આધાર એપએ 40 મિલિયન (4 કરોડ) ડાઉનલોડ્સનો એક મહત્વપૂર્ણ માઈલસ્ટોન વટાવી દીધો છે, જે સુવિધાજનક અને ડિજિટલ-ફર્સ્ટ ઓળખ સેવાઓમાં રહેવાસીઓના વધતા વિશ્વાસને રેખાંકિત કરે છે.

આધાર એપનો વધતો સ્વીકાર એ ઘર બેઠા સરનામું અપડેટ કરવું, મોબાઈલ નંબર અપડેટ, ઈમેલ અપડેટ, બાયોમેટ્રિક લોક/અનલોક અને ઈ-આધાર ડાઉનલોડ સહિતની આધાર સંબંધિત સેવાઓની વ્યાપક શ્રેણીને એક્સેસ કરવા માટેના વન-સ્ટોપ ડિજિટલ પ્લેટફોર્મ તરીકેના તેના ઉભરતા સ્વરૂપને પ્રતિબિંબિત કરે છે.

તેના લોન્ચિંગ સમયથી, આધાર એપ દ્વારા 11.65 લાખ સરનામા અપડેટ કરવાની સુવિધા પૂરી પાડવામાં આવી છે, જેનાથી રહેવાસીઓ આધાર કેન્દ્રની મુલાકાત લીધા વિના સરળતાથી તેમની આધાર વિગતો અપ-ટુ-ડેટ રાખી શકે છે.

આ એપ દ્વારા લગભગ 49 લાખ મોબાઈલ નંબર અપડેટ પણ સક્ષમ બન્યા છે, જે રહેવાસીઓને તેમના આધાર સાથે જોડાયેલી સચોટ સંપર્ક માહિતી જાળવી રાખવામાં મદદ કરે છે.

1 જુલાઈના રોજ ઈમેલ અપડેટ સુવિધા શરૂ થયા પછી, આધાર એપ દ્વારા આશરે 12.5 લાખ ઈમેલ એડ્રેસ ઉમેરવામાં આવ્યા છે અથવા અપડેટ કરવામાં આવ્યા છે, જે જ્યાં લાગુ પડતું હોય ત્યાં રહેવાસીઓ અને યુઆઈડીએઆઈ (UIDAI) વચ્ચેના સંપર્કને વધુ મજબૂત બનાવે છે. આ સુવિધા, જે અગાઉ ₹75 ના દરે ઉપલબ્ધ હતી, તેને આધાર એપ પર 31 ડિસેમ્બર 2026 સુધી નિઃશુલ્ક કરવામાં આવી છે.

એપની ગોપનીયતા અને સુરક્ષા સુવિધાઓનો પણ વ્યાપક સ્વીકાર જોવા મળ્યો છે. રહેવાસીઓએ બાયોમેટ્રિક લોક/અનલોક સુવિધાનો 19.1 મિલિયનથી વધુ વખત ઉપયોગ કર્યો છે. આ સુવિધા આધાર નંબર ધારકોને જ્યારે પણ જરૂર પડે ત્યારે તેમના બાયોમેટ્રિક્સને તાત્કાલિક લોક અથવા અનલોક કરવાની મંજૂરી આપીને તેમની વ્યક્તિગત માહિતી પર વધુ નિયંત્રણ પ્રદાન કરે છે, જે માત્ર થોડા ટેપ સાથે સુરક્ષાનું એક વધારાનું સ્તર ઉમેરે છે.

આધાર એપ આધાર નંબર ધારકોને તેમની ઓળખ દર્શાવવા, શેર કરવા અને ચકાસવા માટે એક સુવિધાજનક અને પ્રાઇવસી-ફર્સ્ટ રીત પ્રદાન કરવા માટે ડિઝાઇન કરવામાં આવી છે અને તે વિકસિત ભારતના ડિજિટલ ઇન્ડિયા મિશનને અનુરૂપ જીવનની સરળતાને વધુ બહેતર બનાવવામાં મહત્વપૂર્ણ ભૂમિકા ભજવી રહી છે.

SM/IJ/JD