ଆଜି ଦିଲ୍ଲୀର ତ୍ୟାଗରାଜ ସ୍ପୋର୍ଟ୍ସ କମ୍ପ୍ଲେକ୍ସରେ କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡା ମନ୍ତ୍ରୀ ଡକ୍ଟର ମନସୁଖ ମାଣ୍ଡଭୀୟ ଏବଂ ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ' ବିକଶିତ ଭାରତ ପାଇଁ ଯୁବପିଢି: ମାଇ ଭାରତ ଯୁବ ସମ୍ମିଳନୀ'ରେ ଉଦବୋଧନ ଦେଇଥିଲେ। ଏହି ସମ୍ମିଳନୀରେ ସାରାଦେଶରୁ ଆସିଥିବା ୬୦୦୦ ରୁ ଅଧିକ ଯୁବକଯୁବତୀ ଯୋଗଦେଇଥିଲେ। ସେମାନେ ଛାତ୍ର, ଯୁବ ପେସାଦାର, ଯୁବତୀ, ଉଦ୍ୟୋଗୀ, କଣ୍ଟେଣ୍ଟ୍‌ କ୍ରିଏଟର୍‌, ନବସୃଜନକାରୀ, ଉଦୀୟମାନ ନେତା ଏବଂ କୃତିତ୍ୱ ହାସଲକାରୀଙ୍କ ସମେତ ବିବିଧ ପୃଷ୍ଠଭୂମିର ପ୍ରତିନିଧିତ୍ୱ କରୁଥିଲେ। ଏହି କାର୍ଯ୍ୟକ୍ରମ ରାଷ୍ଟ୍ର ନିର୍ମାଣରେ ଯୁବପିଢ଼ିଙ୍କ ପରିବର୍ତ୍ତନକାରୀ ଭୂମିକା ଏବଂ ୨୦୪୭ ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ର କରିବା ଯାତ୍ରାକୁ ପ୍ରଦର୍ଶିତ କରିଥିଲା।

ଏହି ଅବସରରେ ବିଧାୟକ ଏବଂ ଗାୟିକା ଶ୍ରୀମତୀ ମୈଥିଳୀ ଠାକୁର, ଅଭିନେତା ଶ୍ରୀ ବିକ୍ରାନ୍ତ ମାସେ, ଉଦ୍ୟୋଗୀ ଶ୍ରୀ ଅମନ ଗୁପ୍ତା ଏବଂ ଭାରତୀୟ କ୍ରିକେଟର ଶ୍ରୀ ଜିତେଶ ଶର୍ମାଙ୍କ ସମେତ ବିଶିଷ୍ଟ ବ୍ୟକ୍ତିମାନେ 'ମୋ ଭାରତ' ଏନଏସ୍‌ଏସ୍‌ ସ୍ୱେଚ୍ଛାସେବୀଙ୍କ ସହ ଆଲୋଚନା କରିଥିଲେ ଏବଂ ସେମାନଙ୍କର ଅଭିଜ୍ଞତା ବାଣ୍ଟିଥିଲେ। ଏହା ସହିତ ଯୁବପିଢ଼ିଙ୍କୁ ଉତ୍କର୍ଷତା ହାସଲ କରିବାକୁ ଏବଂ ଜାତୀୟ ବିକାଶରେ ଅର୍ଥପୂର୍ଣ୍ଣ ଯୋଗଦାନ ଦେବାକୁ ପ୍ରେରଣା ଦେଇଥିଲେ। ୬,୦୦୦ରୁ ଅଧିକ ଯୁବକଯୁବତୀ ଯୋଗଦେଇଥିବା ଏହି ଯୁବ ସମ୍ମିଳନୀରେ ଦେଶବ୍ୟାପୀ ନିଆଯାଇଥିବା ପ୍ରମୁଖ ଯୁବ ସଂପର୍କ ପଦକ୍ଷେପଗୁଡ଼ିକୁ ପ୍ରଦର୍ଶିତ କରାଯାଇଥିଲା। 

