مرکزی صارف تحفظ اتھارٹی (سی سی پی اے) نے ملک بھر کے 41 ریستورانوں کے خلاف از خود کارروائی شروع کی ہے جو صارفین کے بلوں میں ڈیفالٹ کے بطور سروس چارج عائد کر کے صارف کے حقوق کی خلاف ورزی اور غیر منصفانہ تجارتی طریقوں کو اپنا رہے تھے۔

یہ کارروائی نیشنل کنزیومر ہیلپ لائن (این سی ایچ) کے ذریعے موصول ہونے والی شکایات کی بنیاد پر کی گئی ہے۔ شکایات کو ان رسیدوں کی حمایت حاصل تھی جن میں دکھایا گیا تھا کہ صارفین کی واضح رضامندی حاصل کیے بغیر سروس چارج خود بخود ان کے بلوں میں شامل کر دیا گیا تھا۔

ان شکایات کی بنیاد پر، سی سی پی اے نے تحقیقات کیں اور پایا کہ سروس چارج کی خودکار وصولی ہوٹلوں اور ریستورانوں میں سروس چارج عائد کرنے کے سلسلے میں غیر منصفانہ تجارتی طریقوں کو روکنے اور صارف کے مفادات کے تحفظ کے لیے رہ نما خطوط کی خلاف ورزی تھی۔ اتھارٹی نے یہ بھی پایا کہ ایسی عمل داری صارف تحفظ ایکٹ، 2019 کی دفعہ 2(47) کے تحت ایک غیر منصفانہ تجارتی عمل کے مترادف ہے۔

دہلی ہائی کورٹ نے، اپنے 28 مارچ 2025 کے فیصلے میں، نیشنل ریسٹورنٹ ایسوسی ایشن آف انڈیا اور دیگر بمقابلہ یونین آف انڈیا اور دیگر، میں سروس چارج پر سی سی پی اے کے رہ نما خطوط کی توثیق کی اور قرار دیا کہ سروس چارج کی لازمی وصولی قانون کے منافی ہے۔ عدالت نے مزید واضح کیا کہ تمام ریستورانوں کے قیام کو رہ نما خطوط کی تعمیل کرنی ہوگی اور سی سی پی اے قانون کے مطابق انھیں نافذ کرنے کے لیے آزاد ہے۔

سی سی پی اے رہ نما خطوط کی اہم دفعات

ہوٹلوں اور ریستورانوں میں سروس چارج عائد کرنے کے سلسلے میں غیر منصفانہ تجارتی طریقوں کو روکنے اور صارف کے مفادات کے تحفظ کے لیے رہ نما خطوط، جو 4 جولائی 2022 کو جاری کیے گئے تھے، میں یہ فراہم کیا گیا ہے کہ:

• کوئی بھی ہوٹل یا ریستوران کھانے کے بل میں خود بخود یا بطور ڈیفالٹ سروس چارج شامل نہیں کرے گا۔

• کسی دوسرے نام سے سروس چارج کی وصولی نہیں کی جائے گی۔

• کوئی بھی ہوٹل یا ریستوران کسی صارف کو سروس چارج ادا کرنے پر مجبور نہیں کرے گا اور صارفین کو واضح طور پر مطلع کرنا ہوگا کہ یہ رضاکارانہ، اختیاری اور مکمل طور پر صارف کی صوابدید پر ہے۔

• سروس چارج ادا نہ کرنے پر صارفین کے داخلے پر کوئی پابندی یا خدمات کی فراہمی میں کوئی رکاوٹ نہیں ڈالی جائے گی۔

• سروس چارج کھانے کے بل میں شامل نہیں کیا جائے گا اور اس رقم پر جی ایس ٹی عائد نہیں کیا جائے گا۔

سی سی پی اے کے ذریعے کی گئی کارروائی

ایسے ہی ایک معاملے میں، سی سی پی اے نے چایوز (سن شائن ٹی ہاؤس پرائیویٹ لمیٹڈ) کے خلاف حتمی حکم نامہ جاری کیا، جس میں ڈیفالٹ کے طور پر سروس چارج عائد کرنے پر 50,000 روپے کا جرمانہ عائد کیا گیا اور کمپنی کو صارف سے وصول کیا گیا سروس چارج واپس کرنے کی ہدایت کی گئی۔

کمپنی کو ہدایت کی گئی ہے کہ وہ اپنے تمام آؤٹ لیٹس پر اپنے سافٹ ویئر سے تیار کردہ بلنگ سسٹم میں ترمیم کرے تاکہ یہ یقینی بنایا جا سکے کہ سروس چارج یا کوئی بھی اسی طرح کا چارج صارفین کے بلوں میں خود بخود شامل نہ ہو۔ سی سی پی اے نے درج ذیل ریستورانوں کے خلاف بھی حتمی حکم نامے جاری کیے ہیں:

1. کیفے بلو باٹل، پٹنہ

2. چائنا گیٹ ریستوراں پرائیویٹ لمیٹڈ

3. فیسٹا باربی کیو نیشن (باربی کیو نیشن ہاسپٹلٹی پرائیویٹ لمیٹڈ)

4. فو احمد آباد ریستوراں (پیبل اسٹریٹ ہاسپٹلٹی پرائیویٹ لمیٹڈ)

5. ل’اوپیرا فرینچ بیکری پرائیویٹ لمیٹڈ

6. زوررو – دی لکشری نائٹ کلب (رُدرا ہاسپٹلٹی پرائیویٹ لمیٹڈ کا ایک یونٹ)

7. چایوز (سن شائن ٹی ہاؤس پرائیویٹ لمیٹڈ)

دیگر ریستورانوں کے خلاف جہاں شکایات موصول ہوئی ہیں اور ان کی جانچ کی گئی ہے، مزید کارروائی جاری ہے۔

صارف شکایات درج کر سکتے ہیں

سی سی پی اے صارفین کو ان واقعات کی اطلاع دینے کی ترغیب دیتا ہے جہاں ریستوران نیشنل کنزیومر ہیلپ لائن کے ذریعے 1915 (ٹول فری) پر کال کرکے یا این سی ایچ پلیٹ فارم کے ذریعے ڈیفالٹ کے طور پر سروس چارج عائد کرتے ہیں۔ اتھارٹی سروس چارج سے متعلق شکایات کی قریبی نگرانی جاری رکھے گی اور صارف تحفظ ایکٹ، 2019 اور ہوٹلوں اور ریستورانوں میں سروس چارج عائد کرنے کے سلسلے میں غیر منصفانہ تجارتی طریقوں کو روکنے اور صارف کے مفادات کے تحفظ کے لیے رہ نما خطوط کی خلاف ورزی کرنے والے اداروں کے خلاف مناسب کارروائی کرے گی۔ سی سی پی اے صارف کے حقوق کے تحفظ اور ہاسپٹلٹی سیکٹر میں منصفانہ، شفاف اور صارف دوست کاروباری طریقوں کو یقینی بنانے کے لیے عہدبستہ ہے۔

***

(ش ح - ع ا)

U.No. 149