലപ്രദമായി ചെറിയ വായ്പകൾ നൽകുന്നു. വലിയ വാണിജ്യ ബാങ്കുകൾക്ക് സമൂഹത്തിലെ ഈ വിഭാഗങ്ങളിലേക്ക് ഇത്രയും അടുപ്പത്തിൽ പ്രയോജനപ്രദമായി ഇറങ്ങിച്ചെല്ലാൻ കഴിയില്ല. താലൂക്ക് തലത്തിൽ സ്ഥാപിച്ചിട്ടുള്ള ഒരു അർബൻ സഹകരണ ബാങ്ക്, ആ പ്രദേശത്തുടനീളമുള്ള തൊഴിൽ, സ്വയംതൊഴിൽ മേഖലകളിൽ ഏർപ്പെട്ടിരിക്കുന്നവരുടെ സാമ്പത്തിക ആവശ്യങ്ങൾ നിറവേറ്റുന്നതിനുള്ള ഒരു മാർഗ്ഗമായി മാറുന്നു.

ഒരു അർബൻ സഹകരണ ബാങ്കിൻ്റെ ചെയർമാൻ എന്ന നിലയിലുള്ള തൻ്റെ മുൻപരിചയം പങ്കുവെച്ചുകൊണ്ട്, ചെറിയ വായ്പകളുടെ കാര്യത്തിൽ തിരിച്ചടവ് അങ്ങേയറ്റം ശക്തമാണെന്ന് ശ്രീ അമിത് ഷാ പറഞ്ഞു. കാരണം സാധാരണക്കാരും കുറഞ്ഞ വരുമാനക്കാരുമായ വായ്പക്കാർ തങ്ങളുടെ ബാധ്യതകൾ നിറവേറ്റുന്നതിൽ കൂടുതൽ ആത്മാർത്ഥത പുലർത്തുന്നവരാണ്. ഈടോ ഗ്യാരൻ്റിയോ ഇല്ലാതെ 2.5 ലക്ഷം രൂപ വരെയുള്ള വായ്പകൾ നൽകാൻ അന്ന് തൻ്റെ ബാങ്ക് തീരുമാനിച്ചിരുന്നുവെന്നും അദ്ദേഹം വ്യക്തമാക്കി.

ഗ്യാരൻ്റിയോ ഈടോ ഇല്ലാതെ ചെറിയ വായ്പകൾ നൽകുന്ന തൻ്റെ ബാങ്കിൻ്റെ പദ്ധതി തുടർന്നുപോരുന്നുണ്ടെന്നും ഇതിൻ്റെ പരിധി 2.5 ലക്ഷം രൂപയിൽ നിന്ന് 5 ലക്ഷം രൂപയായി ഉയർത്തിയിട്ടുണ്ടെന്നും കേന്ദ്ര ആഭ്യന്തര, സഹകരണ മന്ത്രി പറഞ്ഞു. പദ്ധതിക്ക് കീഴിൽ വിതരണം ചെയ്ത തുക മുഴുവൻ പലിശ സഹിതം തിരിച്ചുകിട്ടിയിട്ടുണ്ടെന്നും വായ്പയെടുത്ത വ്യക്തിയുടെ മരണം പോലുള്ള അപൂർവ്വ സാഹചര്യങ്ങളിൽ മാത്രമാണ് തിരിച്ചടവ് മുടങ്ങിയിട്ടുള്ളതെന്നും അദ്ദേഹം ചൂണ്ടിക്കാട്ടി. വായ്പ എത്ര ചെറുതാണോ അത്രയും മികച്ചതായിരിക്കും അതിൻ്റെ തിരിച്ചടവെന്നും ചെറിയ വായ്പക്കാർ തങ്ങളുടെ സാമ്പത്തിക ബാധ്യതകൾ പൂർത്തീകരിക്കുന്നതിൽ അങ്ങേയറ്റം ആത്മാർത്ഥതയുള്ളവരാണെന്നും ഈ അനുഭവം തെളിയിക്കുന്നുവെന്ന് ശ്രീ അമിത് ഷാ പറഞ്ഞു.

