প্ৰধানমন্ত্ৰী শ্ৰী নৰেন্দ্ৰ মোদীয়ে আজি ৰাজস্থানৰ বালোত্ৰাত প্ৰায় ১.০৬ লাখ কোটি টকাৰ উন্নয়নমূলক প্ৰকল্প দেশবাসীৰ নামত উৎসৰ্গা, উদ্বোধন আৰু আধাৰশিলা স্থাপন কৰে। বিশাল জনসভাক সম্বোধন কৰি তেওঁ উন্নয়নমূলক পদক্ষেপসমূহৰ বাবে এক সহযোগিতাপূৰ্ণ বাৰ্তা প্ৰেৰণ কৰে। প্ৰচণ্ড গৰম নেওচি সভালৈ অহা জনসাধাৰণক গভীৰ কৃতজ্ঞতা প্ৰকাশ কৰি প্ৰধানমন্ত্ৰীগৰাকীয়ে এই বৃহৎ উপস্থিতিক বৰ্তমানৰ শাসন ব্যৱস্থাৰ প্ৰতি এক আশীৰ্বাদ স্বৰূপ বুলি অভিহিত কৰে। শ্ৰী মোদীয়ে কয়, "মই ৰাজস্থানবাসীৰ ওচৰত চিৰকৃতজ্ঞ, এই অপাৰ সমৰ্থনে আমাৰ চৰকাৰৰ প্ৰচেষ্টাৰ প্ৰতি আপোনালোকৰ থকা গভীৰ বিশ্বাসকে প্ৰদৰ্শন কৰিছে।"

অঞ্চলটোৰ ঐতিহাসিক ঐতিহ্যৰ কথা সুঁৱৰি প্ৰধানমন্ত্ৰীগৰাকীয়ে ৰাজ্যখনৰ অগণন বীৰ সন্তানক শ্ৰদ্ধাঞ্জলি অৰ্পণ কৰে। তেওঁ লগতে গুৰুত্ব আৰোপ কৰে যে প্ৰকৃত ৰাষ্ট্ৰীয় গৌৰৱ স্বাৱলম্বিতাৰ সৈতে ওতঃপ্ৰোতভাৱে জড়িত। তেওঁ ব্যক্তিৰ আত্মমৰ্যাদা আৰু দেশৰ কৌশলগত প্ৰয়োজনীয়তাৰ মাজত এক পোনপটীয়া সম্পৰ্ক স্থাপন কৰি বিদেশী নিৰ্ভৰশীলতা হ্ৰাস কৰাৰ ওপৰত দৃঢ়তাৰেয়ে। শ্ৰী মোদীয়ে দৃঢ়তাৰে কয়, "ব্যক্তিৰেই হওক বা দেশৰেই হওক, আত্মমৰ্যাদা কেৱল তেতিয়াহে উচ্চ হৈ থাকিব পাৰে যেতিয়া ই সম্পূৰ্ণৰূপে স্বাৱলম্বী হয়।"

স্মৰণীয় ৰাজস্থান শোধনাগাৰটো দেশবাসীৰ নামত উৎসৰ্গা কৰি প্ৰধানমন্ত্ৰীয়ে সমগ্ৰ দেশৰ সৰ্বাংগীণ উন্নয়ন আৰু অৰ্থনৈতিক স্বাধীনতাৰ দিশত ইয়াৰ গুৰুত্বপূৰ্ণ ভূমিকাৰ কথা উল্লেখ কৰে। শ্ৰী মোদীয়ে কয়, "এই বৃহৎ শোধনাগাৰটোৱে হাজাৰ হাজাৰ লোকৰ বাবে সংস্থাপনৰ এক স্থায়ী মাধ্যম হিচাপে কাম কৰিব আৰু এই সফলতাৰ বাবে মই বিশেষকৈ ৰাজস্থানৰ যুৱপ্ৰজন্মক অভিনন্দন জনাইছো।"

প্ৰশাসনিক কাৰ্য-সংস্কৃতিৰ এক আমূল পৰিৱৰ্তনৰ ওপৰত গুৰুত্ব আৰোপ কৰি প্ৰধানমন্ত্ৰীয়ে পূৰ্বৰ চৰকাৰৰ কেৱল আধাৰশিলা স্থাপন কৰি এৰি থৈ যোৱা প্ৰথাৰ বিপৰীতে বৰ্তমান চৰকাৰৰ নিৰন্তৰ প্ৰকল্প ৰূপায়ণৰ খতিয়ান দাঙি ধৰে। মাত্ৰ দুমাহ পূৰ্বে উক্ত স্থানত সংঘটিত এক দুৰ্ভাগ্যজনক দুৰ্ঘটনাৰ কথা স্মৰণ কৰি তেওঁ অভূতপূৰ্ব গতিৰে এই বৃহৎ আন্তঃগাঁথনি প্ৰকল্প সম্পূৰ্ণ কৰাৰ বাবে কৰ্মীসকলৰ অসাধাৰণ ধৈৰ্য আৰু শ্ৰমক প্ৰশংসা কৰে। শ্ৰী মোদীয়ে দৃঢ়তাৰে কয়, "প্ৰত্যাহ্বান যিমানেই বিশাল বা অপ্ৰত্যাশিত নহওক কিয়, নতুন ভাৰতে নিজৰ কঠিন সংকল্পৰ পৰা পিছহুহকি নাহে আৰু ইয়াৰ দ্ৰুত গতিও লেহেমীয়া হ'বলৈ নিদিয়ে।"

