صدر جمہوریہ ہند ، محترمہ دروپدی مرمو نے آج (7 جولائی 2026) کو راشٹرپتی بھون کلچرل سینٹر میں منعقدہ ایک تقریب میں ڈورنڈ کپ ٹورنامنٹ 2026 کی  ٹرافی کی نقاب کشائی کی اور آغاز کیا ۔

اس موقع پر خطاب کرتے ہوئے صدر جمہوریہ نے ڈورنڈ کپ سے وابستہ تمام سابق اور موجودہ عہدیداروں اور کھلاڑیوں کو مبارکباد دی اور کہا کہ اس ٹورنامنٹ نے متعدد باصلاحیت فٹ بالرز کو ایک پلیٹ فارم فراہم کیا ہے ۔

صدر جمہوریہ کو یہ جان کر خوشی ہوئی کہ اس سال کچھ نئی ٹیمیں ڈورنڈ کپ ، پریذیڈنٹ کپ اور شملہ ٹرافی کے لیے مقابلہ کریں گی ، جن میں سری لنکا کی ایک ٹیم بھی شامل ہے ۔  انہوں نے اس اعتماد کا اظہار کیا کہ نئی ٹیموں کی شمولیت اس تاریخی مقابلے کو مزید مقبول بنائے گی ۔  انہوں نے حصہ لینے والی تمام ٹیموں اور کھلاڑیوں کو شاندار کارکردگی کے لیے نیک خواہشات کا اظہار کیا ۔

صدر جمہوریہ نے کہا کہ فٹ بال دنیا کے مقبول ترین کھیلوں میں سے ایک ہے ۔  یہ مہارت، اتحاد اور کھیل کے جذبے کی ایک منفرد مثال ہے ۔  انہوں نے کہا کہ جاری فیفا ورلڈ کپ میں دنیا کی بہترین ٹیمیں اور کھلاڑی اپنے اپنے ممالک میں فٹ بال کے وقار کو بڑھانے کے لیے مقابلہ کر رہے ہیں ۔  ان ٹیموں اور کھلاڑیوں کے دنیا بھر میں مداح ہیں، جو ان کی عمدہ کارکردگی کی تعریف کرتے ہیں ۔  فٹ بال لوگوں کو متحد کرتا ہے ، اور کھلاڑیوں کی شاندار کارکردگی ہر جگہ کھیلوں کے شوقین افراد کو ترغیب دیتی ہے ۔

صدر جمہوریہ نے کہا کہ فٹ بال کی  عالمی سطح پر اپنی موجودگی قائم کرنے کے لیے ہندوستان کو ابھی بھی ایک طویل سفر طے کرنا ہے ۔  انہوں نے امید ظاہر کی کہ یہ ٹورنامنٹ فٹ بال کی صلاحیتوں کو پروان چڑھانے میں اہم کردار ادا کرے گا ۔

صدر جمہوریہ نے کہا کہ کھیل کے جذبے کی اہمیت صرف کھیلوں تک محدود نہیں ہے ۔  یہ ہمیں مساوات ، تعاون اور منفی حالات میں بھی ثابت قدم رہنے کی اقدار سکھاتا ہے ۔  ہم سال 2047  تک اپنے ملک کو وکست بھارت میں تبدیل کرنے کے لیے آگے بڑھ رہے ہیں ۔  انہوں نے اس اعتماد کا اظہار کیا کہ ہم ، ملک کے شہری ،  اسی طرح متحد ہوکر وکست بھارت کے ہدف کو حاصل کرنے میں کامیاب ہوں گے ، جس طرح فٹ بال کے کھلاڑی اپنی ٹیم کی فتح کی طرف پیش قدمی میں ایک دوسرے کا ساتھ دیتے ہیں ۔

صدر جمہوریہ کی تقریر دیکھنے کے لئے براہ کرم یہاں کلک کریں

........................................................................................................

) ش ح –ا ع خ -ق ر)

U.No. 9645