مرکزی وزیر داخلہ اور امدادِ باہمی کے مرکزی وزیر جناب امت شاہ نے آج چھتیس گڑھ کے شہر جگدلپور میں ایک اہم پریس کانفرنس سے خطاب کیا۔

میڈیا نمائندوں سے گفتگو کرتے ہوئے انہوں نے کہا کہ جب چھتیس گڑھ میں جناب وشنو دیو سائے کی قیادت میں ہماری پارٹی کی حکومت بنی، تو اسی وقت مرکز میں بھی وزیر اعظم نریندر مودی کی قیادت میں حکومت موجود تھی۔ انہوں نے مزید کہا کہ 13 دسمبر 2023 کو یہاں حکومت کی تشکیل کے فوراً بعد ہم نے بستر سے نکسلیوں کے مکمل خاتمے کی مہم کو دوبارہ تیز کیا۔ جناب امت شاہ نے واضح کیا کہ 24 اگست 2024 کو تمام ریاستوں کے ڈائریکٹرز جنرل آف پولیس (ڈی جی پیز) کے اجلاس کے بعد یہ اعلان کیا گیا تھا کہ ملک کو 31 مارچ 2026 تک نکسل ازم سے پاک کر دیا جائے گا۔ انہوں نے فخر کا اظہار کرتے ہوئے کہا کہ ہماری سیکورٹی فورسز کی بہادری، جرات اور لازوال قربانیوں کی بدولت ملک سے نکسل ازم کا مکمل خاتمہ مقررہ ہدف یعنی 31 مارچ 2026 سے پہلے ہی حاصل کر لیا گیا ہے۔

جناب امت شاہ نے کہا کہ 19 مئی 2026 کی تاریخ بھی انتہائی اہمیت کی حامل ہے۔ انہوں نے یاد دلایا کہ جب سے نکسل باری سے نکسل ازم پھیلنا شروع ہوا، اس کے حامی دانشور یہ دلیل دیا کرتے تھے کہ نکسل ازم اس لیے موجود ہے کیونکہ بعض علاقوں تک ترقی نہیں پہنچی۔ انہوں نے اس مفروضے کو مسترد کرتے ہوئے کہا کہ یہ سچ نہیں تھا، کیونکہ ملک میں ایسے کئی علاقے تھے جو نکسل متاثرہ علاقوں سے بھی زیادہ پسماندہ تھے، لیکن وہاں نکسل ازم نہیں پھیلا اور وہ علاقے آہستہ آہستہ ترقی کی راہ پر گامزن ہو گئے۔ تاہم، ہمارا بستر اور دیگر نکسل متاثرہ علاقے نکسلیوں کی وجہ سے ترقی سے محروم رہے۔

وزیر داخلہ نے بتایا کہ آج 19 مئی 2026 کو اسی سابقہ نکسل متاثرہ علاقے میں جامع ترقی کے وژن کا آغاز کیا جا رہا ہے۔ انہوں نے مطلع کیا کہ گزشتہ روز ہی 'ویر شہید گندادھر سیوا ڈیرا' کا افتتاح کیا گیا ہے۔ بستر کے سات اضلاع کو نکسل ازم سے نجات دلانے کے لیے وزارتِ داخلہ نے اس خطے میں تقریباً 200 سیکیورٹی کیمپ قائم کیے تھے۔ اب جب کہ بستر نکسل ازم سے پاک ہو چکا ہے، یہ فیصلہ کیا گیا ہے کہ پہلے مرحلے میں ان 200 کیمپوں میں سے 70 کو 'ویر شہید گندادھر سیوا ڈیرا' میں تبدیل کر دیا جائے گا۔ ان سیوا ڈیروں کا مقصد بستر کے ہر قبائلی بھائی اور بہن کی دہلیز تک سرکاری سہولیات اور خدمات پہنچانا ہے۔ ہر سیوا ڈیرا میں کامن سروس سینٹرز (سی ایس سیز) کے ذریعے بینکنگ خدمات، آدھار کارڈ کی سہولیات، تمام ڈیجیٹل خدمات اور ریاستی و مرکزی حکومتوں کی 371 اسکیموں کے فوائد ایک ہی چھت کے نیچے دستیاب ہوں گے۔ مقصد یہ ہے کہ جو شہری 50 سال سے ترقی سے محروم تھے، انہیں تمام سرکاری اسکیموں کا 100 فیصد فائدہ ملے۔ جناب شاہ نے کہا کہ ان سیوا ڈیروں میں ایک پرائمری زراعتی کریڈٹ سوسائٹی (پیکس) اور ڈیری کی سہولت بھی قائم کی جائے گی، جس سے ہر قبائلی خاتون اپنے مویشیوں کا دودھ فراہم کر سکے گی۔ حکومت بستر کے ہر قبائلی خاندان کو ایک گائے اور ایک بھینس فراہم کرے گی تاکہ وہ کوآپریٹو سسٹم کے ذریعے اپنا دودھ پورے ملک میں فروخت کر سکیں۔ اگلے چھ ماہ میں پورے بستر ڈویژن میں ایک بڑا ڈیری نیٹ ورک تیار کیا جا رہا ہے۔