ৰাজ্যখনত দ্ৰুত উন্নয়নৰ এক শৃংখলাৰ ৰেখাংকন কৰি প্ৰধানমন্ত্ৰীয়ে যোধপুৰত নতুন বিমানবন্দৰ টাৰ্মিনেলৰ উদ্বোধন আৰু দুৰ্গম অঞ্চলসমূহলৈ বিমান সংযোগ বিপ্লৱী কৰি তোলাৰ উদ্দেশ্যে নতুন 'উড়ান' আঁচনিৰ পৰ্যায় আৰম্ভ হোৱাৰ কথা ঘোষণা কৰে। এই বিমান পৰিবহণৰ অগ্ৰগতিৰ সমান্তৰালভাৱে তেওঁ শ্বেখাৱাটী অঞ্চলৰ পানীৰ সংকট অতি শীঘ্ৰে সমাধানৰ প্ৰতিশ্ৰুতি দিয়ে আৰু জয়পুৰ মেট্ৰ’ নেটৱৰ্কৰ ব্যাপক সম্প্ৰসাৰণৰ কথা ঘোষণা কৰে। শ্ৰী মোদীয়ে কয়, "এই গুৰুত্বপূৰ্ণ আন্তঃগাঁথনি প্ৰকল্পসমূহে সমগ্ৰ মাৰৱাড় অঞ্চলৰ পৰ্যটন, বাণিজ্য আৰু নিয়োগৰ ক্ষেত্ৰত এক নতুন গতি প্ৰদান কৰিব।"

যুৱ সবলীকৰণ আৰু প্ৰশাসনিক দক্ষতাৰ দিশত এক বৃহৎ পদক্ষেপৰ কথা উল্লেখ কৰি প্ৰধানমন্ত্ৰীয়ে আনুষ্ঠানিকভাৱে ৰাজস্থানৰ প্ৰায় ৫৪,০০০ যুৱ প্ৰাৰ্থীক চৰকাৰী চাকৰিৰ নিযুক্তি পত্ৰ বিতৰণৰ কথা ঘোষণা কৰে। তেওঁলোকে চৰকাৰী সেৱাৰ গুৰুত্বপূৰ্ণ কেৰিয়াৰ আৰম্ভ কৰাৰ সময়ত তেওঁ আন্তৰিক অভিনন্দন জ্ঞাপন কৰে। শ্ৰী মোদীয়ে কয়, "আজি নিযুক্তি পত্ৰ লাভ কৰা সকলো যুৱক-যুৱতীৰে মই অতি উজ্জ্বল আৰু সমৃদ্ধিশালী ভৱিষ্যত কামনা কৰিছো।"

ভূ-ৰাজনৈতিক প্ৰেক্ষাপটত পশ্চিম এছিয়াৰ বিধ্বংসী সংঘাতৰ প্ৰসংগত প্ৰধানমন্ত্ৰীয়ে ইয়াৰ ফলত সৃষ্টি হোৱা অস্থিৰতাই কেনেকৈ বিশ্বজুৰি এক হাহাকাৰ পৰিস্থিতিৰ সৃষ্টি কৰিছে তাৰ সবিশেষ উল্লেখ কৰে। তেওঁ এই পৰিস্থিতিটোক একবিংশ শতিকাৰ আটাইতকৈ ভয়াৱহ শক্তি সংকট বুলি অভিহিত কৰে, যাৰ বাবে ডাঙৰ ডাঙৰ উন্নত দেশসমূহো ইন্ধনৰ তীব্ৰ অভাৱৰ সৈতে যুঁজিবলগীয়া হৈছে। শ্ৰী মোদীয়ে কয়, "পশ্চিম এছিয়াৰ যুদ্ধৰ বাবে সমগ্ৰ বিশ্বতে হাহাকাৰ লাগিছে আৰু ডাঙৰ ডাঙৰ দেশসমূহে আজি ইন্ধনৰ অভাৱত সংগ্ৰাম কৰিবলগীয়া হৈছে।"

