માહિતી અને પ્રસારણ મંત્રાલય, ભારત સરકાર હેઠળ નેશનલ ફિલ્મ ડેવલપમેન્ટ કોર્પોરેશન (NFDC) દ્વારા આયોજિત WAVES ફિલ્મ બજારે જાહેરાત કરી છે કે WAVES ફિલ્મ બજાર સ્ક્રીનરાઇટર્સ લેબ 2025 માટે પસંદ કરાયેલા પ્રોજેક્ટ "યાયાવર – ધ માઇગ્રેટીંગ બર્ડ" એ આંતરરાષ્ટ્રીય સહયોગ માટે લેટર ઓફ ઇન્ટેન્ટ (LOI) પર હસ્તાક્ષર કર્યા છે.

આ પ્રોજેક્ટે આંતરરાષ્ટ્રીય પ્રેક્ષકો માટે આ ફિલ્મને સંયુક્ત રીતે વિકસાવવા, ફાઇનાન્સ કરવા, પ્રોડ્યુસ કરવા અને પોઝિશન કરવા માટે આઇરોલર મીડિયા એન્ડ એન્ટરટેઇનમેન્ટ–ભારત અને નોર્સ કી પ્રોડક્શન્સ-ફિનલેન્ડ સાથે ભાગીદારી કરી છે. લેટર ઓફ ઇન્ટેન્ટ હેઠળ, આઇરોલર મીડિયા એન્ડ એન્ટરટેઇનમેન્ટ લીડ પ્રોડ્યુસર તરીકે સેવા આપશે, જે ફાઇનાન્સિંગ, પ્રોડક્શન પ્લાનિંગ અને એક્ઝિક્યુશનનું નેતૃત્વ કરશે, જ્યારે નોર્સ કી પ્રોડક્શન્સ ફિનલેન્ડમાં પોસ્ટ-પ્રોડક્શન પ્રવૃત્તિઓનું નેતૃત્વ અને સુવિધા આપશે તેમજ પ્રોજેક્ટની આંતરરાષ્ટ્રીય પહોંચ અને ફેસ્ટિવલ પોઝિશનિંગને ટેકો આપશે.

આ સહયોગ ઉભરતી ભારતીય સ્ક્રીનરાઇટિંગ પ્રતિભાને પોષવામાં અને વૈશ્વિક સહયોગ માટે અર્થપૂર્ણ તકો ઊભી કરવામાં WAVES ફિલ્મ બજાર સ્ક્રીનરાઇટર્સ લેબની વધતી જતી અસરોને પ્રતિબિંબિત કરે છે. લેબમાંથી આંતરરાષ્ટ્રીય ભાગીદારી સુધીની પ્રોજેક્ટની પ્રગતિ એ સ્ક્રિપ્ટ ડેવલપમેન્ટથી આગળ વધીને લેખકોને ટેકો આપવા અને પ્રોડક્શન તથા આંતરરાષ્ટ્રીય ઉપયોગ માટેના માર્ગોને સુગમ બનાવવાની લેબની કટિબદ્ધતાને રેખાંકિત કરે છે.

NFDC ના મેનેજિંગ ડિરેક્ટર શ્રી પ્રકાશ મગદૂમે જણાવ્યું હતું કે, “મૂળ ભારતીય અવાજોને કૌશલ્ય, માર્ગદર્શન અને માર્કેટ એક્સેસ આપવા માટે સ્ક્રીનરાઇટર્સ લેબની વિભાવના તૈયાર કરવામાં આવી હતી જેથી તેઓ આગળ વધી શકે. લેબના રાઇટિંગ રૂમમાંથી કોઈ પ્રોજેક્ટને આંતરરાષ્ટ્રીય ભાગીદારી સુધી પહોંચતો જોવો એ બરાબર એ જ પરિણામ છે જેના માટે આ પ્રોગ્રામ ડિઝાઇન કરવામાં આવ્યો હતો.”

પ્રોજેક્ટના લેખક, દિગ્દર્શક અને નિર્માતા ડૉ. દર્શન અશ્વિન ત્રિવેદીએ જણાવ્યું હતું કે, “હું NFDC સ્ક્રીનરાઇટર્સ લેબનો આભારી છું. હું આઇરોલર, ભારત અને નોર્સ કી, ફિનલેન્ડ સાથેના સહયોગથી ઉત્સાહિત છું.”

