କେନ୍ଦ୍ର କୃଷି ଓ କୃଷକ କଲ୍ୟାଣ ଏବଂ ଗ୍ରାମୀଣ ବିକାଶ ମନ୍ତ୍ରୀ ଶିବରାଜ ସିଂହ ଚୌହାନ ଆଜି ଭୁବନେଶ୍ୱରଠାରେ ପୂର୍ବାଞ୍ଚଳ କୃଷି ସମ୍ମିଳନୀକୁ ଉଦଘାଟନ କରିଛନ୍ତି । ଏହି ଅବସରରେ ଓଡ଼ିଶା ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଉପସ୍ଥିତ ଥିଲେ । ସମ୍ମିଳନୀରେ ପୂର୍ବ ଭାରତର କୃଷି ପରିବର୍ତ୍ତନ ସମ୍ପର୍କିତ ପ୍ରମୁଖ ପ୍ରସଙ୍ଗ ଉପରେ ବିଚାରବିମର୍ଶ କରିବା ଉଦ୍ଦେଶ୍ୟରେ ଓଡ଼ିଶା, ବିହାର, ଝାଡ଼ଖଣ୍ଡ, ଛତିଶଗଡ଼ ଏବଂ ପଶ୍ଚିମବଙ୍ଗର ପ୍ରତିନିଧିମାନେ ଯୋଗ ଦେଇଛନ୍ତି ।

ସମ୍ମିଳନୀରେ ଡାଲି ଓ ତୈଳବୀଜ ଉତ୍ପାଦନ ବୃଦ୍ଧି, କ୍ଷୁଦ୍ର ଓ ନାମମାତ୍ର ଚାଷୀଙ୍କ ପାଇଁ ସମନ୍ୱିତ କୃଷି, ପ୍ରାକୃତିକ କୃଷି, ଚାଷୀ ପଞ୍ଜିକରଣ, ଉଦ୍ୟାନ କୃଷି, କୃଷି ଋଣ, ବିପଣନ ସଂସ୍କାର, ନକଲି କୃଷି ଇନପୁଟ୍ ଉପରେ ନିୟନ୍ତ୍ରଣ ଏବଂ ଚାଷୀଙ୍କ ଆୟ ବୃଦ୍ଧି ସମେତ ବିଭିନ୍ନ ପ୍ରସଙ୍ଗରେ ଆଲୋଚନା କରାଯାଇଥିଲା।

ଉଦଘାଟନୀ ଅଧିବେଶନରେ ଉଦବୋଧନ ଦେଇ କେନ୍ଦ୍ର ମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ କହିଥିଲେ, ଏହି ସମ୍ମିଳନୀ କେବଳ ଏକ ଆନୁଷ୍ଠାନିକ କାର୍ଯ୍ୟକ୍ରମ ନୁହେଁ, ବରଂ ପୂର୍ବ ଭାରତରେ କୃଷି, କୃଷକଙ୍କ ଜୀବିକା ଏବଂ ଆଞ୍ଚଳିକ କୃଷି ରଣନୀତି ପ୍ରସ୍ତୁତି ପାଇଁ ଏକ ଗୁରୁତ୍ୱପୂର୍ଣ୍ଣ ମଞ୍ଚ। ସେ କହିଥିଲେ, ମହାପ୍ରଭୁ ଜଗନ୍ନାଥଙ୍କ ପବିତ୍ର ଭୂମିରେ ‘ଟିମ୍ ଏଗ୍ରିକଲଚର’ ପୂର୍ବାଞ୍ଚଳର କୃଷି ପରିସ୍ଥିତିରେ ଉନ୍ନତି ଆଣିବା ଏବଂ କୃଷକଙ୍କ ଆୟ ବୃଦ୍ଧି କରିବାର ସଂକଳ୍ପ ନେବାକୁ ଏକାଠି ହୋଇଛି ।

