2016ರಲ್ಲಿ ಜಾರಿಗೆ ಬಂದ ದಿವಾಳಿತನ ಮತ್ತು ದಿವಾಳಿತನ ಸಂಹಿತೆ (The Insolvency and Bankruptcy Code - ಐಬಿಸಿ) ಇಂದು ತನ್ನ ಅಸ್ತಿತ್ವದ 10 ವರ್ಷಗಳನ್ನು ಪೂರ್ಣಗೊಳಿಸಿದೆ. ಇದು ಜಾರಿಗೆ ಬಂದು ಒಂದು ದಶಕ ಕಳೆದಿದ್ದು, ಈ ಸಂಹಿತೆಯು ಕೇವಲ ಶಾಸಕಾಂಗ ಸುಧಾರಣೆಯಾಗಿ ಮಾತ್ರವಲ್ಲದೆ, ಸಾಲದ ಮಾರುಕಟ್ಟೆಗಳು, ಕಾರ್ಪೊರೇಟ್ ನಡವಳಿಕೆ, ಹೂಡಿಕೆದಾರರ ವಿಶ್ವಾಸ ಮತ್ತು ಆರ್ಥಿಕ ದಕ್ಷತೆಯ ಮೇಲೆ ದೂರಗಾಮಿ ಪರಿಣಾಮಗಳನ್ನು ಬೀರಿರುವ ಒಂದು ಸಾಂಸ್ಥಿಕ ಪರಿವರ್ತನೆಯಾಗಿ ಹೊರಹೊಮ್ಮಿದೆ.

ದೇಶದ ಚದುರಿಹೋಗಿದ್ದ ದಿವಾಳಿತನ ಚೌಕಟ್ಟನ್ನು ಕ್ರೋಡೀಕರಿಸುವ ಮತ್ತು ಆಧುನೀಕರಿಸುವ ಉದ್ದೇಶದಿಂದ ಜಾರಿಗೆ ತರಲಾದ ಈ ಸಂಹಿತೆಯನ್ನು ಒಂದು ಮಹತ್ವದ ಸುಧಾರಣೆ ಎಂದು ಆಚರಿಸಲಾಗುತ್ತದೆ. ಇದರ ಅನುಷ್ಠಾನವು ವಸೂಲಾತಿ ಕಾರ್ಯವಿಧಾನಗಳನ್ನು ಸುಧಾರಿಸಿದೆ, ಜವಾಬ್ದಾರಿಯುತ ಸಾಲ ನೀಡಿಕೆ ಮತ್ತು ಪಾವತಿ ಪದ್ಧತಿಗಳನ್ನು ಉತ್ತೇಜಿಸಿದೆ ಹಾಗೂ ಭಾರತದ ಹಣಕಾಸು ಮತ್ತು ಕಾನೂನು ವ್ಯವಸ್ಥೆಗಳ ಮೇಲಿನ ವಿಶ್ವಾಸವನ್ನು ಬಲಪಡಿಸಿದೆ.

ಮಾರ್ಚ್ 2026 ರ ಹೊತ್ತಿಗೆ 1,419 ಪ್ರಕರಣಗಳು ಪರಿಹಾರ ಯೋಜನೆಗಳನ್ನು ಕಂಡುಕೊಂಡಿವೆ ಎಂಬ ಅಂಶದಿಂದ ಇದು ಸ್ಪಷ್ಟವಾಗುತ್ತದೆ. ಈ ಪರಿಹಾರ ಪ್ರಕ್ರಿಯೆಯು ಸಾಲದಾತರಿಗೆ ₹4 ಲಕ್ಷ ಕೋಟಿಗೂ ಹೆಚ್ಚು ಮೊತ್ತವನ್ನು ವಸೂಲಿ ಮಾಡಲು ಅನುವು ಮಾಡಿಕೊಟ್ಟಿದೆ. ಸಾಲದಾತರಿಗೆ ಆಗಿರುವ ಈ ವಸೂಲಾತಿಯು ಅವರ ನ್ಯಾಯೋಚಿತ ಮೌಲ್ಯ  ಮತ್ತು ದಿವಾಳಿ ಮೌಲ್ಯಕ್ಕೆ   ಹೋಲಿಸಿದರೆ ಕ್ರಮವಾಗಿ ಶೇ. 95 ಮತ್ತು ಶೇ. 167 ರಷ್ಟಿದೆ.

