ফম্বাক্ত লেংশিল্লিবা রাজ্যপাল শ্রী আর.এন রবি, চীফ মিনিষ্টর সুবেন্দু অধিকারি, কেন্দ্র সরকারগী ঐগী মরুপ, প্রতাপ্রাউ যদব, শক্নাইরবশিং, কোলকাতাদা থৌরম শরুক য়ারিবা মীওইশিং, লৈবাক মনুং অমসুং মপান্দা য়োগ শান্নরিবা মরুপশিং অমসুং ঐগী নুংশিরবা ইরৈচাশিং!

জুন ২১ অসি মালেমগী মফম খরদা চহি অমগী মনুংদা নুংথিল খ্বাইদগী শাংবা নুমিৎনি। মালেমগী য়োগ নুমিৎ জুন ২১ অসি মালেম শীনবা থুংনা পাংথোকপা খ্বাইদগী চাউবা থৌরম ওইরে। মালেমগী তোঙান তোঙানবা মফমশিংদগী য়োগগী ফজরবা ফোতোশিং অমগী মথংদা অমা লাক্লে। ভারত্ত হিমালয়দগী হৌঋগা ভারত মহাসাগর ফাওবা, অৱাং-নোংপোক অমসুং নোংপোক্ত বেঙ্গলদগী হৌরগা নোংচুপতা সৌরাষ্ট্রা ফাওবা, লৈবাক শীনবা থুংনা য়োগগী শক্তিনা পীক থল্লে। লৈবাক শীনবা থুংনা, মালেম শীনবা থুংনা অমগা অমগা শম্নবা মাল্লে অমসুং মসিগী য়োগগী শক্তিনা ওইহনবনি। য়োগনা মীওই খুদিংমক শম্নহল্লে, য়োগনা মীওই খুদিংমক পুনশিনহল্লে। নুংঙাইরবা মালেমগী য়োগগী নুমিৎ অমগীদমক, মালেম শীনবা থুংনা, মীওইবা খুন্নাই শীনবা থুংনা য়াইফ পাউজেল পীনবা খুদোংচাবা ঐনা লৌজরি।

মরুপশিং,

ঙসি, য়োগ নুমিৎ অসিদা, মফম অসিদা, মরুওইনা বেঙ্গলদা, লু-নান্না থম্নবা য়োগ পাংথোকপগীদমক কোলকাতাগী মীয়াম থাগৎপা ঐনা পাম্মী। মসি অঙকপা থবক অমনি- শ্বাচ্ছতা সে শ্বাগৎ থবক্কীদমক মফম অসিদা থবকশিং অমসুং মীয়ামগী থৌদাং পাংথোকপা অসিনা ঐখোয়গী লৈবাক্কী মীয়ামগী অচৌবা ইথিল অমা ওইরে।

মরুপশিং,

ঙসি মালেমগী য়োগ নুমিৎ থৌরমদা বেঙ্গলদা লৈবা অসি য়াম্না অখন্নবনি। ভগবান রামকৃষ্ণ পরমহংসগুম্বা সাধুশিং পোকখিবা, মালেম শীনবা থুংনা য়োগ মশক তাকখিবা শ্বামী বিবেকানন্দগী পোকখিবা মফম, মহর্ষি অরবিন্দগুম্বা শক্নাইরবা য়োগীশিং পোকখিবা মফম, য়োগগী চৎনবী অনৌবা থাকশিংদা পুখৎখিবা লাহিরি মহশয়গুম্বা অচৌবা য়োগীশিং পোকখিবা শেংলবা বেঙ্গলগী লমদমনি। বেঙ্গলগী লৈহাওদা পোকখিবা গুরুদেব রবিন্দ্রনাথ তেগোরনা থাজখি মদুদি মীওইবগী মশক অসি তোঙান্না হিংবদা লৈতে, মসি ঐখোয়গী অকোয়বগী মালেমগা শম্নবগী মরী লৈনৈ। মসি য়োগনা শম্নহন্নবগী মহাও অদুনি। য়োগগা মহৌশাগা পুনবা মতমদা, মসি মীওইবা খুন্নাই অমতা ওইবগী য়ুম্ফমনি।

