তথ্য আৰু সম্প্ৰচাৰ মন্ত্ৰালয়
ৱেভছ অ’টিটিত ব্যৱহাৰকাৰীৰ সংখ্যা ১ কোটি অতিক্ৰম, ভাৰতৰ জনসেৱামূলক ডিজিটেল মিডিয়া পৰিৱেশত শক্তিশালী ভেটি স্থাপন
২৪,০০০ বিষয়বস্তু আৰু ১৪০টা লাইভ চেনেললৈ বিনামূলীয়া প্ৰৱেশাধিকাৰৰ সৈতে ৱেভছ অ’টিটি ভাৰতৰ সৰ্বাধিক বৈচিত্ৰ্যপূৰ্ণ জনসেৱামূলক ষ্ট্ৰীমিং গন্তব্যস্থল হিচাপে পৰিগণিত হৈছে
प्रविष्टि तिथि:
02 JUN 2026 6:52PM by PIB Guwahati
প্ৰসাৰ ভাৰতীৰ ডিজিটেল ষ্ট্ৰীমিং প্লেটফৰ্ম ৱেভছ অ’টিটিয়ে ২০২৪ চনৰ নৱেম্বৰ মাহত শুভাৰম্ভ হোৱাৰ দুবছৰো নৌহওঁতেই ১ কোটি (১০ মিলিয়ন) পঞ্জীয়নভুক্ত ব্যৱহাৰকাৰীৰ ঐতিহাসিক মাইলৰ খুঁটি অতিক্ৰম কৰিছে।
এই সাফল্যই ভাৰতৰ জনসেৱামূলক ডিজিটেল মিডিয়া পৰিৱেশৰ বিকাশত এক গুৰুত্বপূৰ্ণ পদক্ষেপৰ সূচনা কৰিছে আৰু দেশ-বিদেশৰ দৰ্শকৰ মাজত নিৰ্ভৰযোগ্য, অন্তৰ্ভুক্তিমূলক আৰু বৈচিত্ৰ্যপূৰ্ণ বিষয়বস্তু আগবঢ়োৱা স্বদেশী ডিজিটেল প্লেটফৰ্মসমূহৰ ক্ৰমবৰ্ধমান গ্ৰহণযোগ্যতাৰ প্ৰতিফলন ঘটাইছে।
বৰ্তমান ৱেভছ অ’টিটিত মনোৰঞ্জন, বাতৰি, শিক্ষা, সংস্কৃতি, আধ্যাত্মিকতা আৰু জনসেৱামূলক বিভিন্ন শাখাৰ ২৪ হাজাৰতকৈ অধিক বিষয়বস্তু শীৰ্ষক আৰু ১৫ হাজাৰ ঘণ্টাতকৈ অধিক বিষয়বস্তু সন্নিবিষ্ট হৈ আছে। প্লেটফৰ্মটোৱে ১৪০টাতকৈ অধিক লাইভ টেলিভিছন চেনেল, ২০০টাতকৈ অধিক ৰেডিঅ’ সেৱা, লাইভ অনুষ্ঠানৰ ষ্ট্ৰীমিং, পিএম ই-বিদ্যা চেনেলসমূহৰ জৰিয়তে শিক্ষামূলক বিষয়বস্তু, যোজনা, কুৰুক্ষেত্ৰ আৰু ৰোজগাৰ সংবাদ-ৰ ডিজিটেল সংস্কৰণ, বিশিষ্ট মন্দিৰসমূহৰ ভক্তিমূলক লাইভ ষ্ট্ৰীম, লগতে প্ৰসাৰ ভাৰতীৰ সংৰক্ষিত আভিলেখীয় বিষয়বস্তুৰ হাজাৰ হাজাৰ ঘণ্টাৰ সমাহাৰ আগবঢ়াইছে।
ম’বাইল, ৱেব আৰু সংযুক্ত টেলিভিছন ডিভাইচসমূহত উপলব্ধ ৱেভছ অ’টিটিয়ে এতিয়া ১৩০খনতকৈ অধিক দেশৰ দৰ্শকৰ ওচৰ চাপিবলৈ সক্ষম হৈছে। একাধিক ভাৰতীয় ভাষাত বিষয়বস্তু উপলব্ধ কৰাৰ লগতে ই জনস্বাৰ্থমূলক আৰু মনোৰঞ্জনধৰ্মী বিস্তৃত কাৰ্যসূচীসমূহলৈ বিনামূলীয়া প্ৰৱেশাধিকাৰ প্ৰদান কৰি আহিছে।
