ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು ಇಂದು ಛತ್ತೀಸ್‌ಗಢದ ಜಗದಲ್‌ಪುರದಲ್ಲಿ ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದರು.

ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್ ಶಾ ಅವರು, ಶ್ರೀ ವಿಷ್ಣು ದಿಯೋ ಸಾಯಿ ಅವರ ನಾಯಕತ್ವದಲ್ಲಿ, ಛತ್ತೀಸ್‌ಗಢದಲ್ಲಿ ನಮ್ಮ ಪಕ್ಷದ ಸರ್ಕಾರ ರಚನೆಯಾದಾಗ, ಅದೇ ಸಮಯದಲ್ಲಿ ಕೇಂದ್ರದಲ್ಲೂ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನಾಯಕತ್ವದಲ್ಲಿ ನಮ್ಮದೇ ಸರ್ಕಾರ ಅಧಿಕಾರದಲ್ಲಿತ್ತು ಎಂದರು. 13 ಡಿಸೆಂಬರ್ 2023 ರಂದು ಇಲ್ಲಿ ನಮ್ಮ ಸರ್ಕಾರ ರಚನೆಯಾದ ತಕ್ಷಣವೇ, ಬಸ್ತಾರ್‌ನಲ್ಲಿ ಉಳಿದಿರುವ ನಕ್ಸಲರನ್ನು ನಿರ್ಮೂಲನೆ ಮಾಡುವ ಅಭಿಯಾನವನ್ನು ನಾವು ಮರುಪ್ರಾರಂಭಿಸಿದೆವು ಎಂದು ಅವರು ಹೇಳಿದರು. 24 ಆಗಸ್ಟ್ 2024 ರಂದು ಎಲ್ಲಾ ರಾಜ್ಯಗಳ ಪೊಲೀಸ್ ಮಹಾನಿರ್ದೇಶಕರ ಸಭೆಯ ನಂತರ, 31 ಮಾರ್ಚ್ 2026 ರ ವೇಳೆಗೆ ದೇಶವನ್ನು ನಕ್ಸಲ್ ಮುಕ್ತಗೊಳಿಸಲಾಗುವುದು ಎಂದು ಘೋಷಿಸಲಾಗಿತ್ತು ಎಂದು ಶ್ರೀ ಶಾ ತಿಳಿಸಿದರು. ನಮ್ಮ ಭದ್ರತಾ ಪಡೆಗಳ ಶೌರ್ಯ, ಧೈರ್ಯ ಮತ್ತು ತ್ಯಾಗದ ಫಲವಾಗಿ, ನಿಗದಿತ ದಿನಾಂಕವಾದ 31 ಮಾರ್ಚ್ 2026 ಕ್ಕಿಂತ ಮುಂಚಿತವಾಗಿಯೇ ದೇಶದಿಂದ ನಕ್ಸಲಿಸಂ ಅನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡಲಾಗಿದೆ ಎಂದು ಅವರು ಹೇಳಿದರು.

19 ಮೇ 2026 ರ ದಿನಾಂಕವು ಸಹ ಅತ್ಯಂತ ಮಹತ್ವದ್ದಾಗಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ನಕ್ಸಲ್‌ಬಾರಿಯಿಂದ ನಕ್ಸಲಿಸಂ ಬೆಳೆಯಲು ಪ್ರಾರಂಭಿಸಿದಾಗಿನಿಂದ, ಅದನ್ನು ಬೆಂಬಲಿಸುವ ಬುದ್ಧಿಜೀವಿಗಳು, ಕೆಲವು ಪ್ರದೇಶಗಳು ಅಭಿವೃದ್ಧಿ ಹೊಂದದ ಕಾರಣ ಅಲ್ಲಿ ನಕ್ಸಲಿಸಂ ಅಸ್ತಿತ್ವದಲ್ಲಿದೆ ಎಂದು ವಾದಿಸುತ್ತಿದ್ದರು ಎಂಬುದನ್ನ ಅವರು ಸ್ಮರಿಸಿದರು. ಆದರೆ ಇದು ನಿಜವಲ್ಲ ಎಂದು ಅವರು ಸ್ಪಷ್ಟಪಡಿಸಿದರು, ಏಕೆಂದರೆ ದೇಶದಲ್ಲಿ ನಕ್ಸಲ್ ಪೀಡಿತ ಪ್ರದೇಶಗಳಿಗಿಂತಲೂ, ಹೆಚ್ಚು ಹಿಂದುಳಿದ ಹಲವು ಭಾಗಗಳಿದ್ದವು, ಆದರೂ ಅಲ್ಲಿ ನಕ್ಸಲಿಸಂ ಬೆಳೆಯಲಿಲ್ಲ ಮತ್ತು ಆ ಎಲ್ಲಾ ಪ್ರದೇಶಗಳು ಕ್ರಮೇಣ ಅಭಿವೃದ್ಧಿಯತ್ತ ಸಾಗಿದವು. ಆದರೆ, ನಮ್ಮ ಬಸ್ತಾರ್ ಮತ್ತು ಇತರ ಅನೇಕ ನಕ್ಸಲ್ ಪೀಡಿತ ಪ್ರದೇಶಗಳು ಅಭಿವೃದ್ಧಿ ಹೊಂದಲು ಸಾಧ್ಯವಾಗಲಿಲ್ಲ ಎಂದು ಅವರು ಹೇಳಿದರು.