ପୂର୍ବ ଭାରତର ଉର୍ବର ଜମି, ପ୍ରଚୁର ଜଳସମ୍ପଦ, ବିବିଧ ଜଳବାୟୁ ପରିସ୍ଥିତି ଏବଂ କଠିନ ପରିଶ୍ରମୀ ଚାଷୀମାନଙ୍କ ସମ୍ପର୍କରେ ଉଲ୍ଲେଖ କରି କେନ୍ଦ୍ରମନ୍ତ୍ରୀ କହିଥିଲେ, ଏହି ଶକ୍ତିଗୁଡ଼ିକ ସଠିକ୍ ହସ୍ତକ୍ଷେପ ଏବଂ ନୀତି ସହିତ ସ୍ଥାନୀୟ ଅଞ୍ଚଳକୁ ଭାରତର କୃଷି ବିକାଶର ଅଭିବୃଦ୍ଧି ଇଞ୍ଜିନ କରିବାର ସମ୍ଭାବନା ରଖିଛି ।

ଶ୍ରୀ ଚୌହାନ କହିଥିଲେ, ଚାଷୀମାନେ କେବଳ 'ଅନ୍ନଦାତା' ନୁହେଁ ବରଂ 'ଜୀବନଦାତା'। କୃଷକମାନଙ୍କର ସେବା କରିବା ଈଶ୍ୱରଙ୍କ ସେବା କରିବା ସହିତ ସମାନ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ଏକ ବିକଶିତ, ଆତ୍ମନିର୍ଭରଶୀଳ, ସମୃଦ୍ଧ ଏବଂ ଶକ୍ତିଶାଳୀ ରାଷ୍ଟ୍ର ହେବା ଦିଗରେ ଅଗ୍ରଗତି କରୁଛି ଏବଂ କୃଷି ଏହି ଯାତ୍ରାର ମେରୁଦଣ୍ଡ । ସେ କୃଷି କ୍ଷେତ୍ର ପାଇଁ ତିନୋଟି ପ୍ରମୁଖ ପ୍ରାଥମିକତା ଉଲ୍ଲେଖ କରିଥିଲେ। ସେଗୁଡ଼ିକ ହେଲା ୧୪୦ କୋଟି ନାଗରିକଙ୍କ ପାଇଁ ଖାଦ୍ୟ ସୁରକ୍ଷା ସୁନିଶ୍ଚିତ କରିବା, ପୁଷ୍ଟିକର ଖାଦ୍ୟ ଯୋଗାଇବା ଏବଂ କୃଷକମାନଙ୍କ ପାଇଁ ଉତ୍ତମ ଜୀବିକା ଏବଂ ଉଚ୍ଚ ଆୟ ସୁରକ୍ଷିତ କରିବା। 

କେନ୍ଦ୍ର ମନ୍ତ୍ରୀ ଗୁରୁତ୍ୱାରୋପ କରି କହିଥିଲେ, ଉତ୍ପାଦନ ବୃଦ୍ଧି, ଚାଷ ଖର୍ଚ୍ଚ ହ୍ରାସ, ଲାଭଦାୟକ ମୂଲ୍ୟ ସୁନିଶ୍ଚିତ କରିବା, କ୍ଷତିପୂରଣ ଏବଂ କୃଷିର ବିବିଧତା ଆଜିର ସବୁଠୁ ଗୁରୁତ୍ୱପୂର୍ଣ୍ଣ ପ୍ରାଥମିକତା। କୃଷି କେବଳ ଧାନ ଏବଂ ଗହମ ମଧ୍ୟରେ ସୀମିତ ରହିପାରିବ ନାହିଁ। ବର୍ତ୍ତମାନ ଡାଲି, ତୈଳବୀଜ, ଫଳ, ପନିପରିବା ଏବଂ ଅନ୍ୟାନ୍ୟ ଉଚ୍ଚ-ମୂଲ୍ୟ ଫସଲ ଉପରେ ଅଧିକ ଧ୍ୟାନ ଦିଆଯିବା ଆବଶ୍ୟକ। ବିଶେଷକରି ପୂର୍ବ ଭାରତର ଏହି କ୍ଷେତ୍ରଗୁଡ଼ିକରେ ପ୍ରଚୁର ସମ୍ଭାବନା ରହିଥିବା ସେ ଉଲ୍ଲେଖ କରିଥିଲେ । 