ଦେଶର ୬୫ ପ୍ରତିଶତ ଜନସଂଖ୍ୟାଙ୍କ ବୟସ ୩୫ ବର୍ଷରୁ କମ ବୋଲି ଉଲ୍ଲେଖ କରି କେନ୍ଦ୍ରମନ୍ତ୍ରୀ ଡକ୍ଟର ମାଣ୍ଡଭୀୟ କହିଥିଲେ ଯେ ଭାରତର ଯୁବପିଢ଼ି ଦେଶର ସବୁଠାରୁ ବଡ଼ ଶକ୍ତି ଏବଂ ବିକଶିତ ଭାରତର ସ୍ୱପ୍ନକୁ ସାକାର କରିବାର କେନ୍ଦ୍ରରେ ଯୁବପିଢି ଅଛନ୍ତି। 

"ଯୁବକମାନେ ଆମର ଶକ୍ତି, ଆମର ଗର୍ବ, ଆମର ସଂକଳ୍ପ ଏବଂ ଆମର ଭବିଷ୍ୟତ। ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ, ଭାରତୀୟ ଯୁବପିଢିଙ୍କ ପାଇଁ ନବସୃଜନ, ଉତ୍କର୍ଷତା ହାସଲ ଏବଂ ଦେଶ ନିର୍ମାଣରେ ଯୋଗଦାନ ଦେବା ପାଇଁ ଅଭୂତପୂର୍ବ ସୁଯୋଗ ସୃଷ୍ଟି ହୋଇଛି। ଷ୍ଟାର୍ଟଅପ୍, କ୍ରୀଡା, ଜନସେବା, ଉଦ୍ୟୋଗ କିମ୍ବା ସୃଜନଶୀଳ କ୍ଷେତ୍ର ହେଉ, ଯୁବ ଭାରତୀୟମାନେ ସେମାନଙ୍କର ପ୍ରତିଭା ପ୍ରଦର୍ଶନ କରୁଛନ୍ତି ଏବଂ ବିଶ୍ୱ ସ୍ତରରେ ଦେଶକୁ ଗର୍ବିତ କରୁଛନ୍ତି," ସେ କହିଥିଲେ।

ଡକ୍ଟର ମାଣ୍ଡଭୀୟ ଯୁବପିଢ଼ିଙ୍କ ସାମର୍ଥ୍ୟକୁ ବିକଶିତ କରି ରାଷ୍ଟ୍ର ନିର୍ମାଣ ଦିଗରେ ବ୍ୟବହାର କରିବା ପାଇଁ 'ମାଇ ଭାରତ'ର ବିଭିନ୍ନ ପଦକ୍ଷେପ ଉପରେ ଆଲୋକପାତ କରିଥିଲେ। ସେ 'ମାଇ ଭାରତ'ର ଗିନିଜ୍ ବିଶ୍ୱ ରେକର୍ଡ ହାସଲକୁ ପ୍ରଶଂସା କରିଥିଲେ ଏବଂ ଯୁବପିଢ଼ିଙ୍କୁ ପ୍ଲାଟଫର୍ମର କାର୍ଯ୍ୟକ୍ରମ, ସ୍ୱେଚ୍ଛାସେବୀ ସୁଯୋଗ ଏବଂ ରାଷ୍ଟ୍ର ନିର୍ମାଣ ପଦକ୍ଷେପରେ ସକ୍ରିୟ ଭାବରେ ଅଂଶଗ୍ରହଣ କରିବାକୁ ଅନୁରୋଧ କରିଥିଲେ।

