• ଭାରତ କେବଳ ଦ୍ରୁତ ଅଭିବୃଦ୍ଧିଶୀଳ ନୁହେଁ, ଏକ ଭରସାଯୋଗ୍ୟ ଅର୍ଥନୀତି ମଧ୍ୟ : ପ୍ରଧାନମନ୍ତ୍ରୀ
• ଭାରତ ଏକ ଉଦୀୟମାନ ଶକ୍ତି ସହ ଏକ ନିର୍ଭରଯୋଗ୍ୟ ଶକ୍ତି: ପ୍ରଧାନମନ୍ତ୍ରୀ
• ଭାରତ ପାଇଁ, ‘ରାଷ୍ଟ୍ର ପ୍ରଥମ’ ହେଉଛି ସର୍ବୋଚ୍ଚ ପଥପ୍ରଦର୍ଶନକାରୀ ନୀତି: ପ୍ରଧାନମନ୍ତ୍ରୀ
• ଭାରତରେ ଏବେ ଶେଷ ପର୍ଯ୍ୟାୟରେ ଅଛି ମାଓ ଆତଙ୍କ: ପ୍ରଧାନମନ୍ତ୍ରୀ
• 'କଦାପି ହୋଇପାରିବ ନାହିଁ' ମାନସିକତାରୁ 'ନିଶ୍ଚିତ ହୋଇପାରିବ’କୁ ପରିବର୍ତ୍ତନ ହେଉଛି ଭାରତର ସବୁଠାରୁ ବଡ଼ ସଫଳତା: ପ୍ରଧାନମନ୍ତ୍ରୀ
• ସରକାର ଗରିବ ଏବଂ ମଧ୍ୟମ ବର୍ଗଙ୍କୁ ସଶକ୍ତ କରୁଛନ୍ତି: ପ୍ରଧାନମନ୍ତ୍ରୀ
• ୧୪୦ କୋଟି ଭାରତୀୟଙ୍କ ସାମୂହିକ ପ୍ରୟାସ ଏକ 'ବିକଶିତ ଭାରତ'ର ସ୍ୱପ୍ନକୁ ସାକାର କରିବ: ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ‘ରିପବ୍ଲିକ୍‌ ସମିଟ୍‌ ୨୦୨୬’ ସମ୍ବୋଧନ କରିଛନ୍ତି। ସମଗ୍ର ବିଶ୍ବ ଦ୍ରୁତ ଓ ଗୁରୁତ୍ବପୂର୍ଣ୍ଣ ପରିବର୍ତ୍ତନ ଦେଖୁଥିବାବେଳେ  ‘ମହାନ ଶକ୍ତି ଭାରତ: ରାଷ୍ଟ୍ର ପ୍ରଥମ’ ଶୀର୍ଷକରେ ଏହି ସମ୍ମିଳନୀ ଆୟୋଜନ କରିଥିବାରୁ ଆୟୋଜକମାନଙ୍କୁ ଅଭିନନ୍ଦନ ଜଣାଇଥିଲେ।

