2016 میں نافذ ہونے والے دیوالیہ پن اور دیوالیہ پن کوڈ (آئی بی سی) نے آج اپنے قیام کے 10 سال مکمل کر لیے ہیں۔ اس کے نفاذ کے ایک دہائی بعد، یہ ضابطہ نہ صرف ایک قانون سازی اصلاح کے طور پر بلکہ کریڈٹ مارکیٹوں، کارپوریٹ طرزِ عمل، سرمایہ کاروں کے اعتماد اور معاشی کارکردگی پر دور رس اثرات مرتب کرنے والی ایک ادارہ جاتی تبدیلی کے طور پر ابھرا ہے۔

اس ضابطے کو، جسے ایک اہم اصلاحی اقدام کے طور پر سراہا گیا، ملک میں بکھرے ہوئے دیوالیہ پن کے فریم ورک کو مستحکم اور جدید بنانے کے مقصد سے نافذ کیا گیا تھا۔ اس کے نفاذ سے وصولی کے طریقۂ کار میں بہتری آئی، ذمہ دارانہ قرض لینے اور قرض دینے کے رویّوں کی حوصلہ افزائی ہوئی، اور ہندوستان کے مالیاتی و قانونی نظام پر اعتماد مضبوط ہوا ہے۔

یہ اس حقیقت سے واضح ہوتا ہے کہ مارچ 2026 تک 1,419 معاملات میں ریزولیوشن پلان منظور کیے جا چکے تھے۔ اس عمل کے ذریعے قرض دہندگان کے لیے 4 لاکھ کروڑ روپے سے زیادہ کی وصولی ممکن ہوئی۔ یہ وصولی بالترتیب منصفانہ قدر اور لیکویڈیشن ویلیو کے مقابلے میں تقریباً 95 فیصد اور 167 فیصد رہی۔

آج اس ضابطے کے گرد تشکیل پانے والی فقہ نے ایک مضبوط اور متحرک دیوالیہ ماحولیاتی نظام کی ترقی میں اہم کردار ادا کیا ہے، جو ابھرتی ہوئی معاشی حقیقتوں اور مختلف اسٹیک ہولڈرز کی توقعات کے مطابق مسلسل خود کو ڈھالتا جا رہا ہے۔

مارچ 2026 تک مجموعی طور پر 8,987 معاملات دائر کیے گئے، جن میں سے 7,102 بند ہو چکے ہیں۔ ان بند شدہ معاملات میں تقریباً 58 فیصد، یعنی 4,099 کمپنیاں، کامیابی کے ساتھ بچا لی گئیں، جبکہ مزید 3,003 معاملات لیکویڈیشن پر ختم ہوئے۔

بچائے گئے اداروں میں سے 1,388 معاملات اپیل، نظرثانی یا تصفیے کی بنیاد پر بند کیے گئے، جبکہ 1,292 معاملات واپس لے لیے گئے۔

خاص طور پر، ریزولیوشن پلان کے ذریعے ختم ہونے والے تقریباً 42 فیصد معاملات اس سے قبل بورڈ برائے صنعتی و مالیاتی تعمیرِ نو کے پاس زیرِ غور تھے یا وہیں ختم ہوئے تھے، جو مالی مشکلات سے دوچار کاروباری اداروں کی بحالی میں کوڈ کے مؤثر کردار کو ظاہر کرتا ہے۔

کوڈ نے کریڈٹ نظم و ضبط کو فروغ دینے اور قرض لینے والوں میں ادائیگی کے کلچر کو مضبوط بنانے میں بھی نمایاں کردار ادا کیا ہے۔

ضابطے کے روک تھام کے اثرات اس حقیقت سے بھی ظاہر ہوتے ہیں کہ نیشنل کمپنی لا ٹریبونل کے سامنے دائر 30,000 سے زائد معاملات داخلے سے پہلے ہی تصفیے کے ذریعے نمٹا دیے گئے، جن میں تقریباً 14 لاکھ کروڑ روپے کی رقم شامل تھی۔ یہ تصفیے اس بات کی عکاسی کرتے ہیں کہ ضابطے نے باضابطہ دیوالیہ کارروائی سے باہر مالی دباؤ کے بروقت حل کی حوصلہ افزائی کرتے ہوئے قرض دہندگان اور قرض لینے والوں کے تعلقات کو کس حد تک تبدیل کیا ہے۔

