কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে আজি ছত্তীশগড়ৰ জগদলপুৰত এখন সংবাদ মেলত ভাষণ দিয়ে।

সংবাদ মেল সম্বোধন কৰি কেন্দ্ৰীয় গৃহ মন্ত্ৰী মন্ত্ৰী শ্ৰী অমিত শ্বাহে কয় যে যেতিয়া শ্ৰী বিষ্ণু দেও ছাইৰ নেতৃত্বত ছত্তীশগড়ত আমাৰ দলৰ চৰকাৰ গঠন কৰা হৈছিল, সেই সময়ত আমাৰ দলৰ চৰকাৰ কেন্দ্ৰতো প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত ক্ষমতাত আছিল। তেওঁ লগতে কয় যে ২০২৩ চনৰ ১৩ ডিচেম্বৰত ইয়াত আমাৰ দলৰ চৰকাৰ গঠন হোৱাৰ লগে লগে আমি বাস্তাৰত বাকী থকা নক্সালসকলক নির্মূল কৰাৰ বাবে পুনৰ অভিযান আৰম্ভ কৰিছিলো। শ্ৰী শ্বাহে কয় যে ২০২৪ চনৰ ২৪ আগষ্টত সকলো ৰাজ্যিক আৰক্ষী সঞ্চালক প্ৰধানৰ বৈঠকৰ পাছত ঘোষণা কৰা হৈছিল যে ২০২৬ চনৰ ৩১ মাৰ্চৰ ভিতৰত দেশক নক্সাল-মুক্ত কৰা হ'ব। তেওঁ কয় যে আমাৰ নিৰাপত্তা বাহিনীৰ বীৰত্ব, সাহস আৰু ত্যাগৰ ফলত দেশৰ পৰা নক্সালবাদৰ সম্পূৰ্ণ নিৰ্মূল লক্ষ্য ৰ ২০২৬ চনৰ ৩১ মাৰ্চৰ আগতেই সম্ভৱ হয়।

শ্ৰী অমিত শ্বাহে কয় যে ২০২৬ চনৰ ১৯ মেৰ তাৰিখটোও যথেষ্ট গুৰুত্বপূৰ্ণ। তেওঁ কয় যে নক্সালবাৰীৰ পৰা নক্সালবাদ বিয়পিবলৈ আৰম্ভ কৰাৰ পাছৰে পৰা ইয়াৰ সমৰ্থক বুদ্ধিজীৱীসকলে যুক্তি দেখুৱাইছিল যে নক্সালবাদৰ অস্তিত্ব আছিল কাৰণ উন্নয়ন কিছুমান অঞ্চলত হোৱা নাছিল। তেওঁ স্পষ্ট কৰি দিয়ে যে এইটো সত্য নহয়, কিয়নো দেশৰ বহুতো অংশ নক্সাল-প্ৰভাৱিত অঞ্চলতকৈ অধিক পিছপৰা আছিল, তথাপিও তাত নক্সালবাদ বিয়পি পৰা নাছিল আৰু সেই সকলোবোৰ অঞ্চল ক্ৰমান্বয়ে উন্নয়নৰ দিশে আগবাঢ়িছিল। তেওঁ লগতে কয় যে অৱশ্যে, আমাৰ বাস্তাৰ আৰু আন বহুতো নক্সাল-প্ৰভাৱিত অঞ্চলৰ বিকাশ হ’ব পৰা নাছিল।