এই আন্তঃৰাষ্ট্ৰীয় হতাশাজনক পৰিস্থিতিৰ বিপৰীতে দেশৰ শক্তিশালী প্ৰতিৰোধ ক্ষমতাৰ কথা উল্লেখ কৰি প্ৰধানমন্ত্ৰীয়ে দেশৰ সঠিক কৌশলগত মূল্যায়ন, সম্পদৰ সন্তুলিত ব্যৱাহৰ আৰু সক্ৰিয় কূটনীতিৰ বাবেই অৰ্থনীতি সুৰক্ষিত কৰিব পৰা গৈছে বুলি কয়। তেওঁ দৃঢ়তাৰে কয় যে আধুনিক ভাৰতৰ দৃঢ় ইচ্ছাশক্তিৰ আগত গোলকীয় সংকটৰ জোকাৰণি বহুত সৰু প্ৰমাণিত হ’ল। শ্ৰী মোদীয়ে দৃঢ়তাৰে কয়, "ভাৰতে প্ৰতিটো স্তৰতে সঠিক সিদ্ধান্ত লৈছিল, সময়মতে সংকটৰ সঠিক মূল্যায়ন কৰিছিল আৰু পৰিস্থিতিৰ মোকাবিলা কৰিবলৈ আমাৰ কূটনৈতিক শক্তিক ইতিবাচকভাৱে ব্যৱহাৰ কৰিছিল।"

পশ্চিম এছিয়াৰ সংকটৰ সময়ত উৰাবাতৰি আৰু আতংক বিয়পোৱাসকলক গৰিহণা দি প্ৰধানমন্ত্ৰীয়ে ইয়াৰ সমান্তৰালভাৱে দিনে-নিশাই চলা প্ৰশাসনিক তৎপৰতা আৰু সংবেদনশীল কূটনৈতিক পদক্ষেপসমূহৰ প্ৰশংসা কৰে, যাৰ দ্বাৰা এই সংকট সফলতাৰে নিয়ন্ত্ৰণ কৰা হৈছিল। শ্ৰী মোদীয়ে কয়, "যেতিয়া কিছুমান শক্তি উৰাবাতৰি বিয়পোৱাত ব্যস্ত আছিল, তেতিয়া পৰিস্থিতি চম্ভালিবলৈ নীতিগত আৰু কূটনৈতিক পৰ্যায়ত গ্ৰহণ কৰা সংবেদনশীল পদক্ষেপসমূহ আছিল সম্পূৰ্ণ অভূতপূৰ্ব।"

এই সংকটৰ ভয়াৱহতাৰ কথা উল্লেখ কৰি প্ৰধানমন্ত্ৰীয়ে প্ৰকাশ কৰে যে সংঘাতৰ পূৰ্বে ভাৰতে ৬০ শতাংশ এলপিজি আমদানিৰ ওপৰত নিৰ্ভৰ কৰিছিল, যাৰ ৯০ শতাংশই আহিছিল অতি স্পৰ্শকাতৰ উপসাগৰীয় অঞ্চলৰ পৰা। যুদ্ধৰ বাবে যেতিয়া এই যোগান ব্যাহত হৈছিল, তেতিয়া দেশত হ'ব পৰা আতংকৰ এক ছবি দাঙি ধৰি তেওঁ কয়, "যুদ্ধৰ পৰিস্থিতিয়ে যেতিয়া সেই গুৰুত্বপূৰ্ণ যোগান প্ৰায় সম্পূৰ্ণৰূপে বন্ধ কৰি দিছিল, তেতিয়া আমাৰ দেশত কিমান ডাঙৰ হাহাকাৰ হ'বলৈ গৈ আছিল, সেয়া আপোনালোকে সহজেই অনুভৱ কৰিব পাৰে।"

ইতিমধ্যে গ্ৰহণ কৰা জৰুৰীকালীন পদক্ষেপসমূহৰ সবিশেষ উল্লেখ ধৰি প্ৰধানমন্ত্ৰীয়ে বুজাই দিয়ে যে কেনেকৈ ঔদ্যোগিক কামৰ বাবে ব্যৱহাৰ হ'বলগীয়া গেছক ঘৰুৱা ৰন্ধন গেছলৈ পৰিৱৰ্তন কৰিবলৈ ঘৰুৱা শোধনাগাৰসমূহক দ্ৰুতগতিত সাজু কৰা হৈছিল। তেওঁ গৌৰৱেৰে উল্লেখ কৰে যে মাত্ৰ সাত দিনৰ ভিতৰত এই কৌশলগত পৰিৱৰ্তনে ৰাষ্ট্ৰীয় এলপিজি উৎপাদন ৩৫,০০০ মেট্ৰিক টনৰ পৰা ৫৪,০০০ মেট্ৰিক টনলৈ বৃদ্ধি কৰে। শ্ৰী মোদীয়ে কয়, "আমাৰ শোধনাগাৰসমূহৰ ওপৰত সক্ৰিয়ভাৱে গুৰুত্ব আৰোপ কৰি, পূৰ্বে কেতিয়াও এলপিজি উৎপাদন নকৰা প্ৰকল্পসমূহকো এই প্ৰত্যাহ্বানৰ মোকাবিলা কৰিবলৈ দ্ৰুতগতিত সাজু কৰা হৈছিল।"

