ভারতকী প্রধান মন্ত্রী শ্রী নরেন্দ্র মোদীবু স্লোভাক রিপব্লিক্কী প্রধান মন্ত্রী হিস এক্সেলেন্সী মিস্তর রোবর্ত ফিকোনা ঙসি পুৱারী ওইরবা ব্রাতিস্লাভা কাস্তলদা তরাম্না ওকখ্রে। মহাক্না থুংলখিবদা চৎন-লোনচৎ মতুং ইন্না তরাম্না ওকপগী থৌরম অমা পাঙথোকখ্রে।

লুচিংবা অনিমক্না দেলিগেসন থাক্কী মওংদা ৱারী শানখি। মখোয়না লৈবাক অনিগী মরক্তা লৈরিবা মরী অসি কমপ্রেহেন্সিব পার্তনরসিপকী থাক্তা পুখৎলকপবু তরাম্না ওকখি, মসি লৈবাক অনিগী মরক্তা লৈরিবা মরী অমসুং মতম কয়া থাজনবা লৈনরক্লবা মরুপ-মপাং ওইবগী মচৎ অদু ময়েক শেংনা উৎলিবা লৈবাক অনিগী মরীবু অনৌবা থাক অমদা পুখৎলিবসিবু তরাম্না ওক্নখি।

প্রধান মন্ত্রী অনিমক্না ললোন-ইতিক অমসুং ইনভেস্তমেন্ত, ঙাকশেল অমসুং সিক্যুরিতী, স্পেস, সিভিল ন্যুক্লিয়র, রিন্যুএবল ইনর্জী, দিজিতেল ইন্নোভেসন, একাদমিক এক্সচেঞ্জ, নাৎ অমসুং তেলেন্ত মোবিলিতী লৈবাক অনিগী মরক্তা লৈনরিবা মরী য়াওনা অপুনবা লৈঙাক-লোনচৎকী ফীভমশিং অদু কুপ্না খন্নখি। মখোয়না অনৌবা অমসুং মাঙজিল থারিবা তেক্নোলোজীশিং, AI অমসুং সুপরকম্প্যুতরগুম্বা অনৌবা লমশিংদা পুন্না থবক তৌমিন্ননবা লম্বীশিংসু খন্নখি।

প্রধান মন্ত্রীনা এপ্রিল 2025 দা পহলগামদা থোকখিবা তেরোরিস্তকী লান্দা স্লোভাকিয়ানা ভারতপু শৌগৎপিখিবা অমসুং পুন্না লেপমিন্নখিবা অদুগীদমক প্রধান মন্ত্রী ফিকোপু থাগৎপা ফোঙদোকখি। মসিনা লৈবাক অনিমক্না তেরোরিজমগী মখল খুদিংমক অমসুং মসিগী মওং-মতৌশিংবু মায়োক্ননবা লৈরিবা অচেৎপা থাজবা অদু ময়েক শেংনা উৎলি। লুচিংবা অনিমক্না পুন্না ইন্তরেস্ত লৈনবা রিজনেল অমসুং মালেমগী ওইবা ৱাফমশিংদসু খন্নখি। মখোয়না মল্তিলেতরেলিজম অমসুং মালেমগী ওইবা লৈঙাক-লোনচৎকী ইন্সতিত্যুসনশিংদা রিফোর্ম পুরক্নবা লৈরিবা মখোয়গী থাজবা অদু অমুক্কা হেৎনা চেৎশিনমিন্নহনখি।

লুচিংবা অনিমক্না হন্দক্তা পাঙথোকখিবা ইন্দিয়া-EU সম্মিতকী পুক্নিং থৌগৎনিংঙাই ওইরবা মহৈশিংদা অপেনবা ফোঙদোক্নখি। মখোয়না পুৱারী ওইরবা ইন্দিয়া-EU FTA মায় পাক্না মপুং ফশহনখিবা অদুবু তরাম্না ওকখি অমসুং মসিগা লোয়ননা ইন্তিগ্রেতেদ কমপ্রিহেন্সিব স্ত্রেতেজিক এজেন্দা লৌখৎখিবা অদুবুসু তরাম্না ওকখি, মসি পুন্না মরুওইবা লমশিংদা পুন্না থবক তৌমিন্নবগী মরী হেন্না চেৎশিনহনবদা অচৌবা খোঙথাং অমা মাঙলোমদা চঙশিনবনি হায়বা য়ানখি।

ৱারী শানখিবগী মতুং ইন্না, দিজিতেল তেক্নোলোজীশিং, শিন্মীশিং চৎথোক-চৎশিন তৌবা, অৱাংবা থাক্কী মহৈ মশিং অমসুং থিজিন-হুমজিনবা, অমসুং ওদিও-ভিজুএল শেমগৎপগী লমদা পুন্না থবক তৌমিন্ননবা MoU শিং এক্সচেঞ্জ তৌনখি। ঙাকশেলগী লমদা পুন্না থবক তৌমিন্নবা হেনগৎহন্নবা লেতর ওফ ইন্তেন্ত অমসু এক্সচেঞ্জ তৌনখি। ভারতনা তেক্নিকেল য়ুনিভর্সিতী ওফ কোসিসতা চহিদা আর্তিফিসিএল ইন্তেলিজেন্সকী চেয়র অমা লিংখৎলগনি হায়বসিসু য়ানখ্রে।

প্রধান মন্ত্রী ফিকোনা প্রধান মন্ত্রীবু ইকাইখুম্নবা উৎপা ওইনা চাক্লেন অমা শীনখি। প্রধান মন্ত্রী মোদীনা মহাকপু তরাম্না ওকখিবগীদমক অনিমক্না য়ানবা মতম অমদা ভারত্তা লাক্নবা ৱাফম থমখি।

*****