وزیرِ اعظم جناب نریندر مودی نے آج مغربی بنگال کے تاریخی ریڈ روڈ، کولکاتا میں بارہویں عالمی یومِ یوگا (آئی ڈی وائی) کی قومی تقریب میں شرکت کی۔ ’’صحت مند بڑھاپے کے لیے یوگا‘‘ کے موضوع کے تحت قومی تقریب کی قیادت کرتے ہوئے انہوں نے ہزاروں شرکاء کے ساتھ مشترکہ یوگا پروٹوکول انجام دیا، جبکہ بھارت اور دنیا بھر میں لاکھوں افراد ان تقریبات میں شریک ہوئے۔ اس موقع پر مغربی بنگال کے گورنر جناب آر۔ این۔ روی، قائدِ حزبِ اختلاف جناب سوویندو ادھیکاری، مرکزی وزیرِ مملکت (آزادانہ چارج) برائے آیوش جناب پرتاپ راؤ جادھو اور دیگر معزز شخصیات موجود تھیں۔

اجتماع سے خطاب کرتے ہوئے وزیرِ اعظم جناب نریندر مودی نے بارہویں عالمی یومِ یوگا کے موقع پر بھارت اور دنیا بھر کے لوگوں کو مبارک باد پیش کی۔ انہوں نے کہا کہ 21 جون اب دنیا کی سب سے بڑی اجتماعی تقریبات میں سے ایک کی حیثیت اختیار کر چکا ہے، جہاں مختلف ممالک اور ثقافتوں سے تعلق رکھنے والے افراد یوگا کے ذریعے ایک دوسرے سے جڑتے ہیں۔ وزیرِ اعظم نے کہا کہ ہمالیہ سے بحرِ ہند تک اور بنگال سے سوراشٹر تک پورا ملک یوگا کی توانائی اور روح سے سرشار نظر آتا ہے۔ انہوں نے کہا کہ یوگا میں لوگوں، معاشروں اور قوموں کو آپس میں جوڑنے کی منفرد صلاحیت موجود ہے اور یہ انسانی یکجہتی کے رشتوں کو مزید مضبوط بناتا ہے۔

وزیرِ اعظم نے کہا کہ مغربی بنگال میں قومی تقریب کا انعقاد ریاست کے عظیم روحانی اور ثقافتی ورثے کے پیشِ نظر خصوصی اہمیت رکھتا ہے۔ بنگال سے وابستہ عظیم روحانی رہنماؤں اور مفکرین، جن میں سوامی وویکانند، شری اروبندو اور دیگر ممتاز شخصیات شامل ہیں، کی خدمات کا ذکر کرتے ہوئے انہوں نے کہا کہ ان عظیم ہستیوں نے یوگا کے پیغام کو دنیا بھر میں پھیلانے میں اہم کردار ادا کیا۔ انہوں نے کہا کہ یہ سرزمین صدیوں سے ایسی روایات کی پرورش کرتی رہی ہے جو ذہن، جسم اور روح کے باہمی اتحاد پر زور دیتی ہیں۔ انہوں نے مزید کہا کہ کولکاتا میں منعقد ہونے والا اجتماعی یوگا سیشن اسی لازوال ورثے کی عکاسی کرتا ہے۔

عالمی یومِ یوگا 2026 کے موضوع ’’صحت مند بڑھاپے کے لیے یوگا‘‘ پر روشنی ڈالتے ہوئے وزیرِ اعظم نے کہا کہ یوگا محض جسمانی ورزش یا کسی مخصوص عمر کے افراد تک محدود نہیں بلکہ یہ زندگی گزارنے کا ایک جامع طریقہ ہے جو زندگی کے ہر مرحلے میں توانائی، مضبوطی اور خوش حالی کو فروغ دیتا ہے۔ انہوں نے کہا کہ یوگا انسان کو عمر بڑھنے کے باوجود صحت مند، متحرک اور پُرجوش رہنے میں مدد دیتا ہے، جبکہ جسمانی لچک، ذہنی توازن اور جذباتی استحکام کو برقرار رکھنے میں بھی معاون ثابت ہوتا ہے۔

