প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা প্রধান মন্ত্রী বিকসিত ভারত রোজগার য়োজনাগী মখাদা লুপা করোর ২,৪০০ রোমগী কান্নবশিং য়েন্থোকখ্রে
অহানবা থবক ফংলবশিং খুদোংচাবা পীনবা অমসুং নহারোলশিং অমসুং উদ্যোগকী মরক্ত থোঙ অমা ওইনবা প্রধান মন্ত্রী বিকসিত ভারত রোজগার য়োজনা পায়খৎপনি: প্রধান মন্ত্রী
ঐখোয়গী নহারোলশিংগী অনিংবশিং, হৈথোই-শিংথোইবশিংই অমসুং তৌবা ঙম্বনা বিকসিত ভারত অমগী লম্বী শেম্লে: প্রধান মন্ত্রী
লাক্লিবা চহিশিংদা মালেমগী চাউখৎপা, ইন্নোবেসন অমসুং ওন্ত্রেপ্রেন্যুরশিপ ফগৎনবা ভারতকী নহারোলশিংনা মাংজিল থাগনি: প্রধান মন্ত্রী
মাঙজিল থানবা ভারতনা শেম-শারে: প্রধান মন্ত্রী
১২শুবা চহিচাদা, হৈথোই-শিংথোইবা মীওই মশিং হেনগৎহনবা, অনৌবা থবক পায়খৎপা হেনগৎহনবা অমসুং খ্বাইদগী মগুন লৈহনবা লৈবাকশিংনা খুদোংচাবশিং ফংগনি: প্রধান মন্ত্রী
মালেমগী ওইনা চাংদম্না ঙম্নবা, ঐখোয়না খ্বাইদগী ফবা মগুন লৈবা পোৎথোকশিং পুথোক্কদবনি: প্রধান মন্ত্রী
प्रविष्टि तिथि:
19 JUN 2026 7:49PM by PIB Imphal
ঙসি প্রধান মন্ত্রী শ্রী নরেন্দ্র মোদীনা প্রধান মন্ত্রী বিকসিত ভারত রোজগার য়োজনাগা মরী লৈনবা বেনিফিসরিশিং, উদ্যোগকী মীহুৎশিং অমসুং মরী লৈনবশিংদা ৱা ঙাংখ্রে, ভারতকী নহারোলশিংগী ফিবম ফগৎহন্নবা অমসুং লৈবাক শীনবা থুংনা থবক ফংবা য়াংখৎহন্নবা সরকারনা পায়খৎলিবা থবকশিং অমুক হন্না ফোঙদোকখ্রে। প্রধান মন্ত্রীনা প্রধান মন্ত্রী বিকসিত ভারত রোজগার য়োজনাগী মখাদা লুপা করোর ২,৪০০ রোমগী কান্নবশিং য়েন্থোকখ্রে, ভারত সরকারগী মরুওইবা ইমপ্লোইমেন্ত-লিঙ্ক ইন্সেন্তিপ স্কিম অমসুং হিরম খুদিংমক্ত খুন্নাইগী ঙাক্লৌ পীবা হেনগৎহল্লিবা, প্রধান মন্ত্রী বিকসিত ভারত রোজগার য়োজনা থবক ওইনা পায়খৎপগী মরুওইবা খুমাঙচাউশিনবা অমনি হায়না শিংথাখি। পীরিবা কান্নবা অসিনা লৈবাক শীনবা থুংনা থবক লাখ ১৫ ফংহনবদা মতেং পাংলে।
মহাক্না জি-৭ মীফম শরুক য়াখিবা অমসুং মালেমগী লুচিংবশিংগা উনখিবা, মহাক্কী ফ্রান্স অমসুং স্লোভাকিয়া খোঙচৎ হল্লক্লবা মতুংদা মীয়ামদা ৱা ঙাংবদা, প্রধান মন্ত্রীনা হায়খি মখোয়গী হৈথোই-শিংথোইবা, খুৎশা-হৈবা অমসুং তৌবা ঙম্বগীদমক মমাঙদা অমুক্ত ওইখিদ্রিবা মওংদা মালেম শীনবা থুংনা ভারতকী নহারোলশিং মশক খঙলে। মালেম অসিদা নহা ওইরিবা ভারতমচাশিংগী তৌবা মশক খঙবা হেনগৎলক্লি অমসুং মখোয়গী তৌবা ঙম্ব অদু মাইপাকপা ওন্থোক্নবা নহারোল খুদিংমক খুদোংচাবা ফংনবা সরকারনা থবক পায়খৎলে।