ಹಿಂದೆ ನಕ್ಸಲ್ ಪೀಡಿತವಾಗಿದ್ದ ಅದೇ ಪ್ರದೇಶದಲ್ಲಿ ಇಂದು, 19 ಮೇ 2026 ರಂದು ಸಮಗ್ರ ಅಭಿವೃದ್ಧಿಯ ದೃಷ್ಟಿಕೋನಕ್ಕೆ ಚಾಲನೆ ನೀಡಲಾಗುತ್ತಿದೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. 'ವೀರ್ ಶಹೀದ್ ಗುಂಡಾಧುರ್ ಸೇವಾ ಡೇರಾ'ವನ್ನು ನಿನ್ನೆಯಷ್ಟೇ ಉದ್ಘಾಟಿಸಲಾಗಿದೆ ಎಂದು ಅವರು ಮಾಹಿತಿ ನೀಡಿದರು. ಬಸ್ತಾರ್‌ನ ಏಳು ಜಿಲ್ಲೆಗಳನ್ನು ನಕ್ಸಲಿಸಂನಿಂದ ಮುಕ್ತಗೊಳಿಸಲು ಭಾರತ ಸರ್ಕಾರದ ಗೃಹ ಸಚಿವಾಲಯವು ಈ ಪ್ರದೇಶದಲ್ಲಿ ಸುಮಾರು 200 ಭದ್ರತಾ ಕ್ಯಾಂಪ್‌ಗಳನ್ನು ಸ್ಥಾಪಿಸಿತ್ತು. ಈಗ ಬಸ್ತಾರ್ ನಕ್ಸಲ್ ಮುಕ್ತವಾಗಿರುವುದರಿಂದ, ಮೊದಲ ಹಂತದಲ್ಲಿ ಈ 200 ಕ್ಯಾಂಪ್‌ಗಳ ಪೈಕಿ 70 ಕ್ಯಾಂಪ್‌ಗಳನ್ನು 'ವೀರ್ ಶಹೀದ್ ಗುಂಡಾಧುರ್ ಸೇವಾ ಡೇರಾ'ಗಳಾಗಿ ಪರಿವರ್ತಿಸಲು ನಿರ್ಧರಿಸಲಾಗಿದೆ ಎಂದು ಅವರು ಹೇಳಿದರು. ಬಸ್ತಾರ್‌ನ ಪ್ರತಿಯೊಬ್ಬ ಬುಡಕಟ್ಟು ಸಹೋದರ ಮತ್ತು ಸಹೋದರಿಯ ಮನೆಬಾಗಿಲಿಗೆ ಸರ್ಕಾರಿ ಸೌಲಭ್ಯಗಳು ಹಾಗೂ ಸೇವೆಗಳನ್ನು ತಲುಪಿಸುವುದೇ ಈ ಸೇವಾ ಡೇರಾಗಳ ಉದ್ದೇಶವಾಗಿದೆ. ಪ್ರತಿ ಸೇವಾ ಡೇರಾವೂ ಬ್ಯಾಂಕಿಂಗ್ ಸೌಲಭ್ಯಗಳು, ಆಧಾರ್ ಕಾರ್ಡ್ ಸೇವೆಗಳು, ಎಲ್ಲಾ ಡಿಜಿಟಲ್ ಸೇವೆಗಳು ಮತ್ತು ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳ 371 