গ্ৰাহক সুৰক্ষাৰ ব্যাপক ৰণনীতিৰ ওপৰত আলোকপাত কৰি প্ৰধানমন্ত্ৰীয়ে পাৰম্পৰিক চিলিণ্ডাৰ গেছৰ ওপৰত থকা গধুৰ চাপ হ্ৰাস কৰিবলৈ পিএনজি (পাইপযুক্ত প্ৰাকৃতিক গেছ) সংযোগৰ দ্ৰুত সম্প্ৰসাৰণৰ কথা উল্লেখ কৰে। তেওঁ আঙুলিয়াই দিয়ে যে চৰকাৰে অতি কম সময়ৰ ভিতৰত ১১ লাখৰো অধিক পৰিয়ালক এই পাইপলাইন নেটৱৰ্কৰ সৈতে সফলতাৰে সংযোগ কৰিছে। শ্ৰী মোদীয়ে কয়, "চৰকাৰে বিশেষভাৱে নিশ্চিত কৰিছিল যাতে ৰন্ধন গেছৰ চাহিদাৰ সমগ্ৰ বোজা অকল এলপিজিৰ ওপৰত নপৰে।"

নাগৰিকসকলক প্ৰদান কৰা আৰ্থিক সুৰক্ষাৰ কথা উল্লেখ কৰি প্ৰধানমন্ত্ৰীয়ে কয় যে বজাৰ বিশেষজ্ঞসকলে ঘৰুৱা চিলিণ্ডাৰৰ মূল্য ২,০০০ টকালৈ বৃদ্ধি পাব পাৰে বুলি ভৱিষ্যদ্বাণী কৰা স্বত্বেও চৰকাৰে কঠোৰভাৱে ইয়াৰ মূল্য ৯৫০ টকাতকৈ কম কৰি ৰাখিছিল আৰু উজ্জ্বলা আঁচনিৰ চিলিণ্ডাৰসমূহ ৬৫০ টকাতকৈ কম মূল্যত যোগান ধৰিছিল। তেওঁ লগতে কয় যে প্ৰশাসনে মাত্ৰ দুদিন পূৰ্বে বাণিজ্যিক গেছৰ মূল্যও হ্ৰাস কৰিছে। শ্ৰী মোদীয়ে দৃঢ়তাৰে কয়, "এই সক্ৰিয় মূল্য নিয়ন্ত্ৰণে স্পষ্টকৈ দেখুৱাইছে যে আমাৰ চৰকাৰে ঘৰুৱা গ্ৰাহকৰ ওপৰত যাতে গধুৰ বোজা নপৰে তাৰ বাবে কিমান সংবেদনশীলতাৰে কাম কৰি আছে।"

বিশ্বজুৰি পেট্ৰ’ল আৰু ডিজেলৰ মূল্য তীব্ৰ বৃদ্ধিৰ কথা উল্লেখ কৰি, য’ত খাৰুৱা তেলৰ মূল্য প্ৰতি বেৰেলত ৭০ ডলাৰৰ পৰা ১২০ ডলাৰলৈ বৃদ্ধি পাইছিল, প্ৰধানমন্ত্ৰীয়ে ৰাইজক সোঁৱৰাই দিয়ে যে ভাৰতত কোনো বৃহৎ ঘৰুৱা তেলৰ ভাণ্ডাৰ নাই। তেওঁ স্মৰণ কৰে যে বিশ্বজুৰি মূল্য ৪০ৰ পৰা ৫০ শতাংশ বৃদ্ধি পোৱাৰ বাবে বহু দেশে কঠোৰভাৱে ইন্ধন বিতৰণৰ কোটা ধাৰ্য কৰিবলগীয়া হৈছিল। শ্ৰী মোদীয়ে কয়, "বিশ্বৰ বহু দেশত আমদানি পথ বন্ধ হোৱাৰ বাবে ডিজেল আৰু পেট্ৰ’ল কঠোৰভাৱে কোটা ভিত্তিত বিতৰণ কৰা হৈছিল।"