ഇന്ത്യയുടെ സാമ്പത്തിക രംഗത്ത് സ്വയംതൊഴിൽ അവസരങ്ങൾ സൃഷ്ടിക്കുന്നതിൽ സഹകരണ മേഖലയ്ക്ക് വലിയ പങ്കുണ്ടെന്ന് ശ്രീ അമിത് ഷാ പറഞ്ഞു. വലിയൊരു സംരംഭം കെട്ടിപ്പടുക്കാൻ ഒരു വ്യക്തിയുടെ കൈയ്യിൽ നിന്ന് വലിയ തുകയുടെ മൂലധനം ആവശ്യമില്ല. സഹകരണ പ്രസ്ഥാനത്തിലൂടെ സാധാരണക്കാരായ മനുഷ്യരെ ഒന്നിച്ചു കൊണ്ടുവരികയും അവരുടെ ചെറിയ സംഭാവനകൾ സമാഹരിക്കുകയും ചെയ്യുന്നതിലൂടെ വലിയ മൂലധനം രൂപീകരിക്കാനും അതിൻ്റെ അടിത്തറയിൽ വലിയ ബിസിനസ്സ് സ്ഥാപനങ്ങൾ പടുത്തുയർത്താനും സാധിക്കും. ഇതാണ് സഹകരണത്തിൻ്റെ അടിസ്ഥാന കരുത്തെന്നും അദ്ദേഹം പറഞ്ഞു.

അമുൽ, ഇഫ്കോ, ക്രിബ്കോ, ലിജ്ജത് പപ്പട് എന്നിവ ഉദാഹരണമായി ചൂണ്ടിക്കാട്ടിയ കേന്ദ്ര ആഭ്യന്തര, സഹകരണ മന്ത്രി, അവയുടെ വിജയം ഏതെങ്കിലും ഒരു വൻകിട നിക്ഷേപകൻ്റെ നിക്ഷേപം കൊണ്ടല്ല, മറിച്ച് ലക്ഷക്കണക്കിന് ചെറിയ അംഗങ്ങളുടെ കൂട്ടായ പങ്കാളിത്തം കൊണ്ടാണെന്ന് പറഞ്ഞു. അമുലിന് ഇന്ന് ഏകദേശം 1.25 ലക്ഷം കോടി രൂപയുടെ വിറ്റുവരവുണ്ടെന്നും ഏകദേശം 33 ലക്ഷം സ്ത്രീകൾക്ക് അതിൽ പങ്കാളിത്തമുണ്ടെന്നും അദ്ദേഹം പറഞ്ഞു. ചെറിയ മൂലധനത്തെയും വിപുലമായ ജനപങ്കാളിത്തത്തെയും കോർത്തിണക്കി ഒരു വലിയ സാമ്പത്തിക ശക്തിയാക്കി മാറ്റാൻ സഹകരണ മേഖലയ്ക്ക് കഴിയുമെന്നാണ് ഇത് തെളിയിക്കുന്നത്. ഡിജിറ്റൽ ബാങ്കിംഗ്, തത്സമയ പേയ്‌മെൻ്റുകൾ, സൈബർ-ഡാറ്റാ സുരക്ഷ, എ.ഐ അധിഷ്ഠിത തട്ടിപ്പ് തടയൽ സംവിധാനങ്ങൾ, ആധുനിക ബാങ്കിംഗിന് ആവശ്യമായ നിയന്ത്രണ മാനദണ്ഡങ്ങൾ പാലിക്കൽ എന്നിവയിൽ ഈ മാതൃസ്ഥാപനം അർബൻ സഹകരണ ബാങ്കുകളെ സഹായിക്കുമെന്നും അദ്ദേഹം പറഞ്ഞു.

രാജ്യത്ത് ഏറ്റവും കൂടുതൽ അർബൻ സഹകരണ ബാങ്കുകളുള്ളത് മഹാരാഷ്ട്രയിലാണെന്ന് (449) ശ്രീ അമിത് ഷാ പറഞ്ഞു. മഹാരാഷ്ട്ര, ഗുജറാത്ത്, ഗോവ, കർണാടക എന്നീ സംസ്ഥാനങ്ങൾ ചേർന്നാണ് രാജ്യത്തെ അർബൻ സഹകരണ ബാങ്കുകളുടെ ഭൂരിഭാഗവും പ്രതിനിധീകരിക്കുന്നത്. പ്രവർത്തനങ്ങളുടെ കേന്ദ്രീകരണവും അർബൻ സഹകരണ ബാങ്കിംഗ് മേഖലയുടെ വിപുലമായ സാന്നിധ്യവും കണക്കിലെടുത്ത് NUCFDC-യുടെ ആസ്ഥാനം ഡൽഹിയിൽ നിന്ന് മഹാരാഷ്ട്രയിലേക്ക് മാറ്റുമെന്നും അദ്ദേഹം അറിയിച്ചു.