ಯೋಜನೆಗಳ ಪ್ರಯೋಜನಗಳನ್ನು ಸಾಮಾನ್ಯ ಸೇವಾ ಕೇಂದ್ರಗಳ (CSCs) ಮೂಲಕ ಒದಗಿಸಲಿದೆ. ಅಭಿವೃದ್ಧಿಗೆ ಸಂಬಂಧಿಸಿದ ಎಲ್ಲಾ ಸೇವೆಗಳು ಒಂದೇ ಸೂರಿನಡಿ ಲಭ್ಯವಿರಲಿವೆ. 50 ವರ್ಷಗಳಿಂದ ಅಭಿವೃದ್ಧಿಯಿಂದ ವಂಚಿತರಾಗಿರುವ ನಾಗರಿಕರಿಗೆ ಎಲ್ಲಾ ಸರ್ಕಾರಿ ಯೋಜನೆಗಳ ಶೇಕಡಾ 100 ರಷ್ಟು ಪ್ರಯೋಜನಗಳು ಸಿಗುವುದನ್ನು ಖಚಿತಪಡಿಸಿಕೊಳ್ಳುವುದು ಇದರ ಮೂಲ ಉದ್ದೇಶವಾಗಿದೆ. ಈ ಸೇವಾ ಡೇರಾಗಳಲ್ಲಿ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘ (PACS) ಮತ್ತು ಡೈರಿ ಸೌಲಭ್ಯವನ್ನು ಸಹ ಸ್ಥಾಪಿಸಲಾಗುವುದು, ಇದರಿಂದ ಪ್ರತಿಯೊಬ್ಬ ಬುಡಕಟ್ಟು ಮಹಿಳೆಯೂ ತನ್ನ ಜಾನುವಾರುಗಳಿಂದ ಹಾಲನ್ನು ಪೂರೈಸಲು ಸಾಧ್ಯವಾಗುತ್ತದೆ ಎಂದು ಶ್ರೀ ಶಾ ಹೇಳಿದರು. ಈ ಸೇವಾ ಡೇರಾಗಳ ಮೂಲಕ ಸರ್ಕಾರವು ಬಸ್ತಾರ್‌ನ ಪ್ರತಿಯೊಂದು ಬುಡಕಟ್ಟು ಕುಟುಂಬಕ್ಕೆ ಒಂದು ಹಸು ಮತ್ತು ಒಂದು ಎಮ್ಮೆಯನ್ನು ಒದಗಿಸಲಿದೆ, ಇದರಿಂದ ಅವರು ಸಹಕಾರಿ ವ್ಯವಸ್ಥೆಯ ಮೂಲಕ ಭಾರತದಾದ್ಯಂತ ತಮ್ಮ ಹಾಲನ್ನು ಮಾರಾಟ ಮಾಡಬಹುದು ಎಂದು ಅವರು ತಿಳಿಸಿದರು. ಮುಂದಿನ ಆರು ತಿಂಗಳಲ್ಲಿ ಬಸ್ತಾರ್ ವಿಭಾಗದಾದ್ಯಂತ ದೊಡ್ಡ ಡೈರಿ ಜಾಲವನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ ಎಂದು ಅವರು ಮುಂದುವರಿದು ಹೇಳಿದರು.

