પોસ્ટેડ ઓન:
28 JUN 2026 2:33PM by PIB Ahmedabad
ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે શૈક્ષણિક સંસ્થાઓ, પરિવારો, આરોગ્ય સંભાળ વ્યવસાયિકો, કાયદા અમલીકરણ એજન્સીઓ અને નાગરિક સમાજને નશા મુક્ત ભારતના નિર્માણ માટે સાથે મળીને કામ કરવા આહવાન કર્યું હતું અને જણાવ્યું હતું કે માદક દ્રવ્યોના દુરુપયોગ સામેની લડાઈ વ્યક્તિઓથી શરૂ થવી જોઈએ અને તે દેશવ્યાપી આંદોલન બનવી જોઈએ.
બેંગલુરુના શ્રી કાંતિરવા સ્ટેડિયમ ખાતે રાજીવ ગાંધી યુનિવર્સિટી ઓફ હેલ્થ સાયન્સીસ (RGUHS)ના 31મા સ્થાપના દિવસની ઉજવણી દરમિયાન નાર્કોટિક્સ કંટ્રોલ બ્યુરો અને દિશા બોધ ફાઉન્ડેશનના સહયોગથી આયોજિત 'નશા મુક્ત ભારત કોન્ક્લેવ'ને સંબોધતા ઉપરાષ્ટ્રપતિએ જણાવ્યું હતું કે માદક દ્રવ્યોનો દુરુપયોગ માત્ર વ્યક્તિગત સ્વાસ્થ્ય માટે જ નહીં પરંતુ શૈક્ષણિક સિદ્ધિ, ઉત્પાદકતા, સામાજિક સૌહાર્દ અને રાષ્ટ્રીય વિકાસ માટે પણ જોખમ ઊભું કરે છે.
RGUHS ને તેના સ્થાપના દિવસ પર અભિનંદન આપતાં તેમણે આરોગ્ય શિક્ષણ, સંશોધન અને જાહેર આરોગ્ય ક્ષેત્રે યુનિવર્સિટીના નોંધપાત્ર યોગદાન માટે અને દેશની સેવા માટે સમર્પિત આરોગ્ય સંભાળ વ્યવસાયિકોની પેઢીઓ તૈયાર કરવા બદલ પ્રશંસા કરી હતી.
શ્રી સી. પી. રાધાકૃષ્ણને બેંગલુરુ, કર્ણાટક અને અંતતોગત્વા ભારતને ડ્રગ્સ મુક્ત બનાવવાની પ્રતિજ્ઞા લેનારા વિદ્યાર્થીઓના વિશાળ મેળાવડા અંગે આનંદ વ્યક્ત કર્યો હતો. તેમણે કહ્યું કે “નશા મુક્ત ભારત” માત્ર ડ્રગ્સની ગેરહાજરી વિશે નથી. પરંતુ તંદુરસ્ત પસંદગીઓ, માહિતગાર નિર્ણયો, સહાયક પરિવારો અને સ્થિતિસ્થાપક સમુદાયોને પ્રોત્સાહન આપવા વિશે છે. વ્યક્તિઓનું પોતાના મન પર સંપૂર્ણ નિયંત્રણ હોવું જોઈએ તેના પર ભાર મૂકતા તેમણે ટિપ્પણી કરી કે જ્યારે ડ્રગ્સ મન પર કાબૂ મેળવે છે, ત્યારે વ્યક્તિ પોતાના જીવન પરનો કાબૂ ગુમાવી બેસે છે.
ઉપરાષ્ટ્રપતિએ જણાવ્યું હતું કે વ્યસનને કારણે ગુમાવેલું દરેક યુવા જીવન એ રાષ્ટ્રીય ક્ષમતાનું નુકસાન દર્શાવે છે. તેમણે વિદ્યાર્થીઓને, ખાસ કરીને ભવિષ્યના ડૉક્ટરો, નર્સો, ફાર્માસિસ્ટ, મનોવૈજ્ઞાનિકો, સંશોધકો અને જાહેર આરોગ્ય વ્યાવસાયિકોને જાગૃતિના દૂતો બનવા અને માદક દ્રવ્યોના દુરુપયોગનો સામનો કરવા માટે નિવારણ, સારવાર, સંશોધન અને પુરાવા-આધારિત નીતિ નિર્ધારણમાં અગ્રણી ભૂમિકા ભજવવા વિનંતી કરી હતી.