ଏହି ସମ୍ମିଳନୀକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ, ବିଗତ ଦଶନ୍ଧିରେ ଭାରତର ସଫଳତା ଏବଂ ଏକ ବିଶ୍ୱସନୀୟ ବିଶ୍ୱ ଶକ୍ତି ଭାବେ ଏହାର ଉଦୟ ପଛରେ "ରାଷ୍ଟ୍ର ପ୍ରଥମ" ଭାବନା ହିଁ ମୁଖ୍ୟ ମାର୍ଗଦର୍ଶକ ନୀତି ହୋଇ ରହିଆସିଛି। ସେ କହିଥିଲେ ଯେ, ଭାରତ ଏକ ଦୀର୍ଘ ଐତିହାସିକ ସ୍ମୃତି ବହନ କରୁଥିବା ସଭ୍ୟତା ଏବଂ ଏହାର ଉଭୟ ପ୍ରଗତି ଓ ପ୍ରତିକୂଳ ପରିସ୍ଥିତିରୁ ଶିକ୍ଷା ଗ୍ରହଣ କରିବାର ଏକ ଅନନ୍ୟ କ୍ଷମତା ରହିଛି। ସେ ଆହୁରି ମଧ୍ୟ କହିଥିଲେ ଯେ, ଆଜି ନିଆଯାଉଥିବା ନିଷ୍ପତ୍ତି ଏବଂ କାର୍ଯ୍ୟାନୁଷ୍ଠାନଗୁଡ଼ିକ ଆଗାମୀ ଶତାବ୍ଦୀଗୁଡ଼ିକ ପାଇଁ ଦେଶର ଭବିଷ୍ୟତର ମୂଳଦୁଆ ପକାଉଛି। ସେ ଉଲ୍ଲେଖ କରିଥିଲେ, ”ଆମ ଦେଶ କେବଳ ବିଶ୍ୱର ସବୁଠାରୁ ଦ୍ରୁତ ଗତିରେ ବୃଦ୍ଧି ପାଉଥିବା ଅର୍ଥନୀତିଗୁଡ଼ିକ ମଧ୍ୟରୁ ଅନ୍ୟତମ ଭାବେ ଉଭା ହୋଇନାହିଁ, ବରଂ ଏକ ବିଶ୍ୱସନୀୟ ଏବଂ ନିର୍ଭରଯୋଗ୍ୟ ସହଯୋଗୀ ଭାବରେ ମଧ୍ୟ ପ୍ରତିଷ୍ଠିତ ହୋଇଛି। ଭାରତର ଏହି ଉଦୟ ବିଶ୍ୱାସ, ସ୍ଥିରତା ଏବଂ ସମଗ୍ର ବିଶ୍ୱ କଲ୍ୟାଣ ପ୍ରତି ଥିବା ପ୍ରତିବଦ୍ଧତା ଉପରେ ଆଧାରିତ।”

ନିକଟରେ ଜି-୭ ସମ୍ମିଳନୀରେ ନିଜର ଅଂଶଗ୍ରହଣକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ, ସମଗ୍ର ବିଶ୍ୱର ନେତୃବୃନ୍ଦ "ରାଷ୍ଟ୍ର ପ୍ରଥମ" ନୀତି ପ୍ରତି ଭାରତର ଅବିଚଳିତ ପ୍ରତିବଦ୍ଧତାକୁ ସ୍ୱୀକାର କରୁଛନ୍ତି। ସେ ଆହୁରି ମଧ୍ୟ କହିଥିଲେ ଯେ, ବିକାଶ ପଥରେ ଆଗକୁ ବଢ଼ୁଥିବା ଦେଶର ନୀତି, ପ୍ରାଥମିକତା ଏବଂ ଆକାଂକ୍ଷାକୁ ଏହି ମାର୍ଗଦର୍ଶକ ଦର୍ଶନ ନିରନ୍ତର ରୂପରେଖ ପ୍ରଦାନ କରୁଛି। ଦେଶ ବିକାଶ ରାସ୍ତାରେ ଆଗକୁ ବଢୁଥିବାବେଳେ ଏହି ମାର୍ଗଦର୍ଶନକାରୀ ନୀତି ଦେଶର ନୀତି, ପ୍ରାଥମିକତା ଓ ଆକାଂକ୍ଷାକୁ ଆକାର ପ୍ରଦାନ କରୁଛି।