এই মাইলৰ খুঁটি সম্পৰ্কে মন্তব্য প্ৰকাশ কৰি প্ৰসাৰ ভাৰতীয়ে কয় যে, এই সাফল্যই ডিজিটেল যুগত জনসেৱামূলক ডিজিটেল মিডিয়াৰ ক্ৰমবৰ্ধমান প্ৰাসংগিকতাক প্ৰতিফলিত কৰাৰ লগতে টেলিভিছন, ৰেডিঅ’, চাহিদা অনুসৰি উপলব্ধ বিষয়বস্তু, শিক্ষা, সংস্কৃতি আৰু ঐতিহ্যক একক প্লেটফৰ্মত একত্ৰিত কৰাৰ দৃষ্টিভংগীকো সাৰ্থকতা প্ৰদান কৰিছে।
বিষয়বস্তুৰ পৰিসৰ ধাৰাবাহিকভাৱে সম্প্ৰসাৰণ, কৌশলগত ডিজিটেল অংশীদাৰিত্ব, অধিক সংখ্যক ডিভাইচত উপলব্ধতা আৰু উন্নত ব্যৱহাৰকাৰী অভিজ্ঞতাৰ জৰিয়তে প্লেটফৰ্মটোৱে সুস্থিৰ বিকাশ লাভ কৰিছে। ভক্তিমূলক লাইভ ষ্ট্ৰীম, শিক্ষামূলক বিষয়বস্তু, ডিজিটেল প্ৰকাশন, আভিলেখীয় সংগ্ৰহ আৰু লাইভ অনুষ্ঠানৰ কভাৰেজ আদি সাম্প্ৰতিক সংযোজনসমূহে দৰ্শকৰ অংশগ্ৰহণ অধিক শক্তিশালী কৰি তুলিছে।
১ কোটিতকৈ অধিক পঞ্জীয়নভুক্ত ব্যৱহাৰকাৰী আৰু ১.৪ কোটিতকৈ অধিক ডাউনলোডৰ সৈতে ৱেভছ অ’টিটিয়ে এতিয়া ইয়াৰ পৰৱৰ্তী বিকাশ পৰ্যায়ত গুৰুত্ব আৰোপ কৰিছে। ইয়াৰ অন্তৰ্গত হৈছে বিষয়বস্তু অংশীদাৰিত্বৰ সম্প্ৰসাৰণ, অধিক ডিভাইচ আৰু প্লেটফৰ্মত বিতৰণ ব্যৱস্থা বিস্তাৰ, আঞ্চলিক আৰু শিক্ষামূলক বিষয়বস্তুৰ পৰিসৰ অধিক শক্তিশালী কৰা, আৰু ২০২৭ চনৰ মাৰ্চ মাহৰ ভিতৰত ২ কোটি পঞ্জীয়নভুক্ত ব্যৱহাৰকাৰীৰ লক্ষ্যত উপনীত হোৱা।
এই মাইলৰ খুঁটিয়ে ৱেভছ অ’টিটিৰ ভাৰতৰ দ্ৰুততম বিকাশশীল জনসেৱামূলক ষ্ট্ৰীমিং প্লেটফৰ্ম হিচাপে স্থান অধিক সুদৃঢ় কৰাৰ লগতে ভাৰতৰ সংস্কৃতি, জ্ঞান, ঐতিহ্য আৰু সৃষ্টিশীলতাক ডিজিটেল মাধ্যমত বিশ্বৰ আগত উপস্থাপন কৰাৰ ক্ষেত্ৰত ইয়াৰ ভূমিকাক পুনৰ প্ৰতিষ্ঠা কৰিছে।
*****
Mahesh Kumar/ Aparajita Priyadarshini/AA
(रिलीज़ आईडी: 2268132)
आगंतुक पटल : 12