లాస్ ఏంజిల్స్ 2028 ఒలింపిక్ క్రీడలకు సంబంధించి క్రీడాకారుల అర్హత, ఎంపిక విధానాన్ని వెల్లడించాలని గుర్తింపు పొందిన అన్ని జాతీయ క్రీడా సమాఖ్యలకు (ఎన్‌ఎస్‌ఎఫ్‌) కేంద్ర యువజన వ్యవహారాలు, క్రీడల మంత్రిత్వ శాఖ ఆదేశాలు జారీ చేసింది. క్రీడాకారుల ఎంపిక కోసం అనుసరించే ఖచ్చితమైన ప్రమాణాలు, ప్రక్రియతో కూడిన సమగ్ర వివరాలను జూలై 15 లోగా ప్రకటించాలని ఆదేశించింది.

ఒలింపిక్స్, పారాలింపిక్స్, ఆసియా క్రీడలు, పారా ఆసియా క్రీడలు, కామన్వెల్త్ క్రీడలు వంటి అంతర్జాతీయ క్రీడా కార్యక్రమాలకు సంబంధించిన ఎంపిక విధానం, ప్రమాణాలను.. ఆయా క్రీడలు ప్రారంభం కావడానికి కనీసం రెండు సంవత్సరాల ముందే ప్రచారం చేయాలని స్పష్టం చేసింది. ఈ వివరాలను సంబంధిత జాతీయ క్రీడా సమాఖ్యల అధికారిక వెబ్‌సైట్లలో తప్పనిసరిగా అప్‌లోడ్ చేయాలని ఆదేశించింది.

ఈ ఎంపిక విధానం, నిబంధనలకు సంబంధించిన పూర్తి సమాచారాన్ని జాతీయ క్రీడా సమాఖ్యల పరిధిలోని సభ్య విభాగాలకు, భారత క్రీడా ప్రాధికార సంస్థకు (ఎస్‌ఏఐ) ఖచ్చితంగా చేరవేయాలని కేంద్ర మంత్రిత్వ శాఖ స్పష్టం చేసింది.

లాస్ ఏంజిల్స్ 2028 ఒలింపిక్ క్రీడలు 2028 జూలై 14న ప్రారంభమై అదే నెల 30న ముగియనున్నాయి.

లాస్ ఏంజిల్స్ 2028 ఒలింపిక్ క్రీడలకు సంబంధించిన అర్హత మార్గదర్శకాలను ఆయా అంతర్జాతీయ క్రీడా సమాఖ్యలు ఇప్పటికే విడుదల చేశాయని కేంద్ర మంత్రిత్వ శాఖ వెల్లడించింది. క్రీడాకారులు, ఆసక్తి గల వారు ఈ వివరాలను ఒలింపిక్స్ అధికారిక వెబ్‌సైట్ లింకు https://www.olympics.com/ioc/documents/olympic-games/los-angeles-2028-olympic-games ద్వారా తెలుసుకోవచ్చని పేర్కొంది.

ఈ అంతర్జాతీయ మార్గదర్శకాలకు అనుగుణంగా తాము అనుసరించబోయే ఒలింపిక్ అర్హత, క్రీడాకారుల ఎంపిక విధానం, ఖచ్చితమైన ప్రమాణాల వివరాలను తక్షణమే తమ అధికారిక వెబ్‌సైట్లలో ప్రచురించాలని గుర్తింపు పొందిన అన్ని జాతీయ క్రీడా సమాఖ్యలను కోరింది. ఈ సమాచారాన్ని సమర్పించడానికి 2026 జూలై 15 వరకే ఆఖరి గడువుగా విధించింది.

ఈ ఎంపిక మార్గదర్శకాలను తమ పరిధిలోని అన్ని అనుబంధ రాష్ట్ర, కేంద్రపాలిత ప్రాంతాల క్రీడా సంఘాలకు కూడా చేరవేయాలని ఎన్‌ఎస్‌ఎఫ్‌లను ఆదేశించింది.

క్రీడాకారుల ఎంపిక ప్రక్రియలో మరింత పారదర్శకతను, జవాబుదారీతనాన్ని పెంపొందించడమే లక్ష్యంగా కేంద్ర ప్రభుత్వం ఈ చర్యలు చేపట్టింది. ఒలింపిక్ అర్హత ప్రమాణాలు, ఎంపిక విధానాలు చాలా ముందుగానే ప్రజల ముందుకు రావడం వల్ల క్రీడా రంగానికి చెందిన భాగస్వాములందరికీ ఎంతో ప్రయోజనం చేకూరుతుంది.

***