ସରକାରଙ୍କ ୧୨ ବର୍ଷର ସେବାକାଳକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ, ସ୍ୱଚ୍ଛ ଭାରତ, ମେକ୍ ଇନ୍ ଇଣ୍ଡିଆ, ଖଦିର ପ୍ରୋତ୍ସାହନ ଏବଂ ସ୍ଥାନୀୟ ଉତ୍ପାଦ ପାଇଁ ଚାଲିଥିବା ଅଭିଯାନ ଭଳି ପ୍ରମୁଖ ଜାତୀୟ ପ୍ରୟାସଗୁଡ଼ିକ ସଫଳ ହୋଇଛି, କାରଣ ଦେଶବାସୀ ‘ରାଷ୍ଟ୍ରପ୍ରଥମ’ ନୀତିକୁ ଗ୍ରହଣ କରିଛନ୍ତି। ଜନଜାତି ଏବଂ ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳଗୁଡ଼ିକରେ ଏହି ଆଭିମୁଖ୍ୟର ପରିବର୍ତ୍ତନକାରୀ ପ୍ରଭାବ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ, “ଦିନେ ଯେଉଁ ଅଞ୍ଚଳଗୁଡ଼ିକ ହିଂସା ଏବଂ ଅନଗ୍ରସରତା ଦ୍ୱାରା ଜର୍ଜରିତ ଥିଲା, ସେଠାରେ ଏବେ ଅଭୂତପୂର୍ବ ପ୍ରଗତି ଦେଖିବାକୁ ମିଳୁଛି। ବିଗତ ଦଶନ୍ଧି ମଧ୍ୟରେ ପ୍ରଭାବିତ ଅଞ୍ଚଳଗୁଡ଼ିକରେ ୧୨,୦୦୦ କିଲୋମିଟରରୁ ଅଧିକ ରାସ୍ତା, ୯,୫୦୦ରୁ ଅଧିକ ମୋବାଇଲ୍ ଟାୱାର, ବ୍ୟାଙ୍କିଙ୍ଗ୍ ସେବା, ଡାକଘର ଏବଂ ଯୋଗାଯୋଗ ନେଟୱର୍କ ଆଦି ପ୍ରତିଷ୍ଠା କରାଯାଇଛି।”

ଶ୍ରୀ ମୋଦୀ କହିଥିଲେ ଯେ, ବିଗତ ଦଶନ୍ଧିଗୁଡ଼ିକରେ ହଜାର ହଜାର ଜୀବନ ନେଇଥିବା ମାଓବାଦୀ ହିଂସା, ଦୃଢ଼ ସୁରକ୍ଷା ବ୍ୟବସ୍ଥା ଏବଂ ଦ୍ରୁତ ବିକାଶର ମିଳିତ ପ୍ରୟାସ ଯୋଗୁଁ ଏବେ ନିଜର ଶେଷ ସମୟରେ ପହଞ୍ଚିଛି। ସେ ଉଲ୍ଲେଖ କରିଥିଲେ ଯେ, “'ବସ୍ତର ଅଲମ୍ପିକ୍ସ'ର ବଢ଼ୁଥିବା ସଫଳତା ପ୍ରମାଣ କରୁଛି ଯେ, ଦିନେ ଏହି ଅଞ୍ଚଳ ସହ ଜଡ଼ିତ ଥିବା ଭୟ ଏବଂ ଅନିଶ୍ଚିତତା ସ୍ଥାନରେ ଏବେ ଯୁବପିଢ଼ିଙ୍କ ଆକାଂକ୍ଷା ଓ ପ୍ରତିଭା ସ୍ଥାନ ନେଇଛି।”