ପୂର୍ବାଞ୍ଚଳରେ ଛୋଟ ଛୋଟ ଚାଷ ଜମିର ଉପଲବ୍ଧତା ବିଷୟରେ ଉଲ୍ଲେଖ କରି ଶ୍ରୀ ଚୌହାନ କହିଥିଲେ, ସମନ୍ୱିତ କୃଷିକୁ ବ୍ୟବହାରିକ ଏବଂ କ୍ଷେତ୍ରସ୍ତରୀର ମଡେଲରେ ପରିଣତ କରାଯିବା ଉଚିତ୍‌। ଉଦ୍ୟାନ କୃଷି, ମତ୍ସ୍ୟପାଳନ, ପ୍ରାଣୀସମ୍ପଦ, ମହୁମାଛି ପାଳନ ଏବଂ କୃଷି-ବନୀକରଣ ସହିତ ଫସଲ ଚାଷକୁ ମିଶ୍ରଣ କରିବା ଦ୍ୱାରା କ୍ଷୁଦ୍ର ଚାଷୀଙ୍କ ଆୟ ଯଥେଷ୍ଟ ବୃଦ୍ଧି ପାଇପାରିବ। ସମନ୍ୱିତ କୃଷି ମଡେଲଗୁଡ଼ିକୁ ପ୍ରେରଣାଦାୟକ ଏବଂ ବ୍ୟବହାରିକ ଭାବରେ ଚାଷୀମାନଙ୍କୁ ପ୍ରଦର୍ଶିତ କରିବା ନିମନ୍ତେ ସେ ରାଜ୍ୟ କୃଷି ମନ୍ତ୍ରୀ ଏବଂ ଅଧିକାରୀମାନଙ୍କୁ ଅନୁରୋଧ କରିଥିଲେ ।

ଦୀର୍ଘସ୍ଥାୟୀ କୃଷି ଉପରେ ଗୁରୁତ୍ୱାରୋପ କରି, କେନ୍ଦ୍ର ମନ୍ତ୍ରୀ ସନ୍ତୁଳିତ ସାର ବ୍ୟବହାର ମାଧ୍ୟମରେ ମାଟିର ସ୍ୱାସ୍ଥ୍ୟ ସୁରକ୍ଷା ଉପରେ ଗୁରୁତ୍ୱାରୋପ କରିଥିଲେ। ସେ ଚେତାଇ ଦେଇଥିଲେ ଯେ ମାଟି ପରୀକ୍ଷା ବିନା ସାରର ଅବାଧ ବ୍ୟବହାର ଇନପୁଟ୍ ଖର୍ଚ୍ଚ ବୃଦ୍ଧି କରିଥାଏ ଏବଂ ମାଟିର ଉର୍ବରତାକୁ କ୍ଷତି ପହଞ୍ଚାଏ। ସେ ରାଜ୍ୟଗୁଡ଼ିକୁ କେବଳ ବୈଜ୍ଞାନିକ ଆବଶ୍ୟକତା ଅନୁଯାୟୀ ସାର ବ୍ୟବହାର କରିବାକୁ ଚାଷୀମାନଙ୍କୁ ଉତ୍ସାହିତ କରିବାକୁ ଅନୁରୋଧ କରିଥିଲେ। ପ୍ରଧାନମନ୍ତ୍ରୀଙ୍କ ଏକ ପ୍ରମୁଖ କେନ୍ଦ୍ରବିନ୍ଦୁ କ୍ଷେତ୍ର ଭାବରେ ପ୍ରାକୃତିକ କୃଷିକୁ ଉଲ୍ଲେଖ କରି, ସେ ଚାଷୀମାନଙ୍କୁ ସେମାନଙ୍କ ଜମିର ଅତି କମରେ ଗୋଟିଏ ଅଂଶରେ ପ୍ରାକୃତିକ କୃଷି ପଦ୍ଧତି ଗ୍ରହଣ କରିବାକୁ ଆହ୍ୱାନ କରିଥିଲେ।