ಇಂದು, ಈ ಸಂಹಿತೆಯ ಸುತ್ತ ವಿಕಸನಗೊಳ್ಳುತ್ತಿರುವ ನ್ಯಾಯಶಾಸ್ತ್ರವು ಉದಯೋನ್ಮುಖ ಆರ್ಥಿಕ ವಾಸ್ತವತೆಗಳು ಮತ್ತು ಪಾಲುದಾರರ ನಿರೀಕ್ಷೆಗಳಿಗೆ ತಕ್ಕಂತೆ ಹೊಂದಿಕೊಳ್ಳುವ ಶಕ್ತಿಯುತ ಮತ್ತು ಕ್ರಿಯಾತ್ಮಕ ದಿವಾಳಿತನ ಪರಿಸರ ವ್ಯವಸ್ಥೆಯ ಅಭಿವೃದ್ಧಿಗೆ ಕೊಡುಗೆ ನೀಡಿದೆ.

ಮಾರ್ಚ್ 2026 ರವರೆಗೆ ಒಟ್ಟು 8,987 ಪ್ರಕರಣಗಳನ್ನು ದಾಖಲಿಸಿಕೊಳ್ಳಲಾಗಿದ್ದು, ಅವುಗಳಲ್ಲಿ 7,102 ಪ್ರಕರಣಗಳು ಮುಕ್ತಾಯ ಹಂತವನ್ನು ತಲುಪಿವೆ. ಈ ಮುಚ್ಚಲ್ಪಟ್ಟ ಪ್ರಕರಣಗಳಲ್ಲಿ, 4,099 ಕಂಪನಿಗಳನ್ನು — ಅಂದರೆ ಈ ಮುಕ್ತಾಯಗಳ ಸುಮಾರು ಶೇ. 58 ರಷ್ಟನ್ನು ಯಶಸ್ವಿಯಾಗಿ ರಕ್ಷಿಸಲ್ಪಟ್ಟಿದ್ದರೆ, ಇನ್ನುಳಿದ 3,003 ಪ್ರಕರಣಗಳು ದಿವಾಳಿತನದಲ್ಲಿ  ಕೊನೆಗೊಂಡಿವೆ.

ರಕ್ಷಿಸಲ್ಪಟ್ಟ ಘಟಕ ಅಥವಾ ಸಂಸ್ಥೆಗಳ ಪೈಕಿ, 1,388 ಪ್ರಕರಣಗಳನ್ನು ಮೇಲ್ಮನವಿ, ಮರುಪರಿಶೀಲನೆ ಅಥವಾ ರಾಜಿ ಸಂಧಾನದ ಕಾರಣದಿಂದಾಗಿ ಮುಚ್ಚಲಾಗಿದೆ; 1,292 ಪ್ರಕರಣಗಳನ್ನು ಹಿಂಪಡೆಯಲಾಗಿದೆ.

ಗಮನಾರ್ಹವಾಗಿ, ಪರಿಹಾರ ಯೋಜನೆಗಳೊಂದಿಗೆ ಕೊನೆಗೊಂಡ ಪ್ರಕರಣಗಳಲ್ಲಿ ಸುಮಾರು 42% ರಷ್ಟು ಪ್ರಕರಣಗಳು ಈ ಹಿಂದೆ ಕೈಗಾರಿಕಾ ಮತ್ತು ಹಣಕಾಸು ಪುನರ್ನಿರ್ಮಾಣ ಮಂಡಳಿಯಲ್ಲಿದ್ದವು ಅಥವಾ ನಿಷ್ಕ್ರಿಯವಾಗಿದ್ದವು. ಇದು ಆರ್ಥಿಕ ಸಂಕಷ್ಟದಲ್ಲಿರುವ ಉದ್ಯಮಗಳ ಪುನಶ್ಚೇತನವನ್ನು ಸುಗಮಗೊಳಿಸುವಲ್ಲಿ ಈ ಸಂಹಿತೆಯ ಪಾತ್ರವನ್ನು ಎತ್ತಿ ತೋರಿಸುತ್ತದೆ.