وزیرِ اعظم نے کہا کہ یوگا زندگی کے ہر شعبے میں توازن کی اہمیت سکھاتا ہے۔ بھگود گیتا کی تعلیمات کا حوالہ دیتے ہوئے انہوں نے کہا کہ متوازن عادات، متوازن طرزِ عمل اور متوازن زندگی ہی حقیقی فلاح و بہبود کی بنیاد ہیں۔ انہوں نے مشاہدہ کیا کہ جدید معاشرے کو درپیش بہت سے مسائل طرزِ زندگی میں عدم توازن کا نتیجہ ہیں، جبکہ یوگا ہم آہنگی، نظم و ضبط اور باطنی سکون کی جانب ایک عملی راستہ فراہم کرتا ہے۔

یوگا کی ہمہ گیر فطرت پر زور دیتے ہوئے جناب مودی نے کہا کہ اس کے فوائد صرف جسمانی صحت تک محدود نہیں بلکہ ذہنی آسودگی اور جذباتی استحکام تک بھی پھیلے ہوئے ہیں۔ انہوں نے کہا کہ یوگا خود آگاہی کو فروغ دیتا ہے، ذہنی دباؤ کو کم کرتا ہے اور ایک زیادہ پُرامن اور ہم آہنگ معاشرے کی تشکیل میں مددگار ثابت ہوتا ہے۔ وزیرِ اعظم نے مزید کہا کہ یوگا جہاں فرد کی زندگی کو بہتر بناتا ہے، وہیں دنیا بھر میں باہمی افہام و تفہیم، تعاون اور امن کے فروغ کے لیے بھی ایک مؤثر قوت کے طور پر کام کرتا ہے۔

وزیرِ اعظم نے شہریوں پر زور دیا کہ وہ یوگا کو اپنی روزمرہ زندگی کا لازمی حصہ بنائیں اور اسے صرف ایک دن کی تقریب تک محدود نہ رکھیں۔ انہوں نے ’’یوگا 365‘‘ مہم اور اس سال شروع کیے گئے سو روزہ آن لائن یوگا پروگرام کا ذکر کیا، جس میں 130 ممالک سے 30 لاکھ سے زائد افراد نے شرکت کی۔ انہوں نے یقین ظاہر کیا کہ یوگا کو وسیع پیمانے پر اپنانے سے ایک زیادہ صحت مند، مضبوط اور خود کفیل معاشرے کی تشکیل ممکن ہوگی۔ اپنے خطاب کے اختتام پر انہوں نے دعا کی: ’’سروے بھونتو سکھنہ، سروے سنتو نرامیہ‘‘ (سب خوش رہیں اور سب بیماریوں سے محفوظ رہیں)۔

قائدِ حزبِ اختلاف جناب سوویندو ادھیکاری نے وزیرِ اعظم جناب نریندر مودی اور دیگر معزز مہمانوں کا کولکاتا میں خیرمقدم کیا اور بارہویں عالمی یومِ یوگا کی قومی تقریب کے انعقاد کے لیے مغربی بنگال کو منتخب کرنے پر شکریہ ادا کیا۔ انہوں نے کہا کہ اس تقریب نے پوری ریاست میں غیر معمولی جوش و خروش پیدا کر دیا ہے اور دارجلنگ سے دیگھا اور کوچ بہار تک تمام اضلاع کے لوگوں نے یوگا کی سرگرمیوں اور تقریبات میں بھرپور حصہ لیا ہے۔ انہوں نے کہا کہ کولکاتا سمیت پورے مغربی بنگال میں بڑی تعداد میں شہریوں نے یومِ یوگا کی تقریبات میں شرکت کی، جو طرزِ زندگی کے طور پر یوگا کی بڑھتی ہوئی مقبولیت اور قبولیت کا واضح مظہر ہے۔

بنگال کے عظیم روحانی اور ثقافتی ورثے کا ذکر کرتے ہوئے جناب ادھیکاری نے سوامی وویکانند اور دیگر عظیم مفکرین کی خدمات کو یاد کیا، جنہوں نے ذہن، جسم اور کردار کی تعمیر میں یوگا کی اہمیت پر زور دیا تھا۔ انہوں نے کہا کہ یوگا کے اصول بھارت کی تہذیبی روایات میں گہرائی سے پیوست ہیں اور آج بھی لوگوں کو متوازن اور نظم و ضبط پر مبنی زندگی کی جانب رہنمائی فراہم کر رہے ہیں۔ انہوں نے عالمی یومِ یوگا کی قومی تقریب کولکاتا میں منعقد کرنے پر وزیرِ اعظم کا شکریہ ادا کیا اور اس تاریخی تقریب کی میزبانی کا موقع فراہم کرنے پر مغربی بنگال کے عوام کی جانب سے اظہارِ تشکر کیا۔

