U Myntri Sorkar Pdeng ba dei khmih ia ki tnat Kam Pohiing bad Kam Iatreilang Amit Shah u la ai jingmynjur ia ka jingpyllait lypa ia T 2,117.85 klur na ka bynta jong ka Sorkar Pdeng ha ka State Disaster Response Fund (SDRF) ban kyrshan ia ki jylla kiba shah ktah ha ka jingshlei um ha kane ka aiom slam jong u snem 2026. Hapoh ka jingialam jong u Myntri Rangbahduh Narendra Modi, ka Sorkar ka bteng ban kut jingmut ban ai lut ki jingiarap ia ki jylla na ka bynta ki sienjam ai jingiarap bad ka jingpyllait im bad kan bteng ban peit bniah ia ka jinglong jingman.

Naduh ba sdang ka aiom slap, ka Sorkar Pdeng ka la bteng ban peit bniah ia ka jingshlei um ha ka jingiatreilang bad ki Sorkar Jylla. Ka Sorkar Pdeng ka la dep ban ai lut ki jingiarap, ba kynthup ruh ia ka jingphah ia ki kynhun National Disaster Response Force (NDRF) bad ki jingai jingiarap na ka Tnat Kam Iada ri, haba donkam ia kane.

La phah ruh ia ki kynhun Inter-Ministerial Central Team (IMCT) sha Arunachal Pradesh bad Assam tban peit bniah ia ka jingjulor. Ki la don artylli ki jingleit jong ki IMCT sha Assam namar ka jingjur jong ka jingshlei um, bad katkum ka jingkyntu jong ka Sorkar Nagaland, dang pynbiang ia ka IMCT na ka bynta ka jylla.

Na ki hynniew tylli ki jylla ba shah ktah, ka Himachal Pradesh, Odisha bad Nagaland ki la ioh ia ka bynta kaba nyngkong jong ka SDRF na ka bynta u snem mang tyngka 2026-27. Ban pynthikna ia ka jingbiang ka pisa na ka bynta ki kam ai jingiarap, u Myntri ka tnat Kam Poh Iing u la ai jingmynjut ia ka jingpyllait lypa ia ka bynta kaba ar jong ka bynta jong ka Sorkar Pdeng ha ka SDRF sha ka Himachal Pradesh bad Odisha. Shuh shuh, namar ka jingdonkam kyrkieh ia ki jingdon jingem na ka bynta ki kam ai jingiarap, la ai jingmynjur ia ka jingpyllait ia ka bynta kaba nyngkong jong ka bynta jong ka Sorkar Pdeng ha ka SDRF na ka bynta ka Arunachal Pradesh, Assam, Gujarat bad Maharashtra da kaba pynduna ia ki kamram ba hap ban pyndep.

Ka jingai jingmynjur ia ka jingai jingiarap ia ki jylla ba shah ktah ka kynthup ia ka T 44.55 klur sha ka Arunachal Pradesh kum ka jingpyllait lypa ia ka bynta kaba nyngkong jong ka bynta jong ka Sorkar Pdeng ha ka SDRF na ka bynta u snem mang tyngka 2026-27. La ai T 379.35 klur ia ka Assam kum ka jingpyllait lypa ia ka bynta kaba nyngkong, katba la mynjur T 500 klur ia ka Gujarat kum ka jingpyllait lypa ia ka bynta kaba nyngkong. Ka Himachal Pradesh, kaba la ioh lypa ia ka bynta kaba nyngong jong ka SDRF na ka bynta u snem 2026-27, ka la ioh T 193.95 klur kum ka jingpyllait lypa ia ka bynta kaba ar jong ka bynta jong ka Sorkar Pdeng. La ai jingmynjur ba ka Maharashtra kan ioh T 500 klur kum ka jingpyllait lypa ia ka bynta kaba nyngkong. Ka Odisha, kaba la ioh lypa ia ka bynta kaba nyngkong, ka la ioh T 500 klur kum ka jingpyllait lypa ia ka bynta kaba ar. Lyngba kane ka jingai jingmynjur, la pynbiang haduh T 2,117.85 klur na ka bynta ki jylla kiba shah ktah ha ka jingshlei um ban pynkhlain ia ki sienjam ban ai jingiarap.

***