وزیر اعظم جناب نریندر مودی کے "سہکار سے سمردھی" کے وژن اور "سفید انقلاب 2.0" کے ہدف کو آگے بڑھاتے ہوئے  امور داخلہ اور  امداد باہمی کے مرکزی وزیر جناب امت شاہ نے آج کولکاتا کے نیو ٹاؤن سینٹر میں منعقدہ ایک تقریب میں امول بنگال ڈیری پروجیکٹ کے تحت دنیا کے سب سے بڑے دہی بنانے والے پلانٹ کا بھومی پوجن کیا۔ اس موقع پر مغربی بنگال کے وزیر اعلیٰ  جناب شبھیندو ادھیکاری، گجرات قانون ساز اسمبلی کے اسپیکر جناب  شنکر بھائی چودھری، مغربی بنگال کے  امداد باہمی  کے وزیر  جناب سوپن داس گپتا، ریاستی وزیر خزانہ جناب تاپس رائے، صنعت و تجارت کے وزیر ڈاکٹر کلیان چکرورتی،  خوراک کی ڈبہ بندی  اور باغبانی کے وزیر جناب شردوت کمار، مغربی بنگال کے چیف سکریٹری جناب  منوج کمار اگروال اور امول ڈیری کے  چیئرمین جناب  اشوک چودھری سمیت  کئی معززین اور  امدار باہمی کے شعبے  کے نمائندے موجود تھے۔

اجتماع سے خطاب کرتے ہوئے مرکزی وزیر  برائے امور  داخلہ اور  امداد باہمی جناب امت شاہ نے کہا کہ بنگال اسمبلی انتخابات میں جیت کے بعد، وہ وزیر اعظم جناب نریندر مودی کی جانب سے بنگال کے لوگوں کا مشٹی دوئی کے ساتھ منھ میٹھا کرانے کے لیے آئے  ہیں۔ انہوں نے کہا کہ بنگال کے لوگوں کی طرف سے لائی گئی تبدیلی، آزادی کے بعد سے ریاست میں ہونے والے تمام اسمبلی انتخابات کے مقابلے میں مختلف اور تاریخی  ہے۔

جناب امت شاہ نے کہا کہ مغربی بنگال ایک ایسی ریاست رہی ہے جس نے ملک  کے   تقریباً ہر شعبے کو متاثر کیا ہے۔ کئی دہائیوں تک مغربی بنگال تعلیم میں پورےملک سے آگے رہا۔ بنگال نے بھی آزادی کی جدوجہد کے دوران ایک کے بعد ایک عظیم مجاہدین آزادی پیدا کیا۔ مذہب، عقیدت اور سنکیرتن کے شعبوں میں، چیتنیہ مہا پربھو، سوامی وویکانند، رام کرشن پرمہنس اور مہارشی اروبندو نے ایک غیر معمولی روایت قائم کی۔ جب حب الوطنی اور لگن کی بات آتی ہے  تو بنگال نے نیتا جی سبھاش چندر بوس اور خودی رام بوس  جیسے عظیم مجاہدین آزادی کے ذریعے عظیم قربانی دینے سے کبھی دریغ نہیں کیا۔

مرکزی وزیر برائے امور داخلہ اور  امداد باہمی  نے کہا کہ اسی بنگال میں گرودیو رابندر ناتھ ٹیگور نے عالمی شہرت حاصل کی، آچاریہ جگدیش چندر بوس نے بڑی سائنسی کامیابیاں حاصل کیں اور بنکم چندر چٹوپادھیائے نے "آنند مٹھ" میں "وندے ماترم" لکھ کر ثقافتی قوم پرستی کو ایک نئی سمت دی۔ انہوں نے کہا کہ بدقسمتی سے بنگال ایک طویل عرصے تک ایک غیر ملکی نظریے سے متاثر رہا اور اس سے  نکلنے کے بعد نظریاتی خلا، بدعنوانی اور جرائم میں پھنس گیا۔ نتیجتاً، گرودیو رابندر ناتھ ٹیگور کی طرف سے دیکھا گیا "سونار بنگلہ" کا خواب دھیرے دھیرے دھندلا گیا۔

