ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಇಂದು ನವದೆಹಲಿಯಲ್ಲಿ ಎಫ್‌ ಸಿ ಆರ್‌ ಎ 2.0 ಪೋರ್ಟಲ್ ಮತ್ತು ಇ-ಒಸಿಐ ಕಾರ್ಡ್‌ ಗೆ ಚಾಲನೆ ನೀಡಿದರು. ಈ ಸಂದರ್ಭದಲ್ಲಿ ಕೇಂದ್ರ ಗೃಹ ಕಾರ್ಯದರ್ಶಿ, ವಿದೇಶಾಂಗ ಕಾರ್ಯದರ್ಶಿ, ಗುಪ್ತಚರ ಬ್ಯೂರೋ ನಿರ್ದೇಶಕರು ಮತ್ತು ಹಲವು ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.

ಈ ಸಂದರ್ಭದಲ್ಲಿ ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಮಾತನಾಡಿ, ಇಂದು ಚಾಲನೆ ನೀಡಲಾದ ಎರಡೂ ಹೊಸ ಉಪಕ್ರಮಗಳು ನಾಗರಿಕರ ಸೌಕರ್ಯವನ್ನು ಹೆಚ್ಚಿಸುವಲ್ಲಿ ಅತ್ಯಂತ ಪ್ರಯೋಜನಕಾರಿ ಎಂದು ಸಾಬೀತಾಗಲಿವೆ ಎಂದು ಹೇಳಿದರು. ಇಂದು ಆರಂಭಿಸಲಾದ ಈ ಎರಡೂ ಉಪಕ್ರಮಗಳು ನಾಗರಿಕರಿಗೆ ಸೌಲಭ್ಯಗಳನ್ನು ಹೆಚ್ಚಿಸಲಿವೆ ಮತ್ತು ವಿಶೇಷವಾಗಿ ಎಫ್‌ ಸಿ ಆರ್‌ ಎ ಪೋರ್ಟಲ್ ಮೂಲಕ ದೇಣಿಗೆ ಪಡೆಯುವವರು ಎದುರಿಸುತ್ತಿದ್ದ ತೊಂದರೆಗಳನ್ನು ಪರಿಹರಿಸುತ್ತವೆ ಎಂದು ಅವರು ತಿಳಿಸಿದರು. 2014 ರಲ್ಲಿ ಶ್ರೀ ನರೇಂದ್ರ ಮೋದಿ ಅವರು ಪ್ರಧಾನಿಯಾದಾಗ, ನಮ್ಮ ಸರ್ಕಾರವು 'ಕನಿಷ್ಠ ಸರ್ಕಾರ, ಗರಿಷ್ಠ ಆಡಳಿತ' ತತ್ವದ ಮೇಲೆ ಕೆಲಸ ಮಾಡಲಿದೆ ಎಂದು ಹೇಳಿದ್ದನ್ನು ಅವರು ಸ್ಮರಿಸಿದರು. ಉದ್ದೇಶವು ಸ್ಪಷ್ಟವಾಗಿದ್ದಾಗ, ನೀತಿಯು ಪಾರದರ್ಶಕವಾಗಿದ್ದಾಗ ಮತ್ತು ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳುವ ಮನಸ್ಥಿತಿ ಇದ್ದಾಗ, ಪ್ರಾಮಾಣಿಕ ಜನರಿಗೆ ಎಲ್ಲಾ ರೀತಿಯ ಆಡಳಿತವು ತುಂಬಾ ಸುಲಭವಾಗುತ್ತದೆ, ತಪ್ಪು ಮಾಡುವವರಿಗೆ ಕಟ್ಟುನಿಟ್ಟಾದ ಕಣ್ಗಾವಲು ವ್ಯವಸ್ಥೆಯನ್ನು ಜಾರಿಗೊಳಿಸಲಾಗುತ್ತದೆ ಮತ್ತು ದೇಶವನ್ನು ಇನ್ನಷ್ಟು ಸುರಕ್ಷಿತವಾಗಿಸಬಹುದು ಎಂದು ಶ್ರೀ ಶಾ ಅವರು ಹೇಳಿದರು.