ಹಿಂದೆ ಈ ಪ್ರದೇಶವು ಬಂದೂಕುಗಳು ಮತ್ತು ಬಯೋನೆಟ್‌ಗಳ (bayonets) ನೆರಳಿನಲ್ಲಿತ್ತು, ಆದರೆ ಈಗ ಅಲ್ಲಿಗೆ ಅಭಿವೃದ್ಧಿ ತಲುಪಲಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ಇಲ್ಲಿಯವರೆಗೆ, ನಕ್ಸಲರ ಕಾರಣದಿಂದಾಗಿ ಇಡೀ ಪ್ರದೇಶವು ಅಭಿವೃದ್ಧಿಯಿಂದ ವಂಚಿತವಾಗಿತ್ತು. ಇಲ್ಲಿನ ಜನರಿಗೆ ಪಡಿತರ ಚೀಟಿಗಳು ಸಿಗುತ್ತಿರಲಿಲ್ಲ, ಉಚಿತ ಧಾನ್ಯ ಯೋಜನೆಗಳ ಪ್ರಯೋಜನವಾಗಲಿ ಅಥವಾ ₹5 ಲಕ್ಷದವರೆಗಿನ ಆರೋಗ್ಯ ವಿಮೆಯಾಗಲಿ ದೊರೆಯುತ್ತಿರಲಿಲ್ಲ. ಅವರ ಉತ್ಪನ್ನಗಳನ್ನು ಕ್ವಿಂಟಾಲ್‌ಗೆ ₹3,100 ರಂತೆ ಖರೀದಿಸಲಾಗುತ್ತಿರಲಿಲ್ಲ. ಉದ್ಯೋಗದ ಸುಳಿವೇ ಇರಲಿಲ್ಲ, ಹಳ್ಳಿಗಳಿಗೆ ವಿದ್ಯುತ್ ತಲುಪುತ್ತಿರಲಿಲ್ಲ, ನೀರು ಸಿಗುತ್ತಿರಲಿಲ್ಲ ಮತ್ತು ಶಾಲೆಗಳನ್ನು ನಿರ್ಮಿಸಿರಲಿಲ್ಲ ಎಂದು ಅವರು ತಿಳಿಸಿದರು. ಈ ಸೇವಾ ಡೇರಾಗಳ ಮೂಲಕ ನಾವು ಬಸ್ತಾರ್‌ನಾದ್ಯಂತ ಈ ಎಲ್ಲಾ ಸೌಲಭ್ಯಗಳನ್ನು ಒದಗಿಸಲಿದ್ದೇವೆ ಎಂದು ಅವರು ಹೇಳಿದರು. ನಕ್ಸಲ್ ಪೀಡಿತ ಬಸ್ತಾರ್ ಅನ್ನು ನಕ್ಸಲ್ ಮುಕ್ತ ಮತ್ತು ಅಭಿವೃದ್ಧಿ ಹೊಂದಿದ ಬಸ್ತಾರ್ ಆಗಿ ಪರಿವರ್ತಿಸಲು ‘ವೀರ್ ಶಹೀದ್ ಗುಂಡಾಧುರ್ ಸೇವಾ ಡೇರಾ’ ಒಂದು ಪ್ರಮುಖ ಮಾಧ್ಯಮವಾಗಲಿದೆ. ಅರಣ್ಯ ಉತ್ಪನ್ನಗಳನ್ನು ಸಹಕಾರ ಸಂಘಗಳ ಮೂಲಕ ಸಂಸ್ಕರಿಸಲಾಗುವುದು ಮತ್ತು ಅದರಿಂದ ಬರುವ ಸಂಪೂರ್ಣ ಲಾಭವನ್ನು ಬುಡಕಟ್ಟು ಸಮುದಾಯಗಳಿಗೆ ನೀಡಲಾಗುವುದು ಎಂದೂ ಕೂಡ ಅವರು ಹೇಳಿದರು.