দূৰসংযোগ আইন, ২০২৩ত সংসদে গৃহীত কৰিছিল। এই যুগান্তকাৰী আইনখন ১৮৮৫ চনৰ পুৰণি টেলিগ্ৰাফ আইনৰ সলনি প্ৰৱৰ্তন কৰা হৈছে।

দূৰসংযোগ আইন হৈছে এক বিস্তৃত আইন, যিয়ে বিভিন্ন ধৰণৰ সেৱাক সামৰি লৈছে। এই আইনৰ ৰূপায়ণ সংশ্লিষ্ট সেৱাৰ প্ৰকৃতি অনুসৰি বিভিন্ন বিভাগে সম্পন্ন কৰে। টেলিভিছন, ৰেডিঅ’ আৰু সংশ্লিষ্ট সেৱাসমূহৰ সৈতে জড়িত বিধানসমূহ তথ্য আৰু সম্প্ৰচাৰ মন্ত্ৰালয়ে পৰিচালনা কৰে।

২০২৩ চনত প্ৰণীত নতুন দূৰসংযোগ আইনৰ কাঠামোৰ অধীনত ১৮৮৫ চনৰ পূৰ্বৰ টেলিগ্ৰাফ আইনৰ অধীনত টেলিভিছন আৰু ৰেডিঅ’ সেৱাৰ বাবে জাৰি কৰা বিভিন্ন নিৰ্দেশনাসমূহ একত্ৰিত কৰাৰ উদ্দেশ্যে ‘দূৰসংযোগ (টেলিভিছন, ৰেডিঅ’ আৰু সংশ্লিষ্ট সেৱা) নিয়মাৱলী, ২০২৬’ৰ খচৰা প্ৰস্তুত কৰা হৈছে।

এই নিয়মাৱলীত তলত উল্লেখ কৰা নিৰ্দেশনাসমূহ অন্তৰ্ভুক্ত কৰা হৈছে—

ক. ভাৰতত উপগ্ৰহভিত্তিক টেলিভিছন চেনেলৰ আপলিংকিং আৰু ডাউনলিংকিঙৰ নীতিগত নিৰ্দেশনা, ৯ নৱেম্বৰ, ২০২২;

খ. ভাৰতত ডাইৰেক্ট-টু-হোম (ডিটিএইচ) সম্প্ৰচাৰ সেৱা আগবঢ়োৱাৰ বাবে অনুজ্ঞাপত্ৰ লাভৰ নিৰ্দেশনা, ১৫ মাৰ্চ, ২০০১ (সময়ে সময়ে সংশোধিত);

গ. ভাৰতত ‘হেডএণ্ড-ইন-দ্য-স্কাই’ (এইচআইটিএছ) সম্প্ৰচাৰ সেৱা আগবঢ়োৱাৰ নিৰ্দেশনা, ২৬ নৱেম্বৰ, ২০০৯;

ঘ. ব্যক্তিগত সংস্থাৰ জৰিয়তে এফএম ৰেডিঅ’ সম্প্ৰচাৰ সেৱাৰ সম্প্ৰসাৰণ সম্পৰ্কীয় নীতিগত নিৰ্দেশনা (তৃতীয় পৰ্যায়), ২৫ জুলাই, ২০১১ (১০ ছেপ্টেম্বৰ, ২০২৪ পৰ্যন্ত সংশোধিত);

ঙ. ভাৰতত কমিউনিটি ৰেডিঅ’ ষ্টেচন স্থাপনৰ সংশোধিত নীতিগত নিৰ্দেশনা, ১৩ ফেব্ৰুৱাৰী, ২০২৪; আৰু

চ. ইণ্টাৰনেট প্ৰট’কল টেলিভিছন (আইপিটিভি) সেৱা আগবঢ়োৱাৰ নিৰ্দেশনা, ৮ ছেপ্টেম্বৰ, ২০০৮।

এই নিয়মাৱলীৰ জৰিয়তে উদ্যোগখণ্ডে এতিয়া এক একত্ৰিত আৰু যথেষ্ট সৰলীকৃত নিয়ম-পুথি লাভ কৰিব। টেলিভিছন আৰু ৰেডিঅ’ সম্প্ৰচাৰ খণ্ডত ব্যৱসায় কৰাৰ সহজতা বৃদ্ধিৰ লক্ষ্যৰে বৰ্তমানৰ ব্যৱস্থাক সৰলীকৰণ আৰু সমন্বয় সাধন কৰি এই নিয়মাৱলী প্ৰস্তুত কৰা হৈছে।

অধিসূচিত হোৱাৰ পিছত এই নিয়মাৱলীয়ে সম্প্ৰচাৰ সেৱাসমূহ নিয়ন্ত্ৰণ কৰা বৰ্তমানৰ বিভিন্ন নিৰ্দেশনাক প্ৰতিস্থাপিত কৰিব। খচৰা নিয়মাৱলীৰ মুখ্য বৈশিষ্ট্যসমূহ

১. ধাৰাবাহিকতা বজাই ৰাখি পৰিৱৰ্তন: বিদ্যমান অনুমোদনৰ চৰ্ত আৰু নিয়মসমূহক সমন্বয় আৰু যুক্তিসংগতভাৱে পুনৰ্গঠন কৰা হৈছে, যাতে ধাৰাবাহিকতা অটুট থকাৰ লগতে প্ৰয়োজনীয় সংস্কাৰসমূহ বাস্তৱায়ন কৰিব পৰা যায়।

২. ব্যৱসায় কৰাৰ সহজতা

ক. বিভিন্ন নিৰ্দেশনাৰ পৰিৱৰ্তে একক নিয়ামক কাঠামো;

খ. অনুমোদন প্ৰক্ৰিয়াৰ সম্পূৰ্ণ ডিজিটেল ৰূপায়ণ;

গ. সৰলীকৃত অনুমোদন প্ৰক্ৰিয়া;

ঘ. ‘গ্ৰাণ্ট অৱ পাৰমিছন এগ্ৰিমেণ্ট’ (জিঅ’পিএ) স্বাক্ষৰ কৰাৰ প্ৰয়োজনীয়তা বাতিল;

ঙ. স্বচ্ছ বিচাৰ ব্যৱস্থাৰ বিধান।

এই খচৰা নিয়মাৱলী জনমত আৰু আন্তঃমন্ত্ৰালয় পৰামৰ্শৰ বাবে তথ্য আৰু সম্প্ৰচাৰ মন্ত্ৰালয়ৰ ৱেবছাইটত প্ৰকাশ কৰা হৈছে।

কোনো মতামত, পৰামৰ্শ বা মন্তব্য থাকিলে ২০২৬ চনৰ ২৭ জুলাইৰ ভিতৰত তথ্য আৰু সম্প্ৰচাৰ মন্ত্ৰালয়, ভাৰত চৰকাৰৰ আণ্ডাৰ ছেক্ৰেটাৰী (বিপি এণ্ড এল), তৃতীয় মহলা, কৰ্তব্য ভৱন-২, নতুন দিল্লী–১১০০০১লৈ প্ৰেৰণ কৰিব পাৰিব। ই-মেইলৰ জৰিয়তে usbpl-moib[at]gov[dot]in ঠিকনালৈ মতামত প্ৰেৰণ কৰাটো বাঞ্ছনীয়।

*****

Mahesh Kumar/ Vivek Vishwash/AA