2014ಕ್ಕಿಂತ ಮೊದಲು ಎಫ್‌ ಸಿ ಆರ್‌ ಎ ವ್ಯವಸ್ಥೆಯು ಕಡತಗಳು ಮತ್ತು ಪ್ರಕ್ರಿಯೆಗಳಲ್ಲಿ ಸಿಲುಕಿಕೊಂಡಿತ್ತು ಹಾಗೂ ಸೂಕ್ತ ಮೇಲ್ವಿಚಾರಣೆಯಿಂದ ದೂರವಿತ್ತು, ಆದರೆ ರಾಷ್ಟ್ರೀಯ ಭದ್ರತೆ ಮತ್ತು ಅಭಿವೃದ್ಧಿ ಎರಡಕ್ಕೂ ಇದು ಅತ್ಯಂತ ನಿರ್ಣಾಯಕವಾಗಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. 2014 ರಲ್ಲಿ ಪ್ರಧಾನಿ ಮೋದಿ ಅವರ ನಾಯಕತ್ವದಲ್ಲಿ ಸರ್ಕಾರ ರಚನೆಯಾದ ನಂತರ ಈ ವ್ಯವಸ್ಥೆಯನ್ನು ಬಲಪಡಿಸಲಾಯಿತು. ಇಂದು ಎಫ್‌ ಸಿ ಆರ್‌ ಎ ಪೋರ್ಟಲ್ ಅನ್ನು ನವೀಕರಿಸಿರುವುದು ಸಂಸ್ಥೆಗಳ ಸುಲಭ ಕಾರ್ಯನಿರ್ವಹಣೆಯನ್ನು ಗಣನೀಯವಾಗಿ ಹೆಚ್ಚಿಸಲಿದೆ ಎಂದು ಅವರು ಹೇಳಿದರು. ಕಳೆದ ವರ್ಷಗಳಲ್ಲಿ ಅರ್ಜಿಗಳ ಸಂಖ್ಯೆ ಮತ್ತು ದೇಣಿಗೆಗಳ ಹರಿವಿನಲ್ಲಿ ಗಮನಾರ್ಹ ಹೆಚ್ಚಳವಾಗಿದೆ ಎಂದು ಅವರು ಹೇಳಿದರು. ಇದನ್ನು ಗಮನದಲ್ಲಿಟ್ಟುಕೊಂಡು, ಕಾಗದದ ಕೆಲಸವನ್ನು ಕಡಿಮೆ ಮಾಡುವುದು ಮತ್ತು ವಿದೇಶಿ ದೇಣಿಗೆಗಳ ನೈಜ-ಸಮಯದ ಪರಿಣಾಮಕಾರಿ ಮೇಲ್ವಿಚಾರಣೆಯನ್ನು ಖಚಿತಪಡಿಸಿಕೊಳ್ಳುವುದು ದೇಶದ ಭದ್ರತೆಗೆ ಅತ್ಯಂತ ಮಹತ್ವದ್ದಾಗಿದೆ. ಎಫ್‌ ಸಿ ಆರ್‌ ಎ ಕಾಯ್ದೆಯಿಂದಾಗಿ, ತಪ್ಪು ಉದ್ದೇಶಗಳೊಂದಿಗೆ ಬರುವ ವಿದೇಶಿ ದೇಣಿಗೆಗಳ ಮೇಲಿನ ಮೇಲ್ವಿಚಾರಣೆಯು ಹೆಚ್ಚಾಗಲಿದೆ ಎಂದು ಅವರು ಹೇಳಿದರು. ಈ ಹೊಸ ವ್ಯವಸ್ಥೆಯ ಪ್ರಾರಂಭದೊಂದಿಗೆ, ದಾಖಲೆಗಳನ್ನು ಭೌತಿಕವಾಗಿ ಸಲ್ಲಿಸುವ ಪ್ರಕ್ರಿಯೆಯು ಇಲ್ಲದಂತಾಗುತ್ತದೆ ಎಂದು ಶ್ರೀ ಶಾ ತಿಳಿಸಿದರು. ಇ-ಸೈನ್ ಆಧಾರಿತ ದೃಢೀಕರಣ, ಒಸಿಆರ್ ಮತ್ತು ಎನ್‌ ಜಿ ಒ ದರ್ಪಣ್ ಬ್ಯಾಂಕ್ ಖಾತೆ ಸಂಯೋಜನೆ ವ್ಯವಸ್ಥೆಯಂತಹ ಸೌಲಭ್ಯಗಳನ್ನು ಖಚಿತಪಡಿಸಿಕೊಳ್ಳಲಾಗುವುದು. ಈ ಎಲ್ಲಾ ಡೇಟಾವನ್ನು 'ಮೇಘರಾಜ್' (ಸರ್ಕಾರಿ ಕ್ಲೌಡ್) ನಲ್ಲಿ ಹೋಸ್ಟ್ ಮಾಡಲಾಗುವುದರಿಂದ, ಡೇಟಾ ಕಳ್ಳತನದ ಸಾಧ್ಯತೆಯು ಗಣನೀಯವಾಗಿ ಕಡಿಮೆಯಾಗುತ್ತದೆ ಎಂದು ಅವರು ಹೇಳಿದರು. ಇದರೊಂದಿಗೆ, ಮುಂಬರುವ ತಿಂಗಳುಗಳಲ್ಲಿ ಎಫ್‌ ಸಿ ಆರ್‌ ಎ ಮೊಬೈಲ್ ಅಪ್ಲಿಕೇಶನ್, ಕೃತಕ ಬುದ್ಧಿಮತ್ತೆ ಆಧಾರಿತ ಚಾಟ್‌ ಬಾಟ್ ಮತ್ತು ಬ್ಯಾಂಕುಗಳಿಗಾಗಿ ಪ್ರತ್ಯೇಕ ಆನ್‌ಲೈನ್ ಡ್ಯಾಶ್‌ಬೋರ್ಡ್ ಅನ್ನು ಸಹ ಪ್ರಾರಂಭಿಸಲಾಗುವುದು ಎಂದು ಅವರು ಹೇಳಿದರು.

ಇ-ಒಸಿಐ ಕಾರ್ಡ್ ಅನ್ನು ಸಹ ಇಂದು ಬಿಡುಗಡೆ ಮಾಡಲಾಗಿದೆ ಎಂದು ಕೇಂದ್ರ ಗೃಹ ಸಚಿವರು ತಿಳಿಸಿದರು. ಒಸಿಐ ವ್ಯವಸ್ಥೆಯಲ್ಲಿದ್ದ ಆರಂಭಿಕ ಸಮಸ್ಯೆಗಳನ್ನು ಈ ಹೊಸ ವ್ಯವಸ್ಥೆಯಲ್ಲಿ ಪರಿಹರಿಸಲಾಗಿದ್ದು, ಇದು 50 ಲಕ್ಷಕ್ಕೂ ಹೆಚ್ಚು ಒಸಿಐ ಕಾರ್ಡ್‌ ದಾರರಿಗೆ ಹೆಚ್ಚಿನ ಸೌಕರ್ಯವನ್ನು ತರಲಿದೆ ಎಂದು ಅವರು ಹೇಳಿದರು. 20 ವರ್ಷಗಳ ನಂತರ ಹೊಸ ಪಾಸ್‌ಪೋರ್ಟ್ ನೀಡಿದಾಗ, ಒಸಿಐ ಬುಕ್‌ಲೆಟ್ ಅನ್ನು ಮರು-ವಿತರಿಸುವ ಅಗತ್ಯವಿರುವುದಿಲ್ಲ ಮತ್ತು ಕಾರ್ಡ್‌ ದಾರರ ನೋಂದಣಿ ಸಂಖ್ಯೆಯೂ ಸಹ ವಿಶಿಷ್ಟವಾಗಿರುತ್ತದೆ. ಮೇಲಾಗಿ, ಡಿಜಿಟಲ್ ಒಸಿಐ ಕಾರ್ಡ್‌ ನಿಂದಾಗಿ ದಾಖಲೆಗಳನ್ನು ಕಳೆದುಕೊಳ್ಳುವ ಅಥವಾ ಹಾನಿಯಾಗುವ ಸಮಸ್ಯೆ ನಿವಾರಣೆಯಾಗಲಿದ್ದು, ಕಾರ್ಡ್‌ ದಾರರು ತಾವಾಗಿಯೇ ನೈಜ-ಸಮಯದ ಪರಿಶೀಲನೆಯನ್ನು ಮಾಡಿಕೊಳ್ಳಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು.