নাগৰিকক সুৰক্ষা দিবলৈ চৰকাৰে কৰা আৰ্থিক ত্যাগৰ কথা প্ৰকাশ কৰি প্ৰধানমন্ত্ৰীয়ে কয় যে চৰকাৰে কেৱল এপ্ৰিলৰ পৰা জুন মাহৰ ভিতৰত ৭৫,০০০ কোটিতকৈও অধিক টকাৰ লোকচান নিজে বহন কৰিছে। দুৰ্গম অঞ্চলসমূহতো যাতে নিৰৱচ্ছিন্ন আৰু সুলভ মূল্যত যোগান নিশ্চিত কৰিব পৰা যায়, তাৰ বাবে আবকাৰী শুল্ক প্ৰতি লিটাৰত ১০ টকাকৈ হ্ৰাস কৰাৰ সিদ্ধান্তৰ কথাও তেওঁ সবিশেষ উল্লেখ কৰে। শ্ৰী মোদীয়ে দৃঢ়তাৰে কয়, "ভাৰতত এনে ধৰণৰ তীব্ৰ নাটনিৰ পৰিস্থিতি এটা দিনৰ বাবেও হোৱা নাই আৰু আমি ৰাইজৰ ওপৰত বেছি বোজা পৰিবলৈ দিয়া নাই।"

এই গুৰুত্বপূৰ্ণ যোগান সংকটৰ সময়ত ভাৰতৰ শক্তিশালী আৰু সক্ৰিয় বৈদেশিক নীতিৰ বাবেই দেশখন সুকলমে ওলাই আহিব পাৰিলে বুলি উল্লেখ কৰি প্ৰধানমন্ত্ৰীয়ে কয় যে দেশে নিজৰ কূটনৈতিক প্ৰভাৱ ব্যৱহাৰ কৰি ইন্ধন আমদানিৰ উৎস মাত্ৰ ২৫-২৬খন দেশৰ পৰা ৪০খনতকৈও অধিক দেশলৈ সম্প্ৰসাৰণ কৰিছে। তেওঁ দৃঢ়তাৰে কয় যে এই নিৰ্ণায়ক পদক্ষেপে আন্তঃৰাষ্ট্ৰীয় সম্প্ৰদায়লৈ এক শক্তিশালী আৰু স্পষ্ট বাৰ্তা প্ৰেৰণ কৰিছে। শ্ৰী মোদীয়ে কয়, "ভাৰতে সমগ্ৰ বিশ্বক এক স্পষ্ট বাৰ্তা দিছে যে আমাৰ বাবে ৰাষ্ট্ৰীয় স্বাৰ্থ আৰু নাগৰিকৰ কল্যাণেই সৰ্বোপৰি।"

এক দশকৰ দূৰদৰ্শী নীতিৰ ফলতেই দেশৰ এই প্ৰতিৰোধ ক্ষমতা গঢ়ি উঠিছে বুলি উল্লেখ কৰি প্ৰধানমন্ত্ৰীয়ে পূৰ্বৰ চৰকাৰৰ অসহযোগিতাৰ বাবে ২০১৮ৰ পৰা ২০২৩ চনৰ ভিতৰত সম্পূৰ্ণ স্থবিৰ হৈ পৰা ৰাজস্থান ৰিফাইনেৰীৰ কামৰ বিপৰীতে বৰ্তমানৰ চৰকাৰৰ অধীনত ইয়াৰ দ্ৰুত সমাপ্তিৰ তুলনা কৰে। তেওঁ উল্লেখ কৰে যে ইয়াৰ মূল বুজাবুজি চুক্তি ২০১৭ চনতে স্বাক্ষৰিত হৈছিল। শ্ৰী মোদীয়ে কয়, "বৰ্তমানৰ চৰকাৰ ক্ষমতালৈ অহাৰ লগে লগে কাম দ্ৰুতগতিত আগবাঢ়িছে আৰু আজি আমি ইয়াক দেশবাসীৰ উদ্দেশ্যে উৎসৰ্গা কৰিছো।"

গোলকীয় পৰ্যায়ত ভাৰতৰ ঔদ্যোগিক বিকাশৰ প্ৰসংগ উত্থাপন কৰি প্ৰধানমন্ত্ৰীয়ে আঙুলিয়াই দিয়ে যে আমেৰিকাই যোৱা ৫০ বছৰত কোনো নতুন শোধনাগাৰ নিৰ্মাণ কৰা নাই আৰু ইউৰোপৰ ক্ষমতা হ্ৰাস পাই আহিছে, কিন্তু ভাৰতে গৌৰৱেৰে বিশ্বৰ চতুৰ্থ বৃহত্তম শোধনাগাৰ ক্ষমতাৰ অধিকাৰী হৈ উঠিছে। তেওঁ প্ৰতিশ্ৰুতি দিয়ে যে এই কৌশলগত ক্ষমতা আৰু অধিক বৃদ্ধি কৰা হ’ব। শ্ৰী মোদীয়ে কয়, "এই নিৰন্তৰ প্ৰচেষ্টাৰ বাবেই ভাৰতে শতিকাৰ আটাইতকৈ ডাঙৰ শক্তি সংকটৰ বিৰুদ্ধে সফলতাৰে যুঁজ দি সম্পূৰ্ণৰূপে সুস্থ হৈ উঠিছে।"