جناب امت شاہ نے کہا کہ وزیر اعظم جناب نریندر مودی کی اپیل اور ایک دہائی طویل جدوجہد کے بعد اور 2016 سے 2026 تک کے سفر کے بعد، جناب شبھیندو ادھیکاری کی قیادت میں "سونار بنگلہ" کی تحریک کو ایک بار پھر سے زندہ کیا گیا ہے۔ انہوں نے مغربی بنگال کے لوگوں کو یقین دلایا کہ وزیر اعظم جناب نریندر مودی کی قیادت میں کام شروع ہو چکا ہے، تاکہ لوگوں سے کیے گئے ہر وعدے اور ان کے سامنے رکھے گئے "سونار بنگلہ" کے عزم کو حقیقت میں بدل دیا جائے۔ یہ عزم ایک خوشحال، تعلیم یافتہ، محفوظ اور ثقافتی طور پر خوشحال مغربی بنگال کی تعمیر کی راہ ہموار کرے گا۔

مرکزی وزیر برائے امور داخلہ اور  امداد باہمی نے کہا کہ آج کا دن مغربی بنگال کے کسانوں اور مویشی پروروں کے لیے ایک انتہائی اہم دن ہے۔ امول نے یہاں دنیا کے سب سے بڑے دہی تیار کرنے والے  پلانٹ کا بھومی پوجن انجام دیا ہے۔ پروجیکٹ  کے پہلے مرحلے میں، روزانہ 10 لاکھ لیٹر دودھ پر عملدرآمد کیا جائے گا، جس سے تقریباً 1.20 لاکھ چھوٹے دودھ پیدا کرنے والے کسان اور مویشی پرور افراد کو فائدہ ہوگا۔

جناب امت شاہ نے کہا کہ انہوں نے پہلے ریاستی وزیر اعلیٰ سے درخواست کی تھی کہ اگر امول کو 15-15 ایکڑ کے دو پلاٹ فراہم کیے جائیں تو مشرقی ہندوستان کے لیے دودھ کی پیداوار،  اس کی پروسیسنگ اور مارکیٹنگ کا پورا نظام مغربی بنگال سے چلایا جا سکتا ہے۔ انہوں نے کہا کہ اس سے قبل اس تجویز کو اس بنیاد پر مسترد کر دیا گیا تھا کہ گجرات کو مغربی بنگال میں داخل ہونے کی اجازت نہیں دی جائے گی، جبکہ  یہ پروجیکٹ گجرات کے لیے نہیں تھا بلکہ مغربی بنگال کے مویشی  پرور افراد اور دودھ پیدا کرنے والوں کی فلاح و بہبود کے لیے تھا۔

امور داخلہ اور  امداد باہمی کے مرکزی وزیر نے کہا کہ ریاست میں تبدیلی اب واضح طور پر نظر آرہی ہے۔ ان کی درخواست پر وزیر اعلیٰ شبھیندو ادھیکاری نے امول فیڈریشن کو 30 ایکڑ زمین مفت فراہم کرنے کا فیصلہ کیا۔ اس فیصلے سے مغربی بنگال میں تقریباً 100 بڑی سرمایہ کاری کی راہ ہموار ہوئی ہے۔ یہ تقریباً 2.5 لاکھ مویشی پرور افراد کے ذریعہ فراہم کردہ دودھ کی ممکنہ بلند ترین قیمت کو حاصل کرنے میں بھی مدد کرے گا۔

جناب امت شاہ نے یقین ظاہر کیا کہ کشمیر سے کنیا کماری تک اور گجرات سے بنگال تک، امول بنگال ڈیری پروجیکٹ میں تیار کی جانے والی مشتی دوئی کو ملک بھر  میں گھر-گھرمیں استعمال کیا جائے گا اور ملک بھر کے لوگ مغربی بنگال کو آشیرواد دیں گے۔ انہوں نے کہا کہ  امداد باہمی کی تحریک  میں لوگوں کو منظم کرنے، انہیں معاشی طور پر بااختیار بنانے اور انہیں خوشحالی سے جوڑنے کی بے پناہ صلاحیت ہے۔