ಎಫ್‌ ಸಿ ಆರ್‌ ಎ 2.0 ಪೋರ್ಟಲ್

ವಿದೇಶಿ ದೇಣಿಗೆ (ನಿಯಂತ್ರಣ) ಕಾಯ್ದೆಯಡಿ ನಿಯಮಗಳ ಅನುಸರಣೆಯನ್ನು ಸರಳಗೊಳಿಸಲು ಮತ್ತು ಮೇಲ್ವಿಚಾರಣೆ ಹಾಗೂ ಜಾರಿ ಕಾರ್ಯವಿಧಾನವನ್ನು ಬಲಪಡಿಸಲು ಎಫ್‌ ಸಿ ಆರ್‌ ಎ 2.0 ಪೋರ್ಟಲ್ ಅನ್ನು ಅಭಿವೃದ್ಧಿಪಡಿಸಲಾಗಿದೆ. ಅರ್ಜಿಗಳು, ನವೀಕರಣಗಳು, ವಾರ್ಷಿಕ ರಿಟರ್ನ್ಸ್ ಮತ್ತು ಇತರ ಸೇವೆಗಳಿಗೆ ಸಂಬಂಧಿಸಿದ ಎಲ್ಲಾ ಪ್ರಮುಖ ಪ್ರಕ್ರಿಯೆಗಳನ್ನು ಈಗ ಸಂಪೂರ್ಣವಾಗಿ ಡಿಜಿಟಲ್ ಮಾಡಲಾಗಿದೆ. ಪ್ರಸ್ತುತ, ದೇಶಾದ್ಯಂತ ಸುಮಾರು 14,500 ಸಕ್ರಿಯ ಎಫ್‌ ಸಿ ಆರ್‌ ಎ ಸಂಸ್ಥೆಗಳು ಕಾರ್ಯನಿರ್ವಹಿಸುತ್ತಿವೆ. ಪ್ರತಿ ವರ್ಷ ಸರಿಸುಮಾರು 15,000 ದಿಂದ 20,000 ಅರ್ಜಿಗಳು ಮತ್ತು ಸುಮಾರು 17,000 ವಾರ್ಷಿಕ ರಿಟರ್ನ್ಸ್‌ ಗಳು ಸ್ವೀಕರಿಸಲ್ಪಡುತ್ತವೆ. ಇಷ್ಟೊಂದು ದೊಡ್ಡ ಪ್ರಮಾಣವನ್ನು ಪರಿಗಣಿಸಿ, ಆಧುನಿಕ, ತಂತ್ರಜ್ಞಾನ ಆಧಾರಿತ ಮತ್ತು ಸುರಕ್ಷಿತ ವ್ಯವಸ್ಥೆಯ ಅಗತ್ಯವನ್ನು ದೀರ್ಘಕಾಲದಿಂದ ಅನುಭವಿಸಲಾಗುತ್ತಿತ್ತು. ರಾಷ್ಟ್ರೀಯ ಸರ್ಕಾರಿ ಕ್ಲೌಡ್ (ಮೇಘರಾಜ್) ನಲ್ಲಿ ಹೋಸ್ಟ್ ಮಾಡಲಾದ ಈ ಪೋರ್ಟಲ್ ಪ್ರಕ್ರಿಯೆ ಮರು-ಎಂಜಿನಿಯರಿಂಗ್, ಸಂಯೋಜಿತ ಡ್ಯಾಶ್‌ಬೋರ್ಡ್, ಆಧಾರ್ ಆಧಾರಿತ ದೃಢೀಕರಣ, ಇ-ಸೈನ್ ಸೌಲಭ್ಯ ಮತ್ತು ಒಸಿಆರ್ ಆಧಾರಿತ ದಾಖಲೆ ವಿಶ್ಲೇಷಣೆಯಂತಹ ವೈಶಿಷ್ಟ್ಯಗಳನ್ನು ಒಳಗೊಂಡಿದೆ. ಹೊಸ ಎಫ್‌ ಸಿ ಆರ್‌ ಎ ತಿದ್ದುಪಡಿ ನಿಯಮಗಳು, 2026 ರ ಪ್ರಮುಖ ನಿಬಂಧನೆಗಳನ್ನು ಸಹ ಇದರಲ್ಲಿ ಅಳವಡಿಸಲಾಗಿದೆ. ಈ ಪೋರ್ಟಲ್ ಅನ್ನು ಪ್ಯಾನ್, ಆಧಾರ್, ಒಸಿಐ, ಎನ್‌ ಜಿ ಒ ದರ್ಪಣ್ ಮತ್ತು ಐಸಿಎಐ ನ ಯುಡಿಐಎನ್ ವ್ಯವಸ್ಥೆ ಸೇರಿದಂತೆ ಪ್ರಮುಖ ಸರ್ಕಾರಿ ಡೇಟಾಬೇಸ್‌ ಮತ್ತು ಬ್ಯಾಂಕುಗಳೊಂದಿಗೆ ಸಂಯೋಜಿಸಲಾಗಿದೆ.