ಸಾಲಗಾರರಲ್ಲಿ ಸಾಲದ ಶಿಸ್ತನ್ನು ಬೆಳೆಸುವಲ್ಲಿ ಮತ್ತು ಮರುಪಾವತಿ ಸಂಸ್ಕೃತಿಯನ್ನು ಬಲಪಡಿಸುವಲ್ಲಿಯೂ ಈ ಸಂಹಿತೆಯು ಮಹತ್ವದ ಪಾತ್ರ ವಹಿಸಿದೆ.

ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿ ಮುಂದೆ ದಾಖಲಾಗಿದ್ದ 30,000 ಕ್ಕೂ ಹೆಚ್ಚು ಪ್ರಕರಣಗಳು, ದಾಖಲಾತಿಪೂರ್ವ ಹಂತದಲ್ಲೇ ಹಿಂಪಡೆಯುವಿಕೆಗಳ ಮೂಲಕ ಬಗೆಹರಿದಿರುವುದು ಈ ಸಂಹಿತೆಯ ನಿವಾರಕ ಪರಿಣಾಮಕ್ಕೆ  ಸಾಕ್ಷಿಯಾಗಿದೆ. ಇದರಲ್ಲಿ ಅಂದಾಜು ₹14 ಲಕ್ಷ ಕೋಟಿ ಮೊತ್ತ ಸೇರಿದೆ. ಈ ಇತ್ಯರ್ಥಗಳು, ಔಪಚಾರಿಕ ದಿವಾಳಿತನ ಪ್ರಕ್ರಿಯೆಗಳ ಹೊರಗಡೆಯೇ ಹಣಕಾಸಿನ ಒತ್ತಡವನ್ನು ಸಕಾಲದಲ್ಲಿ ಪರಿಹರಿಸಿಕೊಳ್ಳಲು ಪ್ರೋತ್ಸಾಹಿಸುವ ಮೂಲಕ ಸಾಲಗಾರ-ಸಾಲದಾತರ ನಡುವಿನ ಸಂಬಂಧದ ಗತಿಯನ್ನು ಸಂಹಿತೆಯು ಎಷ್ಟರ ಮಟ್ಟಿಗೆ ಬದಲಾಯಿಸಿದೆ ಎಂಬುದನ್ನು ತೋರಿಸುತ್ತವೆ.

ಮುಖ್ಯವಾಗಿ, ಇಂತಹ ಇತ್ಯರ್ಥಗಳು ಮತ್ತು ಹಿಂಪಡೆಯುವಿಕೆಗಳು ಇಲ್ಲದಿದ್ದರೆ, ಬ್ಯಾಂಕಿಂಗ್ ವಲಯದ ಒಟ್ಟು ಅನುತ್ಪಾದಕ ಆಸ್ತಿ (ಎನ್ ಪಿ ಎ) ಅನುಪಾತವು ಸೆಪ್ಟೆಂಬರ್ 2025 ರಲ್ಲಿ ವರದಿಯಾದ ಶೇ. 2.1 ರ ಮಟ್ಟಕ್ಕಿಂತ ಗಣನೀಯವಾಗಿ ಹೆಚ್ಚಾಗಿರುತ್ತಿತ್ತು. ಇದು 2017 ರಲ್ಲಿ ಸುಮಾರು ಶೇ. 11.8 ರಷ್ಟಿತ್ತು ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ ನ 'ಭಾರತದಲ್ಲಿ ಬ್ಯಾಂಕಿಂಗ್ ಪ್ರವೃತ್ತಿ ಮತ್ತು ಪ್ರಗತಿಯ ವರದಿ'ಯಲ್ಲಿ ಉಲ್ಲೇಖಿಸಲಾಗಿದೆ.