അർബൻ സഹകരണ ബാങ്കുകൾക്ക് സാങ്കേതിക അടിസ്ഥാന സൗകര്യങ്ങൾ, സൈബർ സുരക്ഷ, പേയ്‌മെൻ്റ് സംവിധാനങ്ങൾ, ആധുനിക ബാങ്കിംഗ് സൗകര്യങ്ങൾ എന്നിവ ഏറ്റവും താങ്ങാനാവുന്ന ചെലവിൽ ലഭ്യമാക്കുക എന്നതാണ് മാതൃ സംഘടനയുടെ ലക്ഷ്യമെന്ന് കേന്ദ്ര ആഭ്യന്തര, സഹകരണ മന്ത്രി വ്യക്തമാക്കി. രാജ്യത്തെ 1,400 അർബൻ സഹകരണ ബാങ്കുകളും ഈ സേവനങ്ങളും സോഫ്റ്റ്‌വെയറുകളും സാങ്കേതിക സംവിധാനങ്ങളും വ്യക്തിഗതമായി വാങ്ങുകയും സ്വതന്ത്രമായി പരിപാലിക്കുകയും ചെയ്താൽ അതിനുള്ള ചെലവ് വളരെ കൂടുതലായിരിക്കും. എന്നാൽ ഇതിന് വിപരീതമായി, മാതൃസ്ഥാപനം എല്ലാ ബാങ്കുകൾക്കും വേണ്ടി കൂട്ടായ കരാറുകളിൽ ഏർപ്പെടുകയും ആവശ്യമായ സോഫ്റ്റ്‌വെയറുകൾ വാങ്ങുകയും പരിപാലന ചുമതല ഏറ്റെടുക്കുകയും ചെയ്യും. ഇത് ചെലവ് ഗണ്യമായി കുറയ്ക്കുകയും ചെറിയ ബാങ്കുകൾക്ക് ആധുനിക സാങ്കേതികവിദ്യയുടെ പ്രയോജനം ലഭിക്കാൻ അവസരമൊരുക്കുകയും ചെയ്യും.

മാതൃ സംഘടനയുടെ വികസനത്തിനും പുതിയ ഓഫീസിൻ്റെ ഉദ്ഘാടനത്തിനുമൊപ്പം സഹകാർ സി.ബി.എസ്, ഷെയർഡ് പേയ്‌മെൻ്റ് സർവീസസ്, ലോൺ ഒറിജിനേഷൻ സിസ്റ്റം, സഹകാർ ക്ലൗഡ്, സെക്യൂരിറ്റി ഓപ്പറേഷൻസ് സെൻ്റർ തുടങ്ങിയ നിരവധി സേവനങ്ങൾ ഒരേസമയം മുന്നോട്ട് കൊണ്ടുപോകുമെന്ന് ശ്രീ അമിത് ഷാ പറഞ്ഞു. കൂടാതെ മ്യൂൾഹണ്ടർ, മറ്റ് എ.ഐ അധിഷ്ഠിത സംവിധാനങ്ങൾ, ഗ്രൂപ്പ് സൈബർ ഇൻഷുറൻസ്, എൻ.എഫ്.എസ്.യു-വിൻ്റെ പിന്തുണയോടെ ഏറ്റവും ചെറിയ ബാങ്കിലേക്ക് പോലും ഡിജിറ്റൽ ഫോറൻസിക് ശേഷി വ്യാപിപ്പിക്കൽ, ആധാർ അധിഷ്ഠിത സേവനങ്ങൾ, നിയന്ത്രണ ചട്ടങ്ങളുടെ ഓട്ടോമേഷൻ, ആധുനിക അപകടസാധ്യത പരിപാലന ചട്ടക്കൂട് എന്നിവ വികസിപ്പിക്കും. ഈ സംരംഭങ്ങളെല്ലാം അർബൻ സഹകരണ ബാങ്കുകളെ കൂടുതൽ സുരക്ഷിതവും പ്രാപ്തവും സുതാര്യവും മത്സരക്ഷമവുമാക്കുമെന്ന് അദ്ദേഹം പറഞ്ഞു.