اہم بات یہ ہے کہ اگر ایسے تصفیے اور انخلا نہ ہوتے تو بینکاری شعبے کا مجموعی غیر کارکرد اثاثہ تناسب ستمبر 2025 تک رپورٹ کردہ 2.1 فیصد کے مقابلے میں کہیں زیادہ ہوتا، جو 2017 میں تقریباً 11.8 فیصد تھا، جیسا کہ ریزرو بینک آف انڈیا کی “ہندوستان میں بینکاری کے رجحانات اور پیش رفت” رپورٹ میں بتایا گیا ہے۔

ہندوستان کے دیوالیہ نظام نے بہتر وصولی کے نتائج، تیز تر ریزولیوشن ٹائم لائنز، اور قرض دہندگان کو زیادہ اختیارات دینے کے ذریعے مزید مضبوطی حاصل کی ہے۔ ایس اینڈ پی گلوبل ریٹنگز نے گھریلو ریزولیوشن اور وصولی کے ماحولیاتی نظام کی بہتر کارکردگی کو تسلیم کرتے ہوئے ہندوستان کے دیوالیہ فریم ورک کو “گروپ سی” سے “گروپ بی” میں اپ گریڈ کیا۔

آئی بی سی سے پہلے اوسط وصولی کی شرح تقریباً 15 سے 20 فیصد تھی، جو آئی بی سی کے بعد بڑھ کر تقریباً 30 فیصد ہو گئی، جبکہ ریزولیوشن کی مدت تقریباً 6 سے 8 سال سے کم ہو کر اوسطاً تقریباً 2 سال رہ گئی ہے۔

کوڈ کی مسلسل مؤثریت ریزرو بینک آف انڈیا کی “ہندوستان میں بینکاری کے رجحانات اور پیش رفت 2024-25” رپورٹ میں بھی نمایاں ہے، جس میں آئی بی سی کو دباؤ والے اثاثوں کی وصولی کے لیے سب سے مؤثر طریقۂ کار قرار دیا گیا ہے۔ شیڈیولڈ کمرشل بینکوں کی جانب سے مختلف ذرائع کے ذریعے حاصل کی گئی 1.04 لاکھ کروڑ روپے کی مجموعی وصولی میں سے تقریباً 0.54 لاکھ کروڑ روپے، یعنی تقریباً 52.4 فیصد، آئی بی سی کے عمل کے ذریعے حاصل ہوئے۔

رپورٹ میں مزید کہا گیا ہے کہ آئی بی سی کے تحت وصولی کی شرح پچھلے سال کے 28.3 فیصد سے بہتر ہو کر 2024-25 میں 36.6 فیصد ہوگئی، جس سے دباؤ والے اثاثوں سے نمٹنے میں دیوالیہ فریم ورک کی بڑھتی ہوئی تاثیر اجاگر ہوئی اور مجموعی غیر کارکردگی والے اثاثوں میں کمی میں مدد ملی۔

آئی آئی ایم بنگلور کے ایک مطالعے میں اس کے رویّاتی اثرات کے تحت آئی بی سی کے نفاذ کے بعد کریڈٹ رویّے میں نمایاں بہتری دیکھی گئی ہے۔ خاص طور پر، 2018 اور 2024 کے درمیان ’اوورڈیو‘ سے ’نارمل‘ زمرے میں منتقل ہونے والے قرض کھاتوں کا تناسب مسلسل بڑھا ہے، جو قرض لینے والوں کے بہتر مالی نظم و ضبط کی عکاسی کرتا ہے۔

اس رویّاتی تبدیلی کی عکاسی اوسط دنوں کی تعداد میں نمایاں کمی سے بھی ہوتی ہے، جن کے دوران کوئی کھاتہ بقایا رہتا تھا، جو 248-344 دن سے کم ہو کر 30-87 دن رہ گئی۔