ಭಾರತದ ದಿವಾಳಿತನ ವ್ಯವಸ್ಥೆಯು ಸುಧಾರಿತ ವಸೂಲಾತಿ ಫಲಿತಾಂಶಗಳು, ಶೀಘ್ರವಾದ ಪರಿಹಾರದ ಕಾಲಾವಧಿಗಳು ಮತ್ತು ಸಾಲದಾತರ ಹೆಚ್ಚಿನ ಸಬಲೀಕರಣದ ಮೂಲಕ ಬಲವರ್ಧನೆಗೆ ಸಾಕ್ಷಿಯಾಗಿದೆ. ಎಸ್ ಆಂಡ್ ಪಿ ಗ್ಲೋಬಲ್ ರೇಟಿಂಗ್ಸ್  ಸಂಸ್ಥೆಯು ಭಾರತದ ದಿವಾಳಿತನ ಚೌಕಟ್ಟನ್ನು 'ಗ್ರೂಪ್ ಸಿ' ನಿಂದ 'ಗ್ರೂಪ್ ಬಿ' ಗೆ ದರ್ಜೆಗೇರಿಸಿದೆ, ಇದು ದೇಶದ ಪರಿಹಾರ ಮತ್ತು ವಸೂಲಾತಿ ವ್ಯವಸ್ಥೆಯ ದಕ್ಷತೆಯಲ್ಲಿನ ಸುಧಾರಣೆಗಳನ್ನು ಗುರುತಿಸಿವೆ.

ಸರಾಸರಿ ವಸೂಲಾತಿ ದರಗಳು ಐಬಿಸಿ ಪೂರ್ವ ಅವಧಿಯಲ್ಲಿದ್ದ ಸುಮಾರು ಶೇ. 15-20 ರಿಂದ ಐಬಿಸಿ-ನಂತರದ ಅವಧಿಯಲ್ಲಿ ಸುಮಾರು ಶೇ. 30 ಕ್ಕೆ ಏರಿಕೆಯಾಗಿದೆ, ಹಾಗೆಯೇ ಪರಿಹಾರದ ಕಾಲಾವಧಿಯು ಸುಮಾರು 6-8 ವರ್ಷಗಳಿಂದ ಈ ಸಂಹಿತೆಯಡಿಯಲ್ಲಿ ಸುಮಾರು 2 ವರ್ಷಗಳಿಗೆ ಇಳಿಕೆಯಾಗಿದೆ.

ಈ ಸಂಹಿತೆಯ ನಿರಂತರ ಪರಿಣಾಮಕಾರಿತ್ವವು ಭಾರತೀಯ ರಿಸರ್ವ್ ಬ್ಯಾಂಕ್ ನ 'ಭಾರತದಲ್ಲಿ ಬ್ಯಾಂಕಿಂಗ್ ಪ್ರವೃತ್ತಿ ಮತ್ತು ಪ್ರಗತಿಯ ವರದಿ 2024-25' ರಲ್ಲೂ ಇದೆ. ಇದು ಒತ್ತಡಕ್ಕೊಳಗಾದ ಆಸ್ತಿಗಳ ವಸೂಲಾತಿಗೆ ಈ ಸಂಹಿತೆಯನ್ನು ಅತ್ಯಂತ ಪರಿಣಾಮಕಾರಿ ಕಾರ್ಯವಿಧಾನ ಎಂದು ಗುರುತಿಸಿದೆ. ಶೆಡ್ಯೂಲ್ಡ್ ವಾಣಿಜ್ಯ ಬ್ಯಾಂಕುಗಳು ವಿವಿಧ ಮಾರ್ಗಗಳ ಮೂಲಕ ಮಾಡಿದ ಒಟ್ಟು ₹1.04 ಲಕ್ಷ ಕೋಟಿ ವಸೂಲಾತಿಯಲ್ಲಿ, ಸುಮಾರು ₹0.54 ಲಕ್ಷ ಕೋಟಿ (ಅಂದರೆ ಸುಮಾರು ಶೇ. 52.4 ರಷ್ಟು) ಐಬಿಸಿ ಪ್ರಕ್ರಿಯೆಯ ಮೂಲಕವೇ ವಸೂಲಾಗಿದೆ.