ଏକ ଆକାଂକ୍ଷୀ ଭାରତର ଅଭ୍ୟୁଦୟ କଥା ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ, ଦେଶ ନିରାଶାବାଦର ଯୁଗରୁ ବାହାରି ଆତ୍ମବିଶ୍ୱାସ ଏବଂ ସୁଯୋଗର ଯୁଗ ଆଡ଼କୁ ଅଗ୍ରସର ହୋଇଛି। ସେ ମତ ଦେଇଥିଲେ ଯେ, "ପରିବର୍ତ୍ତନ ସମ୍ଭବ" ବୋଲି ଏହି ବିଶ୍ୱାସ ହିଁ ଆଜି ଭାରତର ସବୁଠାରୁ ବଡ଼ ଶକ୍ତି ପାଲଟିଛି। ଶ୍ରୀ ମୋଦୀ ଆଲୋକପାତ କରି କହିଥିଲେ, “'ଆକାଂକ୍ଷୀ ଜିଲ୍ଲା' ଏବଂ 'ଆକାଂକ୍ଷୀ ବ୍ଲକ' କାର୍ଯ୍ୟକ୍ରମ ଦେଶର କେତେକ ସବୁଠାରୁ ଅନଗ୍ରସର ଅଞ୍ଚଳକୁ ବିକାଶର ଚାଳକ ଶକ୍ତିରେ ପରିଣତ କରିଛି। ଏହି ପ୍ରୟାସଗୁଡ଼ିକ କୋଟି କୋଟି ନାଗରିକଙ୍କ ଜୀବନଧାରଣର ମାନ ବୃଦ୍ଧି କରିବାରେ ଏବଂ ସେମାନଙ୍କ ପାଇଁ ସୁଯୋଗର ସମ୍ପ୍ରସାରଣ କରିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛି।”

ପ୍ରଧାନମନ୍ତ୍ରୀ କହିଥିଲେ ଯେ, ବିକାଶର ସୁଫଳ କେବଳ ବ୍ୟକ୍ତିଗତ ହିତାଧିକାରୀଙ୍କ ମଧ୍ୟରେ ସୀମିତ ନରହି ସମଗ୍ର ସମାଜର ସମୃଦ୍ଧିରେ ସହାୟକ ହେଉଛି। ସେ କହିଛନ୍ତି, “ନିକଟ ବର୍ଷଗୁଡ଼ିକରେ ପ୍ରାୟ ୨୫ କୋଟି ଲୋକ ଦାରିଦ୍ର୍ୟ ସୀମାରେଖାରୁ ଉପରକୁ ଉଠିବା ସହ ଦେଶରେ ଏକ ବିଶାଳ 'ନବ୍ୟ-ମଧ୍ୟମ ବର୍ଗ' ର ଅଭ୍ୟୁଦୟ ଘଟିଛି, ଯାହା ଅର୍ଥନୈତିକ କାର୍ଯ୍ୟକଳାପକୁ ମଜବୁତ କରିଛି ଏବଂ ବିଭିନ୍ନ କ୍ଷେତ୍ରରେ ସୁଯୋଗ ବୃଦ୍ଧି କରିଛି। ଦାରିଦ୍ର୍ୟ ଦୂରୀକରଣ କେବଳ ଏକ କଲ୍ୟାଣମୂଳକ ଲକ୍ଷ୍ୟ ନୁହେଁ, ବରଂ ଏହା ବିକାଶ, ଆକାଂକ୍ଷା ଏବଂ ସାମାଜିକ ଗତିଶୀଳତା ପାଇଁ ଏକ ଉତ୍‌ପ୍ରେରକ ସଦୃଶ କାମ କରେ।”