കഴിഞ്ഞ അഞ്ച് വർഷത്തിനിടയിൽ കേന്ദ്ര ഗവണ്മെൻ്റും റിസർവ് ബാങ്ക് ഓഫ് ഇന്ത്യയും തമ്മിലുള്ള പരസ്പര വിശ്വാസത്തിൻ്റെയും ചർച്ചകളുടെയും അടിസ്ഥാനത്തിൽ അർബൻ സഹകരണ ബാങ്കുകളുമായി ബന്ധപ്പെട്ട നിരവധി പ്രശ്നങ്ങൾ പരിഹരിക്കപ്പെട്ടിട്ടുണ്ടെന്ന് കേന്ദ്ര ആഭ്യന്തര, സഹകരണ മന്ത്രി പറഞ്ഞു. പ്രത്യേക അനുമതിയില്ലാതെ ബാങ്കുകൾക്ക് 15 ശതമാനം വരെ അധിക ശാഖകൾ തുറക്കാൻ അനുവാദം നൽകൽ, വാതിൽപ്പടി ബാങ്കിംഗ്, യോഗ്യരായ ടയർ-3 ബാങ്കുകൾക്ക് ഷെഡ്യൂൾഡ് ബാങ്ക് പദവി ലഭിക്കുന്നതിനുള്ള നടപടിക്രമങ്ങൾ ലളിതമാക്കൽ, ആർ.ബി.ഐ-യിൽ നോഡൽ ഓഫീസറെ നിയമിക്കൽ, മുൻഗണനാ വിഭാഗ വായ്പാ ലക്ഷ്യം 75 ശതമാനത്തിൽ നിന്ന് 60 ശതമാനമായി കുറയ്ക്കൽ, ഭവന വായ്പാ പരിധി ഉയർത്തൽ, ഒറ്റത്തവണ തീർപ്പാക്കൽ സൗകര്യം നീട്ടിനൽകൽ എന്നിവ ഇതിൽ ഉൾപ്പെടുന്നു.

അർബൻ സഹകരണ ബാങ്കുകളും റിസർവ് ബാങ്ക് ഓഫ് ഇന്ത്യയും തമ്മിൽ മുൻപ് നിലനിന്നിരുന്ന പരസ്പര സംശയങ്ങളുടെയും അവിശ്വാസത്തിൻ്റെയും സാഹചര്യത്തിൽ നിന്ന് മാറ്റം അനിവാര്യമാണെന്ന് ശ്രീ അമിത് ഷാ പറഞ്ഞു. സഹകരണ മന്ത്രിയെന്ന നിലയിലുള്ള തൻ്റെ അഞ്ചു വർഷത്തെ അനുഭവത്തിൽ, സഹകരണ മേഖല വിശ്വാസ്യതയോടെയും സുതാര്യതയോടെയും മുന്നോട്ട് പോയപ്പോഴൊക്കെ റിസർവ് ബാങ്ക് ഓഫ് ഇന്ത്യ പൂർണ്ണ പിന്തുണ നൽകിയിട്ടുണ്ടെന്ന് അദ്ദേഹം വ്യക്തമാക്കി. അർബൻ സഹകരണ ബാങ്കുകൾക്കായുള്ള മാതൃ സംഘടന രൂപീകരിച്ചത് ഈ വിശ്വാസാധിഷ്ഠിത സഹകരണത്തിൻ്റെ ഏറ്റവും വലിയ ഉദാഹരണമാണ്.

അർബൻ സഹകരണ ബാങ്കുകൾ വർഷങ്ങളായി പുതിയ ശാഖകൾ തുറക്കുന്നതിൽ ബുദ്ധിമുട്ടുകൾ നേരിട്ടിരുന്നുവെന്നും എന്നാൽ ഇപ്പോൾ പ്രത്യേക അനുമതിയില്ലാതെ തന്നെ ശാഖകളുടെ ശൃംഖല 15 ശതമാനം വരെ വികസിപ്പിക്കാൻ അനുവാദം നൽകിയിട്ടുണ്ടെന്നും കേന്ദ്ര ആഭ്യന്തര, സഹകരണ മന്ത്രി പറഞ്ഞു. മുമ്പ് ഷെഡ്യൂൾഡ് ബാങ്കുകൾ അല്ലാത്ത അർബൻ സഹകരണ ബാങ്കുകൾക്ക് വാതിൽപടി ബാങ്കിംഗ് സേവനങ്ങൾ ലഭ്യമായിരുന്നില്ല. എന്നാൽ ഇപ്പോൾ ഉപഭോക്താക്കളുടെ വീട്ടുപടിക്കൽ ഡിമാൻഡ് ഡ്രാഫ്റ്റുകൾ, ലൈഫ് സർട്ടിഫിക്കറ്റുകൾ തുടങ്ങിയ സേവനങ്ങൾ നൽകാൻ അവയ്ക്ക് സാധിക്കും. റിസർവ് ബാങ്ക് ഓഫ് ഇന്ത്യ ആക്റ്റിൻ്റെ രണ്ടാം ഷെഡ്യൂളിൽ ഉൾപ്പെടുത്തി യോഗ്യരായ ടയർ-3 സഹകരണ ബാങ്കുകൾക്ക് ഷെഡ്യൂൾഡ് ബാങ്ക് പദവി നേടുന്നതിനുള്ള വഴിയും ലളിതമാക്കിയിട്ടുണ്ട്.