প্রধান মন্ত্রীনা হায়খি মদুদি প্রধান মন্ত্রী বিকসিত ভারত রোজগার য়োজনা অসি ইমপ্লোইমেন্ত স্কিম অমদগী হেল্লে। অহানবা থবক ফংলবশিং খুদোংচাবা পীনবা অমসুং নহারোলশিং অমসুং উদ্যোগকী মরক্ত থোঙ অমা ওইনবা প্রধান মন্ত্রী বিকসিত ভারত রোজগার য়োজনা পায়খৎপনি। স্কিম অয়াম্না মহৌশানা থবক তৌরিবশিং নত্ত্রগা থবক পীরিবশিংনা মীৎয়েং থম্বনি, থৌরম অসিনা মতম অমতদা অনিমক মতেং পাংলি। মখোয়গী শীনফমগী খোঙচৎ হৌররবা নহারোলশিংগীদমক সরকারনা লেপ্লি অমসুং অনৌবা থবক ফংনবা খুদোংচাবা পীরিবা ইন্সিতিতুৎশিং পুক্নিং থৌগৎলি।
স্কিম অসিগী মাইপাকপশিং পল্লদুনা, প্রধান মন্ত্রীনা হায়খি মদুদি হৌজিক ফাওবদা অনৌবা থবক লাখ ৭০ রোম ফংহনখ্রে অমসুং অহানবা ওইনা থবক ফংলবা চপ মান্নবা মশিং খুন্নাইগী ঙাক্লৌ ফংলে। নহারোল লাখ ২০ রোম মখোয়গী অহানবা থবক্কী থা ৬ মপুংফারে, লোয়ননা মাইপাক্লবা স্কিম অসিগী মখাদা বেনিফিসরি লাখ ১০ কান্নবশিং ফংখ্রে। বেনিফিসরিশিংগী বেঙ্ক একাউন্তশিংদা লুপা করোর ২,০০০ হেন্না হকথেংননা ফংহনখ্রে। শেনগী মতেং পীবগী মথক্ত, লৈবাক অসিগী নহরোলশিংগী থবক শুবা-নোম্বা কনবা অমসুং মখোয়গী তুংলমচত্ত লৈবাক অসিনা ইকায়খুম্নবগী মমি স্কিম অসিদা তারে।
স্কিম অসিগী মখাদা থবক ফংনবগী খুদোংচাবশিং পীরিবা ইন্সিতিতুসনশিং অমসুং ইন্তরপ্রাইজশিং শরুক য়াবদা অপেনবা ফোঙদোক্লদুনা, প্রধান মন্ত্রীনা হায়খি মদুদি সরকার, উদ্যোগ অমসুং নহারোল পুন্না থবক তৌমিন্নবা মতমদা থবক ফংনবগী খোঙজেল য়াংখৎলি। থবক অসি নহারোলশিং খুদোংচাবশিং ফংবা, উদ্যোগশিং পুক্নিং থৌগৎপা ফংবা অমসুং থবক ফংহনবনা লৈবাক্কী পান্দম অমা ওইবা অনৌবা ভারত অমগী মমি অমনি।
প্রধান মন্ত্রীনা হায়খি মদুদি মালেমদা নহা ওইরিবা মীওই মশিং য়াম্না লৈবা লৈবাকশিংগী মনুংদা ভারত য়াওরি অমসুং চাউখৎলবা লৈবাক অমা ওইনবা মাইকৈদা চঙশিল্লিবা খোঙচৎকা লৈবাক অদুগী নহারোলশিংগী অনিংবশিং, হৈথোই-শিংথোইবশিং অমসুং তৌবা ঙম্বশিংগা অচেৎপা মরী লৈনৈ। মহাক্কী লৈজবা হৈথোই-শিংথোইবা অমসুং পান্দমগী মতুংইন্না ভারতকী নহারোল খুদিংমক চাউখৎনবা সরকারনা থবক পায়খৎলে। হৌখিবা চহি ১২ দা, সরকারনা থবক ফংনবা লম্বী ফগৎহল্লে। ইনফ্রাষ্ট্রকচর, ইন্নোবেসন, মেনুফেকচরিং, দিজিতেল ইকোনোমি, স্পেস, তেক্নোলোজি অমসুং ষ্টার্দঅপশিং য়াওনা হিরম কয়াদা শিংথানিঙাই ওইরবা থবকশিং পায়খৎলে। মেক ইন ইন্দিয়া, ভোকেল ফোর লোকেলগুম্বা থবকশিং, লমদম অসিগী পোৎথোকশিং মালেমদা য়ৌহন্নবা থবকশিং অমসুং মিসন মেনুফেকচরিংনা থবক ফংনবা অমসুং মশানা মশাবু থবক পীজনবা খুদোংচাবশিং হেনগৎহল্লে।