কেন্দ্ৰীয় গৃহ মন্ত্ৰীগৰাকীয়ে কয় যে ২০২৬ চনৰ ১৯ মে’ত, পূৰ্বতে নক্সাল-প্ৰভাৱিত একেটা অঞ্চলতে ব্যাপক উন্নয়নৰ দৃষ্টিভংগী আৰম্ভ কৰা হৈছে। তেওঁ অৱগত কৰে যে বীৰ শ্বহীদ গুণ্ডাধুৰ সেৱা দেৰা কালিহে উদ্বোধন কৰা হৈছে। বাস্তাৰৰ সাতখন জিলাক নক্সালবাদৰ পৰা মুক্ত কৰিবলৈ ভাৰত চৰকাৰৰ গৃহ মন্ত্ৰালয়ে অঞ্চলটোত প্ৰায় ২০০ টা নিৰাপত্তা শিবিৰ স্থাপন কৰিছিল। তেওঁ কয় যে এতিয়া বাস্তাৰ নক্সাল মুক্ত হোৱাৰ লগে লগে সিদ্ধান্ত লোৱা হৈছে যে প্ৰথম পৰ্যায়ত এই ২০০ টা শিবিৰৰ ভিতৰত ৭০ টা শিবিৰক বীৰ শ্বহীদ গুণ্ডাধুৰ সেৱা দেৰালৈ ৰূপান্তৰিত কৰা হ'ব। এই সেৱা দেৰাৰ উদ্দেশ্য হৈছে চৰকাৰী সুবিধা আৰু সেৱাসমূহ বাস্তাৰৰ প্ৰতিজন জনজাতীয় ভাই-ভনীৰ দুৱাৰমুখলৈ লৈ যোৱা। প্ৰতিটো সেৱা দেৰাই কমন ছাৰ্ভিচ চেণ্টাৰ (চিএছচি) ৰ জৰিয়তে বেংকিং সুবিধা, আধাৰ কাৰ্ড সেৱা, সকলো ডিজিটেল সেৱা তথা ৰাজ্য আৰু কেন্দ্ৰীয় চৰকাৰৰ ৩৭১ খন আঁচনিৰ সুবিধা প্ৰদান কৰিব।

উন্নয়ন সম্পৰ্কীয় সকলো সেৱা একেখন ছাদৰ তলত উপলভ্য হ’ব। ইয়াৰ উদ্দেশ্য হৈছে ৫০ বছৰ ধৰি উন্নয়নৰ পৰা বঞ্চিত নাগৰিকসকলে যাতে সকলো চৰকাৰী আঁচনিৰ ১০০ শতাংশ সুবিধা লাভ কৰে সেয়া নিশ্চিত কৰা। শ্ৰী শ্বাহে কয় যে এই সেৱা দেৰাত এটা প্ৰাথমিক কৃষি ঋণ সমিতি (পিএচিএছ) আৰু এটা দুগ্ধ সুবিধাও স্থাপন কৰা হ'ব, যাৰ ফলত প্ৰতিগৰাকী জনজাতীয় মহিলাই তেওঁৰ পশুধনৰ পৰা গাখীৰ যোগান ধৰিব পাৰিব। তেওঁ লগতে কয় যে এই সেৱা দেৰাৰ জৰিয়তে চৰকাৰে বাস্তাৰৰ প্ৰতিটো জনজাতীয় পৰিয়ালক এটা গৰু আৰু এটা ম'হ প্ৰদান কৰিব, যাতে তেওঁলোকে সমবায় ব্যৱস্থাৰ জৰিয়তে সমগ্ৰ ভাৰতত তেওঁলোকৰ গাখীৰ বজাৰ কৰিব পাৰে। অহা ছমাহৰ ভিতৰত সমগ্ৰ বাস্তাৰ খণ্ডত  দুগ্ধজাত সামগ্ৰীৰ এক বৃহৎ নেটৱৰ্ক গঢ়ি তোলা হৈছে।