ବିଗତ ଦଶନ୍ଧିରେ ମଧ୍ୟମ ବର୍ଗଙ୍କ ଉପରେ ସରକାର ବିଶେଷ ଗୁରୁତ୍ବ ଦେଉଥିବା ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ, ମଧ୍ୟମ ବର୍ଗର ପରିବାରଗୁଡ଼ିକର ଜୀବନଧାରଣକୁ ସହଜ କରିବା ସରକାରଙ୍କ ଏକ ପ୍ରମୁଖ ପ୍ରାଥମିକତା ହୋଇ ରହିଆସିଛି। ଅଧାରେ ଅଟକି ରହିଥିବା ଗୃହ ନିର୍ମାଣ ପ୍ରକଳ୍ପଗୁଡ଼ିକ ବିଷୟରେ ସେ କହିଥିଲେ ଯେ, ବିଳମ୍ବିତ ଆବାସିକ ପ୍ରକଳ୍ପଗୁଡ଼ିକୁ ସମ୍ପୂର୍ଣ୍ଣ କରିବାରେ ସହାୟତା ପାଇଁ ୨୫,୦୦୦ କୋଟି ଟଙ୍କାର ଏକ ସ୍ୱତନ୍ତ୍ର ପାଣ୍ଠି ଗଠନ କରାଯାଇଛି, ଯାହା ଫଳରେ ଦେଶସାରା ହଜାର ହଜାର ଘର କ୍ରେତାଙ୍କୁ ସେମାନଙ୍କ ଘର ହସ୍ତାନ୍ତର କରାଯାଇପାରିଛି। ସେ ଗୁରୁତ୍ୱାରୋପ କରି କହିଥିଲେ, “ସହଜ ମୂଲ୍ୟରେ ଗୃହ ଋଣ ସୁବିଧା, ଡିଜିଟାଲ୍ ସେବା ଏବଂ ଉନ୍ନତ ସହରୀ ଭିତ୍ତିଭୂମି ନାଗରିକଙ୍କ ଜୀବନଧାରଣର ମାନକୁ ଯଥେଷ୍ଟ ବୃଦ୍ଧି କରିଛି। 'ସ୍ୱାମୀ' (SWAMIH - Special Window for Affordable and Mid-Income Housing) ପାଣ୍ଠି ଭଳି ପଦକ୍ଷେପଗୁଡ଼ିକ ଅଟକି ରହିଥିବା ହଜାର ହଜାର ଗୃହ ନିର୍ମାଣ କାର୍ଯ୍ୟକୁ ସମ୍ପୂର୍ଣ୍ଣ କରିବା ଏବଂ ଘର କ୍ରେତାମାନଙ୍କୁ ତାହା ହସ୍ତାନ୍ତର କରିବାରେ ସାହାଯ୍ୟ କରିଛି।”

ପ୍ରଧାନମନ୍ତ୍ରୀ କହିଥିଲେ ଯେ, ବିଗତ ଦଶନ୍ଧି ମଧ୍ୟରେ ଭାରତର ପରିବହନ ଏବଂ ଯୋଗାଯୋଗ ଭିତ୍ତିଭୂମିର ବ୍ୟାପକ ସମ୍ପ୍ରସାରଣ ଘଟିଛି। “ମେଟ୍ରୋ ରେଳ ନେଟୱର୍କ ଏବେ ପ୍ରତିଦିନ ଏକ କୋଟିରୁ ଅଧିକ ଯାତ୍ରୀଙ୍କୁ ସେବା ଯୋଗାଉଛି, ଅନ୍ୟପଟେ ବନ୍ଦେ ଭାରତ, ନମୋ ଭାରତ ଏବଂ ଅମୃତ ଭାରତ ଭଳି ଟ୍ରେନ ସେବା ଦେଶସାରା ଯୋଗାଯୋଗ ବ୍ୟବସ୍ଥାକୁ ଅଧିକ ମଜବୁତ କରୁଛି। ସମ୍ପ୍ରସାରିତ ସଡ଼କ ନେଟୱର୍କ, ଜାତୀୟ ରାଜପଥ ଏବଂ ବିମାନବନ୍ଦରଗୁଡ଼ିକ ଯାତାୟାତକୁ ସହଜ କରିବା ସହ ଉଭୟ ସହରୀ ଏବଂ ନୂତନ ଭାବେ ବିକଶିତ ହେଉଥିବା ଅର୍ଥନୈତିକ କେନ୍ଦ୍ରଗୁଡ଼ିକରେ ନାଗରିକମାନଙ୍କ ପାଇଁ ନୂଆ ସୁଯୋଗ ସୃଷ୍ଟି କରିଛି’’ ସେ କହିଥିଲେ।