WAVES ફિલ્મ બજાર આ સિદ્ધિ બદલ ડૉ. દર્શન અશ્વિન ત્રિવેદી અને સહયોગી નિર્માતાઓને અભિનંદન આપે છે અને "યાયાવર – ધ માઇગ્રેટીંગ બર્ડ" વૈશ્વિક મંચ તરફ તેની યાત્રા ચાલુ રાખે તેની રાહ જુએ છે.

WAVES ફિલ્મ બજાર સ્ક્રીનરાઇટર્સ લેબ 2026 માટે એન્ટ્રીઓ માટે આમંત્રણ પ્રક્રિયા ટૂંક સમયમાં ખુલશે. તેની વિગતો WAVES ફિલ્મ બજાર અને NFDC પ્લેટફોર્મ પર જાહેર કરવામાં આવશે.

WAVES ફિલ્મ બજાર સ્ક્રીનરાઇટર્સ લેબ વિશે

2007 માં સ્થપાયેલ, સ્ક્રીનરાઇટર્સ લેબ એ NFDC ના WAVES ફિલ્મ બજારની એક મુખ્ય ટેલેન્ટ-ડેવલપમેન્ટ પહેલ છે. પસંદ કરેલા લેખકો પ્રખ્યાત ભારતીય અને આંતરરાષ્ટ્રીય માર્ગદર્શકોના માર્ગદર્શન હેઠળ એક સખત, બહુતબક્કાવાર પ્રોગ્રામ દ્વારા તેમની ફીચર સ્ક્રિપ્ટો પર કામ કરે છે, જે ફિલ્મ બજાર ખાતે પિચિંગમાં પરિણમે છે. લેબ ખાતે વિકસાવવામાં આવેલી સ્ક્રિપ્ટોમાં ધ લંચબોક્સ, લિપસ્ટિક અંડર માય બુરખા, દમ લગા કે હઇશા, તિતલી, અ ડેથ ઇન ધ ગુંજ અને ઉલ્લોઝુક્કુનો સમાવેશ થાય છે.

WAVES ફિલ્મ બજાર વિશે

NFDC દ્વારા આયોજિત WAVES ફિલ્મ બજાર એ દક્ષિણ એશિયાનું અગ્રણી ફિલ્મ માર્કેટ છે, જે ગોવામાં ઇન્ટરનેશનલ ફિલ્મ ફેસ્ટિવલ ઓફ ઇન્ડિયા (IFFI) ની સાથે વાર્ષિક ધોરણે યોજાય છે. તે નવા પ્રોજેક્ટ્સ અને પ્રતિભાઓને શોધવા અને ટેકો આપવા માટે વિશ્વભરમાંથી નિર્માતાઓ, ફાઇનાન્સર્સ, સેલ્સ એજન્ટ્સ, ડિસ્ટ્રીબ્યુટર્સ, ફેસ્ટિવલ પ્રોગ્રામાર્સ અને બાયર્સને એકસાથે લાવે છે. WAVES ફિલ્મ બજારની 20મી આવૃત્તિ અગાઉના વર્ષની સફળતાને આગળ વધારતાં 20-24 નવેમ્બર 2026 દરમિયાન યોજાવાની જાહેરાત કરવામાં આવી છે.

NFDC વિશે

1975 માં સ્થપાયેલ નેશનલ ફિલ્મ ડેવલપમેન્ટ કોર્પોરેશન (NFDC), માહિતી અને પ્રસારણ મંત્રાલય, ભારત સરકાર હેઠળ કાર્ય કરે છે. તે ભારતીય સિનેમાના પ્રચાર અને વિકાસ માટેની નોડલ એજન્સી છે, અને ટેલેન્ટ-ડેવલપમેન્ટ, પ્રોડક્શન અને ફિલ્મ-ફેસિલિટેશન પહેલોની શ્રેણી સાથે ઇન્ટરનેશનલ ફિલ્મ ફેસ્ટિવલ ઓફ ઇન્ડિયા (IFFI) અને WAVES ફિલ્મ બજારનું આયોજન કરે છે.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com