শ্ৰী শ্বাহে কয় যে পূৰ্বতে এই অঞ্চলটো বন্দুক আৰু বেয়েনেটৰ ছাঁত আছিল, কিন্তু এতিয়া উন্নয়ন তাত উপনীত হ'ব। এতিয়ালৈকে নক্সালবাদীসকলৰ বাবে সমগ্ৰ অঞ্চলটো উন্নয়নৰ পৰা বঞ্চিত হৈ আছিল। ইয়াৰ লোকসকলে ৰেচন কাৰ্ড লাভ কৰা নাছিল, বিনামূলীয়া খাদ্যশস্য আঁচনিৰ সুবিধাও পোৱা নাছিল, ৫লাখ টকালৈকে স্বাস্থ্য বীমাও পোৱা নাছিল। তেওঁলোকৰ উৎপাদিত সামগ্ৰী প্ৰতি কুইণ্টলত ৩,১০০ টকাত ক্ৰয় কৰা হোৱা নাছিল। কৰ্মসংস্থাপনৰ কোনো চিহ্ন নাছিল, গাঁওসমূহত বিদ্যুৎ সংযোগ নাছিল, পানী নাছিল আৰু বিদ্যালয় নিৰ্মাণ কৰা হোৱা নাছিল। তেওঁ কয় যে সেৱা দেৰাৰ জৰিয়তে আমি সমগ্ৰ বাস্তাৰত এই সকলোবোৰ সুবিধা প্ৰদান কৰিবলৈ গৈছো। বীৰ শ্বহীদ গুণ্ডাধুৰ সেৱা দেৰা নক্সাল-প্ৰভাৱিত বাস্তাৰক নক্সাল-মুক্ত আৰু উন্নত বাস্তাৰলৈ ৰূপান্তৰিত কৰাৰ এক প্ৰধান বাহন হৈ পৰিব। তেওঁ লগতে কয় যে বনজ সামগ্ৰী সমবায়ৰ জৰিয়তে প্ৰক্ৰিয়া কৰা হ’ব আৰু ইয়াৰ পৰা হোৱা সম্পূৰ্ণ লাভ জনজাতীয় সম্প্ৰদায়ক দিয়া হ’ব।

কেন্দ্ৰীয় গৃহ মন্ত্ৰীগৰাকীয়ে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত ভাৰত চৰকাৰে বাস্তাৰৰ উন্নয়নৰ বাবে কেইবাটাও গুৰুত্বপূৰ্ণ কাম হাতত লৈছে। আমি ২০,৫৫৭ কোটি টকা ব্যয়েৰে ১২,২১১ কিলোমিটাৰ পথ নিৰ্মাণ সম্পূৰ্ণ কৰিছো। মুঠ ১৩ হাজাৰ মোবাইল টাৱাৰৰ পৰিকল্পনা কৰা হৈছে, যাৰ ভিতৰত ৫,০০০ টাৱাৰ ইতিমধ্যে দেশৰ নক্সাল-প্ৰভাৱিত অঞ্চলসমূহত স্থাপন কৰা হৈছে। ১,৮০৪ টা বেংক শাখা খোলা হৈছে, ১,৩২১ টা এ টি এম স্থাপন কৰা হৈছে, আৰু ৮৯০ টা ডাকঘৰ খোলাৰ কামো সম্পূৰ্ণ কৰা হৈছে। ২৫৯ খন একলব্য মডেল বিদ্যালয় খোলা হৈছে, ৪৬ খন আই টি আই আৰু ৪৯টা দক্ষতা বিকাশ কেন্দ্ৰ স্থাপন কৰা হৈছে আৰু ৯০,০০০ তকৈও অধিক যুৱক-যুৱতীক দক্ষতা প্ৰশিক্ষণ প্ৰদান কৰা হৈছে। শ্ৰী শ্বাহে কয় যে প্ৰধানমন্ত্ৰী মোদীৰ নেতৃত্বত ভাৰত চৰকাৰে নক্সাল মুক্ত বাস্তাৰকে ধৰি সমগ্ৰ দেশৰ জনজাতীয় অঞ্চলসমূহৰ বাবে এক ব্যাপক উন্নয়ন পৰিকল্পনা প্ৰস্তুত কৰিছে। এই পৰিকল্পনাৰ অধীনত, উন্নয়ন আঁচনিসমূহৰ সম্পূৰ্ণ পৰিপূৰ্ণতা, সম্পূৰ্ণ নিৰাপত্তা ব্যৱস্থা, যুৱ আৰু মহিলাৰ ভৱিষ্যতমুখী সবলীকৰণৰ বাবে এক বৈজ্ঞানিক কাৰ্যসূচী আৰু স্থানীয় ঐতিহ্য সুৰক্ষিত কৰি আগুৱাই নিয়াৰ লগতে জনজাতীয় সংস্কৃতি তথা পৰম্পৰাৰ সংৰক্ষণ আৰু প্ৰচাৰ হ'ব।

