குடியரசு துணைத்தலைவர் திரு சி பி ராதாகிருஷ்ணன், இன்று புவனேஸ்வரில் ஆழ்கடலில் மீன்வளத்தை நிலையான முறையில் பயன்படுத்துவதற்கான அங்கீகாரக் கடிதங்களை வழங்கும் தேசியத் திட்டத்தைத் தொடங்கி வைத்தார். இந்நிகழ்ச்சியில், அவர் ஒடிசா ஆழ்கடல் மீன்பிடி இயக்க ஆவணத்தை வெளியிட்டார். அத்துடன் நாடு முழுவதிலுமிருந்து பத்து மீன் உற்பத்தியாளர் அமைப்புகளுக்கும் மீனவர்களுக்கும் ஆழ்கடல் மீன்பிடித்தலுக்கான அங்கீகாரக் கடிதங்களையும் வழங்கினார்.

நிகழ்ச்சியில் உரையாற்றிய அவர், இந்த முயற்சி, ஆழ்கடலின் பரந்த ஆற்றலை நிலையான முறையில் பயன்படுத்த வழிவகுக்கும் என்றார். இதன் மூலம் இந்தியாவின் கடல்சார் பயணத்தில் ஒரு புதிய அத்தியாயம் தொடங்குகிறது என்று அவர் கூறினார். இந்தத் திட்டம், மீன்வளத் துறையில் வளர்ச்சி, நிலைத்தன்மை, செழிப்பு ஆகியவை அடங்கிய ஒரு புதிய சகாப்தத்தைக் கொண்டுவருவதற்கான கூட்டு உறுதிப்பாட்டைப் பிரதிபலிக்கிறது என்றும் அவர் குறிப்பிட்டார்.

இந்தியா 11,000 கிலோமீட்டருக்கும் அதிகமான கடற்கரையையும், ஏறக்குறைய 24 லட்சம் சதுர கிலோமீட்டர் பரப்பளவுள்ள பிரத்தியேகப் பொருளாதார மண்டலத்தையும் கொண்டுள்ளது என்றும், இங்குள்ள அளவற்ற கடல் வளம் பெருமளவில் பயன்படுத்தப்படாமல் உள்ளது என்றும் அவர் குறிப்பிட்டார். பாரம்பரியமாக மீன்பிடி நடவடிக்கைகள் கடற்கரைக்கு அருகிலேயே இருந்து வந்தாலும், இந்த புதிய கட்டமைப்பு, சூரை மீன் போன்ற அதிக மதிப்புள்ள இனங்களை நிலையான முறையில் பயன்படுத்துவதற்காக, இந்திய மீனவர்கள் நம்பிக்கையுடன் ஆழ்கடலுக்குள் செல்ல வழிவகுக்கும் என்று அவர் கூறினார்.

இந்தியாவின் மீன்வளத் துறையின் விரைவான வளர்ச்சியை எடுத்துரைத்த குடியரசு துணைத்தலைவர், இந்தியா இப்போது உலகின் இரண்டாவது பெரிய மீன் உற்பத்தி நாடாக உள்ளது என்றும், உலகளாவிய மீன் உற்பத்தியில் சுமார் எட்டு சதவிகிதப் பங்களிப்பை வழங்குகிறது என்றும் கூறினார். இத்துறை கிட்டத்தட்ட மூன்று கோடி மீனவர்கள், மீன் வளர்ப்பாளர்களின் வாழ்வாதாரத்திற்கு ஆதரவளிக்கிறது என்றும், கடந்த நிதியாண்டில் கடல் உணவு ஏற்றுமதி ரூ.73,000 கோடியைத் தாண்டியது என்றும் அவர் குறிப்பிட்டார். 'ஹை சீஸ்' எனப்படும் ஆழ்கடல் மீன்பிடித்தல் முன்முயற்சியானது இந்தியாவின் ஏற்றுமதித் திறனை மேலும் வலுப்படுத்தும் என்றும், பதனப்படுத்துதல், குளிரூட்டப்பட்ட விநியோக நடவடிக்கைகள், போக்குவரத்து, ஏற்றுமதி சேவைகள் ஆகிய துறைகளில் வேலைவாய்ப்பை உருவாக்கும் என்றும் அவர் நம்பிக்கை தெரிவித்தார். அறிவியல், தொழில்நுட்பம், புத்தாக்கம், உலகளாவிய வாய்ப்புகள் ஆகியவற்றால் இயக்கப்படும் ஒரு நவீனத் தொழிலாக மீன்பிடித் தொழிலைக் கருதுமாறு இளைஞர்களை அவர் கேட்டுக்கொண்டார். 

இந்த நிகழ்ச்சியில் ஒடிசா ஆளுநர் திரு ஹரி பாபு கம்பம்பதி, ஒடிசா முதலமைச்சர் திரு மோகன் சரண் மாஜி, மத்திய மீன்வளம், கால்நடை வளர்ப்பு, பால்வளத் துறை அமைச்சர் திரு ராஜீவ் ரஞ்சன் சிங், மத்திய கல்வித்துறை அமைச்சர் திரு தர்மேந்திர பிரதான், மத்திய மீன்வளத் துறை இணையமைச்சர் பேராசிரியர் எஸ் பி சிங் பாகேல் உள்ளிட்டோர் கலந்து கொண்டனர்.

மேலும் விவரங்களுக்கு இந்த ஆங்கிலச் செய்திக் குறிப்பைக் காணவும் : https://www.pib.gov.in/PressReleasePage.aspx?PRID=2282766&reg=3&lang=1

***

SS/PLM/SH