ଟିକସ ସଂସ୍କାର ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, କରଦାତାମାନଙ୍କର ଖର୍ଚ୍ଚ ଯୋଗ୍ୟ ଆୟ ବୃଦ୍ଧି କରିବା ଏବଂ ନିୟମ ଅନୁପାଳନର ବୋଝକୁ ହ୍ରାସ କରିବା ପାଇଁ ଅନେକ ପଦକ୍ଷେପ ନିଆଯାଇଛି। ଫେସଲେସ୍ ପ୍ରକ୍ରିୟା ଏବଂ ଅନଲାଇନ୍ ଫାଇଲିଂ ବ୍ୟବସ୍ଥା ସହିତ ସରଳୀକୃତ ତଥା ପ୍ରଯୁକ୍ତିବିଦ୍ୟା-ଆଧାରିତ ଟିକସ ପ୍ରଶାସନ, ସୁବିଧା ଏବଂ ସ୍ୱଚ୍ଛତାକୁ ବୃଦ୍ଧି କରିଛି।

ପରିବାରର ସ୍ୱାସ୍ଥ୍ୟସେବା ଖର୍ଚ୍ଚ ହ୍ରାସ କରିବା ପାଇଁ ସରକାରଙ୍କ ପ୍ରୟାସ ଉପରେ ମଧ୍ୟ ପ୍ରଧାନମନ୍ତ୍ରୀ ଆଲୋକପାତ କରିଥିଲେ। ସୁଲଭ ମୂଲ୍ୟରେ ଔଷଧ ପ୍ରଦାନ କରୁଥିବା 'ଜନ ଔଷଧି କେନ୍ଦ୍ର' ଭଳି ପଦକ୍ଷେପ ଏବଂ ବିଭିନ୍ନ କଲ୍ୟାଣକାରୀ ଯୋଜନା ଅଧୀନରେ ବୟସ୍କଙ୍କ ପାଇଁ ସ୍ୱାସ୍ଥ୍ୟ ବୀମା ଯୋଜନା ଏହି ଉଦ୍ଦେଶ୍ୟରେ କାର୍ଯ୍ୟକାରୀ କରାଯାଇଛି। ସେ ଉଲ୍ଲେଖ କରିଥିଲେ ଯେ ଏହି ପଦକ୍ଷେପଗୁଡ଼ିକ ସ୍ୱାସ୍ଥ୍ୟସେବା ଉପଲବ୍ଧତାରେ ଉନ୍ନତି ଆଣିଛି ଏବଂ ଲକ୍ଷ ଲକ୍ଷ ପରିବାରଙ୍କ ଖର୍ଚ୍ଚ ହ୍ରାସ କରିଛି।

ମଧ୍ୟବିତ୍ତ ବର୍ଗଙ୍କୁ ଲାଭ ପହଞ୍ଚାଇବା ଲକ୍ଷ୍ୟରେ କରାଯାଇଥିବା ଆର୍ଥିକ ସଂସ୍କାର ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ସୂଚାଇଥିଲେ ଯେ ଟିକସ ରିହାତି ପଦକ୍ଷେପଗୁଡ଼ିକ ଟିକସମୁକ୍ତ ଆୟ ସୀମାକୁ ଉଲ୍ଲେଖନୀୟ ଭାବରେ ବୃଦ୍ଧି କରିଛି, ଯାହା ଦ୍ୱାରା ଲୋକଙ୍କ ଖର୍ଚ୍ଚଯୋଗ୍ୟ ଆୟ ବୃଦ୍ଧି ପାଇଛି। ସେ ପ୍ରଯୁକ୍ତିବିଦ୍ୟା-ଚାଳିତ ଅନଲାଇନ୍ ଫାଇଲିଂ ଏବଂ 'ଫେସଲେସ୍ ଆସେସମେଣ୍ଟ' ବ୍ୟବସ୍ଥା ଭଳି ସଂସ୍କାର ମାଧ୍ୟମରେ ଟିକସ ବ୍ୟବସ୍ଥାର କରାଯାଉଥିବା ସରଳୀକରଣ ବିଷୟରେ ମଧ୍ୟ କହିଥିଲେ। ଏହି ପଦକ୍ଷେପଗୁଡ଼ିକ ଅନୁପାଳନ ବୋଝ ହ୍ରାସ କରିଛି ଏବଂ ସ୍ୱଚ୍ଛତା ବୃଦ୍ଧି କରିଛି।