റിസർവ് ബാങ്ക് ഓഫ് ഇന്ത്യയുടെ രൂപീകരണത്തിന് ശേഷം ആദ്യമായി, അർബൻ സഹകരണ ബാങ്കിംഗ് മേഖലയുമായി സ്ഥിരമായി സംവദിക്കുന്നതിനായി ഒരു നോഡൽ ഓഫീസറെ നിയമിച്ചിട്ടുണ്ടെന്ന് ശ്രീ അമിത് ഷാ പറഞ്ഞു. മുൻഗണനാ വിഭാഗ വായ്പാ ലക്ഷ്യം 75 ശതമാനത്തിൽ നിന്ന് 60 ശതമാനമായി കുറയ്ക്കുകയും അർബൻ സഹകരണ ബാങ്കുകളുടെ ഭവന വായ്പാ പരിധി വർദ്ധിപ്പിക്കുകയും ചെയ്തിട്ടുണ്ട്. വനിതാ വായ്പക്കാർക്ക് നിർണ്ണയിച്ചിരുന്ന 2 ലക്ഷം രൂപ പരിധിയും സ്വർണ്ണപ്പണയ വായ്പകൾക്ക് ബാധകമായിരുന്ന പരിധിയും ഒഴിവാക്കിയിട്ടുണ്ട്.

നിഷ്‌ക്രിയ ആസ്തി അക്കൗണ്ടുകളുമായി ബന്ധപ്പെട്ട വ്യവസ്ഥകൾ പാലിക്കുന്നതിനായി അർബൻ സഹകരണ ബാങ്കുകൾക്ക് ഘട്ടംഘട്ടമായുള്ള 'ഗ്ലൈഡ് പാത്ത്' അനുവദിച്ചിട്ടുണ്ടെന്നും, ഇതിലൂടെ സാമ്പത്തിക ഭാരം മുഴുവൻ ഒരൊറ്റ വർഷം കൊണ്ട് ബാങ്കുകൾക്ക് മേൽ വരില്ലെന്നും കേന്ദ്ര ആഭ്യന്തര, സഹകരണ മന്ത്രി പറഞ്ഞു. മുമ്പ് വാണിജ്യ ബാങ്കുകൾക്കും ദേശസാൽകൃത ബാങ്കുകൾക്കും മാത്രം ലഭ്യമായിരുന്ന ഒറ്റത്തവണ തീർപ്പാക്കൽ സൗകര്യം ഇപ്പോൾ അർബൻ സഹകരണ ബാങ്കുകൾക്കും ലഭ്യമാക്കിയിട്ടുണ്ട്. വ്യക്തിഗത ഭവന വായ്പാ പരിധി വർദ്ധിപ്പിച്ചതിനൊപ്പം ലൈസൻസ് സംബന്ധമായ ഫീസുകളും കുറച്ചിട്ടുണ്ട്.

അർബൻ സഹകരണ ബാങ്കുകൾ, സംസ്ഥാന സഹകരണ ബാങ്കുകൾ, ജില്ലാ സഹകരണ ബാങ്കുകൾ എന്നിവയ്ക്ക് 'മെമ്പർ ലെൻഡിംഗ് ഇൻസ്റ്റിറ്റ്യൂഷനുകൾ' എന്ന പദവി നൽകിയിട്ടുണ്ടെന്നും, ഇത് 85 ശതമാനം വരെ റിസ്ക് കവറേജും ഈടില്ലാത്ത വായ്പകൾ നൽകാനുള്ള സൗകര്യവും ഉറപ്പാക്കുന്നുവെന്നും ശ്രീ അമിത് ഷാ പറഞ്ഞു. കൂടാതെ, സഹകരണ സംഘങ്ങൾക്കായുള്ള മുൻഗണനാ വിഭാഗ വായ്പാ പരിധി 5 ലക്ഷം രൂപയിൽ നിന്ന് 10 കോടി രൂപയായി ഉയർത്തി. ഈ പരിഷ്കാരങ്ങൾ അർബൻ സഹകരണ ബാങ്കുകൾക്ക് അവരുടെ സാമ്പത്തിക വ്യാപ്തി വർദ്ധിപ്പിക്കാനും ഉപഭോക്താക്കൾക്ക് മികച്ച വായ്പാ സൗകര്യങ്ങൾ നൽകാനും ആധുനിക ബാങ്കിംഗ് സംവിധാനത്തിൽ ഫലപ്രദമായി മത്സരിക്കാനും പ്രാപ്തി നൽകുമെന്ന് ശ്രീ അമിത് ഷാ പറഞ്ഞു.