প্রধান মন্ত্রীনা হায়খি মদুদি সরকারনা ইনফ্রাষ্ট্রকচরদা লুপা করোর লাখ ১২ হেন্না থাদবা অসিনা থবক ফংনবা অকনবা য়ুম্ফম অমা শেম্লি। প্রধান মন্ত্রী মুদ্রা য়োজনাগী মখাদা লুপা করোর লাখ ৩৩ হেনবগী মতেং পাংখিবা অসিনা নহারোল করোর কয়া মখোয় মশাগী ললোন-ইতিক্কী থবকশিং হৌবা ঙমহল্লে। নুপী করোর ১০ হেন্না সেল্ফ-হেল্প গ্রুপশিংদা থবক তৌরি, লোয়ননা নুপী করোর ৩ হেন্না লাখপতি দিদিশিং ওইরে। পি.এম শ্বানিধি অমসুং পি.এম বিশ্বকর্মগুম্বা থবকশিংনা অপীকপা ওন্ত্রেপ্রেন্যুরশিং, লম্বী নাকলদা পোৎ-চৈ য়োল্লিবশিং অমসুং খুৎহৈবশিংদা হিংনবগী লম্বী ফংহন্নবা হেনগৎহল্লে।
প্রধান মন্ত্রীনা হায়খি মদুদি কমদৌনা নৌনা থোক্লকপা তেক্নোলোজিশিংনা অনৌবা থবক ফংনবা খুদোংচাবশিং পীবগে হায়বগী খুদম অমা য়াংনা চাউখৎলক্লিবা দ্রোন সেক্তরনা ওইরে। হিদাক-লাংথকশিং ফংহনবা, লৌউ-শিংউগী থবকশিংদা শীজিন্নবা, শ্বামিতভা স্কিমগী মখাদা লমগী মেপ য়েকপা অমসুং ঙাক-শেনগী থবকশিংদা দ্রোন তেক্নোলোজি শীজিন্নবা হেনগৎলকপা অসিনা ভারতকী নহারোলশিং থবক ফংনবা অনৌবা খুদোংচাবশিং পীরে। দিজিতেল ইকোনোমিনা কান্নবা অওনবা কয়া পুরক্লে। গিগ ইকোনোমি, প্লেতফোর্ম-বেজ সর্বিসশিং, কন্তেন্ত শেম্বা অমসুং তেক্নোলোজিদা য়ুম্ফম ওইবা ললোন-ইতিকশিংনা থবক ফংনবা অমসুং শেন ফংনবা মরুওইবা লম্বীশিং ওইরে। মতম অমদা ৱাখলদা ফাওবা খল্লমদবা খুদোংচাবশিং হৌজিক ভারতমচা নহারোল লাখ কয়া থবক ফংনবা মরুওইবা লম্বীশিং ওইরে। মসিগা চপ মান্নবা অওনবা ভারতকী ষ্টার্দঅপ ইকোসিষ্টেম্না খুদম ওইরে অমসুং মসিনা মখা তানা অনৌবা থবক পায়খৎপা অমসুং থবক ফংবা অমসুং লৈবাক অসিগী শেন-থুম চাউখৎহনবদা মতেং পাংগনি।
প্রধান মন্ত্রীনা হায়খি মদুদি হৌখিবা চহি ১০ দা শিংথানিঙাই ওইনা ভারতকী ষ্টার্দঅপকী থবকশিং চাউখৎলক্লে। মতম অমদা লৈবাক অসিদা ষ্টার্দঅপ ৫০০ রোম লৈরম্বা অদু হৌজিক লৈবাক অসিগী জিলা শীনবা থুংনা থবক তৌরবা রেজিষ্টার তৌরবা ষ্টার্দঅপ ২০০,০০০ হেন্না লৈরে। ভারতকী তুংলমচত্ত মালেমগী মীয়াম্না থাজবা হেনগৎলক্লি অমসুং লৈবাক অসিগী নহারোলশিংগী তৌবা ঙম্বশিংদা মপুংফানা থাজবা থম্লি। হন্দক মহাক্কী ফ্রান্স খোঙচৎ অদুদা, মাইপাক্না “ইন্দিয়া ইন্নোবেতস” থৌরম পাংথোকখি, থৌরম অদুদা আর্তিফিসিএল ইন্তিলিজেন্স, স্পেস তেক্নোলোজি, গ্রিন ইনর্জি অমসুং বাইওতেক্নোলোজিগুম্বা অনৌবা হিরমশিংদা ভারতকী ষ্টার্দঅপশিং অমসুং মালেমগী ইনভেষ্টরশিং পুনখি। ভারতকী ইন্নোবেনগী থবক অমসুং লৈবাক অসিনা তুংগী তেক্নোলোজিশিং শেমগৎপদা থৌদাং লৌবা হেনগৎলক্লিবা অসিদা মালেমনা থৱায় য়াওবা হেনগৎলকপা অদু থৌরম অসিনা উৎলে।
