ভারতকী রাস্ত্রপতী, শ্রীমতি দ্রৌপদী মুর্মুনা মহাক্কী মোল্দোভা, নোর্থ মেকেদোনিয়া অমসুং রোমানিয়াগী লৈবাক্কী খোঙচৎকী অহানবা তাঙ্কক্তা ঙসি অয়ুক (জুলাই ২০, ২০২৬) মোল্দাভোগী চিসিনুদা থুংখ্রে। খোঙচৎ অসি ভারতকী রাস্ত্রপতী অমগী মোল্দোভাদা চৎপা অহানবা খোঙচৎনি।

লৈবাক্কী ওইবা খোঙচৎ অসিদা, রাস্ত্রপতীগা লোয়ননা শ্রীমতি নিমুবেন জয়ন্তিভাই বম্ভানিয়া, কঞ্জ্যুমর এফ্যার্স, ফুদ এন্দ পব্লিক দিস্ত্রিব্যুসন মন্ত্রালয়গী রাজ্য মন্ত্রী, দোক্তর দিনেস শর্ম, মেম্বর ওফ পার্লিয়ামেন্ত, রাজ্য সভা অমসুং শ্রী বিজয় বঘেল, মেম্বর ওফ পার্লিয়ামেন্ত, লোক সভানা খোঙবু ওইনা চৎমিন্নরি।

চিসিনু এয়রপোর্ত্তা থুংখিবা মতমদা, রাস্ত্রপতীবু রিপব্লিক ওফ মোল্দোভাগী দিপুতী প্রাইম মিনিস্তর অমসুং ফোরেন এফ্যার্স মন্ত্রী, মিস্তর মিহাই পোপসোইনা তরাম্না ওকখি।

মতুং তারকপদা রাস্ত্রপতীনা প্রেসিদেন্সিএল পেলেসতা থুংখি, মফমদুদা মহাকপু রিপব্লিক ওফ মোল্দোভাগী প্রেসিদেন্ত হিজ এক্সেলেন্সী মেদাম মাইয়া সন্দুনা তরাম্না ওকখি। মহাকপু হৌনবী মতুং ইন্না তরাম্না ওকখি অমসুং গার্দ ওফ ওনর পীখি। মখোয় অনি শানখিবা ৱারী অমদি দেলিগেসনগী থাক্কী ৱারী ৱাতায়শিংদা, লুচিংবা অনিনা নাকল অনিগী ওইবা মরীগী লম পুম্নমক কোনশিন্দুনা মহৈ য়ানবা অমসুং মাঙদা মীৎয়েঙ থম্বা ৱাফমশিং খন্নখি।

মোল্দোভাদা ভারতকী রাস্ত্রপতী অমগী অহানবা লৈবাক্কী থাক্কী খোঙচৎ অসিনা লৈবাক অনিগী ওইবা মরীদা পুৱারী ওইরগদবা তাঙ্কক অমা ওইরে হায়না রাস্ত্রপতীনা ফোঙদোক্লদুনা ভারত অমসুং মোল্দোভাগী মরক্তা হেনগৎলক্লিবা মরূপ মপাঙ ওইবগী মরী অমসুং থাজনববু শিংথাখি।

ভারত অমসুং মোল্দোভানা চহি দেকেদ অহুম হেন্না মরুপ মপাঙ ওইবগী মরী থম্নদুনা লাক্লি হায়না রাস্ত্রপতীনা হায়খি। লমগী ওইনা লাপ্নরবসু, ভারত-মোল্দোভাগী খোঙবু ওইবগী মরী অসি ঐখোয়না পুন্না ইং-তপ্পা, চাওখৎপা অমসুং মালেমগী থাক্কী তেংবাংনবগী খোঙফম অমা লেপমিন্নদুনা মরা চেৎপা হেনগৎলক্লি হায়খি।

শেন্মিৎলোনগী লমদা তেংবাংনবনা ঐখোয়গী খোঙবু ওইবগী মরীগী মরুওইবা য়ুম্বী অমা ওইরি হায়না মহাক্না ফোঙদোকখি। মহাক্না হেন্না চাউবা ত্রেদ অমসুং ইনভেস্তমেন্ত শৌগৎপা, খাঙবা কনবা সপ্লাই চেন মপাঙ্গল কনখৎহনবা, কন্নেক্তিবিতী ফগৎহনবা, অমসুং বিজিনেস কম্ম্যুনিতীশিংগী মরক্তা হেন্না নক্নবা মরী লৈহনবগী মথৌ তাবা ৱাফমশিং থমখি।

আর্তিফিসিএল ইন্তলিজেন্স অমসুং অতৈ নৌনা মচিন তুমখৎলক্লিবা তেক্নোলোজীীশিংগী অখন্নবা কোর্সশিং য়াওনা মোল্দোভাগী প্রোফেস্নেলশিংগী আইতেক ত্রেনিং স্লোত মশিং শরুক অনি হেনগৎহন্নবা ভারতনা লৌরিবা ফিরেপ্পু রাস্ত্রপতীনা পাউদমখি। মহাক্না মোল্দোভাগী দিপ্লোমেতশিংবু ফোরেস সর্ভিস ইন্সতিত্যুৎ ওফ ইন্দিয়াদা এ.আই. অমসুং সাইবর দিপ্লোমেসীগী অখন্নবা কোর্সশিংদা শরুক য়ানবা ৱাফম থমখি।

লুচিংবা অনিনা লৌউ-শিংউ, লোজিস্তিক্স অমসুং ইনফ্রাস্ত্রকচর, হেল্থকেয়র অমসুং ফার্মাসিউতিকেল্স, রিনিউএবল ইনর্জী, দিজিতেল পব্লিক ইনফ্রাস্ত্রকচর, আর্তিফিসিএল ইন্তলিজেন্স, অমসুং ইনোভেসন য়াওনা নাকল অনিমক্না ইন্তরেস্ত লৈবা লম কয়াদা তেংবাংনবগী চাং হেনগৎহন্নবা য়ানখি। মখোয়না মান্নবা মালেমগী শিংনবশিং থেংনমিন্ননবা অমসুং ইং-তপ্পা, মরা চেৎপা অমসুং নুংঙশই য়াইফবা মালেম অমা পুরক্নবগী লমদা মখা তানা পুন্না থবক তৌমিন্ননবা ৱাফমসু য়ানখি।

প্রেসিদেন্ত অনিমক্না প্রেসতা মখোয়গী ৱারোলশিং থোকখি। (রাস্ত্রপতী দ্রৌপদী মুরমুগী প্রেসতা থোকপা ৱারোল হাপ্লি।)

রাস্ত্রপতীগী ইংলিসতা প্রেসতা থোকপা ৱারোল পাননবগীদমক মসিদা নম্বিয়ু।

***