কৃষি খণ্ডৰ দুৰ্বলতাসমূহৰ কথা উল্লেখ কৰি প্ৰধানমন্ত্ৰীয়ে ইউক্ৰেইন যুদ্ধৰ ফলত সৃষ্টি হোৱা সাৰৰ তীব্ৰ নাটনিৰ কথা বিশদভাৱে উল্লেখ কৰে, যাৰ ফলত গোলকীয় ইউৰিয়াৰ মূল্য প্ৰতি বেগ ৩,০০০ টকাতকৈ অধিক হৈছিল। লাখ লাখ কোটি টকাৰ ৰাজসাহায্যৰ জৰিয়তে মাত্ৰ ৩০০ টকাত ইউৰিয়া প্ৰদান কৰা, বিকল্প গোলকীয় পথ সুৰক্ষিত কৰিবলৈ দূতাবাসসমূহক দায়িত্ব দিয়া আৰু প্ৰাকৃতিক কৃষিক সক্ৰিয়ভাৱে প্ৰসাৰ কৰাকে ধৰি এক বৃহৎ বহুমুখী প্ৰতিৰক্ষামূলক পদক্ষেপৰ খতিয়ান দি তেওঁ ক'লা বজাৰ আৰু মজুতকৰণৰ বিৰুদ্ধে কঠোৰ পদক্ষেপৰ ওপৰত গুৰুত্ব আৰোপ কৰে। শ্ৰী মোদীয়ে কয়, “ব্যাপক ৰাজসাহায্য আৰু বিকল্প যোগান শৃংখলাৰ জৰিয়তে আমি আমাৰ কৃষকসকলে যাতে একেবাৰে ন্যূনতম মূল্যত গুৰুত্বপূৰ্ণ ইউৰিয়া লাভ কৰে, সেয়া নিশ্চিত কৰিছো।”

ঔদ্যোগিক ক্ষেত্ৰখন সুৰক্ষিত কৰাৰ গুৰুত্বৰ ওপৰত দৃঢ়তাৰে প্ৰধানমন্ত্ৰীয়ে জৰুৰীকালীন ক্ৰেডিট লাইন গেৰাণ্টি আঁচনিৰ পৰৱৰ্তী পৰ্যায়ৰ কৌশলগত ৰূপায়ণৰ কথা বাখ্যা কৰে, যাতে এমএছএমইসমূহক বৃদ্ধি পোৱা কাৰ্যবাহী ব্যয়ৰ পৰা সুৰক্ষিত কৰিব পৰা যায়। চৰকাৰৰ ১০০ শতাংশ গেৰাণ্টিৰ সৈতে বেংকৰ পৰা অতিৰিক্ত ২০ শতাংশ ঋণৰ সুবিধা প্ৰদান কৰি ক্ষুদ্ৰ আৰু কুটিৰ উদ্যোগসমূহক অৰ্থনৈতিক পতনৰ পৰা কাৰ্যকৰীভাৱে সুৰক্ষিত কৰা হৈছে বুলি তেওঁ উল্লেখ কৰে। শ্ৰী মোদীয়ে কয়, “এনে বহু গুৰুত্বপূৰ্ণ আৰ্থিক পদক্ষেপৰ পোনপটীয়া পৰিণতি হ’ল যে আমাৰ ক্ষুদ্ৰ আৰু বৃহৎ উদ্যোগসমূহ আজি সম্পূৰ্ণ সুৰক্ষিত অনুভৱ কৰিছে।”

ভাৰতৰ ১৪০ কোটি নাগৰিকৰ প্ৰতি গভীৰ কৃতজ্ঞতা প্ৰকাশ কৰি প্ৰধানমন্ত্ৰীয়ে দেশৰ সামূহিক সুস্থিৰতাৰ কৃতিত্ব চৰকাৰ আৰু জনসাধাৰণৰ মাজৰ গভীৰ পাৰস্পৰিক বিশ্বাসক দিয়ে। কঠিন সময়ত ব্যতিক্ৰমীভাৱে শক্তিশালী হৈ থকা, ভয় বিয়পাব বিচৰা দুষ্কাৰ্যসমূহক সক্ৰিয়ভাৱে পৰাস্ত কৰা আৰু অৱশেষত ভাৰতৰ ব্যৰ্থতাৰ ভৱিষ্যদ্বাণী কৰা শক্তি সমূহক হতাশ কৰাৰ বাবে তেওঁ ৰাইজক প্ৰশংসা কৰে। শ্ৰী মোদীয়ে কয়, ''আমাৰ স্থিতিস্থাপক নাগৰিকসকলৰ অদম্য বিশ্বাস আৰু গভীৰ ক্ষমতাৰ জোৰতেই দেশে সফলতাৰে আগবাঢ়ি যাবলৈ সক্ষম হৈছে।”