વ્યસન મુક્તિ દવાઓ, માનસિક સ્વાસ્થ્ય, વર્તણૂક વિજ્ઞાન અને સમુદાય-આધારિત હસ્તક્ષેપોમાં વધુ સંશોધન કરવા માટે આહવાન કરતા તેમણે ભારપૂર્વક જણાવ્યું હતું કે પુરાવાઓએ કાર્યવાહીનું માર્ગદર્શન કરવું જોઈએ અને સંશોધનોએ નીતિ ઘડતરમાં મદદ કરવી જોઈએ. તેમણે માદક દ્રવ્યોના સેવનની વિકૃતિઓનો સામનો કરવા માટે ટેકનોલોજી, કાઉન્સેલિંગ સેવાઓ અને પીઅર સપોર્ટ નેટવર્કનો લાભ લેવાના મહત્વ પર પણ ભાર મૂક્યો હતો.
ડ્રગ્સ મુક્ત શૈક્ષણિક સંસ્થાઓ પર પોતાના સતત ભારને રેખાંકિત કરતા શ્રી સી. પી. રાધાકૃષ્ણને નોંધ્યું હતું કે, ત્રણ કેન્દ્રીય યુનિવર્સિટીઓના ચાન્સેલર તરીકે તેમણે હંમેશા ડ્રગ્સ મુક્ત કેમ્પસની હિમાયત કરી છે. આ વર્ષની શરૂઆતમાં દિલ્હી યુનિવર્સિટીમાં શરૂ કરાયેલા ડ્રગ-ફ્રી કેમ્પસ કેમ્પેઈન અને ઇ-પ્રતિજ્ઞા પ્લેટફોર્મનો ઉલ્લેખ કરીને તેમણે સંતોષ વ્યક્ત કર્યો હતો કે આ પહેલે ડ્રગ્સ મુક્ત કેમ્પસ વાતાવરણ ઊભું કરવામાં યોગદાન આપ્યું છે.
આ પ્રસંગે ઉપરાષ્ટ્રપતિએ કર્ણાટકમાં નેશનલ પલ્સ પોલિયો ડ્રાઇવના ભાગરૂપે બાળકોને પોલિયો રસીના ટીપાં પીવડાવ્યા હતા. તેમણે રાજીવ ગાંધી યુનિવર્સિટી ઓફ હેલ્થ સાયન્સીસના ભૂતપૂર્વ વાઇસ ચાન્સેલરોને વર્ષોથી યુનિવર્સિટીના વિકાસ અને પ્રગતિમાં તેમના અમૂલ્ય યોગદાન બદલ સન્માનિત પણ કર્યા હતા.
આ પ્રસંગે કર્ણાટકના રાજ્યપાલ શ્રી થાવરચંદ ગેહલોત, કર્ણાટકના મુખ્યમંત્રી શ્રી ડી.કે. શિવકુમાર, આંધ્રપ્રદેશના રાજ્યપાલ જસ્ટિસ (નિવૃત્ત) સૈયદ અબ્દુલ નઝીર, કર્ણાટકના તબીબી શિક્ષણ મંત્રી ડૉ. શરણ પ્રકાશ આર. પાટીલ, કર્ણાટકના આરોગ્ય અને પરિવાર કલ્યાણ મંત્રી શ્રી યુ.ટી. ખાદર ફરીદ, RGUHS ના વાઇસ ચાન્સેલર ડૉ. ભગવાન અને અન્ય મહાનુભાવો ઉપસ્થિત રહ્યા હતા.



SM/IJ/JD