ନାଗରିକଙ୍କ ପରିବର୍ତ୍ତିତ ଆକାଂକ୍ଷା ବିଷୟରେ ପ୍ରଧାନମନ୍ତ୍ରୀ କହିଛନ୍ତି, "ଭାରତର ବିକାଶ ସହ ଉଚ୍ଚ ଆକାଂକ୍ଷାର ଏକ ସଂସ୍କୃତି ଜନ୍ମ ନେଇଛି, ଲୋକମାନେ ଉନ୍ନତ ଭିତ୍ତିଭୂମି, ତ୍ୱରିତ ସେବା ଏବଂ ଜୀବନର ଉନ୍ନତ ଗୁଣବତ୍ତା ଖୋଜୁଛନ୍ତି। ଏହି ଆକାଂକ୍ଷା ଦେଶର ଭବିଷ୍ୟତ ପ୍ରତି ବିଶ୍ୱାସର ଏକ ସକାରାତ୍ମକ ସଙ୍କେତକୁ ଦର୍ଶାଏ ଏବଂ ‘ପ୍ରଗତି ହେବ’ ବୋଲି ନାଗରିକଙ୍କ ବିଶ୍ୱାସକୁ ପ୍ରତିଫଳିତ କରେ ।"

ପ୍ରଧାନମନ୍ତ୍ରୀ କହିଥିଲେ ଯେ, ଏକ ଦ୍ରୁତ ପରିବର୍ତ୍ତନଶୀଳ ବିଶ୍ୱ ପରିବେଶରେ ଉଦୀୟମାନ ସୁଯୋଗଗୁଡ଼ିକର ସଦୁପଯୋଗ କରିବାରେ ଭାରତର ଯୁବବର୍ଗ, ଉଦ୍ୟୋଗୀ, ନବସୃଜନକାରୀ ଏବଂ ଷ୍ଟାର୍ଟଅପ୍ ଗୁଡ଼ିକ ଆଗଧାଡ଼ିରେ ରହିଛନ୍ତି। ସେ 'ରାଷ୍ଟ୍ର ପ୍ରଥମ' ନୀତି ଦ୍ୱାରା ପରିଚାଳିତ ହୋଇ ସଂସ୍କାର, ନବସୃଜନ ଏବଂ ନାଗରିକ-କୈନ୍ଦ୍ରିକ ଶାସନ ପ୍ରତି ସରକାରଙ୍କ ପ୍ରତିବଦ୍ଧତାକୁ ଦୋହରାଇଥିଲେ। ଶ୍ରୀ ମୋଦୀ ଏକ ଦ୍ରୁତ ବିକାଶଶୀଳ ଭାରତର ଆକାଂକ୍ଷା ସହିତ କ୍ରମାଗତ ନକାରାତ୍ମକତା ଏବଂ ବିରୋଧ ପ୍ରଦର୍ଶନ କରୁଥିବା ଏକ ରାଜନୈତିକ ବିଚାରଧାରାର ତୁଳନା କରିଥିଲେ। ସେ କହିଥିଲେ, ନାଗରିକମାନେ ଅଧିକରୁ ଅଧିକ ଉନ୍ନତ ଭିତ୍ତିଭୂମି, ପ୍ରଯୁକ୍ତିବିଦ୍ୟା, ଯୋଗାଯୋଗ ଏବଂ ସୁଯୋଗ ଚାହୁଁଥିବା ବେଳେ, କିଛି ଗୋଷ୍ଠୀ ବିକାଶମୂଳକ ପଦକ୍ଷେପଗୁଡ଼ିକୁ ବିରୋଧ କରୁଛନ୍ତି, ଯଦିଓ ସେମାନେ ସେଥିରୁ ସୁଫଳ ମିଳୁଥିବା ଦାବି କରନ୍ତି। ରାଷ୍ଟ୍ର ଗଠନରେ ଗଠନମୂଳକ ଅଂଶଗ୍ରହଣର ଗୁରୁତ୍ୱ ଉପରେ ଜୋର ଦେଇ ପ୍ରଧାନମନ୍ତ୍ରୀ ନାଗରିକମାନଙ୍କୁ, ବିଶେଷ କରି ଯୁବବର୍ଗଙ୍କୁ ଭାରତର ବିକାଶ ଲକ୍ଷ୍ୟ ଏବଂ 'ରାଷ୍ଟ୍ର ପ୍ରଥମ' ନୀତି ଉପରେ ଧ୍ୟାନ କେନ୍ଦ୍ରୀଭୂତ କରିବାକୁ ଆହ୍ୱାନ ଦେଇଥିଲେ।