ଯୁବପିଢ଼ିଙ୍କୁ ସେମାନଙ୍କର ସାମର୍ଥ୍ୟକୁ ଚିହ୍ନିବା ଏବଂ ଉତ୍କର୍ଷତା ପାଇଁ ପ୍ରୟାସ କରିବାକୁ ଆହ୍ୱାନ କରି ଡକ୍ଟର ମାଣ୍ଡଭୀୟ କହିଥିଲେ, "ଏହା ଯୁବପିଢ଼ିଙ୍କ ସମୟ। ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏକ ବିକଶିତ ଭାରତ କଳ୍ପନା କରିଛନ୍ତି ଯାହା ଯୁବ ଭାରତୀୟଙ୍କ ଚିନ୍ତାଧାରା, ନବସୃଜନ ଏବଂ ଆକାଂକ୍ଷା ଦ୍ୱାରା ଗଢ଼ାଯିବ। ଏକାଠି ହୋଇ, ଆମ ସମସ୍ତଙ୍କୁ ଏକ ପ୍ରତିଯୋଗିତାକ୍ଷମ, ଆତ୍ମବିଶ୍ୱାସୀ ଏବଂ ସ୍ୱାବଲମ୍ବୀ ଭାରତ ନିର୍ମାଣ କରିବାକୁ ପଡିବ ଯାହା ୧୪୦ କୋଟି ନାଗରିକଙ୍କ ସ୍ୱପ୍ନ ପୂରଣ କରିବ।"

ଏହି ସମାବେଶକୁ ସମ୍ବୋଧିତ କରି ଦିଲ୍ଲୀ ମୁଖ୍ୟମନ୍ତ୍ରୀ ଶ୍ରମତୀ ରେଖା ଗୁପ୍ତା କହିଥିଲେ ଯେ ଭାରତର ଯୁବପିଢ଼ି ସେମାନଙ୍କର ପ୍ରତିଭା, ଦୃଢ଼ ସଂକଳ୍ପ ଏବଂ କଠିନ ପରିଶ୍ରମ ମାଧ୍ୟମରେ ଦେଶକୁ ନୂଆ ଉଚ୍ଚତାକୁ ନେଇଯିବାକୁ ପ୍ରସ୍ତୁତ।

ଦେଶ ନିର୍ମାଣରେ ଯୁବପିଢ଼ିଙ୍କ ପ୍ରମୁଖ ଭୂମିକା ଉପରେ ଗୁରୁତ୍ୱାରୋପ କରି ସେ ମନ୍ତବ୍ୟ ଦେଇଥିଲେ ଯେ ଭାରତର ଯୁବପିଢ଼ି ପରିଶ୍ରମୀ, ଦୂରଦୃଷ୍ଟିସମ୍ପନ୍ନ, ସୃଜନଶୀଳ ଏବଂ ସାହସୀ। ଯୁବ ଭାରତୀୟଙ୍କ ଦ୍ୱାରା ହାସଲ ହୋଇଥିବା ପ୍ରତ୍ୟେକ ସଫଳତା ଦେଶର ବିକଶିତ ଭାରତ ଅଭିମୁଖୀ ଯାତ୍ରାକୁ ସୁଦୃଢ଼ କରିଥାଏ। ଯେକୌଣସି କ୍ଷେତ୍ରରେ ଉତ୍କର୍ଷତା ଦୃଢ଼ ନିଶ୍ଚୟ, ଶୃଙ୍ଖଳା ଏବଂ ସମର୍ପଣ ଉପରେ ନିର୍ମିତ ବୋଲି ଉଲ୍ଲେଖ କରି ସେ କ୍ରୀଡ଼ା, ଉଦ୍ୟୋଗୀତା, କଣ୍ଟେଣ୍ଟ ତିଆରି, କଳା ଏବଂ ସାର୍ବଜନୀନ ସେବାରେ ଯୁବ ଭାରତୀୟଙ୍କ ସଫଳତାକୁ ପ୍ରଶଂସା କରିଥିଲେ।