ಸಂಸ್ಥೆಗಳಿಗೆ ಈ ಪೋರ್ಟಲ್ ಕಾಗದದ ಕೆಲಸವನ್ನು ಕಡಿಮೆ ಮಾಡುತ್ತದೆ, ಸಮಯವನ್ನು ಉಳಿಸುತ್ತದೆ ಮತ್ತು ಸರಳ ಹಾಗೂ ಹೆಚ್ಚು ಅನುಕೂಲಕರ ಅನುಭವವನ್ನು ನೀಡುತ್ತದೆ. ಇದು ಅರ್ಜಿಗಳ ವೇಗದ ಪ್ರಕ್ರಿಯೆ ಮತ್ತು ಸಂಯೋಜಿತ, ಲಾಗಿನ್ ಆಧಾರಿತ ಡ್ಯಾಶ್‌ಬೋರ್ಡ್ ಅನ್ನು ಒಳಗೊಂಡಿದೆ. ಸರ್ಕಾರದ ಮಟ್ಟದಲ್ಲಿ, ಪ್ರಮುಖ ಡೇಟಾಬೇಸ್‌ ಗಳೊಂದಿಗೆ ಎಪಿಐ-ಆಧಾರಿತ ಸಂಯೋಜನೆಯು ವೇಗವಾದ ಮತ್ತು ಹೆಚ್ಚು ನಿಖರವಾದ ಪರಿಶೀಲನೆ, ಸುಧಾರಿತ ನಿಯಮಗಳ ಅನುಸರಣೆ ಮೇಲ್ವಿಚಾರಣೆ ಮತ್ತು ವಿದೇಶಿ ದೇಣಿಗೆಗಳ ಸ್ವೀಕೃತಿ ಹಾಗೂ ಬಳಕೆಯ ಪರಿಣಾಮಕಾರಿ ಉಸ್ತುವಾರಿಯನ್ನು ಶಕ್ತಗೊಳಿಸುತ್ತದೆ - ತನ್ಮೂಲಕ ರಾಷ್ಟ್ರೀಯ ಭದ್ರತೆ ಮತ್ತು ಉತ್ತಮ ಆಡಳಿತ ಎರಡನ್ನೂ ಬಲಪಡಿಸುತ್ತದೆ. ಈ ಪ್ಲಾಟ್‌ಫಾರ್ಮ್ ಅನ್ನು ಮುಂಬರುವ ದಿನಗಳಲ್ಲಿ ಎಐ-ಆಧಾರಿತ ಚಾಟ್‌ ಬಾಟ್ ಮತ್ತು ಮೊಬೈಲ್-ಆಧಾರಿತ ಪ್ರವೇಶದಂತಹ ವೈಶಿಷ್ಟ್ಯಗಳನ್ನು ಅಳವಡಿಸಿಕೊಳ್ಳಲು ಅನುಕೂಲವಾಗುವಂತೆ ವಿನ್ಯಾಸಗೊಳಿಸಲಾಗಿದೆ.

