'વિકસિત ભારત યુવા સંસદ 2026' ના રાષ્ટ્રીય સ્તરનું ઉદ્ઘાટન લોકસભા અધ્યક્ષ શ્રી ઓમ બિરલા દ્વારા સંવિધાન સદનના સેન્ટ્રલ હોલ ખાતે કરવામાં આવ્યું હતું. આ કાર્યક્રમનું આયોજન કેન્દ્રીય યુવા બાબતો અને રમતગમત તેમજ શ્રમ અને રોજગાર મંત્રી ડૉ. મનસુખ માંડવિયાના નેતૃત્વ હેઠળ કરવામાં આવી રહ્યું છે, જેમણે યુવા બાબતોના વિભાગના સચિવ પલ્લવી જૈન ગોવિલની સાથે આ પ્રસંગને ગૌરવાન્વિત કર્યો હતો. આ કાર્યક્રમમાં ભારતભરની 757 યુનિવર્સિટીઓ અને સંસ્થાઓમાંથી પસંદ કરાયેલા યુવા પ્રતિનિધિઓ એકસાથે આવ્યા હતા, જેમણે વિકસિત ભારત@2047ના વિઝન પર પોતાના વિચારો અને દૃષ્ટિકોણ રજૂ કર્યા હતા.

લોકસભા અધ્યક્ષ શ્રી ઓમ બિરલાએ દેશના યુવાનોને વર્ષ 2047 સુધીમાં વિકસિત ભારતના વિઝનને સાકાર કરવામાં અગ્રણી ભૂમિકા ભજવવા આહ્વાન કર્યું હતું. સભાને સંબોધિત કરતા શ્રી બિરલાએ ભારતના યુવાનોને આકાંક્ષી, મહત્વાકાંક્ષી અને મોટા સપનાઓથી પ્રેરિત ગણાવ્યા હતા. તેમણે કહ્યું, “ભારતના યુવાનો એક વિકસિત રાષ્ટ્રના ભવિષ્ય પાછળનું સૌથી મોટું બળ છે,” અને ઉમેર્યું કે તેમનો સંકલ્પ, નવીન વિચારસરણી અને નેતૃત્વની ક્ષમતા 2047ના ભારતને આકાર આપવામાં મહત્વની ભૂમિકા ભજવશે. તેમણે કહ્યું, “આગામી વર્ષોમાં, ભારતના યુવાનો વિજ્ઞાન, ટેકનોલોજી, સંશોધન અને ઇનોવેશનમાં વિશ્વનું નેતૃત્વ કરશે. આજે સમગ્ર વિશ્વ ભારતના યુવાનો તરફ આશા, આત્મવિશ્વાસ અને ભવિષ્યની શક્યતાઓના પ્રતીક તરીકે જોઈ રહ્યું છે.” વિકસિત ભારતના વિઝનના સામૂહિક સ્વરૂપ પર ભાર મૂકતા અધ્યક્ષે જણાવ્યું હતું કે વિકસિત ભારતનું સપનું કોઈ એક વ્યક્તિ, સંસ્થા કે સરકારની આકાંક્ષા નથી. તેમણે કહ્યું, “વિકસિત ભારતનું સપનું એ 140 કરોડ ભારતીયોનો સહિયારો રાષ્ટ્રીય સંકલ્પ છે.” તેમણે વધુમાં ઉમેર્યું હતું કે 2047 સુધીમાં આ લક્ષ્ય હાંસલ કરવાની જવાબદારી મોટાભાગે આજના યુવાનોના ખભા પર છે. તેમણે ઉમેર્યું, “આપણા યુવાનોની ઊર્જા, ઇનોવેશન, હિંમત અને સંકલ્પ વિકસિત ભારતના સપનાને હકીકતમાં બદલવામાં સૌથી મજબૂત બળ બનશે.”

કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ પણ સહભાગીઓને સંબોધિત કર્યા હતા અને રાષ્ટ્રનિર્માણમાં યુવાનોની પરિવર્તનકારી ભૂમિકાની રૂપરેખા આપી હતી. પ્રતિનિધિઓનું સ્વાગત કરતાં તેમણે જણાવ્યું હતું કે સહભાગીઓએ સખત પસંદગી પ્રક્રિયા દ્વારા પોતાનું સ્થાન મેળવ્યું છે અને તેઓ ભાગ્યશાળી છે કે તેમને માનનીય લોકસભા અધ્યક્ષ સમક્ષ પોતાના વિચારો રજૂ કરવાની તક મળી છે.