মরুপশিং,

য়োগ অসি ইচম চম্বা হকচাং শাজেল অমা নত্তে। অকক্নবা চহি মতাং অমা খক্তনা য়োগ শান্নগদবনি হায়বা লৈতে। য়োগ মীওইবগী পুন্সিগী মঙাল অমনি, শক্তি অমসুং ৱাখল তাবা অনিগী অপুনবা অমনি হায়বা ভারত্ত ঐখোয়না খঙলে অমসুং উরে। মরম অদুনা চহি অসিগী মালেমগী য়োগ নুমিৎকী থিম অসি ‘হকচাং ফনা অহল ওইনবা য়োগ’ হায়না খল্লে। চহি য়ামশিল্লক্লবা ফাওবদা, ঐখোয় হকচাং ফনা, কন্না অমসুং তিক-তিক লাউনা লৈবা য়াই-মসিগী লম্বী য়োগনা ঐখোয়দা তাক্লে।

মরুপশিং,

ঐখোয়না ‘হকচাং ফনা অহল ওইনবা য়োগ’ গী মতাংদা ৱা ঙাংবদা, মসিনা তাক্লিবদি চহিনা মীওইবগী তৌবা ঙম্বা হন্থহন্দনবা ঐখোয়না থবক তৌবা য়াই হায়বনি। লেপ্তনা চাউখৎনবা য়োগনা মীওইবগী পুন্সিদা মতেং পাংবা ঙমগনি। ঐখোয়গী পান্দমদি ঐখোয়না চহি ২০ দা লৈখিবা অদুদগী হেন্না চহি ৪০ দা হেন্না থেকতোক থেকচিন য়াহনবা ওইগদবনি। ঐখোয়গী পান্দমদি ঐখোয়না চহি ৩০ দা লৈখিবা অদুগী চহি ৫০ দনা হেন্না পাঙ্গল কনহনবনি। ঐখোয়গী পান্দমদি ঐখোয়না চহি ৫০ দা লৈখিবা অদুগী হেন্না চহি ৭০ দা পুন্সি মহিংগা মরী লৈনবা লাইনাশিং ঙাকথোকপা অদুনা ওইগদবনি। মসিনি য়োগনা ঐখোয়দা মতেং পাংবা ঙম্বা। মসিনা ঐখোয়গী হকচাং থেকতোক তেকচিন তৌবদা ঐখোয়গী মতেং পাংই। মসিনা ঐখোয়গী পাঙ্গল হেনগৎহল্লি, মসিনা লাংতক্নবা লৈতবা পুন্সি অমা লৈহনবদা ঐখোয়গী মতেং পাংই অমসুং পুন্সি মহিংগা মরী লৈনবা লাইনাশিং নাহন্দবদা ঐখোয়গী মতেং পাংই। মসিগী মথক্ত, চাংনাইনা য়োগ শান্নবনা, ঐখোয়গী হকচাং অমসুং ৱাখল পুন্সি চুপ্পা মহৈরোয় অমা লৈনবা য়োগনা ঐখোয়দা তাকপীরি। ঐখোয় ইশাগী মরমদা ঐখোয়না হেন্না খঙলিবমখৈ, ঐখোয়না ঐখোয় ইশ হেন্না ফজনা শেন্নবা ঙমগনি। মরম অদুনা, হকচাং ফনা অহল ওইনবা য়োগ দরকার ওইরিবনি। মসিগী থিম অসি চহি কাংলুপ খুদিংমক্কীনি, অহলশিং খক্তগী নত্তে।