ଜୁନ୍ ୧ ତାରିଖରୁ ଦେଶବ୍ୟାପୀ 'ଖେତ ବଚାଓ ଅଭିଯାନ' ଆରମ୍ଭ କରାଯିବ ବୋଲି ଶ୍ରୀ ଚୌହାନ ଘୋଷଣା କରିଥିଲେ । ଏହା ସନ୍ତୁଳିତ ସାର ବ୍ୟବହାର, ମୃତ୍ତିକା ସ୍ୱାସ୍ଥ୍ୟ, ଆଧୁନିକ ପ୍ରଯୁକ୍ତିବିଦ୍ୟା ଗ୍ରହଣ, ସରକାରୀ ଯୋଜନା ବିଷୟରେ ସଚେତନତା ଏବଂ ଚାଷୀଙ୍କ ଶିକ୍ଷା ଓ ସଚେତନତା ଉପରେ ଧ୍ୟାନ ଦେବ। ସବସିଡିଯୁକ୍ତ ସାରର ବିପରୀତ ପ୍ରକ୍ରିୟାକୁ ରୋକିବା ଏବଂ ସବସିଡିଯୁକ୍ତ ଇନପୁଟ୍‌କୁ କୃଷି ଉଦ୍ଦେଶ୍ୟରେ କଡ଼ାକଡ଼ି ଭାବରେ ବ୍ୟବହାର କରିବା ନିଶ୍ଚିତ କରିବା ଉପରେ ସେ ଗୁରୁତ୍ୱାରୋପ କରିଥିଲେ ।

ନକଲି ସାର, ନିମ୍ନମାନର ବିହନ ଏବଂ ନକଲି କୀଟନାଶକକୁ ଚାଷୀଙ୍କ ବିରୁଦ୍ଧରେ ଗମ୍ଭୀର ଅପରାଧ ବୋଲି ବର୍ଣ୍ଣନା କରି କେନ୍ଦ୍ରମନ୍ତ୍ରୀ କହିଥିଲେ, ଏପରି ଅଭ୍ୟାସ ବିରୁଦ୍ଧରେ ଏକ ବଡ଼ ଅଭିଯାନ ଆରମ୍ଭ କରାଯିବ। ଚାଷୀମାନେ ଚାଷ ଖର୍ଚ୍ଚରେ ଅନାବଶ୍ୟକ ବୃଦ୍ଧି ବିନା ଗୁଣାତ୍ମକ କୃଷି ଇନପୁଟ୍‌ ପାଇବା ନିଶ୍ଚିତ କରିବା ପାଇଁ ରାଜ୍ୟଗୁଡ଼ିକ ଦ୍ୱାରା କଠୋର ଆଇନ ଏବଂ ଦୃଢ଼ କାର୍ଯ୍ୟାନୁଷ୍ଠାନର ଆବଶ୍ୟକତା ଉପରେ ମଧ୍ୟ ସେ ଗୁରୁତ୍ୱାରୋପ କରିଥିଲେ ।

ଡାଲି ଏବଂ ତୈଳବୀଜ ଉତ୍ପାଦନ ବୃଦ୍ଧି କରିବାର ଆବଶ୍ୟକତା ଉପରେ ଆଲୋକପାତ କରି ଶ୍ରୀ ଚୌହାନ କହିଥିଲେ, ପୂର୍ବ ଭାରତରେ ଦେଶକୁ ଏହି କ୍ଷେତ୍ରଗୁଡ଼ିକରେ ଆତ୍ମନିର୍ଭରଶୀଳ କରିବାର ଅପାର ସମ୍ଭାବନା ରହିଛି। କ୍ରୟ ସହାୟତା ନିଶ୍ଚିତ ହେଲେ ଯାଇ ଚାଷୀମାନେ କେବଳ ଡାଲି ଏବଂ ତୈଳବୀଜ ଚାଷ ବୃଦ୍ଧି କରିବେ। ଏହି ପରିପ୍ରେକ୍ଷୀରେ, ସେ ପିଏମ-ଆଶା, କ୍ରୟ ବ୍ୟବସ୍ଥା, ନାଫେଡ, ଏନସିସିଏଫ ଏବଂ ରାଜ୍ୟ ଏଜେନ୍ସିଗୁଡ଼ିକୁ ମଜବୁତ କରିବା ଉପରେ ଗୁରୁତ୍ୱାରୋପ କରିଥିଲେ ।

