نائب صدر جمہوریہ ہند جناب سی پی رادھا کرشنن نے آج بنگلورو میں آرٹ آف لیونگ فاؤنڈیشن کی 45 ویں سالگرہ کی عالمی تقریبات میں شرکت کی اور دنیا بھر میں امن ، ہم آہنگی ، خدمت اور روحانی بیداری کی اقدار کو پھیلانے کے لیے تنظیم کی تعریف کی ۔

اجتماع سے خطاب کرتے ہوئے نائب صدرِ جمہوریہ نے کہا کہ آرٹ آف لیونگ فاؤنڈیشن کی تحریک نے براعظموں، ثقافتوں اور نسلوں میں لاکھوں زندگیوں کو متاثر کیا ہے۔ انہوں نے تنظیم کے عالمی دائرہ کار کو سراہتے ہوئے کہا کہ آرٹ آف لیونگ کے مراکز تقریباً 180 ممالک میں قائم ہیں۔

نائب صدرِ جمہوریہ نے کہا کہ یہ تحریک، جو ساڑھے چار دہائیاں قبل اس اصول پر قائم کی گئی تھی کہ اندرونی امن بیرونی ہم آہنگی کی بنیاد ہے، آج ایک بڑی انسانی و روحانی قوت کی شکل اختیار کر چکی ہے جو ہمدردی، حوصلے اور مسرت کو فروغ دے رہی ہے۔

عقیدت کے گہرے مفہوم پر روشنی ڈالتے ہوئے نائب صدرِ جمہوریہ نے کہا کہ بھکتی صرف عبادت یا عقیدت کا نام نہیں بلکہ یہ اپنے آپ، خاندان، معاشرے، قوم اور انسانیت کے لیے مکمل وابستگی ہے۔ انہوں نے مزید کہا کہ روحانیت انسانوں کو دوسروں کے ساتھ پُرامن زندگی گزارنے کا درس دیتی ہے اور زندگی کو بامقصد اور بامعنی بناتی ہے۔

گرو دیو شری شری روی شنکر کی تعریف کرتے ہوئے نائب صدرِ جمہوریہ نے کہا کہ ایک ایسے دور میں جہاں تنازعات اور غیر یقینی کی کیفیت پائی جاتی ہے، گرو دیو حکمت، بیداری، امن اور ہم آہنگی کی اقدار کے ذریعے انسانیت کو مسلسل متاثر کر رہے ہیں۔ انہوں نے کہا کہ گرو دیو کی سادگی، عاجزی اور ہمدردی نے دنیا بھر میں لاکھوں افراد کی زندگیوں کو متاثر کیاہے۔

نائب صدرِ جمہوریہ نے کہا کہ مراقبہ، خدمت، تعلیم، دیہی ترقی، ماحولیاتی اقدامات اور بین المذاہب مکالمے کے ذریعےآرٹ آف لیونگ فاؤنڈیشن نے یہ ثابت کیا ہے کہ روحانیت سماجی تبدیلی میں اہم کردار ادا کر سکتی ہے۔ انہوں نے مراقبہ اور یکسوئی کی اہمیت پر زور دیتے ہوئے کہا کہ مرکوز ذہن غیر معمولی کارنامے انجام دینے کی صلاحیت رکھتا ہے۔

نائب صدرِ جمہوریہ نے کہا کہ گرو دیو نے معاشرے کے سامنے ایک ایسا قابلِ تقلید نمونہ پیش کیا ہے جس میں نوجوان قدیم اور جدید دونوں ورثے کو ساتھ لے کر چل سکتے ہیں۔ انہوں نے اس بات کی نشاندہی کی کہ جدیدیت اور قدیم تہذیبی ورثہ ایک دوسرے کے لیے تکمیلی حیثیت رکھتے ہیں اور آرٹ آف لیونگ فاؤنڈیشن کی خدمت پر مبنی سرگرمیوں میں نوجوانوں کی بڑھتی ہوئی شرکت کو سراہنا کی۔

راک ستسنگ اور بھجن کلبنگ جیسے اقدامات کا حوالہ دیتے ہوئے نائب صدرِ جمہوریہ نے کہا کہ یہ کوششیں بھارت کی قدیم حکمت و دانائی کی روایات کو جدید انداز میں دوبارہ زندہ کر رہی ہیں، جو دنیا بھر میں نوجوان نسل کے ساتھ ہم آہنگ ہو رہی ہیں۔

نائب صدر جمہوریہ نے منشیات سے پاک ہندوستان کے لیے آرٹ آف لیونگ فاؤنڈیشن کی مہم کی بھی تعریف کی اور اس بات پر زور دیا کہ نوجوان ذہنوں کو نقصان دہ لت کے بجائے خود پر قابو اور مثبت اقدار سے رہنمائی کرنی چاہیے ۔

بھارت کی بڑھتی ہوئی عالمی حیثیت کو اجاگر کرتے ہوئے نائب صدرِ جمہوریہ نے کہا کہ ملک آج تاریخ کے ایک منفرد موڑ پر کھڑا ہے، جہاں وہ پراعتماد، بلند عزائم کا حامل اور عالمی سطح پر قائدانہ کردار ادا کر رہا ہے۔ انہوں نے کہا کہ وزیر اعظم جناب نریندر مودی کا تہذیبی حکمت، یوگا، فلاح و بہبود، پائیداری اور ‘‘واسودھیو کٹمبکم’’ پر زور آرٹ آف لیونگ فاؤنڈیشن کے فروغ پانے والے اقدار کے ساتھ گہری ہم آہنگی رکھتا ہے۔

تحریک کے رضاکاروں کی تعریف کرتے ہوئے نائب صدرِ جمہوریہ نے انہیں ‘‘خدمت کے خاموش معمار’’ قرار دیا جنہوں نے اس مشن کو دنیا کے ہر گوشے تک پہنچایا ہے۔ انہوں نے کہا کہ ایک فرد میں مثبت تبدیلی لانا نہ صرف ایک خاندان کو بااختیار بناتا ہے بلکہ بالآخر پوری کمیونٹی کو مضبوط کرتا ہے۔

نائب صدرِ جمہوریہ نے آرٹ آف لیونگ فاؤنڈیشن کے کیمپس میں واقع گنپتی مندر میں بھی پوجا کی اور آرٹ آف لیونگ فاؤنڈیشن کے یادگاری ڈاک ٹکٹ کا اجرا کیا۔

کرناٹک کے گورنر جناب تھاور چند گہلوت ، گرودیو سری سری روی شنکر ، آرٹ آف لیونگ فاؤنڈیشن کے ممبران ، ہندوستان اور بیرون ملک سے معززین ، اور ہزاروں عقیدت مند اور رضاکار اس موقع پر موجود تھے ۔

*****

(ش ح-ش آ-اش ق)

U-7701