ভারতকী রাস্ত্রপতি, শ্রীমতি দ্রৌপদী মর্মুনা ঙসি (জুলাই ৭, ২০২৬) রাস্ত্রপতি ভাৱন কলচরেল সেন্তরদা পাংথোকপা থৌরম অমদা দুরান্দ কপ তর্নামেন্ত ২০২৬কী ত্রোফিশিং মাইখুম হাংদোকখ্রে অমসুং ফ্লেগ ওফ তৌখ্রে।

থৌরম অদুদা ৱা ঙাংলদুনা রাস্ত্রপতিনা দুরান্দ কপকা মরী লৈনবা হান্নগী অমসুং হৌজিক্কী ওফিসিয়েলশিং অমসুং শান্নরোই পুম্নমকপু থাগৎপা ফোংদোকখি অমসুং তুর্নামেন্ত অসিনা হৈ-শিংলবা ফুতবোলর কয়াদা প্লেতফোর্ম অমা পীরি হায়না মহাক্না হায়খি।

দুরান্দ কপ, প্রেসিদেন্তস কপ অমসুং শিমলা ত্রোফিগীদমক চহি অসিদা অনৌবা তীম খরা শরুক য়ারগনি, মসিগী মনুংদা শ্রী লঙ্কাগী তীম অমা য়াওরি হায়বা খঙবদা রাস্ত্রপতিনা নুংঙাইবা ফোংদোকখি। অনৌবা তীমশিং য়াওহন্দুনা পুৱারী ওইরবা কম্পিতিসন অসি হেন্না মীয়াম্না পাম্নবা ওইহল্লগনি হায়না মহাক্না থাজবা থমখি। মহাক্না শরুক য়ারিবা তীম অমসুং শান্নরোই পুম্নমকপু থোইদোক-হেন্দোকপা পর্ফোমেন্সকীদমক মহাক্কী য়াইফ-পাউজেল পীখি।

রাস্ত্রপতিনা হায়খি মদুদি ফুতবোল অসি মালেমদা খ্বাইদগী পাম্নবা শান্ন-খোৎনবশিংগী মরক্তগী অমনি। মসি থোইদোক-হেন্দোক্না অথোইবা, অমত্তা ওইবা অমসুং স্পোর্তসমেনশিপকী তোপ-তোপ্পা খুদম অমনি। মহাক্না হায়খি মদুদি হৌজিক চত্থরিবা ফিফা ৱার্ল্দ কপতা মালেমগী খ্বাইদগী ফবা তীম অমসুং শান্নরোইশিংনা মখোয়গী লৈবাকশিংদা ফুতবোলগী মীংচৎ হেনগৎহন্নবা চাংদম্নরি। হায়রিবা তীমশিং অমসুং শান্নরোইশিং অসিগী মালেম শিনবা থুংনা মখোয়গী অফবা পর্ফোমেন্সশিংবু থাগৎচবা ফেনশিং লৈ। ফুতবোলনা মীশিংবু পুনশিন্নৈ, অমসুং শান্নরোইশিংগী শিংথানীংঙাই ওইবা থবকশিং অসিনা মফম খুদিংমক্তা শান্ন-খোৎনববু পামজবশিংবু পুক্নিং থৌগৎলি।

গ্লোবেল ফুতবোলগী স্তেজতা ভারতনা মকোক থোংবা ঙম্নবগীদমক চৎকদবা খোংচৎ অসি য়াম্না শাংই হায়না রাস্ত্রপতিনা হায়খি। মহাক্না হায়খি মদুদি তুর্নামেন্ত অসিনা ফুতবোলগী হৈশিংবা হেনগৎহন্নবা অমসুং য়োকখৎনবগী য়াম্না মরু ওইবা থৌদাং অমা লৌগনি।

রাস্ত্রপতিনা হায়খি মদুদি শান্ন-খোৎনবগী ৱাখল্লোনগী মরুওইবা অসি শান্ন-খোৎনবখক্তদা অকক্নবা ওইদে। মসিনা ঐখোয়দা মান্নবা, মতেং পাংনবগী অমসুং অরুবা ফিভমদা লৈরবসু অচেৎপা থাজবা থমবগী মগুনশিং তাকই। ঐখোয়না ২০৪৭ ফাওবদা ঐখোয়গী লৈবাক অসিবু 'ভিক্সিত ভারত' ওইহন্নবা মাংলোমদা চংশিল্লি। মহাক্না থাজবগা লোইননা ফোংদোকখি মদুদি ফুতবোল শান্নরোইশিংনা মখোয়গী তীমগী মাইপাকপগী খোঙচত্তা অমনা অমবু মতেং পাংবগুম্না, ঐখোয়না, লৈবাক অসিগী প্রজাশিংনা অমত্তা ওইনা লেপতুনা বিক্সিত ভারতকী পান্দম অসি ফংবদা মাই পাকপা ঙমগনি।

রাস্ত্রপতিগী ৱারোল অদু য়েংনবগীদমক্তা অসিদা ক্লিক তৌবীয়ু

***