କେନ୍ଦ୍ରମନ୍ତ୍ରୀ ଆଇସିଏଆର, କୃଷି ବିଜ୍ଞାନ କେନ୍ଦ୍ର ଏବଂ ଅନ୍ୟାନ୍ୟ ବୈଜ୍ଞାନିକ ପ୍ରତିଷ୍ଠାନ ମାଧ୍ୟମରେ ସିଧାସଳଖ କୃଷକମାନଙ୍କ ନିକଟରେ ବୈଜ୍ଞାନିକ ଗବେଷଣା ଏବଂ ପ୍ରଯୁକ୍ତିବିଦ୍ୟା ପହଞ୍ଚାଇବା ଉପରେ ମଧ୍ୟ ଗୁରୁତ୍ୱାରୋପ କରିଥିଲେ। କୃଷି ଗବେଷଣା ନିଷ୍କର୍ଷ, ଆଧୁନିକ ପ୍ରଯୁକ୍ତିବିଦ୍ୟା ଏବଂ ଯୋଜନା ସମ୍ବନ୍ଧୀୟ ସୂଚନା ଚାଷୀମାନଙ୍କ ନିକଟରେ ସମୟୋଚିତ ପ୍ରସାରଣ ସୁନିଶ୍ଚିତ କରିବା ପାଇଁ କ୍ଷେତ୍ର-ନିର୍ଦ୍ଦିଷ୍ଟ ଅଭିଯାନ ଆରମ୍ଭ କରିବାକୁ ସେ ରାଜ୍ୟଗୁଡ଼ିକୁ ଅନୁରୋଧ କରିଥିଲେ।

ଶ୍ରୀ ଚୌହାନ କୃଷକ ପରିଚୟପତ୍ର ବା ଫାର୍ମର ଆଇଡିକୁ ଏକ ପ୍ରଭାବଶାଳୀ ବ୍ୟବସ୍ଥା ଭାବରେ ବର୍ଣ୍ଣନା କରିଥିଲେ । ଚାଷୀମାନଙ୍କୁ ସରଳ, ସ୍ୱଚ୍ଛ ଏବଂ ଦ୍ରୁତ ଗତିରେ ଲାଭ ପହଞ୍ଚାଇବା ପାଇଁ ଏହା ଉପଯୋଗୀ ହେବ ବୋଲି ସେ କହିଥିଲେ। କେନ୍ଦ୍ର ମନ୍ତ୍ରୀ ଆହୁରି କହିଥିଲେ, ଫାର୍ମର ଆଇଡି ଚାଷୀଙ୍କ ଜମି, ପରିବାର ଏବଂ ଅନ୍ୟାନ୍ୟ ବିବରଣୀକୁ ଗୋଟିଏ ପ୍ଲାଟଫର୍ମରେ ଏକୀକୃତ କରିବାରେ ସାହାଯ୍ୟ କରିବ, ଯାହାଦ୍ଵାରା ଋଣ, ସାର ଏବଂ ସରକାରୀ ଯୋଜନାର ଲାଭ ପାଇବାରେ ବିଳମ୍ବ ଓ ଅସୁବିଧା ହ୍ରାସ ପାଇବ।

ସେ ଉଦ୍ୟାନ କୃଷି, ଆମ୍ବ ଭଳି ଉଚ୍ଚ-ମୂଲ୍ୟର ଫସଲ, ରପ୍ତାନି ସମ୍ଭାବନା, ସ୍ୱଚ୍ଛ ରୋପଣ ସାମଗ୍ରୀ, ନର୍ସରୀ ବ୍ୟବସ୍ଥା ଏବଂ ବଜାର-ମୁଖୀ କୃଷି ଅଧିକ ଗୁରୁତ୍ୱାରୋପ କରିଥିଲେ। ପୂର୍ବ ଭାରତରେ ଚାଷ ହେଉଥିବା ଫଳ, ପନିପରିବା ଏବଂ ସ୍ୱତନ୍ତ୍ର ଫସଲ କେବଳ ଘରୋଇ ବଜାରରେ ନୁହେଁ ବରଂ ରପ୍ତାନିରେ ମଧ୍ୟ ଭଲ ମୂଲ୍ୟ ପାଇବାର ସମ୍ଭାବନା ରହିଛି ବୋଲି ସେ ମତ ଦେଇଥିଲେ ।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କାର୍ଯ୍ୟକ୍ରମରେ କହିଥିଲେ, ପୂର୍ବାଞ୍ଚଳ କୃଷି ସମ୍ମିଳନୀ ପୂର୍ବାଞ୍ଚଳ ରାଜ୍ୟଗୁଡ଼ିକୁ କୃଷିର ଭବିଷ୍ୟତ ପାଇଁ ଏକ ସହଭାଗୀ ରୋଡମ୍ୟାପ୍ ପ୍ରସ୍ତୁତ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ସୁଯୋଗ ପ୍ରଦାନ କରେ। ସେ କେନ୍ଦ୍ର କୃଷି ମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନଙ୍କୁ ଏହି ସମ୍ମିଳନୀ ଆୟୋଜନ କରିବା ପାଇଁ ଧନ୍ୟବାଦ ଜଣାଇଥିଲେ। ସେ କହିଥିଲେ, ଏହା ପୂର୍ବ ଭାରତରେ କୃଷି ଉତ୍ପାଦକତା, ଜଳବାୟୁ-ପ୍ରତିରୋଧୀ କୃଷି ଏବଂ ସମାବେଶୀ କୃଷି ବିକାଶକୁ ନୂତନ ଗତି ଦେବା ସହିତ 'ପୂର୍ବୋଦୟ'ର ଦୃଷ୍ଟିକୋଣକୁ ମଜବୁତ କରିବ।