ଏହି ଅବସରରେ ଅଭିନେତା ବିକ୍ରାନ୍ତ ମାସେ ମାନନୀୟ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତର କ୍ରିଏଟର୍‌ ଅର୍ଥନୀତିର ଉଲ୍ଲେଖନୀୟ ଅଭିବୃଦ୍ଧି ଉପରେ ଆଲୋକପାତ କରିଥିଲେ। ଏହା ସହିତ ସେ ଡିଜିଟାଲ୍ ସଶକ୍ତିକରଣ ଏବଂ ନବସୃଜନ ଦ୍ୱାରା ସୃଷ୍ଟି ହୋଇଥିବା ସୁଯୋଗ ଉପରେ ଗୁରୁତ୍ୱାରୋପ କରିଥିଲେ। ଉଦ୍ୟୋଗୀ ଅମନ ଗୁପ୍ତା ଉଦ୍ୟୋଗୀତା, ନବସୃଜନ ଏବଂ ଏକ ଅନୁକୂଳ ବ୍ୟବସାୟିକ ଇକୋସିଷ୍ଟମକୁ ପ୍ରୋତ୍ସାହିତ କରି ଭାରତକୁ ବିଶ୍ୱର ଷ୍ଟାର୍ଟଅପ୍ ରାଜଧାନୀ ଭାବରେ ପ୍ରତିଷ୍ଠା କରିବା ପାଇଁ ସରକାରଙ୍କ ପ୍ରୟାସ ବିଷୟରେ ଆଲୋକପାତ କରିଥିଲେ।

ସମ୍ମିଳନୀରେ ଭାରତୀୟ କ୍ରୀଡ଼ାରେ ଉଲ୍ଲେଖନୀୟ ସଫଳତା ଏବଂ ଅବଦାନକୁ ପାଳନ କରାଯିବା ସହ କିଛି ବିଶିଷ୍ଟ କ୍ରୀଡ଼ାବିତମାନଙ୍କୁ ସମ୍ମାନିତ କରାଯାଇଥିଲା। 

କ୍ରିକେଟର ଜିତେଶ ଶର୍ମା "ଭାରତରେ ଖେଳନ୍ତୁ, ଭାରତ ପାଇଁ ଖେଳନ୍ତୁ" ବିଷୟବସ୍ତୁ ଉପରେ ତାଙ୍କର ଅଭିଜ୍ଞତା ବାଣ୍ଟିଥିଲେ, ଯାହା ଯୁବ କ୍ରୀଡ଼ାବିତମାନଙ୍କୁ ଅନୁପ୍ରାଣିତ କରିଥିଲା। 

ଏହି ଅଧିବେଶନରେ ଯୁବ ବ୍ୟାପାର ସଚିବ ଶ୍ରୀମତୀ ପଲ୍ଲବୀ ଜୈନ ଗୋଭିଲ ରାଷ୍ଟ୍ର ନିର୍ମାଣରେ ଯୁବପିଢ଼ିଙ୍କୁ ନିରନ୍ତର ନିୟୋଜିତ ହେବା ଏବଂ ଯୁବ ନେତାମାନଙ୍କୁ ସଶକ୍ତ କରିବା ପାଇଁ ସରକାରଙ୍କ ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରିଥିଲେ।

'ମାଇ ଭାରତ ଯୁବ ସମ୍ମିଳନୀ' 'ବିକାଶିତ ଭାରତ ସଂକଳ୍ପ' ସହିତ ଶେଷ ହୋଇଥିଲା, ଯାହା ୨୦୪୭ ମସିହାରେ ସ୍ୱାଧୀନତାର ଶତବାର୍ଷିକୀ ବର୍ଷ ସୁଦ୍ଧା ଏକ ବିକଶିତ, ସ୍ୱାବଲମ୍ବୀ ଏବଂ ସମାବେଶୀ ଭାରତ ଗଠନ ଦିଗରେ ସକ୍ରିୟ ଭାବରେ ଯୋଗଦାନ ଦେବା ପାଇଁ ଯୁବ ନାଗରିକଙ୍କ ପ୍ରତିବଦ୍ଧତାକୁ ଦୋହରାଇଥିଲା।

TKM