കഴിഞ്ഞ അഞ്ച് വർഷത്തിനിടയിൽ റിസർവ് ബാങ്ക് ഓഫ് ഇന്ത്യയുമായുള്ള ഏകോപനത്തിലൂടെ, ശാഖകൾ തുറക്കുന്നതിനുള്ള അനുമതി, സാമ്പത്തിക യോഗ്യതാ മാനദണ്ഡങ്ങളിലെ ഇളവുകൾ എന്നിവയുൾപ്പെടെ അർബൻ സഹകരണ ബാങ്കുകളുമായി ബന്ധപ്പെട്ട നിരവധി വിഷയങ്ങൾ പരിഹരിച്ചതായി കേന്ദ്ര ആഭ്യന്തര, സഹകരണ മന്ത്രി പറഞ്ഞു. ബാങ്കുകൾ ശരിയായി പ്രവർത്തിക്കുന്നുണ്ടെന്നും നിയമങ്ങൾ പാലിച്ചാണ് പ്രവർത്തിക്കുന്നതെന്നും നിക്ഷേപകരുടെ പണം പൂർണ്ണമായും സുരക്ഷിതമാണെന്നും ഉറപ്പാക്കാൻ നിയന്ത്രണ ഏജൻസി എന്ന നിലയിൽ റിസർവ് ബാങ്ക് ഓഫ് ഇന്ത്യക്ക് ഉത്തരവാദിത്വമുണ്ടെന്ന് മനസ്സിലാക്കണമെന്നും അദ്ദേഹം പറഞ്ഞു. ഇതിനായിട്ടാണ് അർബൻ സഹകരണ ബാങ്കുകൾക്കായുള്ള മാതൃസ്ഥാപനം സ്ഥാപിച്ചിരിക്കുന്നത്.

രാജ്യത്തെ 1,400 അർബൻ സഹകരണ ബാങ്കുകളും മാതൃസംഘടനയിൽ അംഗങ്ങളാകണമെന്ന് ശ്രീ അമിത് ഷാ പറഞ്ഞു. ബാങ്കുകൾ പ്രവർത്തനങ്ങളിൽ സുതാര്യത കൊണ്ടുവരികയും ആധുനിക സാങ്കേതികവിദ്യ സ്വീകരിക്കുകയും ജീവനക്കാർക്ക് പരിശീലനം നൽകുകയും ഉപഭോക്താക്കൾക്ക് എല്ലാത്തരം ആധുനിക ബാങ്കിംഗ് സൗകര്യങ്ങളും നൽകുകയും വേണം; അതുവഴി അവയ്ക്ക് മത്സരശേഷി നിലനിർത്താനും പ്രവർത്തനങ്ങൾ വിപുലീകരിക്കാനും സാധിക്കും. നിലവിൽ 1,400 അർബൻ സഹകരണ ബാങ്കുകളിൽ 650 എണ്ണം മാതൃസംഘടനയിൽ അംഗങ്ങളായിട്ടുണ്ടെന്നും ഇത് അംഗത്വത്തിൻ്റെ 50 ശതമാനത്തോളം വരുമെന്നും അദ്ദേഹം പറഞ്ഞു. ചെറിയ ബാങ്കുകൾക്കും ഒരൊറ്റ ശാഖ മാത്രമുള്ള ബാങ്കുകൾക്കും അംഗത്വ ഫീസ് കൂടുതൽ താങ്ങാനാവുന്നതാക്കി മാറ്റാൻ NUCFDC ശ്രമിക്കുമെന്ന് അദ്ദേഹം പ്രതീക്ഷ പ്രകടിപ്പിച്ചു. അടുത്ത ഒരു വർഷത്തിനുള്ളിൽ രാജ്യത്തുടനീളമുള്ള 100 ശതമാനം അർബൻ സഹകരണ ബാങ്കുകളെയും മാതൃസംഘടനയുടെ ശൃംഖലയിലേക്ക് കൊണ്ടുവരുന്നതിനുള്ള ഉത്തരവാദിത്വo ഏറ്റെടുക്കണമെന്ന് രാജ്യത്തുടനീളമുള്ള അർബൻ സഹകരണ ബാങ്ക് ഫെഡറേഷനുകളുടെ ചെയർമാന്മാരോടും ഭാരവാഹികളോടും ശ്രീ അമിത് ഷാ ആഹ്വാനം ചെയ്തു.