વિકસિત ભારતના વિઝનનો ઉલ્લેખ કરતા ડૉ. માંડવિયાએ જણાવ્યું હતું કે, પ્રધાનમંત્રી શ્રી નરેન્દ્ર મોદીએ 2047 સુધીમાં વિકસિત ભારતની પરિકલ્પના કરી છે, જ્યારે દેશ આઝાદીના 100 વર્ષની ઉજવણી કરશે. તેમણે યુવાનોને આ રાષ્ટ્રીય લક્ષ્યને સાકાર કરવા માટે સક્રિયપણે યોગદાન આપવા વિનંતી કરી હતી. ભારતના વસ્તી વિષયક લાભ પર પ્રકાશ પાડતા તેમણે જણાવ્યું હતું કે, “આ ડેમોગ્રાફિક ડિવિડન્ડ આપણી તાકાત અને આપણી શક્તિ છે. યુવાનો માત્ર આપણું ભવિષ્ય નથી; તેઓ જ ઉકેલ પણ છે.” મંત્રીએ નોંધ્યું હતું કે ભારતની આશરે 65 ટકા વસ્તી 35 વર્ષથી ઓછી ઉંમરની છે અને તેમણે ભારપૂર્વક જણાવ્યું હતું કે જો યુવાનો સામૂહિક સંકલ્પ લે, તો તેઓ દેશ સામેના દરેક પડકારનો ઉકેલ શોધી શકે છે.

ડૉ. માંડવિયાએ વધુમાં જણાવ્યું હતું કે પ્રધાનમંત્રીએ હંમેશા ભારતના યુવાનોની ક્ષમતાઓ પર વિશ્વાસ મૂક્યો છે અને આદિવાસી સમુદાયો, દરિયાકાંઠાના વિસ્તારો અને ઉત્તર-પૂર્વ સહિતની વિવિધ પૃષ્ઠભૂમિમાંથી એક લાખ યુવા નેતાઓ તૈયાર કરવા આહ્વાન કર્યું છે. તેમણે કહ્યું, “પ્રધાનમંત્રીએ કહ્યું છે કે રાષ્ટ્રનિર્માણમાં યોગદાન આપવા માટે આવા એક લાખ યુવા નેતાઓ તૈયાર કરવા જોઈએ. યુવા બાબતોના મંત્રાલયે આ જવાબદારી ઉપાડી છે.” ડૉ. માંડવિયાએ માય ભારત (MY Bharat) હેઠળ યુવા-આધારિત પહેલોના વધતા પ્રભાવ પર પણ પ્રકાશ પાડ્યો હતો, જેમાં વિકસિત ભારત યંગ લીડર્સ ડાયલોગ, વાઇબ્રન્ટ વિલેજ પ્રોગ્રામ, વિકસિત ભારત બજેટ ક્વિઝ, યુવા કનેક્ટ અને પ્રાયોગિક શિક્ષણ કાર્યક્રમો (એક્સપિરિયન્શિયલ લર્નિંગ પ્રોગ્રામ્સ)નો સમાવેશ થાય છે, જે યુવાનોને શાસન, સામુદાયિક સેવા અને રાષ્ટ્રનિર્માણમાં સક્રિયપણે જોડાવા માટે પ્રોત્સાહિત કરે છે.

જેન ઝેડ (Gen Z) ની ભાવનાનું વર્ણન કરતા તેમણે ટિપ્પણી કરી કે, “યુવાનોની ઊર્જા, જુસ્સો અને વિચારોને વિકસિત ભારતના નિર્માણ તરફ વાળવા જોઈએ.” તેમણે એમ પણ ભારપૂર્વક જણાવ્યું હતું કે યુવા સંસદ જેવા પ્લેટફોર્મ ભવિષ્યના નેતાઓને શીખવાની, ચર્ચા કરવાની, જોડાવાની અને દેશની પ્રગતિમાં અર્થપૂર્ણ યોગદાન આપવાની તકો પૂરી પાડે છે.

આ પ્રસંગે લોકસભાના મહાસચિવ (સેક્રેટરી-જનરલ) શ્રી ઉત્પલ કુમાર સિંહ અને અધિક સચિવ (યુવા બાબતો) શ્રી નીતેશ મિશ્રા સહિત મંત્રાલયના અન્ય વરિષ્ઠ અધિકારીઓ પણ ઉપસ્થિત રહ્યા હતા.

વિકસિત ભારત યુવા સંસદ 2026 નું આયોજન યુવા બાબતો અને રમતગમત મંત્રાલય દ્વારા નવી દિલ્હીમાં 15-17 જૂન 2026 દરમિયાન કરવામાં આવી રહ્યું છે. તેની રચના લોકશાહી પ્રક્રિયાઓ સાથે યુવાનોના જોડાણને વધુ ગાઢ બનાવવા અને શાસન, નીતિ વિષયક ચર્ચા-વિચારણા તથા સંસદીય કામગીરીનો પ્રત્યક્ષ અનુભવ પ્રદાન કરવા માટે કરવામાં આવી છે. આ રાષ્ટ્રીય સ્તરની ઇવેન્ટ તમામ રાજ્યો અને કેન્દ્રશાસિત પ્રદેશોના શ્રેષ્ઠ પ્રદર્શન કરનારા યુવા પ્રતિનિધિઓને રાષ્ટ્રીય મહત્વના મુદ્દાઓ પર ચર્ચા કરવા અને વિકસિત ભારત@2047ના વિઝનમાં યોગદાન આપવા માટે એક મંચ પર લાવે છે.

SM/DK/JD