انڈین انسٹی ٹیوٹ آف مینجمنٹ احمد آباد (2025) کی جانب سے آئی بی سی کے تحت حل شدہ فرموں پر کیے گئے ایک مطالعے میں حل کے بعد پانچ سالہ مدت کے دوران کلیدی آپریشنل اور مالیاتی اشاریوں میں خاطر خواہ بہتری کے ساتھ کاروباروں کی نمایاں بحالی کو اجاگر کیا گیا ہے۔

حل شدہ فرموں کی اوسط فروخت میں تقریباً 89 فیصد اضافہ ہوا، جبکہ اثاثوں کے کاروبار کے تناسب میں تقریباً 131 فیصد اضافہ دیکھا گیا، جو آپریشنل کارکردگی اور کاروباری بحالی میں بہتری کی نشاندہی کرتا ہے۔ پانچ برسوں میں اوسط سرمائے کے اخراجات میں تقریباً 106 فیصد اضافہ ہوا، جو تجدید شدہ سرمایہ کاری اور معاشی استحکام کی عکاسی کرتا ہے۔

مطالعے میں مزید کہا گیا ہے کہ حل شدہ درج شدہ اداروں کی مجموعی مارکیٹ ویلیو میں نمایاں اضافہ ہوا ہے، جو پانچ سالوں میں تقریباً 2.8 لاکھ کروڑ روپے سے بڑھ کر تقریباً 9 لاکھ کروڑ روپے تک پہنچ گئی، جو سرمایہ کاروں کے اعتماد میں اضافے اور کامیاب حل کے بعد طویل مدتی ترقی کے امکانات کو بہتر بنانے کا اشارہ ہے۔

جب 2016 میں آئی بی سی کا آغاز ہوا تو اس نے ایسے دور سے آگے بڑھنے کا وعدہ کیا، جس میں انٹرپرائز ویلیو میں نمایاں کمی واقع ہوتی تھی، جہاں کئی سالوں تک جاری رہنے والی تاخیر کے نتیجے میں اثاثے ٹکڑوں میں فروخت کیے جاتے تھے اور جاری کاروباری حیثیت برقرار رکھنے کے لیے کی گئی سرمایہ کاری کو بہت کم یا کوئی اہمیت نہیں دی جاتی تھی، جس کے باعث اکثر قرض دہندگان کو اپنی رقم کا صرف ایک معمولی حصہ ہی واپس مل پاتا تھا۔

اس کے جواب میں، ضابطۂ دیوالیہ پن نے مالی بحران اور دیوالیہ پن کے حل کے لیے ایک مربوط، قرض دہندگان پر مبنی اور مقررہ وقت کے اندر مکمل ہونے والا طریقۂ کار متعارف کرانے کی کوشش کی، جس میں کارکردگی، کارپوریٹ بحالی اور قدر میں زیادہ سے زیادہ اضافے پر زور دیا گیا۔ اس طرح اس نے ہندوستانی معیشت میں قرض، کاروبار اور جوابدہی کے باہمی تعلق کو بنیادی طور پر نئی سمت دی۔

آئی بی سی کے دس سال مکمل ہونا عکاسی، جائزے اور نئے تصور کے لیے ایک اہم موقع فراہم کرتا ہے۔ یہ ہندوستان کے مالیاتی اور ادارہ جاتی منظرنامے پر دیوالیہ پن کے فریم ورک کے تبدیلی لانے والے اثرات پر سنجیدہ غور و فکر کی دعوت دیتا ہے، جبکہ ایک پختہ دیوالیہ نظام کے ساتھ آنے والے چیلنجوں پر تعمیری انداز میں غور کرنے کی بھی حوصلہ افزائی کرتا ہے۔

جیسے جیسے ہندوستان ’وکست بھارت 2047‘ کے وژن کی جانب پیش قدمی کر رہا ہے، ایک مؤثر اور مضبوط دیوالیہ نظام کا مسلسل ارتقا صنعت کاری کو برقرار رکھنے، پیداواری سرمائے کے تحفظ، مالی استحکام کو مستحکم کرنے اور ذمہ دارانہ اقتصادی ترقی کو فروغ دینے کے لیے ناگزیر رہے گا۔

***

(ش ح۔اس ک  )

UR-7666