جناب امت شاہ نے کہا کہ ماضی میں یہ علاقہ بندوقوں اور سنگینوں کے سائے میں تھا، لیکن اب یہاں ترقی پہنچے گی۔ نکسلیوں کی وجہ سے یہاں کے لوگوں کو نہ راشن کارڈ ملے، نہ مفت اناج کی اسکیموں کا فائدہ ملا اور نہ ہی 5 لاکھ روپے تک کا ہیلتھ انشورنس ملا۔ ان کی فصلیں 3,100 روپے فی کوئنٹل کے حساب سے نہیں خریدی جاتی تھیں۔ روزگار، بجلی، پانی اور اسکولوں کا کوئی نام و نشان نہیں تھا۔ انہوں نے کہا کہ ان سیوا ڈیروں کے ذریعے ہم یہ تمام سہولیات فراہم کرنے جا رہے ہیں۔ 'ویر شہید گندادھر سیوا ڈیرا' نکسل زدہ بستر کو ایک ترقی یافتہ بستر میں تبدیل کرنے کا بڑا ذریعہ بنے گا۔ مزید برآں، جنگلاتی پیداوار (فارسٹ پروڈیوس) کو کوآپریٹیوز کے ذریعے پروسیس کیا جائے گا اور اس کا پورا منافع قبائلی برادریوں کو دیا جائے گا۔

مرکزی وزیر داخلہ نے کہا کہ وزیر اعظم نریندر مودی کی قیادت میں حکومت ہند نے بستر کی ترقی کے لیے کئی بڑے کام کیے ہیں۔ ہم نے 20,557 کروڑ روپے کی لاگت سے 12,211 کلومیٹر سڑکوں کی تعمیر مکمل کی ہے۔ ملک کے نکسل متاثرہ علاقوں میں کل 13,000 موبائل ٹاورز لگانے کا منصوبہ تھا، جن میں سے 5,000 ٹاورز نصب کیے جا چکے ہیں۔ 1,804 بینک برانچیں کھولی گئی ہیں، 1,321 اے ٹی ایم لگائے گئے ہیں اور 890 پوسٹ آفس کھولنے کا کام بھی مکمل ہو چکا ہے۔ اس کے علاوہ 259 ایکلویا ماڈل اسکول، 46 آئی ٹی آئیز اور 49 اسکل ڈیولپمنٹ سینٹرز قائم کیے گئے ہیں، جہاں 90,000 سے زائد نوجوانوں اور خواتین کو ہنر کی تربیت دی گئی ہے۔ جناب شاہ نے کہا کہ مودی حکومت نے قبائلی علاقوں کے لیے ایک جامع ترقیاتی منصوبہ تیار کیا ہے، جس کے تحت ترقیاتی اسکیموں کی مکمل فراہمی، فول پروف سیکیورٹی، نوجوانوں اور خواتین کی بااختیاری کا سائنسی پروگرام اور مقامی ورثے کی حفاظت کرتے ہوئے قبائلی ثقافت اور روایات کا تحفظ و فروغ شامل ہے۔