বৃহৎ আন্তঃগাঁথনি উন্নয়নক পাৰিপাৰ্শ্বিক দায়িত্বৰ সৈতে সংযোগ কৰি প্ৰধানমন্ত্ৰীয়ে মৰুভূমিকৰণ ৰোধ কৰাত ইয়াৰ গুৰুত্বপূৰ্ণ ভূমিকাৰ প্ৰতি সন্মান জনাই এটা পবিত্ৰ খেজৰি গছৰ পুলি ৰোপণ কৰাৰ সুযোগ পোৱাটো তেওঁৰ বাবে এক সৌভাগ্য বুলি উল্লেখ কৰে। নবীকৰণযোগ্য শক্তিৰ দ্ৰুত পৰিৱৰ্তনৰ বিষয়ে বিশদভাৱে উল্লেখ কৰি তেওঁ বিশ্বমানৰ সৌৰ উদ্যান স্থাপন, 'পিএম সূৰ্য ঘৰ' আঁচনিৰ অধীনত ১.৫ লাখতকৈও অধিক ঘৰ সংযোগ কৰা আৰু 'পিএম কুসুম' যোজনাৰ জৰিয়তে থলুৱা কৃষকসকলক ৬৫,০০০তকৈ অধিক সৌৰ পাম্প বিতৰণ কৰাৰ কথা উল্লেখ কৰে। শ্ৰী মোদীয়ে কয়, "এই গছপুলি ৰোপণে আমাৰ মূল কাৰ্য-সংস্কৃতিৰ এক উৎকৃষ্ট উদাহৰণ দাঙি ধৰিছে, যাৰ দ্বাৰা প্ৰমাণিত হয় যে আমি আমাৰ পৰিৱেশক কঠোৰভাৱে সুৰক্ষা দিয়াৰ সমান্তৰালভাৱে প্ৰগতিৰ নতুন শিখৰত উপনীত হ'ব লাগিব।"

দীৰ্ঘদিনীয়া আঞ্চলিক পানীৰ বিবাদৰ ঐতিহাসিক সমাধানৰ কথা উল্লেখ কৰি প্ৰধানমন্ত্ৰীয়ে ৰাজস্থানৰ পানীৰ তীব্ৰ নাটনিক আওকাণ কৰাৰ বাবে পূৰ্বৰ চৰকাৰসমূহক তীব্ৰ সমালোচনা কৰে আৰু বৰ্তমান চৰকাৰৰ 'ৰাষ্ট্ৰ প্ৰথম' নীতিৰ প্ৰশংসা কৰে। গুজৰাটে মৰমৰ নৰ্মদা নদীৰ পানী ৰাজস্থানৰ গাঁৱৰ সৈতে স্বেচ্ছাই ভগাই লোৱাৰ ঐতিহাসিক উদাহৰণ তেওঁ দাঙি ধৰে। শ্ৰী মোদীয়ে দৃঢ়তাৰে কয়, ''আনকি আটাইতকৈ কঠিন সংকল্পসমূহো সফলতাৰে অৰ্জন কৰিব পাৰি যেতিয়া সেইবোৰৰ আঁৰত থকা মূল উদ্দেশ্যসমূহ সম্পূৰ্ণ পবিত্ৰ হয়।"

ৰাজস্থান আৰু হাৰিয়ানা চৰকাৰৰ মাজত এক ঐতিহাসিক ৩৪,০০০ কোটি টকাৰ চুক্তিৰ কথা গৌৰৱেৰে ঘোষণা কৰি প্ৰধানমন্ত্ৰীয়ে হাথনিকুণ্ড বান্ধৰ পৰা ভূগৰ্ভস্থ পাইপলাইন স্থাপনৰ পৰিকল্পনাৰ সবিশেষ উল্লেখ কৰে। তেওঁ দৃঢ়তাৰে কয় যে এই অভূতপূৰ্ব পাৰস্পৰিক সন্মতিয়ে ছিকাৰ, চুৰু, ঝুনঝুনু আৰু সমগ্ৰ শ্বেখাৱাটী অঞ্চলৰ লাখ লাখ বাসিন্দালৈ জীৱনদায়িনী পানী কঢ়িয়াই আনিব। শ্ৰী মোদীয়ে কয়, "এতিয়া যিহেতু দুয়োখন ৰাজ্যতে বিজেপি চৰকাৰ আছে, সেয়েহে পোনপথমবাৰৰ বাবে পাৰস্পৰিক সন্মতিৰে সমাধান বিচাৰি পোৱা গৈছে।"