ಇ-ಒಸಿಐ ಕಾರ್ಡ್

ಎಲೆಕ್ಟ್ರಾನಿಕ್ ಓವರ್‌ಸೀಸ್ ಸಿಟಿಜನ್ ಆಫ್ ಇಂಡಿಯಾ (ಇ-ಒಸಿಐ) ಕಾರ್ಡ್ ಒಂದು ಪ್ರಮುಖ ನಾಗರಿಕ-ಕೇಂದ್ರಿತ ಉಪಕ್ರಮವಾಗಿದ್ದು, ಸಂಪೂರ್ಣ ಡಿಜಿಟಲ್ ವ್ಯವಸ್ಥೆಯ ಮೂಲಕ ಜಾಗತಿಕ ಭಾರತೀಯ ಸಮುದಾಯಕ್ಕಾಗಿ (ವಿದೇಶಿ ಭಾರತೀಯರು) ಒಸಿಐ ಸೇವೆಗಳನ್ನು ರೂಪಾಂತರಿಸುವ ಗುರಿಯನ್ನು ಹೊಂದಿದೆ. ಈ ವ್ಯವಸ್ಥೆಯಡಿಯಲ್ಲಿ, ಅರ್ಜಿದಾರರು ಅರ್ಜಿಯನ್ನು ಸಲ್ಲಿಸುವುದು ಮತ್ತು ಪೂರಕ ದಾಖಲೆಗಳನ್ನು ಅಪ್‌ಲೋಡ್ ಮಾಡುವುದರಿಂದ ಹಿಡಿದು, ಅನುಮೋದನೆಯ ನಂತರ ಡಿಜಿಟಲ್ ಆಗಿ ಸೃಜಿಸಲಾದ ಕಾರ್ಡ್ ಅನ್ನು ಡೌನ್‌ಲೋಡ್ ಮಾಡುವವರೆಗೆ ಸಂಪೂರ್ಣ ಒಸಿಐ ಪ್ರಕ್ರಿಯೆಯನ್ನು ಆನ್‌ಲೈನ್‌ ನಲ್ಲಿ ಪೂರ್ಣಗೊಳಿಸಬಹುದು. ಪ್ರಸ್ತುತವಿರುವ ಕಾರ್ಡ್‌ ದಾರರು ಸಹ ಹೆಚ್ಚಿನ ಸಂದರ್ಭಗಳಲ್ಲಿ ಹೊಸ ಅರ್ಜಿ ಅಥವಾ ಭೌತಿಕ ಪರಿಶೀಲನೆಯ ಅಗತ್ಯವಿಲ್ಲದೇ ತಮ್ಮ ಇ-ಒಸಿಐ ಕಾರ್ಡ್ ಅನ್ನು ಡಿಜಿಟಲ್ ಆಗಿ ಪಡೆಯಬಹುದು. ಹೊಸ ವ್ಯವಸ್ಥೆಯಡಿ, 20 ವರ್ಷ ವಯಸ್ಸಿನ ನಂತರ ಹೊಸ ಪಾಸ್‌ಪೋರ್ಟ್ ಪಡೆದಾಗ ಒಸಿಐ ಬುಕ್‌ಲೆಟ್ ಅನ್ನು ಮರು-ವಿತರಿಸುವ ಅಗತ್ಯವನ್ನು ತೆಗೆದುಹಾಕಲಾಗಿದೆ. ಆದಾಗ್ಯೂ, ಕಾರ್ಡ್‌ ದಾರರು ಹೊಸ ಪಾಸ್‌ಪೋರ್ಟ್ ಪಡೆದಾಗಲೆಲ್ಲಾ ತಮ್ಮ ಪಾಸ್‌ಪೋರ್ಟ್‌ ಗೆ ಸಂಬಂಧಿಸಿದ ವಿವರಗಳನ್ನು ಆನ್‌ಲೈನ್‌ ನಲ್ಲಿ ನವೀಕರಿಸಬೇಕಾಗುತ್ತದೆ.