শ্ৰী অমিত শ্বাহে কয় যে আমি ইয়াত বাস্তাৰ পাণ্ডুমৰ সূচনা কৰিছো। তেওঁ লগতে কয় যে প্ৰধানমন্ত্ৰী মোদীয়ে আমাক আন্তৰিক প্ৰচেষ্টা চলাবৰ বাবে আৰু জনজাতীয় সংস্কৃতি সংৰক্ষণৰ বাবে এক পৰিকল্পনা প্ৰস্তুত কৰিবলৈ অনুপ্ৰাণিত কৰিছে। বাস্তাৰ পাণ্ডুমৰ অধীনত জনজাতীয় নৃত্য, গীত, ভাষা, পৰম্পৰাগত সাজ-পোছাক, ৰন্ধন প্ৰণালী আৰু অন্যান্য সাংস্কৃতিক উপাদানৰ বাবে এক মুখ্য মঞ্চ প্ৰদান কৰা হৈছে। এবছৰ পূৰ্বে, ৪৫,০০০ লোকে বাস্তাৰ পাণ্ডুমত অংশগ্ৰহণ কৰিছিল আৰু সকলো কাৰ্যকলাপৰ প্ৰচাৰত অৰিহণা যোগাইছিল। একেদৰে ইতিমধ্যে দুখন বাস্তাৰ অলিম্পিক আয়োজন কৰা হৈছে। পূৰ্বৰ বাস্তাৰ অলিম্পিকত ৩ লাখ ৯৪ হাজাৰ খেলুৱৈয়ে অংশগ্ৰহণ কৰিছিল, যাৰ ভিতৰত আমাৰ প্ৰাক্তন নক্সাল ভাতৃ-ভগ্নী সহকৰ্মীৰ এটা দলে পুনৰ্বাসন গ্ৰহণ কৰিছিল। উল্লেখযোগ্য যে এই দলটোৱে সৰ্বশ্ৰেষ্ঠ প্ৰদৰ্শন দাঙি ধৰিছিল। শ্ৰী শ্বাহে কয় যে প্ৰধানমন্ত্ৰী মোদীয়ে সমগ্ৰ নক্সাল মুক্ত অঞ্চলটোলৈ এটা স্পষ্ট বাৰ্তা প্ৰেৰণ কৰিব বিচাৰে যে হিংসা কেতিয়াও কোনো বিবাদৰ সমাধান হ’ব নোৱাৰে। গণতান্ত্ৰিক মূল্যবোধ, পাৰস্পৰিক সহযোগিতা আৰু কেৱল উন্নয়নৰ ধাৰণাই ব্যক্তিৰ প্ৰগতিৰ ভেটি গঠন কৰিব পাৰে। হিংসাৰ জৰিয়তে কোনো ব্যক্তি, গাওঁ বা অঞ্চলৰ উন্নয়ন সম্ভৱ নহয়। দৰিদ্ৰতাৰ বাবে নক্সালবাদ বিয়পি পৰাৰ ধাৰণাটো বীৰ শ্বহীদ গুণ্ডাধুৰ সেৱা দেৰাই দূৰ কৰিব।

কেন্দ্ৰীয় গৃহ মন্ত্ৰীগৰাকীয়ে কয় যে এবাৰ এই সমগ্ৰ অঞ্চলটো সম্পূৰ্ণৰূপে বিকশিত হ'লে সমগ্ৰ বিশ্বলৈ এক শক্তিশালী বাৰ্তা প্ৰেৰণ কৰা হ'ব যে ইয়াত বিদ্যালয় নিৰ্মাণ কৰিব পৰা হোৱা নাছিল, কাৰণ নক্সালবাদীসকলে সেইবোৰ ধ্বংস কৰিছিল, পথ নিৰ্মাণ কৰিব পৰা হোৱা নাছিল, কাৰণ নক্সালবাদীসকলে বাধাৰ সৃষ্টি কৰিছিল, চিকিৎসালয়সমূহত কাম হোৱা নাছিল, কাৰণ নক্সালবাদীসকলে চিকিৎসালয়ৰ কৰ্মচাৰীসকলক হত্যা কৰিছিল আৰু বেংকসমূহ চলা নাছিল, কাৰণ নক্সালবাদীসকলে তেওঁলোকক লুট কৰি বন্ধ কৰিবলৈ বাধ্য কৰিছিল। শ্ৰী শ্বাহে কয় যে বাস্তাৰৰ শ্বহীদ বীৰ গুণ্ডাধুৰ সেৱা দেৰাই সমগ্ৰ দেশতে উন্নয়নৰ পথ তৈয়াৰ কৰাৰ নামত অস্ত্ৰ তুলি লোৱা সকলোৰে সন্মুখত উন্নয়নৰ এক গণতান্ত্ৰিক আৰ্হি উপস্থাপন কৰিব।

