ఈ రోజు (2026 ఆగస్టు 3) రాష్ట్రపతి భవన్‌లో రాష్ట్రపతి శ్రీమతి ద్రౌపదీ ముర్ముతో ఉజ్బెకిస్థాన్ రిపబ్లిక్ విదేశీ వ్యవహారాల మంత్రి సైదోవ్ బక్తియోర్ ఒదిలోవిచ్ సమావేశమయ్యారు.

రాష్ట్రపతి భవన్‌కు విచ్చేసిన ఒదిలోవిచ్‌కూ, ఆయన ప్రతినిధి బృందానికీ రాష్ట్రపతి స్వాగతం పలికారు. ప్రాచీన వాణిజ్య మార్గాల ఆధారంగా ఏర్పడిన బలమైన చారిత్రక, సాంస్కృతిక, నాగరిక సంబంధాలను భారత్, ఉజ్బెకిస్థాన్ పంచుకుంటున్నాయన్నారు. ద్వైపాక్షిక భాగస్వామ్యాన్ని వాస్తు కళ, భాష, ఆహారం, సంగీతం, మత సంప్రదాయాల్లో ఉన్న ఉమ్మడి వారసత్వం మరింత బలోపేతం చేస్తోందన్నారు.

రెండు దేశాల వ్యాపార సంస్థలకు ఒకరి మార్కెట్లపై మరొకరికి పెరుగుతున్న విశ్వాసాన్ని- ఉజ్బెక్ ప్రతినిధి బృందంలో ఉన్నత స్థాయి నాయకుల భాగస్వామ్యం, పర్యటన సందర్భంగా నిర్వహించిన భారత్–ఉజ్బెకిస్థాన్ బిజినెస్ ఫోరం ప్రతిబింబిస్తున్నదని రాష్ట్రపతి అన్నారు. మైనింగ్ రంగంలో ముఖ్యంగా అరుదైన ఖనిజాలు, వ్యవసాయం, ఫార్మాసూటికల్స్, ఇన్ఫర్మేషన్ టెక్నాలజీ రంగాల్లో భారత్, ఉజ్బెకిస్థాన్ మధ్య సహకారానికి ఉన్న అపారమైన అవకాశాల గురించి వివరించారు.

మన ఐటీఈసీ శిక్షణ కోర్సులు, ఇతర ఉపకార వేతన కార్యక్రమాల ద్వారా ఉజ్బెకిస్థాన్‌కు చెందిన 3,000 మందికి పైగా అధికారులు, నిపుణులు, విద్యార్థులు ప్రయోజనం పొందినందుకు రాష్ట్రపతి హర్షం వ్యక్తం చేశారు. అదే సమయంలో ఉజ్బెకిస్థాన్‌లో 16,000 మందికి పైగా భారతీయ విద్యార్థులు ఉన్నత విద్యను అభ్యసిస్తున్నారు. వారు రెండు దేశాల మధ్య స్నేహానికి ప్రతీకగా నిలుస్తూ పరస్పర అవగాహనను, బలమైన ప్రజా సంబంధాలను పెంపొందిస్తున్నారని రాష్ట్రపతి అన్నారు.

ఈ పర్యటన సందర్భంగా చేపట్టిన చర్చలు రెండు దేశాల మధ్య ఉన్న స్నేహసంబంధాలనూ, విశ్వాసాన్నీ, సహకారాన్నీ మరింత బలోపేతం చేస్తాయని నాయకులిద్దరూ అంగీకరించారు.  

***