امول کو ایک مثال کے طور پر پیش کرتے ہوئے، امور داخلہ اور  امداد باہمی کے مرکزی  وزیر نے کہا کہ اتنے بڑے پیمانے پر کام کر رہی یہ تنظیم آج دنیا کی نمبر 1 کوآپریٹو تنظیم بن گئی ہے۔ امول سے 36 لاکھ خواتین وابستہ ہیں۔ انہوں نے کہا کہ یہ  امداد باہمی کی مضبوطی اور اس کی اقتصادی صلاحیت کی سب سے بڑی مثال ہے۔

جناب امت شاہ نے کہا کہ اس وقت 18,600 سے زیادہ دیہی ڈیری کوآپریٹیو سوسائٹیاں امول سے وابستہ ہیں اور امول کی مصنوعات ملک کی تقریباً ہر ریاست تک پہنچتی ہیں۔ انہوں نے امول کی مصنوعات کا استعمال کرنے والے ہر شہری کو مخاطب کرتے ہوئے کہا کہ جب ایک صارف امول پروڈکٹ پر 100 روپیہ خرچ کرتا ہے، تو تقریباً 87  پیسے براہ راست کسان اور مویشی پرور افراد  کو جاتے ہیں۔

انہوں نے کہا کہ یہ رقم کسی صنعتکار یا بڑے کاروباری گھرانے کے پاس نہیں جاتی۔ امول کے کل کاروبار کا تقریباً 87 فیصد براہ راست اور شفاف طریقے سے مویشی پرور  افراد  کے بینک کھاتوں میں جمع کیا جاتا ہے۔ یہ حقیقی کوآپریٹو ماڈل ہے، جس کے تحت پروڈکٹ تیار کرنے والے کو کاروباری فائدے کا سب سے بڑا حصہ ملتا ہے۔

مرکزی وزیر برائے امور داخلہ اور  امداد باہمی نے کہا کہ انہوں نے وزیر اعلیٰ شبھیندو  ادھیکاری سے امول اور کوآپریٹو ڈیری  شعبے  کی توسیع کے لیے اضافی زمین فراہم کرنے کی درخواست کی ہے۔ حکومت ہند مغربی بنگال میں مویشیوں کی نسل کی بہتری کے لیے ایک بڑا مرکز قائم کرے گی۔ اس سے دودھ پیدا کرنے والے کسانوں کو زیادہ دودھ کی پیداوار والے مویشیوں  کی بہتر نسلوں تک رسائی حاصل ہو گی۔ ریاست میں سیکس سارٹیڈ سیمین کی سہولت بھی قائم کی جائے گی، جس سے دودھ دینے والے مویشیوں  کی تعداد بڑھانے اور دودھ کی پیداوار کو بہتر بنانے میں مدد ملے گی۔

جناب امت شاہ نے کہا کہ کوآپریٹو تحریک کے ذریعے بنگال کے کسانوں میں خوشحالی لانے کے مقصد سے، انہوں نے وزیر اعلیٰ  شبھیندو  ادھیکاری کو ایک خط لکھا تھا۔ انہوں نے کہا کہ وہ خود وزیر اعلیٰ کی جانب سے عملدرآمد کی رفتار سے حیران ہیں۔ ان  کا ای میل شام کو موصول ہوا اور اسی دن رات 9 بجے تک مغربی بنگال حکومت نے ایک رابطہ افسر مقرر  کرکے جواب بھیج دیا تھا کہ یہ افسر امداد باہمی کی وزارت کے ساتھ  تال میل قائم کرے گا۔

مرکزی وزیر برائے امور داخلہ اور  امداد باہمی نے کہا کہ وزیر اعظم جناب نریندر مودی نے امداد باہمی  کی وزارت کو کسانوں کی بہبود سے متعلق 70 سے زیادہ اسکیموں کی ذمہ داری سونپی ہے۔ وزیر اعلی جناب  شبھیندو  ادھیکاری کے ذریعہ بنائے گئے تال میل کے موثر طریقہ کار کی وجہ سے ان تمام اسکیموں کے فوائد اگلے چھ ماہ کے اندر مغربی بنگال کے کسانوں تک پہنچ جائیں گے۔