ಐಬಿಸಿ ಅಡಿಯಲ್ಲಿ ವಸೂಲಾತಿ ದರಗಳು ಹಿಂದಿನ ವರ್ಷದ ಶೇ. 28.3 ರಿಂದ 2024-25 ರಲ್ಲಿ ಶೇ. 36.6 ಕ್ಕೆ ಸುಧಾರಿಸಿದೆ ಎಂದು ವರದಿಯು ಮತ್ತಷ್ಟು ಗಮನಿಸಿದೆ. ಇದು ಒತ್ತಡಕ್ಕೊಳಗಾದ ಆಸ್ತಿಗಳನ್ನು ನಿರ್ವಹಿಸುವಲ್ಲಿ ಮತ್ತು ಒಟ್ಟು ಅನುತ್ಪಾದಕ ಆಸ್ತಿಗಳ ಕಡಿತಕ್ಕೆ ಕೊಡುಗೆ ನೀಡುವಲ್ಲಿ ದಿವಾಳಿತನ ಚೌಕಟ್ಟಿನ ಹೆಚ್ಚುತ್ತಿರುವ ಪರಿಣಾಮಕಾರಿತ್ವವನ್ನು ಎತ್ತಿ ತೋರಿಸುತ್ತದೆ.

ಐಐಎಂ ಬೆಂಗಳೂರು ನಡೆಸಿದ ಇದರ  ಪ್ರಭಾವದ ಅಧ್ಯಯನವು, ಐಬಿಸಿ ಅನುಷ್ಠಾನದ ನಂತರ ಸಾಲದ ನಡವಳಿಕೆಯಲ್ಲಿ ಗಮನಾರ್ಹ ಸುಧಾರಣೆಯನ್ನು ಗುರುತಿಸಿದೆ. ವಿಶೇಷವಾಗಿ, 'ಬಾಕಿ' (ಓವರ್ ಡ್ಯೂ) ವರ್ಗದಿಂದ 'ಸಾಮಾನ್ಯ' (ನಾರ್ಮಲ್) ವರ್ಗಕ್ಕೆ ಬದಲಾಗುವ ಸಾಲದ ಖಾತೆಗಳ ಪ್ರಮಾಣವು 2018 ಮತ್ತು 2024 ರ ನಡುವೆ ಸ್ಥಿರವಾಗಿ ಹೆಚ್ಚಾಗಿದೆ, ಇದು ಸಾಲಗಾರರ ಸುಧಾರಿತ ಶಿಸ್ತನ್ನು ತೋರಿಸುತ್ತದೆ.

ಈ ನಡವಳಿಕೆಯ ಬದಲಾವಣೆಯು ಖಾತೆಯೊಂದು ಬಾಕಿ ಉಳಿದಿರುವ ಸರಾಸರಿ ದಿನಗಳ ಸಂಖ್ಯೆಯಲ್ಲಿನ ತೀವ್ರ ಇಳಿಕೆಯಲ್ಲೂ  ಕಂಡುಬಂದಿದೆ, ಇದು 248-344 ದಿನಗಳಿಂದ 30-87 ದಿನಗಳಿಗೆ ಇಳಿಕೆಯಾಗಿದೆ.

ಐಬಿಸಿ ಅಡಿಯಲ್ಲಿ ಪುನಶ್ಚೇತನಗೊಂಡ ಸಂಸ್ಥೆಗಳ ಕುರಿತು ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಮ್ಯಾನೇಜ್ಮೆಂಟ್ ಅಹಮದಾಬಾದ್ (2025) ನಡೆಸಿದ ಅಧ್ಯಯನವು, ಪರಿಹಾರದ ನಂತರದ ಐದು ವರ್ಷಗಳ ಅವಧಿಯಲ್ಲಿ ಪ್ರಮುಖ ಕಾರ್ಯಾಚರಣೆ ಮತ್ತು ಹಣಕಾಸು ಸೂಚಕಗಳಲ್ಲಿ ಗಣನೀಯ ಸುಧಾರಣೆಗಳೊಂದಿಗೆ ವ್ಯವಹಾರಗಳ ಗಮನಾರ್ಹ ಪುನಶ್ಚೇತನವನ್ನು ಎತ್ತಿ ತೋರಿಸುತ್ತದೆ.