ಅರ್ಜಿದಾರರಿಗೆ ಈ ವ್ಯವಸ್ಥೆಯು ಅನುಕೂಲಕರ ಮತ್ತು ಸಂಪೂರ್ಣ ಡಿಜಿಟಲ್ ಅನುಭವವನ್ನು ನೀಡುತ್ತದೆ, ಇದು ಭೌತಿಕವಾಗಿ ಹಾಜರಿರಬೇಕಾದ ಅಗತ್ಯವನ್ನು ನಿವಾರಿಸುತ್ತದೆ, ಮೊಬೈಲ್ ಸಾಧನಗಳ ಮೂಲಕ ಯಾವುದೇ ಸಮಯದಲ್ಲಿ ಪ್ರವೇಶಿಸಲು ಅನುಮತಿಸುತ್ತದೆ, ಡಿಜಿಟಲ್ ವಿತರಣೆಯ ಮೂಲಕ ಪ್ರಕ್ರಿಯೆಯನ್ನು ವೇಗಗೊಳಿಸುತ್ತದೆ, ಭೌತಿಕ ದಾಖಲೆಗಳನ್ನು ಕಳೆದುಕೊಳ್ಳುವ ಅಥವಾ ಹಾನಿ ಮಾಡುವ ಅಪಾಯವನ್ನು ತೆಗೆದುಹಾಕುತ್ತದೆ ಮತ್ತು ವೇಗವಾಗಿ ವಲಸೆ ಅನುಮತಿ ಪಡೆಯಲು ಅನುಕೂಲ ಮಾಡಿಕೊಡುವ ಮೂಲಕ ಸುಗಮ ಪ್ರಯಾಣಕ್ಕೆ ಸಹಾಯ ಮಾಡುತ್ತದೆ. ಸರ್ಕಾರದ ಮಟ್ಟದಲ್ಲಿ, ಇ-ಒಸಿಐ ವ್ಯವಸ್ಥೆಯು ಸಂಪೂರ್ಣವಾಗಿ ಆನ್‌ಲೈನ್ ಪ್ರಕ್ರಿಯೆಯನ್ನು ಖಾತ್ರಿಗೊಳಿಸುತ್ತದೆ, ಕಾಗದದ ಕೆಲಸ ಮತ್ತು ಆಡಳಿತಾತ್ಮಕ ವೆಚ್ಚಗಳನ್ನು ಕಡಿಮೆ ಮಾಡುತ್ತದೆ, ಡೇಟಾ ನಿರ್ವಹಣೆ ಮತ್ತು ಕೇಂದ್ರೀಕೃತ ಟ್ರ್ಯಾಕಿಂಗ್ ಅನ್ನು ಬಲಪಡಿಸುತ್ತದೆ ಮತ್ತು ವಿಮಾನ ನಿಲ್ದಾಣಗಳಲ್ಲಿ ನೈಜ-ಸಮಯದ ಪರಿಶೀಲನೆಗಾಗಿ ಡಿಜಿಟಲ್ ವಲಸೆ ವ್ಯವಸ್ಥೆಗಳೊಂದಿಗೆ ಸಂಯೋಜನೆಗೊಳ್ಳುತ್ತದೆ. ಇದು ಉತ್ತಮ ಗುರುತಿನ ಪರಿಶೀಲನೆ, ವರ್ಧಿತ ಭದ್ರತೆ ಮತ್ತು ವಂಚನೆಯ ಅಪಾಯವನ್ನು ಕಡಿಮೆ ಮಾಡಲು ಕಾರಣವಾಗುತ್ತದೆ.

ಎಫ್‌ ಸಿ ಆರ್‌ ಎ 2.0 ಪೋರ್ಟಲ್ ಮತ್ತು ಇ-ಒಸಿಐ ಕಾರ್ಡ್‌ ನ ಚಾಲನೆಯು ಉತ್ತಮ ಆಡಳಿತ ಮತ್ತು ಸಾರ್ವಜನಿಕ ಸೇವಾ ವಿತರಣೆಗಾಗಿ ತಂತ್ರಜ್ಞಾನವನ್ನು ಬಳಸುವಲ್ಲಿ ಗೃಹ ವ್ಯವಹಾರಗಳ ಸಚಿವಾಲಯದ ಮತ್ತೊಂದು ಮಹತ್ವದ ಸಾಧನೆಯಾಗಿದೆ. ಇದು ಹೆಚ್ಚು ಪಾರದರ್ಶಕ, ಸುರಕ್ಷಿತ ಮತ್ತು ಡಿಜಿಟಲ್ ಸಬಲೀಕರಣದ ಆಡಳಿತ ವ್ಯವಸ್ಥೆಯನ್ನು ನಿರ್ಮಿಸಲು ಕೊಡುಗೆ ನೀಡುತ್ತದೆ.

*****