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನಾಯಕತ್ವದಲ್ಲಿ ಭಾರತ ಸರ್ಕಾರವು ಬಸ್ತಾರ್‌ನ ಅಭಿವೃದ್ಧಿಗಾಗಿ ಹಲವಾರು ಪ್ರಮುಖ ಕಾಮಗಾರಿಗಳನ್ನು ಕೈಗೊಂಡಿದೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. ನಾವು ₹20,557 ಕೋಟಿ ವೆಚ್ಚದಲ್ಲಿ 12,211 ಕಿಲೋಮೀಟರ್ ರಸ್ತೆಗಳ ನಿರ್ಮಾಣವನ್ನು ಪೂರ್ಣಗೊಳಿಸಿದ್ದೇವೆ. ಒಟ್ಟು 13,000 ಮೊಬೈಲ್ ಟವರ್‌ಗಳನ್ನು ಸ್ಥಾಪಿಸಲು ಯೋಜಿಸಲಾಗಿದ್ದು, ಈ ಪೈಕಿ 5,000 ಟವರ್‌ಗಳನ್ನು ಈಗಾಗಲೇ ದೇಶದ ನಕ್ಸಲ್ ಪೀಡಿತ ಪ್ರದೇಶಗಳಲ್ಲಿ ಅಳವಡಿಸಲಾಗಿದೆ. 1,804 ಬ್ಯಾಂಕ್ ಶಾಖೆಗಳನ್ನು ತೆರೆಯಲಾಗಿದೆ, 1,321 ಎಟಿಎಂಗಳನ್ನು ಸ್ಥಾಪಿಸಲಾಗಿದೆ ಮತ್ತು 890 ಅಂಚೆ ಕಚೇರಿಗಳನ್ನು ತೆರೆಯುವ ಕೆಲಸವೂ ಪೂರ್ಣಗೊಂಡಿದೆ. 259 ಏಕಲವ್ಯ ಮಾದರಿ ಶಾಲೆಗಳನ್ನು ತೆರೆಯಲಾಗಿದೆ, 46 ಐಟಿಐ (ITI) ಗಳು  ಮತ್ತು 49 ಕೌಶಲ್ಯ ಅಭಿವೃದ್ಧಿ ಕೇಂದ್ರಗಳನ್ನು ಸ್ಥಾಪಿಸಲಾಗಿದೆ ಹಾಗೂ 90,000 ಕ್ಕೂ ಹೆಚ್ಚು ಯುವಕರು ಮತ್ತು ಮಹಿಳೆಯರಿಗೆ ಕೌಶಲ್ಯ ತರಬೇತಿ ನೀಡಲಾಗಿದೆ. ಪ್ರಧಾನಮಂತ್ರಿ ಶ್ರೀ ಮೋದಿ ಅವರ ನಾಯಕತ್ವದಲ್ಲಿ ಭಾರತ ಸರ್ಕಾರವು ನಕ್ಸಲ್ ಮುಕ್ತ ಬಸ್ತಾರ್ ಸೇರಿದಂತೆ ದೇಶಾದ್ಯಂತದ ಬುಡಕಟ್ಟು ಪ್ರದೇಶಗಳಿಗಾಗಿ ಸಮಗ್ರ ಅಭಿವೃದ್ಧಿ ಯೋಜನೆಯನ್ನು ಸಿದ್ಧಪಡಿಸಿದೆ ಎಂದು ಶ್ರೀ ಶಾ ತಿಳಿಸಿದರು. ಈ ಯೋಜನೆಯಡಿ, ಅಭಿವೃದ್ಧಿ ಯೋಜನೆಗಳ ಸಂಪೂರ್ಣ ತಲುಪುವಿಕೆ, ಪರಿಪೂರ್ಣ ಭದ್ರತಾ ವ್ಯವಸ್ಥೆಗಳು, ಯುವಕರು ಮತ್ತು ಮಹಿಳೆಯರ ಭವಿಷ್ಯದ ಸಬಲೀಕರಣಕ್ಕಾಗಿ ವೈಜ್ಞಾನಿಕ ಕಾರ್ಯಕ್ರಮ ಹಾಗೂ ಸ್ಥಳೀಯ ಪರಂಪರೆಯನ್ನು ರಕ್ಷಿಸಿ ಮುನ್ನಡೆಸುವ ಜೊತೆಗೆ ಬುಡಕಟ್ಟು ಸಂಸ್ಕೃತಿ ಮತ್ತು ಸಂಪ್ರದಾಯಗಳ ಸಂರಕ್ಷಣೆ ಮತ್ತು ಪ್ರಚಾರವನ್ನು ಕೈಗೊಳ್ಳಲಾಗುವುದು ಎಂದು ಹೇಳಿದರು.