মরুপশিং,

গীতাদা, ভগবান কৃষ্ণনা য়োগগী মরমদা হায়খি: "যুক্ত আহার বিহারস্য, যুক্ত চেষ্টস্য কর্মসু, যুক্ত স্বপ্নবোধস্য, যোগো ভবতি দুখা।" মসি হায়রি মদুদি অফবা চীঞ্জাক অমসুং ফজনা পোথাবা, অফবা থবকশিং অমসুং থৌদাংশিং, ফজনা তুম্বা অমসুং মিকুপ-নাহুম শিংবনা, য়োগনা অৱাবা কোকহল্লি। চাং চানা থবক তৌবা অসি য়োগগী য়ুম্ফমনি। চাং চানা থবকতৌবা অসি ঐখোয়গী পুন্সিগী য়ুম্ফমনি। অদুবু, অনৌবা যুগ অসিদা, মীওই অয়াম্বনা পুন্সিদা খল কায়বগী অৱাবা মায়োক্নরি। খল চাবা মওং অমদা হিংনবা আর্ত য়োগনা ঐখোয়দা তাকপীরি। তৌগদবশিং অমসুং তৌরোইদবশিং য়োগনা ঐখোয়দা তাক্লি। ঐখোয়গী হকচাং ফজনা লমজিংনবা ঐখোয়না তম্বা মতমদা, হকচাং অসি মশা মরোমদোম ফজরকই।

মরুপশিং,

য়োগনা ঐখোয়গী হকচাং ফবা খক্তদা মীৎয়েং থমদে। য়োগনা ঐখোয়দা পুক্নিং-ৱাখল ফনা থম্বদগী হৌরগা হকচাং ফনা থম্বা ফাওবগী লম্বী তাক্লি। মরম অদুনা য়োগদা হায়রি- "যুক্তা চেষ্টস্য কর্মসু"- মসিনা হায়রি, ঐখোয়না খঙবা অদু পাংথোক্কদবনি অমসুং খঙদবা অদু ঐখোয়না পাংথোক্লোইদবনি। মসিগী খঙবা অসিনা ঐখোয়গী পুন্সিগী শান্তিগী হৌরকফম অমা ওইহল্লি অমসুং মসিনা মালেমগী শান্তি পুরক্নবা লম্বীসু ফাৎলি। মরম অদুনা ঙসিদি য়োগ অসি ঐখোয়গী লনাই পুন্সি মহিংগী তঙাইফদবা অমা ওইবতা নত্তনা, মসি মালেমগী হেন্না ফবা তুংলমচৎ অমগী তঙাইফদবা অমসু ওইরে।

মরুপশিং,

মালেমগী য়োগ নুমিত্ত, মীওই করোর কয়া য়োগ শান্নরে। অদুবু ঙসিদি ঐখোয় অমুক হন্না ৱাশক লৌনবা ঐখোয়দা খুদোংচাবা পীরে। য়োগ অসি নোংম খক্তগী ওইদনবা, য়োগ অসি থৌরম অমা খক্তগী ওইদনবা ঐখোয় ৱাশক লৌরসি। ঐখোয়না য়োগ অসি ঐখোয়গী পুন্সিগী শরুক অমা, ঐখোয়গী ইমুংশিং শরুক অমা অমসুং তুংগী মীরোলশিংগী শরুক অমা ওইহনগদবনি।

মরুপশিং,

মাইকৈ অসিদা, “য়োগ ৩৬৫” গী থবক চহি অসিদা খুমাঙচাউশিল্লে। থবক অসিগী মখাদা, নুমিৎ ১০০ গী ওনলাইন য়োগ থৌরম অমা পাংথোক্লে, মসিদা মমাঙদা অমুক্ত ওইখিদ্রিবা মওংদা মীয়াম শরুক য়াখি। মসিদা লৈবাক ১৩০ দগী মীওই মিল্লিয়ন ৩ হেন্না শরুক য়াখি।

মরুপশিং,

খুন্নাইনা মশা ফবা মতমদা, লৈবাক অদু হেন্না তৌবা ঙম্মী, হেন্না নুংঙাই অমসুং থাজবা হেন্না লৈগনি। ঐনা ময়াম পুম্নমক্ত য়াইফ পাউজেল পীজরি: "সরভে ভবন্তু সুখিনঃ, সর্বে সন্তু নিরাময়।" মসিগা লোয়ননা, মালেমগী য়োগ নুমিৎ অসিদা ময়াম পুম্নমক ঐনা অমুক হন্না য়াইফ পাউজেল পীজরি।

অদোম ঙমখৈ লৈতনা থাগৎচরি!

দিসক্লেমর: মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা ঙাংখি।

***