جناب امت شاہ نے کہا کہ آج ریاست میں کوامداد باہمی کی سوسائٹیوں کے رجسٹرار کے دفتر کو بھی مکمل طور پر کمپیوٹرائزڈ کر دیا گیا ہے۔ یہ کام کافی عرصے سے زیر التوا تھا لیکن نئی حکومت نے اسے صرف نو ہفتوں میں مکمل کر لیا۔ امداد باہمی کے  اداروں کے نمائندے اب اپنے موبائل فون کے ذریعے رجسٹرار آفس کی خدمات تک رسائی حاصل کر سکیں گے۔ اس سے  امداد باہمی کے شعبے کے کام کاج میں شفافیت، جوابدہی، کارکردگی اور رفتار میں اضافہ ہوگا۔

مرکزی وزیر برائے امور داخلہ اور  امداد باہمی  نے کہا کہ پروگرام کے دوران 10 کوآپریٹو گوداموں کا سنگ بنیاد رکھا گیا اور 1400 میٹرک ٹن کی کل گنجائش والے گوداموں کا بھی افتتاح کیا گیا۔ یہ گودام کسانوں اور  امداد باہمی کے اداروں کو ان کی پیداوار کے محفوظ ذخیرہ کے لیے سہولیات فراہم کریں گے اور کم قیمتوں پر پریشانی کی فروخت کو کم کرنے میں مدد کریں گے۔

جناب امت شاہ نے کہا کہ مغربی بنگال میں آج ایک اور اہم نئی شروعات ہوئی ہے۔ اس وقت ٹیکسی ڈرائیوروں کا استحصال کئی نجی ایگریگیٹر کمپنیوں کے ذریعے کیا جاتا ہے۔ مرکزی حکومت نے "بھارت ٹیکسی" کے ذریعے  "ساراتھی" کا تصور متعارف کرایا ہے۔ اس انتظام کے تحت گاڑی چلانے والا محض ڈرائیور نہیں رہے گا بلکہ وہ اپنی گاڑی  کے ساتھ ساتھ کمپنی کا مالک اور شیئر ہولڈر بھی ہوگا۔ انہوں نے کہا کہ مغربی بنگال کی ٹیکسیوں کو ’’بھارت ٹیکسی‘‘ سے جوڑنے کے لیے آج ایک مفاہمت کی یادداشت پر دستخط کیے گئے۔ نتیجے کے طور پر، مغربی بنگال میں کوئی سارتھی محض ڈرائیور نہیں رہے گا۔ ہر ایک کمپنی میں شیئر ہولڈر بن جائے گا اور کمپنی کو حاصل ہونے والے منافع کا ایک حصہ براہ راست اس کے بینک اکاؤنٹ میں منتقل کیا جائے گا۔ یہ انتظام ٹیکسی ڈرائیوروں کو عزت، ملکیت اور معاشی تحفظ فراہم کرے گا۔

مرکزی وزیر داخلہ اور تعاون کے وزیر نے کہا کہ مغربی بنگال میں زراعت اور مویشی پروری  کی بے پناہ صلاحیت موجود ہے۔ گجرات کے کئی حصوں میں، کبھی  آبپاشی اور پینے کے مقاصد کے لیے 1,200 فٹ کی گہرائی سے پانی کھینچنا پڑتا تھا، جب کہ مغربی بنگال کو ماں گنگا کی خصوصی  مہربانی  حاصل ہے۔ یہاں زیادہ تر جگہوں پر صرف 100 سے 200 فٹ کی گہرائی میں مناسب پانی دستیاب ہے۔ ریاست کے پاس زرخیز زمین ہے اور مویشی پروری کی توسیع کے لیے لامحدود صلاحیت ہے۔

جناب امت شاہ نے کہا کہ بدقسمتی سے ان امکانات کا پہلے پوری طرح استعمال نہیں کیا گیا ۔ وزیر اعظم جناب نریندر مودی اور وزیر اعلیٰ جناب شبھیندو ادھیکاری کی جانب سے، انہوں نے مغربی بنگال میں تمام مویشی  پرور  افراد کو یقین دلایا کہ اگلے 15 برسوں میں یہ یقینی بنانے کی کوشش کی جائے گی کہ ریاست کے ہر کنبے میں کم از کم دو دودھ دینے والے مویشی ہوں اور ان مویشیوں سے پیدا ہونے والا دودھ ڈیری کوآپریٹو اداروں کے ذریعے حاصل کیا جائے۔ انہوں نے کہا کہ مویشی پروری کسانوں کو مویشیوں کی بہتر نسل فراہم کی جائے گی جو اس وقت کے مقابلے میں کم از کم 25 فیصد زیادہ دودھ پیدا کرنے کی صلاحیت رکھتے ہیں۔ اس سے مویشی  پروری  دیہی خاندانوں کی آمدنی کا ایک باقاعدہ اور قابل اعتماد ذریعہ بنے گا اور مغربی بنگال میں ایک نئے سفید انقلاب کی راہ ہموار کرے گا۔