اجتماع سے خطاب کرتے ہوئے مرکزی وزیرِ مملکت (آزادانہ چارج) برائے آیوش جناب پرتاپ راؤ جادھو نے کہا کہ وزیرِ اعظم جناب نریندر مودی کی دور اندیش قیادت میں یوگا صحت اور فلاح و بہبود کے لیے ایک حقیقی عالمی تحریک کی صورت اختیار کر چکا ہے۔ انہوں نے کہا کہ 2014 میں اقوامِ متحدہ کی جانب سے عالمی یومِ یوگا سے متعلق قرارداد منظور کیے جانے کے بعد آج یوگا دنیا کے 180 سے زائد ممالک میں منایا جاتا ہے، جو اس کی عالمگیر کشش اور موجودہ دور میں اس کی بڑھتی ہوئی اہمیت کا مظہر ہے۔

اس سال کے موضوع ’’صحت مند بڑھاپے کے لیے یوگا‘‘ کا حوالہ دیتے ہوئے جناب پرتاپ راؤ جادھو نے وزارتِ آیوش کی ’’یوگا 365‘‘ مہم کا ذکر کیا، جس کا مقصد شہریوں کو سال بھر یوگا کو اپنی روزمرہ زندگی کا حصہ بنانے کی ترغیب دینا ہے۔ انہوں نے عالمی یومِ یوگا 2026 کے سلسلے میں شروع کی گئی مختلف سرگرمیوں پر بھی روشنی ڈالی، جن میں بڑے پیمانے پر عوامی بیداری پروگرام، ڈیجیٹل شرکت کی مہمات اور یوگا سے متعلق اختراعی سرگرمیاں شامل ہیں۔ بھارت کے روایتی نظامِ طب کے فروغ کے لیے حکومت کے عزم کا اعادہ کرتے ہوئے انہوں نے کہا کہ وزیرِ اعظم کی رہنمائی میں وزارتِ آیوش آیوش خدمات تک عوام کی رسائی بڑھانے اور ملک کے صحت و فلاح کے نظام کو مزید مضبوط بنانے کے لیے مسلسل کام کر رہی ہے۔

کولکاتا کے ریڈ روڈ پر منعقدہ تقریب میں یوگا کے سادھکوں، طلبہ، رضاکاروں، مختلف تنظیموں کے نمائندوں اور عام شہریوں نے بھرپور جوش و خروش کے ساتھ شرکت کی۔ ملک بھر اور دنیا کے مختلف حصوں میں لاکھوں افراد نے بھی یوگا سیشنوں، سماجی تقریبات اور آن لائن پلیٹ فارمز کے ذریعے اس دن کی مناسبت سے منعقدہ سرگرمیوں میں حصہ لیا، جو صحت اور فلاح و بہبود کی تحریک کے طور پر یوگا کی وسیع مقبولیت کا مظہر ہے۔

اس سال کی تقریبات میں عوامی شرکت نے ایک نئی مثال قائم کی ہے۔ یوگا سنگم پورٹل پر رجسٹریشن کرانے والی تنظیموں کی تعداد چھ لاکھ سے تجاوز کر چکی ہے۔ یہ غیر معمولی ردِ عمل اس بات کا ثبوت ہے کہ ادارے، مقامی برادریاں اور عام شہری یوگا کو حقیقی معنوں میں عوامی تحریک بنانے کے لیے پُرجوش ہیں۔

عالمی یومِ یوگا 2026 میں عالمی سطح پر بھی غیر معمولی شرکت دیکھنے میں آ رہی ہے۔ انڈین کونسل فار کلچرل ریلیشنز (آئی سی سی آر) کی مربوط کاوشوں کے تحت دنیا بھر میں بھارت کے 210 سے زائد سفارتی مشن تقریباً 2,500 مقامات پر یوگا کی تقریبات کا انعقاد کر رہے ہیں۔

تقریبات میں ثقافتی رنگ شامل کرنے کے لیے وزارتِ ثقافت، بھارت کے آثارِ قدیمہ کے سروے (اے ایس آئی) کے اشتراک سے ملک کے 100 نمایاں اور تاریخی مقامات پر خصوصی یوگا پروگراموں کا انعقاد کر رہی ہے۔ اس اقدام کا مقصد بھارت کے عظیم ثقافتی ورثے، تاریخی یادگاروں اور یوگا کی روایات کو ایک دوسرے سے جوڑنا ہے۔

******

ش ح۔ ش ا ر۔ ول

Uno-8958