ಪರಿಹಾರಗೊಂಡ ಸಂಸ್ಥೆಗಳ ಸರಾಸರಿ ಮಾರಾಟವು ಸುಮಾರು ಶೇ. 89 ರಷ್ಟು ಹೆಚ್ಚಾಗಿದ್ದರೆ, ಆಸ್ತಿ ವಹಿವಾಟು ಅನುಪಾತಗಳು ಸುಮಾರು ಶೇ. 131 ರಷ್ಟು ಸುಧಾರಿಸಿದೆ, ಇದು ಹೆಚ್ಚಿದ ಕಾರ್ಯಾಚರಣೆಯ ದಕ್ಷತೆ ಮತ್ತು ವ್ಯವಹಾರದ ಚೇತರಿಕೆಯನ್ನು ಸೂಚಿಸುತ್ತದೆ. ಸರಾಸರಿ ಬಂಡವಾಳ ವೆಚ್ಚವು  ಐದು ವರ್ಷಗಳ ನಂತರ ಸರಿಸುಮಾರು ಶೇ. 106 ರಷ್ಟು ಹೆಚ್ಚಾಗಿದೆ, ಇದು ನವೀಕೃತ ಹೂಡಿಕೆ ಮತ್ತು ಆರ್ಥಿಕ ಕಾರ್ಯಸಾಧ್ಯತೆಯನ್ನು ತೋರಿಸುತ್ತದೆ.

ಪರಿಹರಿಸಲಾದ ಪಟ್ಟಿಮಾಡಲಾದ ಸಂಸ್ಥೆಗಳ ಒಟ್ಟು ಮಾರುಕಟ್ಟೆ ಮೌಲ್ಯಮಾಪನದಲ್ಲಿನ ಗಮನಾರ್ಹ ಹೆಚ್ಚಳವನ್ನು ಅಧ್ಯಯನವು ಮತ್ತಷ್ಟು ಗಮನಿಸಿದೆ, ಇದು ಐದು ವರ್ಷಗಳಲ್ಲಿ ಸುಮಾರು ₹2.8 lakh ಕೋಟಿಯಿಂದ ಸುಮಾರು ₹9 ಲಕ್ಷ   ಕೋಟಿಗೆ ಏರಿದೆ. ಇದು ಯಶಸ್ವಿ ಪರಿಹಾರದ ನಂತರ  ಹೂಡಿಕೆದಾರರ ಹೆಚ್ಚಿದ ವಿಶ್ವಾಸ ಮತ್ತು ಸುಧಾರಿತ ದೀರ್ಘಕಾಲೀನ ಬೆಳವಣಿಗೆಯ ಭರವಸೆಗಳನ್ನು ಸೂಚಿಸುತ್ತದೆ.

2016ರಲ್ಲಿ ಐಬಿಸಿ ಪ್ರಾರಂಭವಾದಾಗ, ಅದು ಉದ್ಯಮದ ಮೌಲ್ಯದ ಭಾರಿ ಸವೆತದಿಂದ ಗುರುತಿಸಲ್ಪಟ್ಟಿದ್ದ ಯುಗವನ್ನು ದಾಟಿ ಮುನ್ನಡೆಯುವ ಭರವಸೆ ನೀಡಿತ್ತು; ಅಲ್ಲಿ ಹಲವಾರು ವರ್ಷಗಳ ದೀರ್ಘಕಾಲದ ವಿಳಂಬಗಳು ಆಸ್ತಿಗಳನ್ನು ಭಾಗವಾಗಿ ಮಾರಾಟ ಮಾಡಲು ಕಾರಣವಾಗುತ್ತಿದ್ದವು ಮತ್ತು ಚಾಲ್ತಿಯಲ್ಲಿರುವ ಉದ್ಯಮವನ್ನು ಸ್ಥಾಪಿಸಲು ಮಾಡಿದ ಹೂಡಿಕೆಗೆ ಯಾವುದೇ ಮೌಲ್ಯ ಸಿಗುತ್ತಿರಲಿಲ್ಲ, ಇದರಿಂದಾಗಿ ಸಾಲದಾತರು ರೂಪಾಯಿಗೆ ಕೇವಲ ಕೆಲವು ಪೈಸೆಗಳನ್ನು ಮಾತ್ರ ವಸೂಲಿ ಮಾಡುವಂತಾಗುತ್ತಿತ್ತು.