2047-ഓടെ ഇന്ത്യയെ ആഗോള സമൃദ്ധിയുടെ ഉന്നതിയിൽ എത്തിക്കുക, എല്ലാ മേഖലകളിലും രാജ്യത്തെ ഒന്നാമതാക്കുക എന്നീ ലക്ഷ്യങ്ങൾ പ്രധാനമന്ത്രി ശ്രീ നരേന്ദ്ര മോദി മുന്നോട്ടുവെച്ചിട്ടുണ്ടെന്ന് ശ്രീ അമിത് ഷാ പറഞ്ഞു. ഇന്ത്യയെ പുരോഗതിയുള്ളതാക്കണമെങ്കിൽ ഓരോ ഇന്ത്യക്കാരനെയും സമൃദ്ധനാക്കണമെന്നും അതിനായി സ്വയംതൊഴിലിൻ്റെ ശക്തമായ ഒരു സംവിധാനം പടുത്തുയർത്തണമെന്നും അദ്ദേഹം പറഞ്ഞു. ഈ ലക്ഷ്യം കൈവരിക്കുന്നതിൽ അർബൻ സഹകരണ ബാങ്കുകൾക്ക് സുപ്രധാന പങ്ക് വഹിക്കാനാകും. 'സഹകാർ സേ സമൃദ്ധി' (സഹകരണത്തിലൂടെ സമൃദ്ധി) എന്നത് ബാങ്കുകളെ മാത്രം സമ്പന്നമാക്കലല്ല, മറിച്ച് ബാങ്കുകളുടെയും സ്വയംതൊഴിൽ കണ്ടെത്തുന്ന അവയുടെ ഉപഭോക്താക്കളുടെയും സമൃദ്ധി ഉറപ്പാക്കലാണ്.

ഈ മാതൃസംഘടന ഏറ്റവും ചെറിയ പട്ടണങ്ങളുടെ പോലും വികസന വാഹനമായി മാറുമെന്നും 'സഹകാർ സേ സമൃദ്ധി' എന്ന വിപ്ലവത്തിന് പുതിയ വേഗത നൽകുമെന്നും കേന്ദ്ര ആഭ്യന്തര, സഹകരണ മന്ത്രി ആത്മവിശ്വാസം പ്രകടിപ്പിച്ചു. മാതൃസംഘടന എന്ന സ്വപ്നം യാഥാർത്ഥ്യമാക്കുന്നതിൽ നൽകിയ സംഭാവനകൾക്ക് അർബൻ സഹകരണ ബാങ്കുകളുടെ ചെയർമാൻമാർക്കും ഭരണസമിതി അംഗങ്ങൾക്കും അദ്ദേഹം നന്ദി രേഖപ്പെടുത്തി.

ഇന്ത്യൻ സ്വാതന്ത്ര്യത്തിൻ്റെ ശതാബ്ദി വർഷമായ 2047-ഓടെ രാജ്യം സമൃദ്ധിയുടെ കൊടുമുടിയിലെത്തണമെന്നും എല്ലാ മേഖലകളിലും ഒന്നാം സ്ഥാനത്തെത്തണമെന്നും പ്രധാനമന്ത്രി ശ്രീ നരേന്ദ്ര മോദി ദൃഢനിശ്ചയം ചെയ്തിട്ടുണ്ടെന്ന് ശ്രീ അമിത് ഷാ പറഞ്ഞു. ഇന്ത്യ സമൃദ്ധമാകാൻ ഓരോ ഇന്ത്യക്കാരനും സമൃദ്ധനാകേണ്ടതുണ്ട്. കേവലം മൂലധന വിപണിയിലൂടെ മാത്രം സമൃദ്ധി എല്ലാ പൗരന്മാരിലേക്കും എത്തിക്കാൻ കഴിയില്ല; വിപുലവും ശക്തവുമായ സ്വയംതൊഴിൽ സംവിധാനം കൂടി രാജ്യത്ത് കെട്ടിപ്പടുക്കേണ്ടതുണ്ട്. ചെറിയ വ്യാപാരികൾക്കും സംരംഭകർക്കും സ്വയംതൊഴിലിൽ ഏർപ്പെട്ടിരിക്കുന്നവർക്കും സാമ്പത്തിക പിന്തുണ നൽകിക്കൊണ്ട് ഈ സംവിധാനത്തെ ശക്തിപ്പെടുത്താൻ അർബൻ സഹകരണ ബാങ്കുകൾക്ക് വലിയ പങ്കുവഹിക്കാൻ കഴിയും.

