এক্সিলেন্সী,

অদোমগী থৌজাল হৈরবা ৱাহৈশিংগীদমক ঐহাক্না থম্মোয় শেংনা তৌবীমল খঙবা উৎচরি।

ঙরাং নুমিদাং এয়রপোর্ত্তা অদোম্না লাকপীবা অদু তশেংনা য়াম্না মরু ওইবা থৌওং অমনি, অমসুং ঐহাক্না মসিগীদমক অদোমদা অখন্ননা  থাগৎপা ফোংদোকচরি।

অমসুং অদোমগী মন্ত্রীনা নুমিদাং চুপ্পা ঐহাক্কা লোয়ননা লৈখি। ভারতকী প্রধান মন্ত্রীনা চহি ৪০গী মতুংদা ন্যু জীলেন্দদা চৎপা হায়বা অসি ঐহাক্কীদমক্তা য়াম্না নুংঙাইবা ৱাফম অমনি; অদোমগী ইকনোমিক কেপিতেলদা থৌরম অমা পাংথোক্তুনা অদোমনা ভারত অমসুং ন্যু জীলেন্দগী মরক্তা মরী অসিদা অনৌবা শক্তি পীনবা খুদোংচাবা অমা ফংহল্লে। মসিগীদমক ঐহাক্না অদোমবু থাগৎপা ফোংদোকচরি।

ন্যু জীলেন্দগী মীয়ামগী মরক্তা লৈবা অমসুং মখোয়না ভারতকীদমক থম্লিবা নুংশিবা অদু উবা ফংজবা অসি য়াম্না পুক্নিং থৌগৎনীংঙাইনি। মসিনা ঐহাক্কী থম্মোয়দা য়াম্না নুংঙাইবা ফাওহল্লি। মসিগীদমক্তা ঐহাক্না অদোমগী থাগৎপা ফোংদোকচরি।

মসিনা ঐখোয়গী মরীশিংদা অনৌবা ইনর্জী অমা হাপচিনবা অমসুং মরুপ-মপাং ওইবগীদমক ঐখোয়গী অচেৎপা ফিরেপ অমুক হন্না চেৎশিলহন্নবা ঐখোয়গী মরীশিংদা পুৱারী ওইরবা মাইলস্তোন অমা ওইরি। অদোম্না ভারত্তা লাকখিবা খোঙচৎ অদুদা এফ.তি.এ.গী থৌওং হৌদোকখি; ন্যু জীলেন্দ পুম্নমক্না পুনশিন্নবা অমসুং এফ.তি.এ. অসি অসিগুম্বা অতেনবা মতমগী মনুংদা মপুং ফাহনবা অসি অঙকপা মাইপাকপা অমনি - মালেমগী ওইনা অহানবা ওইরম্বা য়াই। মসিগীদমক্তা ঐহাক্না অদোম, অদোমগী সরকার অমসুং অদোমগী তীম অদুদা ঐহাক্কী থম্মোয়দগী নুংঙাইবা ফোংদোকচরি।

মমাং চহিদা হোলিগী মতমদা অদোম ভারত্তা লাকখি। অদোমগী খোঙচৎ অসিনা ঐখোয়গী মরীদা অনৌবা মচুশিং হাপচিনখি মরমদি হোলিগী মচুশিংনা অখন্নবা মরুওইবা অমা লৈরি, অমসুং ঐখোয়না মদু হকথেংননা থেংনখি। ঙসি ঐখোয়না স্ত্রেতেজিক পার্তনরশিপকী ফ্রেমৱার্ক্কী মনুংদা ঐখোয়গী মরীশিং অসি মপাঙ্গল কনখৎহল্লিবা অসিদা ঐহাক নুংঙাইবা ফাওই। মাইলস্তোন অসিনা ঐখোয়দা হেন্না ইনর্জী অমসুং থাজবগা লোয়ননা মাংলোমদা চংশিন্নবা পুক্নিং থৌগৎকনি।

এক্সিলেন্সী,

 দেমোক্রেতিক ভেল্যুশিংদা ঐখোয়গী অচেৎপা থাজবা অসিনা ঐখোয়বু মহৌশাগী ওইবা পার্তনর ওইহল্লি। ঐখোয় অসি অমনা অমগীদমক শেমলকপনি। মসিগী মথক্তা, মেরিতাইম নেসন অনি ওইনা, ঐখোয়গী নক্নবা মতেং পীনবা অসিনা ইন্দো-পেসিফিকতা অনৌবা শক্তি পীরি, অমসুং ঐখোয়গী পার্তনরশিপ অসিনা ঐখোয়গী শান্তিগী পান্দমশিং ফংনবা অনৌবা ইনর্জী পীবা ঙমগনি।

ঐহাক্না থাজবা থম্লি মদুদি খোঙচৎ অসিনা ঐখোয়গী লৈবাক অনিগী মরী হেন্না চেৎশিলহল্লগনি অমসুং মালেমগী শান্তি, তংদু লৈতাবা অমসুং সেক্যুরিতীদা ঐখোয়গী শরুক য়াবা হেনগৎহল্লগনি। ঐখোয়না শান্তিগীদমক এদভোকেৎ তৌবা, শান্তিগীদমক থবক তৌবা, অমসুং শান্তিগী খুত্থাংদা মালেমগী য়াইফ-থৌরাংগী মায়কৈদা খুমাং চাউশিন্নবা কেতালাইতিক এজেন্ত অমা ওইনা থবক তৌবা ঙম্মী।

অদোম্না নুংশিজবা অমসুং ঐঙোন্দা ইকায় খুম্নবা উৎখিবগীদমক ঐহাক্না অমুক্কা হন্না থাগৎপা ফোংদোকচরি।

অমুক হন্না ঐহাক্না অদোম্না তরাম্না ওকপা অমসুং অদোম্না ঐঙোন্দা উৎলিবা ইকায় খুম্নবা অদুগীদমক থম্মোয় শেংনা থাগৎপা ফোংদোকচরি।

***