ಇದಕ್ಕೆ ಪ್ರತಿಕ್ರಿಯೆಯಾಗಿ, ಈ ಸಂಹಿತೆಯು ಹಣಕಾಸಿನ ಸಂಕಷ್ಟ ಮತ್ತು ದಿವಾಳಿತನದ ಪರಿಹಾರಕ್ಕಾಗಿ ಸುಸಂಬದ್ಧವಾದ, ಸಾಲದಾತ-ಚಾಲಿತ ಮತ್ತು ಸಮಯ ಬದ್ಧ ಕಾರ್ಯವಿಧಾನವನ್ನು ಸ್ಥಾಪಿಸಲು ಶ್ರಮಿಸಿತು; ಇದು ದಕ್ಷತೆ, ಕಾರ್ಪೊರೇಟ್ ಪುನಶ್ಚೇತನ ಮತ್ತು ಮೌಲ್ಯದ ಗರಿಷ್ಠೀಕರಣಕ್ಕೆ ಒತ್ತು ನೀಡಿತು. ಹಾಗೆ ಮಾಡುವ ಮೂಲಕ, ಇದು ಭಾರತೀಯ ಆರ್ಥಿಕತೆಯೊಳಗೆ ಸಾಲ, ಉದ್ಯಮ ಮತ್ತು ಹೊಣೆಗಾರಿಕೆಯ ನಡುವಿನ ಸಂಬಂಧವನ್ನು ಮೂಲಭೂತವಾಗಿ ಮರುಹೊಂದಿಸಿತು.

ಐಬಿಸಿಯ ಹತ್ತು ವರ್ಷಗಳ ಈ ಮೈಲಿಗಲ್ಲು ಆತ್ಮಾವಲೋಕನ, ಮೌಲ್ಯಮಾಪನ ಮತ್ತು ನವೀಕೃತ ಕಲ್ಪನೆಗೆ ಒಂದು ಪ್ರಮುಖ ಸಂದರ್ಭವನ್ನು ಒದಗಿಸುತ್ತದೆ. ಇದು ಭಾರತದ ಹಣಕಾಸು ಮತ್ತು ಸಾಂಸ್ಥಿಕ ನೆಲೆಯ  ಮೇಲೆ ದಿವಾಳಿತನ ಚೌಕಟ್ಟಿನ ಪರಿವರ್ತಕ ಪ್ರಭಾವದ ಆಳವಾದ ಪರಿಗಣನೆಗೆ ಆಹ್ವಾನ ನೀಡುತ್ತದೆ, ಹಾಗೆಯೇ ಪ್ರಬುದ್ಧವಾಗುತ್ತಿರುವ ದಿವಾಳಿತನ ವ್ಯವಸ್ಥೆಯೊಂದಿಗೆ ಬರುವ ಸವಾಲುಗಳೊಂದಿಗೆ ರಚನಾತ್ಮಕವಾಗಿ ತೊಡಗಿಸಿಕೊಳ್ಳಲು ಉತ್ತೇಜಿಸುತ್ತದೆ.

ಭಾರತವು 'ವಿಕಸಿತ ಭಾರತ 2047'ರ ಮಹತ್ವಾಕಾಂಕ್ಷೆಯತ್ತ ಸಾಗುತ್ತಿರುವಾಗ, ಉದ್ಯಮಶೀಲತೆಯನ್ನು ಉಳಿಸಿಕೊಳ್ಳಲು, ಉತ್ಪಾದಕ ಬಂಡವಾಳವನ್ನು ರಕ್ಷಿಸಲು, ಹಣಕಾಸಿನ ಸ್ಥಿರತೆಯನ್ನು ಸದೃಢಗೊಳಿಸಲು ಮತ್ತು ಜವಾಬ್ದಾರಿಯುತ ಆರ್ಥಿಕ ಬೆಳವಣಿಗೆಯನ್ನು ಉತ್ತೇಜಿಸಲು ದಕ್ಷ ಮತ್ತು ಚೇತರಿಕೆಯಾಗುವ ದಿವಾಳಿತನ ವ್ಯವಸ್ಥೆಯ ನಿರಂತರ ವಿಕಸನವು ಅತ್ಯಗತ್ಯವಾಗಿರುತ್ತದೆ.

*****