ভাৰতৰ প্ৰধানমন্ত্ৰী শ্ৰী নৰেন্দ্ৰ মোদীক আজি ব্ৰাটিশ্লাভাৰ ঐতিহাসিক দুৰ্গত শ্লভাক গণৰাজ্যৰ প্ৰধানমন্ত্ৰী ৰবাৰ্ট ফিৎচোৱে উষ্ম আদৰণি জনায়। ব্ৰাটিশ্লাভাত উপস্থিত হোৱাৰ পিছতে প্ৰধানমন্ত্ৰী মোদীক আনুষ্ঠানিকভাৱে অভিবাদন জনোৱা হয়।

দুয়োগৰাকী নেতাই প্ৰথমে এক সুকীয়া আলোচনাত মিলিত হয় আৰু ইয়াৰ পিছতে প্ৰতিনিধি পৰ্যায়ৰ বৈঠকত অংশগ্ৰহণ কৰে। দুয়োখন দেশে নিজৰ দ্বিপাক্ষিক সম্পৰ্কক 'সামগ্ৰিক অংশীদাৰিত্ব'-ৰ পৰ্যায়লৈ উন্নীত কৰাৰ সিদ্ধান্তক আদৰণি জনায়। ই দুয়োখন দেশৰ মাজত থকা উমৈহতীয়া মূল্যবোধ আৰু পুৰণি বন্ধুত্বক প্ৰতিফলিত কৰাৰ লগতে দ্বিপাক্ষিক সম্পৰ্কৰ এক নতুন অধ্যায়ৰ সূচনা কৰিছে।

বৈঠকত দুয়োগৰাকী প্ৰধানমন্ত্ৰীয়ে বাণিজ্য আৰু বিনিয়োগ, প্ৰতিৰক্ষা আৰু নিৰাপত্তা, মহাকাশ, অসামৰিক পাৰমাণৱিক শক্তি, নবীকৰণযোগ্য শক্তি, ডিজিটেল উদ্ভাৱন, শৈক্ষিক আদান-প্ৰদান, সংস্কৃতি তথা দক্ষ শ্ৰমিকৰ যাতায়াতকে ধৰি দ্বিপাক্ষিক সম্পৰ্কৰ সমগ্ৰ দিশ পৰ্যালোচনা কৰে। ইয়াৰ উপৰিও তেওঁলোকে নতুন আৰু উদীয়মান প্ৰযুক্তি, কৃত্ৰিম বুদ্ধিমত্তা আৰু ছুপাৰকম্পিউটাৰৰ দৰে নতুন ক্ষেত্ৰসমূহতো সহযোগিতাৰ সম্ভাৱনাৰ বুজ লয়।

২০২৫ চনৰ এপ্ৰিল মাহত পেহেলগামত হোৱা সন্ত্ৰাসবাদী আক্ৰমণৰ পিছত শ্লভাকিয়াই ভাৰতৰ প্ৰতি আগবঢ়োৱা সমৰ্থন আৰু সহমৰ্মিতাৰ বাবে প্ৰধানমন্ত্ৰী মোদীয়ে প্ৰধানমন্ত্ৰী ফিৎচোক ধন্যবাদ জ্ঞাপন কৰে। ই সকলো ধৰণৰ সন্ত্ৰাসবাদৰ বিৰুদ্ধে যুঁজ দিয়াত দুয়োখন দেশৰ দৃঢ় সংকল্পক প্ৰমাণ কৰে। দুয়োগৰাকী নেতাই পাৰস্পৰিক স্বাৰ্থজড়িত আঞ্চলিক আৰু গোলকীয় বিষয়সমূহৰ ওপৰতো মতামত বিনিময় কৰে। লগতে গোলকীয় শাসন প্ৰতিষ্ঠানসমূহৰ সংস্কাৰ আৰু বহুপাক্ষিকতাবাদৰ প্ৰতি থকা দায়বদ্ধতা পুনৰ দোহাৰে।

শেহতীয়াকৈ অনুষ্ঠিত হোৱা ভাৰত-ইউৰোপীয় ইউনিয়ন সন্মিলনৰ উৎসাহজনক ফলাফলক লৈ নেতাদ্বয়ে গভীৰ সন্তোষ প্ৰকাশ কৰে। ঐতিহাসিক ভাৰত-ইউৰোপীয় ইউনিয়ন মুক্ত বাণিজ্য চুক্তিৰ সফল সমাপ্তি আৰু 'যুটীয়া সামগ্ৰিক কৌশলগত কাৰ্যসূচী' গ্ৰহণ কৰা কাৰ্যকো তেওঁলোকে আদৰণি জনায়। এই পদক্ষেপসমূহে গুৰুত্বপূৰ্ণ খণ্ডসমূহৰ সহযোগিতা গভীৰ কৰাৰ দিশত এক ডাঙৰ পদক্ষেপ হিচাপে বিবেচিত হৈছে।

এই আলোচনাৰ অন্তত ডিজিটেল প্ৰযুক্তি, শ্ৰম প্ৰব্ৰজন, উচ্চ শিক্ষা আৰু গৱেষণা তথা দৃশ্য-শ্ৰব্য নিৰ্মাণৰ ক্ষেত্ৰত সহযোগিতাৰ কেইবাখনো গুৰুত্বপূৰ্ণ বুজাবুজি চুক্তি স্বাক্ষৰিত হয়। তদুপৰি প্ৰতিৰক্ষা খণ্ডত সহযোগিতা বৃদ্ধিৰ বাবে এখন সন্মতি পত্ৰও আদান-প্ৰদান কৰা হয়। বৈঠকত এই সিদ্ধান্তও লোৱা হয় যে ভাৰতে ক’চিচৰ টেকনিকেল ইউনিভাৰ্ছিটীত প্ৰথমবাৰৰ বাবে কৃত্ৰিম বুদ্ধিমত্তাবিষয়ক এখন বিশেষ আসন বা 'ইণ্ডিয়া চেয়াৰ' স্থাপন কৰিব।

প্ৰধানমন্ত্ৰী ফিৎচোৱে ভাৰতৰ প্ৰধানমন্ত্ৰীগৰাকীৰ সন্মানাৰ্থে এক মধ্যাহ্নভোজনৰো আয়োজন কৰে। প্ৰধানমন্ত্ৰী মোদীয়ে শ্লভাকিয়াৰ প্ৰধানমন্ত্ৰীগৰাকীক সুবিধা অনুযায়ী ভাৰত ভ্ৰমণৰ বাবে আমন্ত্ৰণ জনায়।

.

***********

MJPS/SS/ST/DB