শ্ৰী অমিত শ্বাহে ভাৰত চৰকাৰ আৰু প্ৰধানমন্ত্ৰী শ্ৰী নৰেন্দ্ৰ মোদীৰ হৈ বাস্তাৰৰ সকলো বাসিন্দাক আশ্বাস দি কয় যে এতিয়া আৰু ভয়ত জীয়াই থকাৰ কোনো প্ৰয়োজন নাই-ইয়াত এক নতুন সূৰ্যোদয় আৰম্ভ হৈছে। তেওঁ কয় যে অঞ্চলটোৰ জনজাতীয় যুৱক-যুৱতী আৰু মহিলাসকলে সম্পূৰ্ণ আত্মবিশ্বাসৰে আগবাঢ়ি যোৱা উচিত, কিয়নো ভাৰত চৰকাৰ আৰু ছত্তীশগড় চৰকাৰ দুয়োটাই তেওঁলোকৰ সৈতে দৃঢ়ভাৱে থিয় দিছে। শ্ৰী শ্বাহে কয় যে পূৰ্বতে নক্সাল-প্ৰভাৱিত অঞ্চল বাস্তাৰ এতিয়া এখন উন্নত অঞ্চলত পৰিণত হ’বলৈ সাজু হোৱাৰ বাবে জনসাধাৰণ সতৰ্ক হৈ থাকিব লাগিব। এসময়ত বন্দুকৰে বাস্তাৰ ধ্বংস কৰিবলৈ চেষ্টা কৰা মাওবাদী আদৰ্শৰ দ্বাৰা অনুপ্ৰাণিত হোৱাসকলে এতিয়া ছদ্মৱেশত ঘূৰি আহিব পাৰে। তেওঁ জনসাধাৰণক তেওঁলোকৰ প্ৰচাৰৰ দ্বাৰা বিপথে পৰিচালিত নহ’বলৈ আহ্বান জনায়। তেওঁ গুৰুত্ব আৰোপ কৰি কয় যে ছত্তীশগড় চৰকাৰ তথা ভাৰত চৰকাৰ দুয়োটাই জনসাধাৰণৰ দ্বাৰা নিৰ্বাচিত চৰকাৰ আৰু গণতান্ত্ৰিক পদ্ধতিৰে বাস্তাৰৰ উন্নয়ন আগবঢ়াই নিব।

কেন্দ্ৰীয় গৃহ আৰু সমবায় মন্ত্ৰীগৰাকীয়ে কয় যে ভাৰত চৰকাৰ আৰু ছত্তীশগড় চৰকাৰে এই অঞ্চলক সমগ্ৰ দেশৰ আটাইতকৈ উন্নত জনজাতীয় খণ্ডলৈ ৰূপান্তৰিত কৰিবলৈ একেলগে কাম কৰিবলৈ প্ৰতিশ্ৰুতিবদ্ধ আৰু অহা পাঁচ বছৰৰ ভিতৰত বাস্তাৰৰ আয় ৬ গুণ বৃদ্ধিৰ সৈতে ভাৰতৰ সকলো জনজাতীয় অঞ্চলৰ ভিতৰত বাস্তাৰ আটাইতকৈ উন্নত জনজাতীয় খণ্ড হৈ পৰিব। তেওঁ লগতে কয় যে নক্সাল-মুক্ত ভাৰতৰ সম্পূৰ্ণ কৃতিত্ব আমাৰ নিৰাপত্তা বাহিনীৰ জোৱানসকল আৰু তেওঁলোকৰ পৰিয়াললৈ যায়, যিসকলে সৰ্বোচ্চ ত্যাগ কৰিছিল।

****

RK/RR/PR/PS/MK