ನಾವು ಇಲ್ಲಿ 'ಬಸ್ತಾರ್ ಪಾಂಡುಮ್' ಅನ್ನು ಪ್ರಾರಂಭಿಸಿದ್ದೇವೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ಬುಡಕಟ್ಟು ಸಂಸ್ಕೃತಿಯನ್ನು ಸಂರಕ್ಷಿಸಲು ಪ್ರಾಮಾಣಿಕ ಪ್ರಯತ್ನಗಳನ್ನು ಮಾಡಲು ಮತ್ತು ಯೋಜನೆಯೊಂದನ್ನು ಸಿದ್ಧಪಡಿಸಲು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ನಮಗೆ ಪ್ರೇರಣೆ ನೀಡಿದ್ದರು ಎಂದು ಅವರು ತಿಳಿಸಿದರು. ಬಸ್ತಾರ್ ಪಾಂಡುಮ್ ಅಡಿಯಲ್ಲಿ ಬುಡಕಟ್ಟು ನೃತ್ಯ, ಹಾಡುಗಳು, ಭಾಷೆ, ಸಾಂಪ್ರದಾಯಿಕ ಉಡುಪು, ಆಹಾರ ಪದ್ಧತಿ ಮತ್ತು ಇತರ ಸಾಂಸ್ಕೃತಿಕ ಅಂಶಗಳಿಗಾಗಿ ಒಂದು ದೊಡ್ಡ ವೇದಿಕೆಯನ್ನು ಒದಗಿಸಲಾಗಿದೆ. ಒಂದು ವರ್ಷದ ಹಿಂದೆ, 45,000 ಜನರು ಬಸ್ತಾರ್ ಪಾಂಡುಮ್‌ನಲ್ಲಿ ಭಾಗವಹಿಸಿ ಈ ಎಲ್ಲಾ ಚಟುವಟಿಕೆಗಳನ್ನು ಉತ್ತೇಜಿಸಲು ಕೊಡುಗೆ ನೀಡಿದ್ದರು. ಅದೇ ರೀತಿ, ಈಗಾಗಲೇ ಎರಡು 'ಬಸ್ತಾರ್ ಒಲಿಂಪಿಕ್ಸ್' ಅನ್ನು ಆಯೋಜಿಸಲಾಗಿದೆ. ಹಿಂದಿನ ಬಸ್ತಾರ್ ಒಲಿಂಪಿಕ್ಸ್‌ನಲ್ಲಿ 3 ಲಕ್ಷ 94 ಸಾವಿರ ಕ್ರೀಡಾಪಟುಗಳು ಭಾಗವಹಿಸಿದ್ದರು, ಇದರಲ್ಲಿ ಪುನರ್ವಸತಿಯನ್ನು ಒಪ್ಪಿಕೊಂಡಿದ್ದ ನಮ್ಮ ಮಾಜಿ ನಕ್ಸಲ್ ಸಹೋದರ-ಸಹೋದರಿ ಒಡನಾಡಿಗಳ ತಂಡವೂ ಸೇರಿತ್ತು. ವಿಶೇಷವೆಂದರೆ, ಈ ತಂಡವೇ ಅತ್ಯುತ್ತಮ ಪ್ರದರ್ಶನ ನೀಡಿತು. ಯಾವುದೇ ವಿವಾದಕ್ಕೆ ಹಿಂಸಾಚಾರವು ಎಂದಿಗೂ ಪರಿಹಾರವಾಗಲು ಸಾಧ್ಯವಿಲ್ಲ ಎಂಬ ಸ್ಪಷ್ಟ ಸಂದೇಶವನ್ನು ಇಡೀ ನಕ್ಸಲ್ ಮುಕ್ತ ಪ್ರದೇಶಕ್ಕೆ ರವಾನಿಸಲು ಪ್ರಧಾನಮಂತ್ರಿ ಮೋದಿ ಬಯಸುತ್ತಾರೆ ಎಂದು ಶ್ರೀ ಶಾ ಹೇಳಿದರು. ಪ್ರಜಾಸತ್ತಾತ್ಮಕ ಮೌಲ್ಯಗಳು, ಪರಸ್ಪರ ಸಹಕಾರ ಮತ್ತು ಅಭಿವೃದ್ಧಿಯ ಆಲೋಚನೆ ಮಾತ್ರ ವ್ಯಕ್ತಿಗಳ ಪ್ರಗತಿಗೆ ಅಡಿಪಾಯವಾಗಬಲ್ಲದು. ಹಿಂಸಾಚಾರದ ಮೂಲಕ ಯಾವುದೇ ವ್ಯಕ್ತಿ, ಹಳ್ಳಿ ಅಥವಾ ಪ್ರದೇಶದ ಅಭಿವೃದ್ಧಿ ಸಾಧ್ಯವಿಲ್ಲ. ಬಡತನದ ಕಾರಣದಿಂದಾಗಿ ನಕ್ಸಲಿಸಂ ಬೆಳೆಯಿತು ಎಂಬ ವದಂತಿಯನ್ನು 'ವೀರ್ ಶಹೀದ್ ಗುಂಡಾಧುರ್ ಸೇವಾ ಡೇರಾ' ಸುಳ್ಳಾಗಿಸಲಿದೆ ಎಂದರು.

