രാഷ്ട്രപതി ശ്രീമതി ദ്രൗപദി മുർമു, മോൾഡോവൻ പ്രസിഡൻ്റ്  മയ്യ സാന്ദുവിനൊപ്പം ഇന്ന് (2026 ജൂലൈ 20) ചിസിനാവിൽ നടന്ന ഇന്ത്യ-മോൾഡോവ ബിസിനസ് ഫോറത്തെ അഭിസംബോധന ചെയ്തു.

1992-ൽ നയതന്ത്ര ബന്ധം സ്ഥാപിതമായതുമുതൽ ഇന്ത്യയും മോൾഡോവയും ഊഷ്മളവും സൗഹൃദപരവുമായ ബന്ധമാണ് പുലർത്തുന്നതെന്ന് രാഷ്ട്രപതി തൻ്റെ ഉദ്ഘാടന പ്രസംഗത്തിൽ പറഞ്ഞു. പരസ്പര ബഹുമാനം, ജനാധിപത്യ മൂല്യങ്ങൾ, സമാധാനം, വികസനം, അന്താരാഷ്ട്ര സഹകരണം എന്നിവയോടുള്ള പങ്കിട്ട പ്രതിബദ്ധത എന്നിവയാണ് ഇരു രാജ്യങ്ങളും തമ്മിലുള്ള പങ്കാളിത്തത്തിൻ്റെ അടിസ്ഥാനമെന്നും അവർ കൂട്ടിച്ചേർത്തു.

വികസിത ഭാരതം @2047 എന്ന ലക്ഷ്യത്തിലേക്ക് ഇന്ത്യ മുന്നേറുമ്പോൾ, വിശ്വാസത്തിലും പങ്കിട്ട അഭിവൃദ്ധിയിലും അധിഷ്ഠിതമായ പങ്കാളിത്തമാണ് രാജ്യം ആഗ്രഹിക്കുന്നതെന്ന് രാഷ്ട്രപതി പറഞ്ഞു. സംരംഭകത്വം, ഡിജിറ്റൽ പരിവർത്തനം, ഉൽപ്പാദന രംഗത്തെ മികവ്, വൈദഗ്ധ്യമുള്ള യുവജനശക്തി എന്നിവയുടെ കരുത്തിൽ ലോകത്തെ അതിവേഗം വളരുന്ന പ്രമുഖ സമ്പദ്‌വ്യവസ്ഥകളിലൊന്നാണ് ഇന്ത്യ. അതേസമയം, പരിഷ്കാരങ്ങൾക്ക് പ്രാധാന്യം നൽകുന്ന സമീപനം, തന്ത്രപ്രധാനമായ ഭൂമിശാസ്ത്രപരമായ സ്ഥാനം, കഴിവുറ്റ മനുഷ്യവിഭവശേഷി, യൂറോപ്യൻ വിപണികളുമായുള്ള വർദ്ധിച്ചുവരുന്ന സംയോജനം എന്നിവ മോൾഡോവയെ ഇന്ത്യൻ വ്യവസായങ്ങൾക്ക് അനുയോജ്യമായ ഒരു പ്രധാന ലക്ഷ്യസ്ഥാനമാക്കി മാറ്റുന്നു.

ഡിജിറ്റൽ സാങ്കേതികവിദ്യകൾ, നിർമ്മിതബുദ്ധി, സൈബർ സുരക്ഷ, ഫിൻ-ടെക്, ഡിജിറ്റൽ പൊതു അടിസ്ഥാന സൗകര്യങ്ങൾ, അടിസ്ഥാന സൗകര്യ വികസനം, പുനരുപയോഗ ഊർജ്ജം, നൂതന ഉൽപ്പാദനം, കൃഷി, ഭക്ഷ്യ സംസ്കരണം, ഫാർമസ്യൂട്ടിക്കൽസ്, ബയോടെക്നോളജി, ആരോഗ്യ പരിപാലനം തുടങ്ങിയ വിവിധ മേഖലകളിൽ സഹകരണത്തിന് ഗണ്യമായ സാധ്യതകളുണ്ടെന്ന് രാഷ്ട്രപതി അടിവരയിട്ടു പറഞ്ഞു. സൗരോർജ്ജം, ബാറ്ററി സ്റ്റോറേജ്, സ്മാർട്ട് ഗ്രിഡുകൾ, ഹരിത ഹൈഡ്രജൻ, മറ്റ് ശുദ്ധ ഊർജ്ജ  സാങ്കേതികവിദ്യകൾ എന്നിവയുൾപ്പെടെയുള്ള പുനരുപയോഗ ഊർജ്ജ മേഖലയിലെ മോൾഡോവയുടെ വികസന പദ്ധതികളിൽ പങ്കാളികളാകാൻ ഇന്ത്യൻ കമ്പനികൾക്ക് താൽപ്പര്യമുണ്ടെന്നും അവർ വ്യക്തമാക്കി.