প্রধান মন্ত্রীনা মখা তানা হায়খি মদুদি মালেম শীনবা থুংবগী লৈবাকশিংগা লোয়ননা ভারতনা অনৌবা ললোন-ইতিক্কী এগ্রিমেন্তশিং লৈনরে। হায়রিবা এগ্রিমেন্তশিং অসিনা ভারতকী উদ্যোগশিংগী অনৌবা কৈথেলশিং হাংদোক্লি অমসুং ভারতকী হৈথোই-শিংথোইবা মীওইশিংগী অনৌবা খুদোংচাবশিং পীরে। তুংগী শেন্মিৎলোনগীদমক মালেম্না থৌরাং তৌবগা লোয়ননা, মসিদা মাংজিল থানবা ভারতনা শেম-শারি। তুংগী তেক্নোলোজিশিংগী মাইকৈদা লৈবাকশিং মাঙলোমদা চঙশিল্লকপগা লোয়ননা, য়াংনা অওনবা পুরক্লিবা মালেম অমগী দরকার ওইবা স্কিলশিং অমসুং তৌবা ঙম্বশিং লৈবাক অসিগী নহারোলশিংদা লৈহন্নবা ভারতনা মীৎয়েং চঙলি।
প্রধান মন্ত্রীনা হায়খি মদুদি হৌখীবা চহি ১২ দা ভারতকী থবক ফংহন্নবা থবক্ত শিংথানিঙাই ওইরবা অওনবা অমা লাক্লে, কনাগুম্বা অমনা পুক্নিং চঙদ্রবসু বিকসিত ভারত অমগী মাইকৈদা চঙশিল্লিবা খোচৎকী য়াম্না মরুওইরি। থবক ফংবগা সেকুরিতি, ইকায়খুম্নবা অমসুং খুন্নাইগী ঙাক্লৌগা মরী লৈনহন্নবা সরকারনা মীৎয়েং চঙলি। ইমপ্লোইয়িজ প্রোভিদেন্ত ফন্দ ওর্গনাইজেসন মতমগা চুন্নবা, পেন্সনগী থবকশিং লাইহন্নবা অমসুং শিন্মী লাখ কয়াদা হেল্থ ইন্সুরেন্স অমসুং মমল হোংবা অনা-লাইয়েংগী খুদোংচাবা ফংহন্নবা তেক্নোলোজি শীজিন্নরে। মসিগা চপ মান্নবা ৱাঙুলোন্না লমজিংদুনা সরকারনা শিন্মীশিংগী অওনবশিং পুরক্লে।
প্রধান মন্ত্রীনা হায়খি মদুদি ভারতকী শেন-থুম অমসুং খুন্নাই চাউখৎপদা নুপীশিংনা মতেং পাংবা হেনগৎলক্লি। নুমিদাং থবক শুবা, য়ুমদগী থবক শুনবা খুদোংচাবশিংগী মতাংদা অওনবশিং পুরক্লে অমসুং থবক শুবদা নুপীশিং শরুক য়াবা হেনগৎহন্নবা থবক মফমদা অশোই-অঙাম থোক্নবা থবকশিং হেনগৎহল্লে।
উদ্যোগকী মীহুৎশিংদা ৱা ঙাংলদুনা, প্রধান মন্ত্রীনা হায়খি মদুদি ২১শুবা চহিচাদা শেন-থুমগী মাইপাকপা পুরকপদা হৈথোই-শিংথোইবা মীওই, অনৌবা থবক অমসুং মগুন লৈহনবা য়াম্না মরুওই। হায়রিবা গুনশিং অসি লৈবা লৈবাকশিংনা খুদোংচাবশিং হেন্না ফংগনি অমসুং হিরম অহুম অসিদা মমাঙদা অমুক্ত ওইখিদ্রিবা তৌবা ঙম্বা ভারতকী লৈরে। মালেমগী লৈবাকশিংনা ভারতকী থোঙশিং হাংদোকপা হেনগৎলক্লি অমসুং লৈবাক ৪০ রোমগা ফ্রি ত্রেদ এগ্রিমেন্তশিং লৈনরে। এগ্রিমেন্তশিং অসিনা অনৌবা কৈথেলশিং ফংহল্লে, মালেমগী কঞ্জুমরশিং য়ৌবা হেনগৎহল্লে অমসুং মেক ইন ইন্দিয়াগী মখাদা ব্রান্দশিংগী অনৌবা খুদোংচাবশিং পীরে।