جناب امت شاہ نے کہا کہ ہم نے یہاں 'بستر پنڈم' (ثقافتی فیسٹیول) کا آغاز کیا ہے۔ وزیر اعظم مودی نے ہمیں قبائلی ثقافت کو محفوظ رکھنے کے لیے مخلصانہ کوششیں کرنے کی ترغیب دی تھی۔ بستر پنڈم کے تحت قبائلی رقص، گیت، زبان، روایتی لباس اور کھانوں کو ایک بڑا پلیٹ فارم ملا ہے۔ ایک سال پہلے اس میں 45,000 لوگوں نے شرکت کی تھی۔ اسی طرح دو بار 'بستر اولمپکس' کا انعقاد بھی کیا جا چکا ہے، جس کے حالیہ ایڈیشن میں 3 لاکھ 94 ہزار ایتھلیٹس نے حصہ لیا۔ اس میں ہمارے ان سابق نکسلی بھائی بہنوں کی ٹیم بھی شامل تھی جنہوں نے ہتھیار ڈال کر بحالی کو قبول کیا تھا، اور اس ٹیم نے بہترین کارکردگی کا مظاہرہ کیا۔ جناب شاہ نے کہا کہ وزیر اعظم مودی اس نکسل فری خطے کو واضح پیغام دینا چاہتے ہیں کہ تشدد کبھی بھی کسی تنازع کا حل نہیں ہو سکتا۔ صرف جمہوری اقدار، باہمی تعاون اور ترقی کا نظریہ ہی انسانی ترقی کی بنیاد بن سکتا ہے۔ تشدد سے کسی شخص، گاؤں یا خطے کی ترقی ممکن نہیں۔ غربت کی وجہ سے نکسل ازم پھیلنے کا واہمہ اب 'ویر شہید گندادھر سیوا ڈیرا' کے ذریعے ہمیشہ کے لیے ختم ہو جائے گا۔

وزیر داخلہ نے کہا کہ جب یہ پورا خطہ مکمل طور پر ترقی یافتہ ہو جائے گا، تو پوری دنیا کو ایک مضبوط پیغام جائے گا کہ یہاں اسکول اس لیے نہیں بن سکے کیونکہ نکسلیوں نے انہیں تباہ کر دیا تھا، سڑکیں اس لیے نہیں بن سکیں کیونکہ نکسلیوں نے رکاوٹیں کھڑی کیں، ہسپتال اس لیے کام نہیں کر سکے کیونکہ نکسلیوں نے طبی عملے کو قتل کیا اور بینک اس لیے نہیں آئے کیونکہ نکسلیوں نے انہیں لوٹ کر بند ہونے پر مجبور کیا۔ جناب شاہ نے کہا کہ بستر میں قائم یہ سیوا ڈیرا ملک بھر میں ترقی کے نام پر ہتھیار اٹھانے والوں کے سامنے ترقی کا ایک مثالی جمہوری ماڈل پیش کرے گا۔

جناب امت شاہ نے حکومت ہند اور وزیر اعظم نریندر مودی کی طرف سے بستر کے تمام باشندوں کو یقین دلایا کہ اب خوف کے سائے میں جینے کی ضرورت نہیں ہے، یہاں ایک نئی صبح کا آغاز ہو چکا ہے۔ انہوں نے کہا کہ خطے کے قبائلی نوجوان اور خواتین پورے اعتماد کے ساتھ آگے بڑھیں، کیونکہ حکومت ہند اور چھتیس گڑھ حکومت مضبوطی کے ساتھ ان کے ساتھ کھڑی ہے۔ جناب شاہ نے لوگوں کو متنبہ بھی کیا کہ چونکہ بستر اب ترقی یافتہ علاقہ بننے جا رہا ہے، اس لیے لوگوں کو ہوشیار رہنا ہوگا۔ ماؤ نواز نظریات سے متاثر جن لوگوں نے کبھی بندوقوں کے زور پر بستر کو تباہ کرنے کی کوشش کی تھی، وہ اب بھیس بدل کر واپس آ سکتے ہیں۔ انہوں نے عوام سے اپیل کی کہ وہ ان کے پروپیگنڈے سے گمراہ نہ ہوں۔ انہوں نے زور دیا کہ چھتیس گڑھ اور مرکز کی حکومتیں عوام کی منتخب کردہ حکومتیں ہیں اور وہ جمہوری طریقوں سے بستر کی ترقی کو آگے بڑھائیں گی۔

مرکزی وزیر داخلہ اور امدادِ باہمی کے مرکزی وزیر نے کہا کہ دونوں حکومتیں اس خطے کو پورے ملک کا سب سے ترقی یافتہ قبائلی ڈویژن بنانے کے لیے کندھے سے کندھا ملا کر کام کرنے کے لیے پرعزم ہیں۔ اگلے پانچ سالوں کے اندر بستر کی آمدنی میں 6 گنا اضافہ کر کے اسے ہندوستان کے تمام قبائلی خطوں میں سب سے زیادہ ترقی یافتہ قبائلی ڈویژن بنا دیا جائے گا۔ انہوں نے آخر میں کہا کہ نکسل ازم سے پاک ہندوستان کا پورا کریڈٹ ہماری سیکیورٹی فورسز کے ان جوانوں کو جاتا ہے جنہوں نے ملک کے لیے عظیم قربانی دی اور ان کے پسماندگان کو جاتا ہے۔

************

ش ح ۔   م  د ۔  م  ص

(U : 7285 )