വ്യാപാരത്തിനും നിക്ഷേപത്തിനുമായി മോൾഡോവൻ കമ്പനികൾക്ക് ഇന്ത്യ മികച്ച ബിസിനസ് അവസരങ്ങളാണ് വാഗ്ദാനം ചെയ്യുന്നതെന്ന് രാഷ്ട്രപതി പറഞ്ഞു. സുതാര്യവും പ്രവചനാതീതവും നിക്ഷേപക സൗഹൃദവുമായ ഒരു ബിസിനസ് അന്തരീക്ഷം വളർത്തിയെടുക്കാൻ ഇന്ത്യ പ്രതിജ്ഞാബദ്ധമാണെന്നും അവർ വ്യക്തമാക്കി. ഇന്ത്യയിലെ അവസരങ്ങൾ പര്യവേക്ഷണം ചെയ്യാനും അവ പ്രയോജനപ്പെടുത്താനും രാഷ്‌ട്രപതി മോൾഡോവൻ കമ്പനികളെ ക്ഷണിച്ചു.

മോൾഡോവയിലെ അവസരങ്ങൾ പ്രയോജനപ്പെടുത്താൻ ഇന്ത്യൻ ബിസിനസ് സമൂഹത്തോട് രാഷ്ട്രപതി ആഹ്വാനം ചെയ്തു. അവരുടെ സംരംഭകത്വവും കാഴ്ചപ്പാടും പ്രതിബദ്ധതയും ഇരു രാജ്യങ്ങളും തമ്മിലുള്ള  ദീർഘകാല സാമ്പത്തിക പങ്കാളിത്തം കെട്ടിപ്പടുക്കുന്നതിൽ നിർണ്ണായക പങ്കുവഹിക്കുമെന്ന് ശ്രീമതി മുർമു പറഞ്ഞു. ഈ ബിസിനസ് ഫോറത്തിലെ ചർച്ചകൾ പുതിയ പങ്കാളിത്തങ്ങൾക്കും നൂതന സഹകരണങ്ങൾക്കും അടിത്തറ പാകുമെന്നും, ഇന്ത്യയും മോൾഡോവയും തമ്മിലുള്ള സാമ്പത്തിക സഹകരണത്തെ പുതിയ ഉയരങ്ങളിലേക്ക് നയിക്കുമെന്നും അവർ ആത്മവിശ്വാസം പ്രകടിപ്പിച്ചു.

കൃഷി, ഭക്ഷ്യ സംസ്കരണം, വിവരസാങ്കേതികവിദ്യ, ഫാർമസ്യൂട്ടിക്കൽസ്, ആരോഗ്യ പരിപാലനം, പുനരുപയോഗ ഊർജ്ജം, വിദ്യാഭ്യാസം, ലോജിസ്റ്റിക്സ്, ഡിജിറ്റൽ സാങ്കേതികവിദ്യകൾ എന്നിവയുൾപ്പെടെ വിവിധ മേഖലകളെ പ്രതിനിധീകരിച്ച് ഇരു രാജ്യങ്ങളിലേയും പ്രമുഖ ബിസിനസ് പ്രതിനിധികൾ ഈ ഫോറത്തിൽ പങ്കെടുക്കുന്നുണ്ട്.

രാഷ്ട്രപതിയുടെ പ്രസംഗം കാണുന്നതിനായി ഇവിടെ ക്ലിക്ക് ചെയ്യുക -

***