مرکزی وزیر برائے امور  داخلہ اور  امداد باہمی نے کہا کہ وہ پچھلے تین دنوں سے مغربی بنگال میں ہیں۔ اس عرصے کے دوران بنگال کو دراندازی سے پاک بنانے، تازہ دراندازی کو روکنے، نظم و نسق کی صورتحال کو بہتر بنانے اور ماؤں اور بہنوں کی حفاظت کو یقینی بنانے کے لیے کئی اہم اقدامات کیے گئے ہیں۔ جناب امت شاہ نے کہا کہ انہوں نے وزیر اعلی جناب شبھیندو  ادھیکاری کے کام کرنے کے انداز اور عمل کی رفتار کا قریب سے مشاہدہ کیا ہے اور انہیں یقین ہے کہ مغربی بنگال کو دوبارہ اپنی پوری صلاحیت کے ساتھ کھڑا ہونے میں زیادہ دیر نہیں لگے گی۔ انہوں نے ریاست کے لوگوں کو یقین دلایا کہ حکومت ان کی تمام توقعات پر پورا اترے گی اور گرودیو رابندر ناتھ ٹیگور کے ’’سونار بنگلہ‘‘ کے خواب کو پورا کرنے کا کام یقینی طور پر پورا کرے گی۔

امول تقریباً 700 کروڑ روپے کی سرمایہ کاری کے ساتھ مغربی بنگال کے ہاوڑہ فوڈ پارک میں امول بنگال ڈیری پروجیکٹ قائم کر رہا ہے۔ پروجیکٹ  کے مکمل صلاحیت کے ساتھ  کام کرنے پر  یہ روزانہ تقریباً 30 لاکھ لیٹر دودھ کو پروسیس کرنے کے قابل ہو جائے گا۔ پلانٹ میں روزانہ تقریباً 1000 میٹرک ٹن یعنی 10 لاکھ کلو گرام دہی اور دیگر کلچرڈ ڈیری مصنوعات تیار کرنے کی صلاحیت ہوگی۔ اس صلاحیت کے ساتھ یہ دنیا کا سب سے بڑا دہی بنانے والا پلانٹ ہوگا۔  پروجیکٹ کی مجوزہ یومیہ پیداواری صلاحیت میں 10 لاکھ لیٹر پیک شدہ دودھ، دو لاکھ لیٹر یو ایچ ٹی  دودھ، ایک لاکھ لیٹر آئس کریم، 20 میٹرک ٹن پنیر، 10 میٹرک ٹن گھی اور 10 میٹرک ٹن مٹھائیاں شامل ہیں۔ اس کے علاوہ پلانٹ روزانہ تقریباً 2.5 لاکھ فلیورڈ دودھ تیار کرنے کی صلاحیت رکھتا ہے۔ امول بنگال ڈیری پروجیکٹ مغربی بنگال کے ڈیری کے شعبے  میں جدید پروسیسنگ، ویلیو ایڈیشن، کولڈ چین اور مارکیٹنگ کی سہولیات کو وسعت دے گا۔ یہ دودھ پیدا کرنے والے کسانوں اور مویشی پرور افراد کو ان کی پیداوار کے لیے ایک بہتر، شفاف اور مستحکم مارکیٹ فراہم کرے گا اور ان کی آمدنی بڑھانے میں مدد کرے گا۔ یہ پروجیکٹ مغربی بنگال میں ڈیری کوآپریٹیو کو مضبوط بنانے، دیہی معیشت میں روزگار اور آمدنی کے نئے مواقع پیدا کرنے اور ریاست میں سفید انقلاب کے ایک نئے باب کا آغاز کرنے میں اہم کردار ادا کرے گا۔

***********

ش ح۔م ش ۔ ر ض

 (U: 155)