അർബൻ സഹകരണ ബാങ്കുകളുടെ പശ്ചാത്തലത്തിൽ, ഗവണ്മെൻ്റിനെ സംബന്ധിച്ച് 'സമൃദ്ധി' എന്നത് ബാങ്കുകളെ സാമ്പത്തികമായി ശക്തിപ്പെടുത്തുക എന്നത് മാത്രമല്ല; സ്വയംതൊഴിലും ഉപജീവനമാർഗ്ഗങ്ങളും സൃഷ്ടിക്കുന്ന ഉപഭോക്താക്കളെ സമൃദ്ധരാക്കുക എന്നത് കൂടിയാണെന്ന് കേന്ദ്ര ആഭ്യന്തര, സഹകരണ മന്ത്രി പറഞ്ഞു. ഉപഭോക്താവിൻ്റെയും ബാങ്കിൻ്റെയും സമൃദ്ധിയാണ് 'സഹകാർ സേ സമൃദ്ധി'യുടെ യഥാർത്ഥ ആശയം. അർബൻ സഹകരണ ബാങ്കുകൾക്കായുള്ള മാതൃ സംഘടനയുടെ ഈ വലിയ ലക്ഷ്യം കൈവരിക്കുന്നതിനായി അതിവേഗം പ്രവർത്തിക്കുകയാണെന്നും വരും കാലയളവിൽ ഇതിൻ്റെ പ്രവർത്തനങ്ങൾ കൂടുതൽ വികസിപ്പിക്കുമെന്നും അദ്ദേഹം വ്യക്തമാക്കി. മഹാരാഷ്ട്രയിലെ സൗകര്യപ്രദമായ സ്ഥലത്ത് ഇതിൻ്റെ ആസ്ഥാനം സ്ഥാപിക്കുന്നത് സംഘടനയുടെ പ്രവർത്തനക്ഷമത വർദ്ധിപ്പിക്കുകയും അർബൻ സഹകരണ ബാങ്കുകൾക്ക് കൂടുതൽ ഫലപ്രദമായ പിന്തുണ നൽകാൻ സഹായിക്കുകയും ചെയ്യും.

മാതൃ സംഘടന എന്ന സ്വപ്നം സാക്ഷാത്കരിക്കുന്നതിൽ നിർണായക പങ്കുവഹിച്ച രാജ്യത്തുടനീളമുള്ള അർബൻ സഹകരണ ബാങ്കുകളുടെ ചെയർമാൻമാർക്കും ഭരണസമിതി അംഗങ്ങൾക്കും ശ്രീ അമിത് ഷാ നന്ദി അറിയിച്ചു. അവരുടെ സഹകരണമില്ലാതെ സംഘടന സ്ഥാപിക്കാൻ കഴിയില്ലായിരുന്നുവെന്ന് അദ്ദേഹം പറഞ്ഞു. ഓഗസ്റ്റ് ക്രാന്തിയുടെ ചരിത്രദിനത്തിൽ മാതൃ സംഘടന അതിൻ്റെ പുതിയ ഓഫീസിലേക്ക് പ്രവർത്തനമാരംഭിച്ചത് പരാമർശിച്ച ശ്രീ അമിത് ഷാ, ഇവിടെ നിന്ന് 'സഹകാർ സേ സമൃദ്ധി' വിപ്ലവത്തിന് പുതിയ വേഗത ലഭിക്കുമെന്നും അർബൻ സഹകരണ ബാങ്കുകൾ രാജ്യത്തെ ഏറ്റവും ചെറിയ പട്ടണങ്ങളുടെ പോലും വികസനത്തിൻ്റെയും സമൃദ്ധിയുടെയും വാഹനങ്ങളായി മാറുമെന്നും പ്രത്യാശ പ്രകടിപ്പിച്ചു.

ചടങ്ങിൽ, റിസർവ് ബാങ്ക് ഓഫ് ഇന്ത്യയുടെ മുൻ ഡെപ്യൂട്ടി ജനറൽ മാനേജർ ശ്രീ ജി.പി. മിസ്ത്രി രചിച്ച ‘ ഓപ്പറേഷണൽ റിസ്ക് മാനേജ്മെൻ്റ് -എ പ്രാക്ടിക്കൽ ഗൈഡ് ടു അർബൻ കോഓപ്പറേറ്റീവ് ബാങ്ക്സ്’ എന്ന പുസ്തകവും, ഇന്ത്യയിലെ സഹകരണ ബാങ്കിംഗിൻ്റെ ചരിത്രപരമായ യാത്രയെക്കുറിച്ചുള്ള കോഫി-ടേബിൾ ബുക്കും കേന്ദ്ര ആഭ്യന്തര, സഹകരണ മന്ത്രി പ്രകാശനം ചെയ്തു. സഹകാർ സി.ബി.എസിൽ വിജയകരമായി പങ്കാളികളായ ആദ്യ ആറ് അർബൻ സഹകരണ ബാങ്കുകളുടെ പ്രതിനിധികളെ ശ്രീ അമിത് ഷാ ചടങ്ങിൽ ആദരിച്ചു.

***