ভৱিষ্যতৰ জল-আন্তঃগাঁথনি পদক্ষেপসমূহৰ বিষয়ে উল্লেখ কৰি প্ৰধানমন্ত্ৰীয়ে উচ্চ যমুনা অৱবাহিকাত ৰেণুকা, লাখৱাৰ আৰু কিশাউ বান্ধ সম্পূৰ্ণ কৰাৰ ভৱিষ্যতৰ পৰিৱৰ্তনকাৰী লাভালাভৰ লগতে গ্ৰাম্য টেপৰ পানীৰ বাবে ৰামজল সেতু প্ৰকল্পৰ আলোকপাত কৰে। তেওঁ 'জল সঞ্চয়, জন ভাগীদাৰী' অভিযানৰ বৃহৎ সফলতাৰ কথাও উল্লেখ কৰে, যাৰ অধীনত ৰাষ্ট্ৰীয় পৰ্যায়ত ২৫ লাখতকৈও অধিক আৰু ৰাজস্থানত ১.২৫ লাখ চোক পিট নিৰ্মাণ কৰি ভূগৰ্ভস্থ পানীৰ স্তৰ উন্নত কৰা হৈছে। শ্ৰী মোদীয়ে দৃঢ়তাৰে কয়, “এই বৃহৎ সহযোগিতামূলক প্ৰচেষ্টাৰ জৰিয়তে বহুমূলীয়া পানী পদ্ধতিগতভাৱে সংৰক্ষণ কৰা হৈছে আৰু আঞ্চলিক ভূগৰ্ভস্থ পানীৰ স্তৰ ক্ৰমান্বয়ে উন্নত হৈছে।”

ৰাজস্থান দেশৰ আধুনিক আন্তঃগাঁথনিৰ কেন্দ্ৰবিন্দু হৈয়েই আছে বুলি দোঁহাৰি প্ৰধানমন্ত্ৰীয়ে নতুন যোধপুৰ বিমানবন্দৰ টাৰ্মিনেল আৰু জয়পুৰ মেট্ৰ’ দ্বিতীয় পৰ্যায়ৰ আধাৰশিলা স্থাপনক ভৱিষ্যতৰ বিকাশৰ বাবে এক ডাঙৰ অনুঘটক বুলি উল্লেখ কৰে। তেওঁ বিশেষভাৱে উল্লেখ কৰে যে দ্বিতীয় পৰ্যায়ে জয়পুৰৰ মুঠ নেটৱৰ্ক ৫০ কিলোমিটাৰৰ ওপৰলৈ সম্প্ৰসাৰিত কৰিব, যাৰ ফলত পূব-পশ্চিম আৰু উত্তৰ-দক্ষিণ কৰিডৰ সংলগ্ন হৈ স্থানীয় লোক আৰু পৰ্যটক দুয়োৰে সুবিধা হ’ব। শ্ৰী মোদীয়ে কয়, “আজি ৰাজস্থানত ইমান দ্ৰুতগতিৰে আধুনিক আন্তঃগাঁথনি নিৰ্মাণ কৰা হৈছে যে সম্পূৰ্ণ নতুন অভিলেখ গঢ়ি উঠিছে।”

ভাষণৰ সামৰণিত প্ৰধানমন্ত্ৰীয়ে ৰাইজক আশ্বাস দিয়ে যে এই ব্যাপক পৰিবহণ নেটৱৰ্ক আৰু শক্তি প্ৰকল্পসমূহ ৰাজ্যখনৰ পৰিৱৰ্তনকাৰী যাত্ৰাৰ আৰম্ভণিহে। বৰ্তমানৰ নেতৃত্বৰ অধীনত ৰাজ্যখনৰ বাবে এক অত্যন্ত সমৃদ্ধিশালী নতুন ভৱিষ্যত যুটীয়াভাৱে গঢ়ি তুলিবলৈ জনসাধাৰণৰ নিৰন্তৰ সমৰ্থনৰ ওপৰত তেওঁ সম্পূৰ্ণ আস্থা প্ৰকাশ কৰে। শ্ৰী মোদীয়ে দৃঢ়তাৰে কয়, “মোৰ সম্পূৰ্ণ বিশ্বাস আছে যে আমাৰ চৰকাৰৰ প্ৰতি আপোনালোকৰ নিৰন্তৰ আশীৰ্বাদৰ জৰিয়তে আমি একেলগে ৰাজস্থানৰ বাবে এক গৌৰৱময় নতুন ভৱিষ্যত গঢ়ি তুলিম।”

A very special day for Rajasthan! Development initiatives across aviation, energy and connectivity will strengthen infrastructure, accelerate growth and improve ease of living.
https://t.co/gYw1RXYzLq

— Narendra Modi (@narendramodi) July 4, 2026

***

MJPS/SS/PRK/DB