প্রধান মন্ত্রীনা হায়খি মদুদি লৈবাক অমনা মালেম শীনবা থুংবগী মীৎয়েং অমা লৈবা মতমদা, মাইপাকপগী ঙমখৈশিং মশা মরোমদোম পাকথোকচরকই। ২১শুবা চহিচাদা, ত্রেনিং, মেন্তরশিপ অমসুং ইন্তরশিপ অসি মখা তানা খন্নিংবা খনবা য়াবা অপাম্বা ওইদ্রে, মসি তুংগী শেম-শারবা শিন্মীগী তঙাইফদবা মচাকশিং ওইরে। শেন থাদবা খক্তনা বিকসিত ভারত অমগী মাইকৈদা চঙশিল্লিবা খোঙচৎ লমজিংবা য়ারোই। মদুগী মহুত্ত, মসি হৈথোই-শিংথোইবা, খুৎ-শা হৈবা অমসুং অনৌবা থবক্না মপাঙ্গল কনখৎহনগনি। লৈবাক অমা চাউখৎপগী হিরম খুদিংমক্ত মগুন লৈহন্নবনা মশক তাক্নবা নাপচৈ ওইগনি। মালেমগী থাক্ত চাংদম্নবা অমসুং মাইপাকপা ঙম্নবা, মালেমগী খ্বাইদগী ৱাংবা ষ্টেন্দার্দশিং ঙাকপা ভারতনা ঙমগদবনি।
প্রধান মন্ত্রীনা হায়খি মদুদি ঙসিগী মালেমগী লৈবাকশিংনা ভারত্ত অচৌবা থাজবশিং থম্লে। ভারতকী নহারোলশিংনা থাজবশিং অসি ফংহনবা খক নত্তনা মখোয়গী খাংবা কনবা, অনৌবা থবক পাংথোকপা ঙম্বা অমসুং তৌবা ঙম্বশিংগী খুৎথাংদা হেনতোক্না থবক তৌগদবনি। থাজবা অসি বিকসিত ভারত অমগী অশেংবা মপাঙ্গলনি অমসুং ভারতকী যুব শক্তিগী অকনবা তৌবা ঙম্বগী মমি অমনি। মাইথিবশিং নত্ত্রগা নিংহন্নবশিংনা নহারোলশিং পুক্নিং শোন্থরোইদবনি। মাইথিবা খুদিংমক্না মমল য়াম্লবা পারাশিং তম্বীরি অমসুং লনাই চাউখৎপা অমসুং তুংগী মাইপাকপদা মতেং পাংলি। শিংনবশিংদগী মখা তানা তম্বা, মঙলানশিং মাইপাকপশিংদা ওন্থোকপা অমসুং মাইপাকপা খুদিংমক অনৌবা অপাম্বশিং ওন্থোকপা ঙম্বা নহারোলশিংগী থৌনানা নহা ওইরিবা ৱাখল অমা তশেংনা মশক খঙবা ঙম্মী।
ভারতকী নহারোলশিং অমসুং ওন্ত্রেপ্রেন্যুরশিপকী থৌনাদা প্রধান মন্ত্রী শ্রী নরেন্দ্র মোদীনা অচেৎপা থাজবা থমখি অমসুং শরুক য়াখিবা খুদিংমক্ত মহাক্কী য়াইফ পাউজেল পীদুনা লোইশিনখি অমসুং বিকসিত ভারত অমগী পান্দম ফংনবা মাইকৈদা ভারতনা চঙশিনবগা লোয়ননা লৈবাক অসিগী নহারোলশিংগী অনিংবশিং, অনৌবা থবক অমসুং অপাম্বশিংদা মতেং পাংনবা সরকারনা শৌগৎপা অমুক হন্না ফোঙদোকখি।
***
(रिलीज़ आईडी: 2275821)
आगंतुक पटल : 16
इस विज्ञप्ति को इन भाषाओं में पढ़ें:
Telugu
,
English
,
Urdu
,
Marathi
,
हिन्दी
,
Assamese
,
Bengali
,
Punjabi
,
Gujarati
,
Odia
,
Kannada
,
Malayalam