ભારતના રાષ્ટ્રપતિ શ્રીમતી દ્રૌપદી મુર્મુએ આજે (1 જુલાઈ, 2026) અનંતપુરામુ, આંધ્રપ્રદેશ ખાતે સેન્ટ્રલ યુનિવર્સિટી ઓફ આંધ્રપ્રદેશના પ્રથમ દીક્ષાંત સમારોહને સુશોભિત કર્યો હતો.

આ અવસરે રાષ્ટ્રપતિએ જણાવ્યું હતું કે સેન્ટ્રલ યુનિવર્સિટી ઓફ આંધ્રપ્રદેશનો પ્રથમ દીક્ષાંત સમારોહ માત્ર ઉજવણીનો દિવસ નથી પરંતુ આ નવી સંસ્થાની સફરમાં એક નિર્ણાયક સીમાચિહ્નરૂપ પણ છે. આ યુનિવર્સિટીએ ભવિષ્ય માટે સજ્જ (ફ્યુચર-રેડી) સંસ્થા બનવા માટે લાંબા ગાળાનું વિઝન વિકસાવ્યું છે તે નોંધીને તેઓ ખુશ થયા હતા. તેમણે કહ્યું કે ટકાઉ વિકાસ લક્ષ્યો, ખાસ કરીને ગુણવત્તાયુક્ત શિક્ષણ સંબંધિત લક્ષ્યો પ્રત્યેની તેની પ્રતિબદ્ધતા, સમાવિષ્ટ અને ન્યાયી વિકાસ પ્રત્યેની જવાબદારીની ભાવના દર્શાવે છે. તેમણે વિશ્વાસ વ્યક્ત કર્યો હતો કે સેન્ટ્રલ યુનિવર્સિટી ઓફ આંધ્રપ્રદેશ એક સેન્ટર ઓફ એક્સેલન્સ (શ્રેષ્ઠતાના કેન્દ્ર) તરીકે ઉભરી આવશે અને વર્ષ 2047 સુધીમાં વિકસિત ભારતના વિઝનને સાકાર કરવામાં નોંધપાત્ર યોગદાન આપશે.

પદવી મેળવતા વિદ્યાર્થીઓને સંબોધતાં રાષ્ટ્રપતિએ કહ્યું કે દીક્ષાંત સમારોહ એ વર્ષોની તેમની સખત મહેનત, દ્રઢતા અને સમર્પણની પરાકાષ્ઠા છે. તેઓ સપનાઓ સાથે યુનિવર્સિટીમાં પ્રવેશ્યા હતા, અને આજે તેઓ જ્ઞાન, આત્મવિશ્વાસ અને એક એવી ડિગ્રી સાથે વિદાય લઈ રહ્યા છે જે તેમના માટે તકોના નવા દ્વારા ખોલે છે.

રાષ્ટ્રપતિએ જણાવ્યું હતું કે વિદ્યાર્થીઓની સફળતા એ તેમની પોતાની સખત મહેનતનું પરિણામ છે, પરંતુ તેને તેમના માતા-પિતાના બલિદાન, તેમના શિક્ષકોના માર્ગદર્શન અને સમાજના સહયોગ દ્વારા આકાર મળ્યો છે. તેથી, સમાજને પરત આપવાની તેમની જવાબદારી બને છે. ભલે તેઓ રોજગારીનું સર્જન કરતા ઉદ્યોગસાહસિક બને, ઇનોવેશનને વેગ આપતા વૈજ્ઞાનિક બને, લોકો માટે કામ કરતા જાહેર સેવક બને અથવા સમાજની સેવા કરતા પરોપકારી બને, તેમનું શિક્ષણ વંચિતો માટે શક્તિનો સ્ત્રોત બનવું જોઈએ.

રાષ્ટ્રપતિએ કહ્યું કે ટેકનોલોજીકલ પ્રગતિ દરેક ક્ષેત્રમાં પરિવર્તન લાવી રહી છે. આવા ઝડપથી બદલાતા વિશ્વમાં, શિક્ષણ માત્ર ડિગ્રી મેળવવાની સાથે સમાપ્ત થઈ શકે નહીં અને થવું પણ ન જોઈએ. ઉભરતી ટેકનોલોજીને સતત અનુકૂળ થવાની વૃત્તિ વિદ્યાર્થીઓ માટે સૌથી મોટી શક્તિઓ પૈકીની એક સાબિત થશે. તેમણે વિદ્યાર્થીઓને નવા વિચારોનું અન્વેષણ કરવાની અને નવું જ્ઞાન પ્રાપ્ત કરવાની હિંમત કેળવવાની સલાહ આપી હતી.

રાષ્ટ્રપતિએ જણાવ્યું હતું કે આપણા શિક્ષણ-લક્ષી, સ્થિતિસ્થાપક અને નવીન વિચારો ધરાવતા યુવાનો આપણી કિંમતી રાષ્ટ્રીય સંપત્તિ છે. પોતાના જ્ઞાનને સર્જનાત્મકતા, દ્રઢ સંકલ્પ અને જવાબદારીની ભાવના સાથે જોડીને, આપણા યુવાનો પડકારોને તકોમાં બદલી શકે છે અને વધુ સમાવિષ્ટ તેમજ સમૃદ્ધ ભારતના નિર્માણમાં યોગદાન આપી શકે છે.

રાષ્ટ્રપતિએ વિદ્યાર્થીઓને જણાવ્યું કે નૈતિક મૂલ્યોને આત્મસાત કરવાથી તેમને ઘણી મદદ મળશે. તેમણે કહ્યું કે પ્રમાણિકતા, કરુણા, સહાનુભૂતિ અને પ્રકૃતિ પ્રત્યેનો આદર એ માત્ર ઉચ્ચ નૈતિક આદર્શો જ નથી, પરંતુ તે સર્વાંગી વિકાસનો પાયો પણ છે. આ ગુણો તેમને પોતાનું જીવન સમૃદ્ધ બનાવવા અને સમાજ તેમજ રાષ્ટ્રમાં અર્થપૂર્ણ યોગદાન આપવા માટે સક્ષમ બનાવશે.

રાષ્ટ્રપતિએ કહ્યું કે વિકસિત ભારતનું વિઝન આપણા યુવાનોની ઉર્જા, પ્રતિભા અને પ્રતિબદ્ધતા દ્વારા જ સાકાર થઈ શકે છે. તેઓ ગમે તે માર્ગ પસંદ કરે, તેઓએ સમર્પણ અને અખંડિતતા સાથે શ્રેષ્ઠતાનો પીછો કરવો જોઈએ.

રાષ્ટ્રપતિનું સંબોધન જોવા માટે કૃપા કરીને અહીં ક્લિક કરો-

SM/DK/JD