ମୁଖ୍ୟମନ୍ତ୍ରୀ କହିଥିଲେ, ଓଡ଼ିଶା ମୌଳିକ ଭାବରେ ଏକ କୃଷିପ୍ରଧାନ ରାଜ୍ୟ। ଏଠାରେ କୃଷି ହେଉଛି ଜୀବିକା, ଖାଦ୍ୟ ସୁରକ୍ଷା ଏବଂ ସାମାଜିକ-ଆର୍ଥିକ ବିକାଶର ଆଧାର । ରାଜ୍ୟ ସରକାର ଏକାଧିକ ପ୍ରମୁଖ ପଦକ୍ଷେପ ମାଧ୍ୟମରେ କୃଷିକୁ ଅଧିକ ସମାବେଶୀ, ଜଳବାୟୁ-ଅନୁକୂଳ ଏବଂ କୃଷକ-କୈନ୍ଦ୍ରିକ କରିବାକୁ ସଂକଳ୍ପବଦ୍ଧ।

ଓଡ଼ିଶାର ଚାଷୀ କୈନ୍ଦ୍ରିକ ପଦକ୍ଷେପ ଉପରେ ଆଲୋକପାତ କରି ମୁଖ୍ୟମନ୍ତ୍ରୀ କହିଥିଲେ, ଧାନ ସଂଗ୍ରହ, ଇନପୁଟ୍ ସହାୟତା, ପ୍ରଧାନମନ୍ତ୍ରୀ-କିଷାନ ସହିତ ମୁଖ୍ୟମନ୍ତ୍ରୀ-କିଷାନ ସହାୟତା, ଫସଲ ବୀମା, କୃଷି ଯାନ୍ତ୍ରିକୀକରଣ, ଏଫପିଓ ସୁଦୃଢ଼ୀକରଣ, ଶୀତଳ ଭଣ୍ଡାର ସମ୍ପ୍ରସାରଣ ଏବଂ କୃଷି-ଶିଳ୍ପର ପ୍ରୋତ୍ସାହନ ପାଇଁ ଅନେକ ପଦକ୍ଷେପ ନିଆଯାଇଛି । ଚାଷୀମାନଙ୍କୁ ଦୀର୍ଘସ୍ଥାୟୀ ଏବଂ ଲାଭଦାୟକ କୃଷି ସହ ଯୋଡ଼ିବା ପାଇଁ ନୀତିଗତ ସମର୍ଥନ, ଭିତ୍ତିଭୂମି, ସଂଗଠିତ ବିପଣନ ବ୍ୟବସ୍ଥା ଏବଂ ଉଦ୍ୟୋଗ ଆଧାରିତ ପଦ୍ଧତି ଆବଶ୍ୟକ ବୋଲି ସେ ଗୁରୁତ୍ୱାରୋପ କରିଥିଲେ।