ಈ ಇಡೀ ಪ್ರದೇಶವು ಸಂಪೂರ್ಣವಾಗಿ ಅಭಿವೃದ್ಧಿ ಹೊಂದಿದ ತಕ್ಷಣ, ಇಡೀ ಜಗತ್ತಿಗೆ ಒಂದು ಪ್ರಬಲ ಸಂದೇಶ ರವಾನೆಯಾಗಲಿದೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. ಇಲ್ಲಿ ಶಾಲೆಗಳನ್ನು ನಿರ್ಮಿಸಲು ಸಾಧ್ಯವಾಗಲಿಲ್ಲ ಏಕೆಂದರೆ ನಕ್ಸಲರು ಅವುಗಳನ್ನು ಧ್ವಂಸಗೊಳಿಸಿದ್ದರು, ರಸ್ತೆಗಳನ್ನು ನಿರ್ಮಿಸಲು ಸಾಧ್ಯವಾಗಲಿಲ್ಲ ಏಕೆಂದರೆ ನಕ್ಸಲರು ಅಡೆತಡೆಗಳನ್ನು ಸೃಷ್ಟಿಸಿದ್ದರು, ಆಸ್ಪತ್ರೆಗಳು ಕಾರ್ಯನಿರ್ವಹಿಸಲು ಸಾಧ್ಯವಾಗಲಿಲ್ಲ ಏಕೆಂದರೆ ನಕ್ಸಲರು ಆಸ್ಪತ್ರೆಯ ಸಿಬ್ಬಂದಿಯನ್ನು ಕೊಂದಿದ್ದರು ಮತ್ತು ಬ್ಯಾಂಕುಗಳು ಬರಲಿಲ್ಲ ಏಕೆಂದರೆ ನಕ್ಸಲರು ಅವುಗಳನ್ನು ಲೂಟಿ ಮಾಡಿ ಮುಚ್ಚುವಂತೆ ಒತ್ತಾಯಿಸಿದ್ದರು ಎಂಬ ಸತ್ಯ ಜಗತ್ತಿಗೆ ತಿಳಿಯಲಿದೆ. ಅಭಿವೃದ್ಧಿಯ ಹಾದಿಯನ್ನು ಕಂಡುಕೊಳ್ಳುವ ಹೆಸರಿನಲ್ಲಿ ಆಯುಧಗಳನ್ನು ಕೈಗೆತ್ತಿಕೊಂಡಿರುವ ದೇಶದ ಪ್ರತಿಯೊಬ್ಬರ ಮುಂದೆ ಬಸ್ತಾರ್‌ನ 'ಶಹೀದ್ ವೀರ್ ಗುಂಡಾಧುರ್ ಸೇವಾ ಡೇರಾ' ಅಭಿವೃದ್ಧಿಯ ಪ್ರಜಾಸತ್ತಾತ್ಮಕ ಮಾದರಿಯನ್ನು ಪ್ರಸ್ತುತಪಡಿಸಲಿದೆ ಎಂದು ಶ್ರೀ ಶಾ ತಿಳಿಸಿದರು.

ಭಾರತ ಸರ್ಕಾರ ಮತ್ತು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಪರವಾಗಿ ಬಸ್ತಾರ್‌ನ ಎಲ್ಲಾ ನಿವಾಸಿಗಳಿಗೆ ಭರವಸೆ ನೀಡಿದ ಶ್ರೀ ಅಮಿತ್ ಶಾ, ಇನ್ನು ಮುಂದೆ ಭಯದಿಂದ ಬದುಕುವ ಅಗತ್ಯವಿಲ್ಲ — ಇಲ್ಲಿ ಹೊಸ ಸೂರ್ಯೋದಯವಾಗಿದೆ ಎಂದರು. ಈ ಪ್ರದೇಶದ ಬುಡಕಟ್ಟು ಯುವಕರು ಮತ್ತು ಮಹಿಳೆಯರು ಸಂಪೂರ್ಣ ಆತ್ಮವಿಶ್ವಾಸದಿಂದ ಮುನ್ನಡೆಯಬೇಕು, ಏಕೆಂದರೆ ಭಾರತ ಸರ್ಕಾರ ಮತ್ತು ಛತ್ತೀಸ್‌ಗಢ ಸರ್ಕಾರ ಎರಡೂ ಅವರ ಬೆನ್ನಿಗೆ ದೃಢವಾಗಿ ನಿಂತಿವೆ ಎಂದು ಅವರು ಹೇಳಿದರು. ಹಿಂದೆ ನಕ್ಸಲ್ ಪೀಡಿತವಾಗಿದ್ದ ಬಸ್ತಾರ್ ಪ್ರದೇಶವು ಈಗ ಅಭಿವೃದ್ಧಿ ಹೊಂದಿದ ಪ್ರದೇಶವಾಗಲು ಸಜ್ಜಾಗಿರುವುದರಿಂದ, ಜನರು ಜಾಗರೂಕರಾಗಿರಬೇಕು ಎಂದು ಶ್ರೀ ಶಾ ಎಚ್ಚರಿಸಿದರು. ಒಂದು ಕಾಲದಲ್ಲಿ ಬಂದೂಕುಗಳ ಮೂಲಕ ಬಸ್ತಾರ್ ಅನ್ನು ಧ್ವಂಸಗೊಳಿಸಲು ಪ್ರಯತ್ನಿಸಿದ ಮಾವೋವಾದಿ ಸಿದ್ಧಾಂತದಿಂದ ಪ್ರೇರಿತರಾದವರು ಈಗ ವೇಷ ಮರೆಸಿಕೊಂಡು ಬರಬಹುದು. ಅವರ ಅಪಪ್ರಚಾರಕ್ಕೆ ಜನರು ಮರುಳಾಗಬಾರದು ಎಂದು ಅವರು ಒತ್ತಾಯಿಸಿದರು. ಛತ್ತೀಸ್‌ಗಢ ಸರ್ಕಾರ ಮತ್ತು ಭಾರತ ಸರ್ಕಾರ ಎರಡೂ, ಜನರಿಂದ ಚುನಾಯಿತಲ್ಪಟ್ಟ ಸರ್ಕಾರಗಳಾಗಿದ್ದು, ಪ್ರಜಾಸತ್ತಾತ್ಮಕ ಮಾರ್ಗಗಳ ಮೂಲಕ ಬಸ್ತಾರ್‌ನ ಅಭಿವೃದ್ಧಿಯನ್ನು ಮುನ್ನಡೆಸಲಿವೆ ಎಂದು ಅವರು ಒತ್ತಿಹೇಳಿದರು.

ಈ ಪ್ರದೇಶವನ್ನು ಇಡೀ ದೇಶದಲ್ಲೇ ಅತ್ಯಂತ ಅಭಿವೃದ್ಧಿ ಹೊಂದಿದ ಬುಡಕಟ್ಟು ವಿಭಾಗವನ್ನಾಗಿ ಪರಿವರ್ತಿಸಲು ಭಾರತ ಸರ್ಕಾರ ಮತ್ತು ಛತ್ತೀಸ್‌ಗಢ ಸರ್ಕಾರಗಳು ಹೆಗಲಿಗೆ ಹೆಗಲು ಕೊಟ್ಟು ಕೆಲಸ ಮಾಡಲು ಬದ್ಧವಾಗಿವೆ ಎಂದು ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ಹೇಳಿದರು. ಮುಂದಿನ ಐದು ವರ್ಷಗಳಲ್ಲಿ, ಬಸ್ತಾರ್‌ನ ಆದಾಯವನ್ನು 6 ಪಟ್ಟು ಹೆಚ್ಚಿಸುವ ಮೂಲಕ ಭಾರತದ ಎಲ್ಲಾ ಬುಡಕಟ್ಟು ಪ್ರದೇಶಗಳಲ್ಲೇ ಬಸ್ತಾರ್ ಅನ್ನು ಅತ್ಯಂತ ಅಭಿವೃದ್ಧಿ ಹೊಂದಿದ ಬುಡಕಟ್ಟು ವಿಭಾಗವನ್ನಾಗಿ ಮಾಡಲಾಗುವುದು ಎಂದು ಅವರು ತಿಳಿಸಿದರು. ನಕ್ಸಲ್ ಮುಕ್ತ ಭಾರತದ ಸಂಪೂರ್ಣ ಶ್ರೇಯಸ್ಸು ಅತ್ಯುನ್ನತ ತ್ಯಾಗ ಮಾಡಿದ ನಮ್ಮ ಭದ್ರತಾ ಪಡೆಗಳ ಜವಾನರಿಗೆ ಮತ್ತು ಅವರ ಕುಟುಂಬಗಳಿಗೆ ಸಲ್ಲುತ್ತದೆ ಎಂದೂ ಅವರು ಹೇಳಿದರು.

*****