ନିଜ ଅଭିଭାଷଣ ଶେଷରେ ପ୍ରଧାନମନ୍ତ୍ରୀ କହିଥିଲେ ଯେ ସମଗ୍ର ବିଶ୍ୱ ଏବେ ଏଭଳି ଏକ ଅଭୂତପୂର୍ବ ପରିବର୍ତ୍ତନ ଦେଇ ଗତି କରୁଛି ଯାହା ପାରମ୍ପରିକ ଚିନ୍ତାଧାରାକୁ ଚ୍ୟାଲେଞ୍ଜ କରିବା ସହ ଅଭିବୃଦ୍ଧି ଏବଂ ନବସୃଜନ ପାଇଁ ନୂତନ ସୁଯୋଗ ସୃଷ୍ଟି କରୁଛି। ସେ ଭାରତର ଯୁବବର୍ଗ, ଉଦ୍ୟୋଗୀ, ନବସୃଜନକାରୀ ଏବଂ ଷ୍ଟାର୍ଟଅପ୍ ଗୁଡ଼ିକୁ ଏହି ସୁଯୋଗଗୁଡ଼ିକର ସଦୁପଯୋଗ କରିବାକୁ ଏବଂ ଦେଶର ପ୍ରଗତିରେ ଯୋଗଦାନ ଦେବାକୁ ଆହ୍ୱାନ କରିଛନ୍ତି। “ଏହି ପରିବର୍ତ୍ତନର ଯାତ୍ରାରେ ସରକାର ଦେଶବାସୀଙ୍କ ସହ ଦୃଢ଼ ଭାବରେ ଠିଆ ହୋଇଛନ୍ତି। ଦେଶ ଏବେ ଦ୍ରୁତ ବିକାଶ ପଥରେ ଦୃଢ଼ତାର ସହ ଆଗକୁ ବଢ଼ୁଛି ଏବଂ ଏହି ଗତି ଆଗକୁ ଆହୁରି ମଜବୁତ ହେବ,” ସେ କହିଥିଲେ। ୧୪୦ କୋଟି ଭାରତୀୟଙ୍କ ସାମୂହିକ ପ୍ରୟାସ ଏବଂ ଆକାଂକ୍ଷା 'ବିକଶିତ ଭାରତ'ର ସଂକଳ୍ପକୁ ସାକାର କରିବ ବୋଲି ପ୍ରଧାନମନ୍ତ୍ରୀ ଦୃଢ଼ ବିଶ୍ୱାସ ବ୍ୟକ୍ତ କରିବା ସହ ସମସ୍ତ ନାଗରିକଙ୍କୁ ଶୁଭେଚ୍ଛା ଜଣାଇଥିଲେ।

TKM