U Myntri Rangbahduh ka ri u Narendra Modi u la pynïaid ïa ka jingïalang kaba ar bad ki Secretary jong ka Sorkar India ha ka ïing sah jong u kaba don ha 7, Lok Kalyan Marg mynta ka sngi. U la bishar bniah ia ka rukom treikam ha ki por ban wan jong ki tnad sorkar pdeng bad ki tnad kiba iadei bad ka kam pla tyngka bad ka ioh ka kot, ka kam khaii pateng bad kam karkhana, bad ki kam ba iadei bad ka teknoloji. Ka jingialang ka pynleit jingmut halor ka jingpynsted ia ka jingiaid shaphrang sha ki thong jong ka Viksit Bharat.

U Myntri Rangbahduh u la kyntu ban pynleit jingmut bha ha kaba ïadei bad ka jingiatreilang hapoh ki Tnad sorkar pdeng bad ki Tnad, da kaba kyntu ïa ki ophisar ban trei da ka jingsngewthuh lang ïa ka jingthmu. U la ban jur ia ka jingdonkam ban weng ia baroh ki jingtrei marwei hapoh ka Sorkar khnang ba ki tnad kin treikam ha ka jingiatreilang bad ban pynmih ia ki jingmih kiba iasoh lang.

Haba ban jur ia ka jingdonkam jong ka jingsynshar kaba pynshong nongrim ha ki nongshong shnong, u Myntri Rangbahduh u la ong ba ki briew jong ka India kidei ban don ha ka bynta pdeng jong ka jingsynshar. U la pynkynmaw ba man la ka rai bad ka polisi dei ban ialam da ki jingmyntoi bad ki jingangnud jong ki nongshong shnong.

U Myntri Rangbahduh u la ban jur ba katba ka India ka dang bei tyngka shibun ha ki jingdon jingem, dei ban peit bniah mar katjuh ban kyntiew ia ki teknoloji ba shna hapoh ka ri. U la kren shaphang ka jingdonkam ban lah ban kyrshan dalade ha ka liang ka teknoloji bad ban tei ia ki bor treikam hapoh ka ri ha ki kam kiba kongsan.

U Myntri Rangbahduh u la ban jur ba ka jingshngain ha ka bording ka ïadei bad ka jingshngain jong ka ri, ka jingskhem ka ïoh ka kot bad ka bha ka miat jong ki nongshong shnong. U Myntri Rangbahduh u la ong ba ka India ka dei ban lah ban kyrshan dalade ha ka kam bording lyngba ka jingsaindur thymmai, ka jingbun bynta bad ka jingpynsted ban wanrah ia ka bor treikam.

Da kaba ban jur ba ki jingpynkylla kim dei tang ka kyntien hynrei ka jingdonkam kaba iaibteng na ka bynta ka jingsynshar kaba seisoh, u Myntri Rangbahduh u la ban jur ïa ka jingdonkam ban pynkylla ïa ki rukom treikam, ban kyntiew ïa ka rukom treikam bad ban pynkhlain ïa ka jingtreikam jong ki tnat treikam.

U Myntri Rangbahduh u la ong ba ka jingkiew ka jingpyndonkam ia ka teknoloji kadei ban don ryngkat bad ka jingpynleit jingmut kaba khlain halor ka jingshngain ha ka kam cyber ban iada ia ki lad digital bad ki jingdon jingem. U la ban jur ia ka jingdonkam ban peitngor man ka por pyrshah ia ki jingma kiba mih na ka kam cyber. U la kyntu ban pynshlur ia ka jingiashim bynta kaba kham bun jong ki samla nongsaindur bad ki nongseng kam seng jam ha kaba iadei bad ka jingshngain ha ka kam cyber bad u la ban jur ba kadei ban nang kylla sha ka jingiakhih ha ka ri baroh kawei.

U Myntri Rangbahduh u la ban jur ruh ïa ka jingdonkam jong ka jingïakren halor ki kam ba kongsan ha kaba ka ri ka shim ïa ki sienjam kiba kongsan, ban ïakhun pyrshah ïa ki jingtip kiba bakla bad ki jingtieng bym don nongrim kiba don ha kaba iadei bad kum kine ki sienjam.

U Myntri Rangbahduh u la ong dei ban pynkhreh ia ki jinghikai thymmai ha ka jingiatreilang bad ki karkhana ban pyntbit ia ki nongtrei da ki sap kiba donkam da ki karkhana kiba dang mih bad ki ban sa wan. U la ong ruh ba ka sorkar ka dei ban long beit kaba don ka mynsiem jong ki samla, kaba thymmai bad kaba peit shakhmat, kaba iai bteng ban kylla katkum ki jingeh bad ki lad ki lynti kiba dang mih da ka jinglong stet bad jingsaindur thymmai.

Ha kane ka jingialang la don ki jingiakren sani da ki Secretary halor ka jingiaid shaphrang, ki mat ba kongsan bad ki mat pyntreikam ha kylleng ki bynta jong ki. Ha kane ka jingialang la iadon lang u Cabinet Secretary, ki Secretary jong ki tnad sorkar pdeng bad ki tnad ba kongsan, bad ki heh ophisar na ka ophis jong u Myntri Rangbahduh ka ri.

***