ମିଲେଟ୍ସ ବା ଶ୍ରୀ ଅନ୍ନକୁ 'ସୁପର ଫୁଡ୍' ବୋଲି ଅଭିହିତ କରି ଶ୍ରୀ ମାଝୀ କହିଥିଲେ, ଏହି ଫସଲ ପାଇଁ କମ୍ ପାଣି ଏବଂ କମ୍ ସାର ଆବଶ୍ୟକ। ଏହା ଆଦିବାସୀ ଅଞ୍ଚଳ ପାଇଁ ବିଶେଷ ଭାବରେ ଲାଭଦାୟକ। ସେ ଜୈବିକ କୃଷି, ପାରମ୍ପରିକ ଫସଲ କିସମର ସଂରକ୍ଷଣ, ଜୈବ ବିବିଧତା ପୁନରୁଦ୍ଧାର ଏବଂ ଏହି କ୍ଷେତ୍ରଗୁଡ଼ିକ ଉପରେ କୃଷି ବୈଜ୍ଞାନିକଙ୍କ ଅଧିକ ଧ୍ୟାନ ଉପରେ ମଧ୍ୟ ଗୁରୁତ୍ୱାରୋପ କରିଥିଲେ।

ସେ କହିଥିଲେ, ଏଫପିଓ ଏବଂ ଶୀତଳ ଭଣ୍ଡାର ଭିତ୍ତିଭୂମିକୁ ସୁଦୃଢ଼ କରିବା ସହିତ କୃଷି-ଉଦ୍ୟୋଗ ବିକାଶ, କଫି ଚାଷ ଏବଂ ସ୍ଥାନୀୟ କୃଷି ଉତ୍ପାଦର ଉତ୍ତମ ବିପଣନ ଉପରେ ରାଜ୍ୟ ସରକାର ପ୍ରାଥମିକତା ଦେଉଛନ୍ତି । ପୂର୍ବାଞ୍ଚଳ ରାଜ୍ୟଗୁଡ଼ିକ ମଧ୍ୟରେ ସର୍ବୋତ୍ତମ ଅଭ୍ୟାସ, ନବସୃଜନ ଏବଂ ଅଭିଜ୍ଞତାର ଆଦାନପ୍ରଦାନ ସମ୍ମିଳନୀର ପ୍ରମୁଖ ପରିଣାମ ହେବ । ଏହା କୃଷି ଆତ୍ମନିର୍ଭରଶୀଳତା ଏବଂ କୃଷକ ସମୃଦ୍ଧି ପାଇଁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ଭାବରେ କାର୍ଯ୍ୟ କରିବ।

ଏହି ଅବସରରେ କେନ୍ଦ୍ର କୃଷି ଓ କୃଷକ କଲ୍ୟାଣ ରାଷ୍ଟ୍ରମନ୍ତ୍ରୀ ଶ୍ରୀ ଭଗୀରଥ ଚୌଧୁରୀ ଓ ଶ୍ରୀ ରାମନାଥ ଠାକୁର, ଓଡ଼ିଶାର ଉପମୁଖ୍ୟମନ୍ତ୍ରୀ ତଥା କୃଷି ମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂହ ଦେଓ, ବିହାର କୃଷି ମନ୍ତ୍ରୀ ଶ୍ରୀ ବିଜୟ କୁମାର ସିହ୍ନା, ଛତିଶଗଡ଼ କୃଷି ମନ୍ତ୍ରୀ ଶ୍ରୀ ରାମବିଚାର ନେତାମ, ପଶ୍ଚିମବଙ୍ଗ ସରକାରଙ୍କ ପ୍ରତିନିଧି-ମନ୍ତ୍ରୀ ଶ୍ରୀ ଅଶୋକ କିର୍ତ୍ତନିଆ, କେନ୍ଦ୍ର କୃଷି ସଚିବ ଶ୍ରୀ ଅତିଶ ଚନ୍ଦ୍ର, ଆଇସିଏଆର ମହାନିର୍ଦ୍ଦେଶକ ଡକ୍ଟର ମଙ୍ଗୀ ଲାଲ ଜାଟ, କେନ୍ଦ୍ର ସରକାର ଏବଂ ଅଂଶଗ୍ରହଣକାରୀ ରାଜ୍ୟର ବରିଷ୍ଠ ଅଧିକାରୀ, କୃଷି ବୈଜ୍ଞାନିକ, କୃଷକ ପ୍ରତିନିଧି, କେଭିକେ, ଏଫପିଓ, ଷ୍ଟାର୍ଟଅପ୍, ନାବାର୍ଡ ଏବଂ ବ୍ୟାଙ୍କିଂ ପ୍ରତିଷ୍ଠାନର ପ୍ରତିନିଧିମାନେ ମଧ୍ୟ ଉପସ୍ଥିତ ଥିଲେ।

*******

PS/Swadhin/Mahendra/Manoj