భారతీయ రైల్వే తన అద్భుతమైన నిర్వహణ తీరును కొనసాగిస్తూ,  ఈ ఏడాది జూన్ నెలలో సరుకు రవాణా లోనూ, ప్రయాణికుల సేవల్లోనూ స్థిరమైన వృద్ధిని నమోదు చేసింది. అధిక సరుకు రవాణా, పెరిగిన ప్రయాణికుల రాకపోకలు,  ప్రయాణ సేవల నిరంతర విస్తరణ వంటివి దేశ ఆర్థిక వృద్ధికి మద్దతు ఇవ్వడం, రవాణా వ్యవస్థను బలోపేతం చేయడం, దేశవ్యాప్తంగా సౌకర్యవంతమైన ప్రయాణ సౌకర్యాలను కల్పించడంపై భారతీయ రైల్వే నిరంతర కృషిని ప్రతిబింబిస్తున్నాయి.

సరుకు రవాణాలో గణనీయమైన వృద్ధి

భారతీయ రైల్వే జూన్  నెలలో 142.21 మిలియన్ టన్నుల సరుకు రవాణాను సాధించింది. గత ఏడాది ఇదే నెలలో నమోదైన 136.71 మిలియన్ టన్నులతో పోలిస్తే ఇది 4 శాతం వృద్ధిని సూచిస్తోంది. సరుకు రవాణా ద్వారా వచ్చిన ఆదాయం కూడా జూన్ 2025తో పోలిస్తే 3 శాతం పెరుగుదలతో దాదాపు రూ. 430 కోట్ల అదనపు ఆదాయం సమకూరింది.

పలు ప్రధాన వస్తువుల రవాణా కూడా జూన్ నెలలో ఆశాజనకమైన వృద్ధిని నమోదు చేసింది. ఎరువుల రవాణా 19.1 శాతం, ఇతర వస్తువులు  17.3 శాతం, ఇనుప ఖనిజం 9.4 శాతం, దేశీయ బొగ్గు 4.9 శాతం, మొత్తం బొగ్గు  3.6 శాతం, క్లింకర్ 7.2 శాతం వృద్ధిని నమోదు చేశాయి.ఇది దేశ ఆర్థిక వ్యవస్థకు కీలకమైన రంగాల నుంచి  స్థిరంగా ఉన్న డిమాండ్‌ను ప్రతిబింబిస్తోంది.

జూన్ 2026లో సాధించిన ఈ ఘనమైన నిర్వహణ తీరు ప్రస్తుత ఆర్థిక సంవత్సరం (2026-27)  మొదటి త్రైమాసికం (ఏప్రిల్-జూన్) లో నమోదైన నిరంతర వృద్ధిని మరింత బలోపేతం చేసింది. ఈ త్రైమాసికంలో భారతీయ రైల్వే 419.08 మిలియన్ టన్నుల సరుకు రవాణాను నిర్వహించింది. గత ఆర్థిక సంవత్సరం (2025-26) ఇదే కాలంలో నమోదైన 413.05 మిలియన్ టన్నులతో పోలిస్తే ఇది మెరుగైన ప్రదర్శన. ఈ త్రైమాసికంలో పలు కీలకమైన వస్తువుల విభాగాలలో కూడా ఆశాజనకమైన వృద్ధి కనిపించింది. గత ఏడాది ఇదే కాలంతో పోలిస్తే ఇనుప ఖనిజం లోడింగ్ 7.44 శాతం, క్లింకర్ 6.54 శాతం,  ఇతర వస్తువులు 12.16 శాతం వృద్ధిని సాధించాయి.

అధిక వేసవి కారణంగా థర్మల్ పవర్ స్టేషన్ల పెరిగిన అవసరాలను తీర్చడానికి భారతీయ రైల్వే దేశీయ బొగ్గు రవాణాను వేగవంతం చేసింది. గత ఏడాది ఇదే నెలతో పోలిస్తే జూన్ 2026లో విద్యుత్ ప్లాంట్లకు 7 శాతం ఎక్కువ బొగ్గును సరఫరా చేసింది.  తద్వారా దేశవ్యాప్తంగా అంతరాయం లేని విద్యుత్ ఉత్పత్తికి దోహదపడింది. 

ప్రయాణికుల రాకపోకలలో నిరంతర వృద్ధి

జూన్ 2026 నెలలో ప్రయాణికుల రాకపోకలు కూడా స్థిరమైన వృద్ధిని కనబరిచాయి. గత ఏడాది ఇదే నెలలో 62.37 కోట్ల మంది ప్రయాణించగా, ఈ ఏడాది జూన్ నెలలో భారతీయ రైల్వే 63.81 కోట్ల మంది ప్రయాణికులను వారి గమ్యస్థానాలకు చేర్చింది.

స్వల్ప, సుదూర ప్రయాణాలను కలిగివున్న నాన్-సబర్బన్ విభాగం 3.9 శాతం వృద్ధిని నమోదు చేసింది; దీని ద్వారా ప్రయాణికుల సంఖ్య 28.90 కోట్ల నుంచి 30.04 కోట్లకు పెరిగింది. సబర్బన్  విభాగం కూడా 0.9 శాతం సానుకూల వృద్ధిని కనబరిచింది. ఇందులో ప్రయాణికుల సంఖ్య 33.46 కోట్ల నుంచి  33.77 కోట్లకు పెరిగింది.

ఆధునిక ప్రయాణ సేవల విస్తరణ

ప్రధాన రైలు సర్వీసుల విస్తరణతో భారతీయ రైల్వే ప్రయాణికుల సేవలను ఆధునీకరించడాన్ని నిరంతరం కొనసాగిస్తోంది. ఇటీవలే హౌరా -  కామాఖ్య మధ్య ప్రారంభమైన 'వందే భారత్ స్లీపర్' సర్వీస్‌తో కలిపి మొత్తం వందే భారత్ సర్వీసుల సంఖ్య 164కి పెరిగింది. జూన్ 2026లో ప్రారంభించిన నాలుగు కొత్త సర్వీసులతో కలిపి అమృత్ భారత్ రైలు సర్వీసుల సంఖ్య 72కి చేరింది. ఇది దేశవ్యాప్తంగా అందుబాటు చార్జీల్లో ఆధునిక సుదూర ప్రయాణ అనుసంధానాన్ని  మరింత బలోపేతం చేసింది.

సరుకు రవాణా,  ప్రయాణికుల రాకపోకలలో కనిపిస్తున్న ఈ నిరంతర వృద్ధి  సమర్థవంతమైన రవాణా, విశ్వసనీయమైన ప్రయాణికుల సేవలు, ఆధునిక మౌలిక సదుపాయాలను అందించడంలో భారతీయ రైల్వే నిబద్ధతను ప్రతిబింబిస్తోంది. నిరంతర సామర్థ్య పెంపుదల, మెరుగైన నిర్వహణ సామర్థ్యం, ప్రయాణికుల ప్రయోజనాలే ప్రాధాన్యతగా తీసుకుంటున్న నిర్ణయాల ద్వారా దేశ ఆర్థికాభివృద్ధికి తోడ్పాటు అందిస్తూ, దేశవ్యాప్తంగా సురక్షితమైన, విశ్వసనీయమైన, ప్రయాణికులకు అనుకూలమైన రవాణా సేవలను అందించేందుకు భారతీయ రైల్వే తమ నిబద్ధతను కొనసాగిస్తోంది. 

***