صدر جمہوریہ ہند ، محترمہ دروپدی مرمو نے آج (15 جولائی 2026) سشروت جینتی کے موقع پر آل انڈیا انسٹی ٹیوٹ آف آیوروید (اے آئی آئی اے) نئی دہلی میں ’سشروتم 2026‘ کا افتتاح کیا ۔  انہوں نے اس موقع پر اے آئی آئی اے کے ایم آر آئی سیکشن کا بھی افتتاح کیا ۔

اجتماع سے خطاب کرتے ہوئے صدر جمہوریہ نے سرجری کےباوا کے طور پر مشہور آچاریہ سشروت کے یوم پیدائش کے موقع پر آیوروید سے وابستہ تمام افراد کو مبارکباد پیش کی ۔  انہوں نے کہا کہ جب آچاریہ سشروت نے صدیوں پہلے جراحی کے عمل کا آغاز کیا تھا ، تو یہ اپنے وقت کے لیے کسی انقلاب سے کم نہیں تھا ۔

صدر جمہوریہ نے کہا کہ آچاریہ سشروت بہت سے پیچیدہ اور اختراعی جراحی طریقہ کار کے علمبردار کے طور پر مشہور ہیں ۔  اپنے دور میں انہوں نے پلاسٹک سرجری ، موتیابند کی سرجری ، ٹیومر کا علاج اور ای این ٹی سرجری جیسے مختلف شعبوں میں نئی تکنیکیں متعارف کروائیں ۔  ان کی تحریر کردہ سشروت سمہیتا نے نہ صرف برصغیرہند بلکہ پوری دنیا کو ایک نئی سمت فراہم کی ہے ۔

صدر جمہوریہ نے کہا کہ ہماری روایات میں پنہاں انسانی فلاح و بہبود کے لیے کارآمدعلم کو نہ صرف آگے بڑھانا- بلکہ اسے بدلتے وقت کے ساتھ ہم آہنگ کرنا معاشرے کے لیے فائدہ مند ہوگا ۔  زندگی کے بارے میں آیوروید کا جامع نظریہ انسانیت کے لیے ایک نعمت ہے ۔  ہمیں اس بات کو یقینی بنانا چاہیے کہ یہ قدیم حکمت موجودہ دور میں بھی موزوں اور مؤثر رہے ۔  انہوں نے کہا کہ حکومت ہند نے آیوروید اور یوگا کو نئے جوش و خروش کے ساتھ عالمی سطح پر فروغ دیا ہے ۔  انہیں یہ جان کر خوشی ہوئی کہ حکومت تمام سائنسی معیارات پر جراحی کی قدیم روایت کی توثیق کرنے کی کوششیں کر رہی ہے ۔  انہوں نے کہا کہ معیاری دستاویزات ، ڈیجیٹل صحت انضمام  اور جدید سائنسی تحقیقی تکنیکوں کے مؤثر استعمال سے نظام کی وسیع پیمانے پر عالمی قبولیت کو تقویت ملے گی ۔

صدر جمہوریہ نے اپنے پیشہ ورانہ سفر کا آغاز کرنے والے نوجوان طلباء اور محققین سے کہا کہ آیوروید کا مستقبل ان کے ہاتھوں میں ہے۔  انہوں نے انہیں مشورہ دیا کہ وہ تجسس ، دیانتداری اور سائنسی مزاج کی رہنمائی میں عملی تحقیق اور اپنے شعبے میں اعلیٰ معیار کے شواہد کی تخلیق کے راستے پر آگے بڑھیں ۔  انہوں نے کہا کہ جہاں بھی مناسب ہو ، انہیں نئی ٹیکنالوجی کے استعمال میں ہچکچاہٹ نہیں کرنی چاہیے ۔  انہوں نے ان پر زور دیا کہ وہ آچاریہ سشروت کے دکھائے ہوئے راستے پر چلیں اور طبی اخلاقیات اور مریضوں کے لیے ہمدردانہ خدمات کے عزم پر ثابت قدم رہیں ۔

صدر جمہوریہ نے اس اعتماد کا اظہار کیا کہ سشروتم 2026 میں ہونے والی بات چیت سے نئی بصیرت سامنے آئے گی اور آیورویدک سرجری کے شعبے میں بین الاقوامی تعاون کو مزید تقویت ملے گی ۔  انہوں نے کہا کہ اس طرح کے بامعنی پروگراموں سے صحت کی دیکھ بھال کے مجموعی نظام میں آیوروید کے تعاون کو بڑھانے میں مدد ملے گی ۔

آل انڈیا انسٹی ٹیوٹ آف آیوروید (اے آئی آئی اے) کے زیر اہتمام منعقدہ تین روزہ بین الاقوامی سیمینار میں ہندوستان اور دیگر ممالک کے نامور سرجن، ماہرین تعلیم اور محققین شرکت کریں گے ۔

صدر جمہوریہ کے خطاب کوملاحظہ کرنے کے لیے براہ کرم یہاں کلک کریں -

*******

) ش ح –م ش-  ش ہ ب )

U.No. 9962